Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi

MARCH 7-13

Ngmami ɔ Mi Junehi

w11 7/15 13 ¶15

Anɛ O Kɛ Yehowa Blɔ Tsɔɔmi Nɛ E Je Suɔmi Mi Kɛ Ha a Ma Tsu Ní Lo?

Anɛ Israel bi ɔmɛ susu kaa adesa nɛ a maa hla kaa a matsɛ ɔ ma nyɛ maa ye bua mɛ nɛ a ma nyɛ maa ngɔ a hɛ kɛ fɔ e nɔ pe Yehowa lo? Ke jã a, lɛɛ a ngɛ yaka níhi a se nyɛɛe, nɛ lɔ ɔ ma ha a ya di ní kpahi nɛ a he be se nami nɛ a je Satan ngɔ nɛ ma nyɛ maa ye mɛ awi ɔ se. Adesahi nɛ a maa hla kaa a matsɛ ɔ ma ha nɛ e he be wae ha mɛ kaa a ma ya ja amagahi. Nihi nɛ a jaa amagahi ɔ susuɔ kaa mawuhi nɛ a kɛ tso kɛ tɛ pee ɔ ngɛ nitsɛnitsɛ nɛ a ma nyɛ maa ngɔ a hɛ kɛ fɔ a nɔ mohu pe Yehowa Mawu nɛ e bɔ níhi tsuo nɛ wa nɛ́ lɛ kɛ wa hɛ ngmɛ ɔ. Se kaa bɔ nɛ bɔfo Paulo de ɔ, amagahi “be he wami ko kulaa.” (1Ko 8:4) A be nyɛe maa hyɛ nɔ́, a be nyɛe maa nu nɔ́, a be nyɛe maa tu munyu nɛ a be nyɛe maa pee nɔ́ ko hulɔ. O ma nyɛ maa na mɛ nɛ o ma nyɛ maa pɛtɛ a he mohu lɛɛ, se ke o jaa eko ɔ, lɛɛ e tsɔɔ kaa o ngɛ yaka níhi nɛ se nami be a he nɛ a ma nyɛ maa kpata o hɛ mi ɔ se die.​—La 115:4-8.

MARCH 14-20

JUETLI NƐ NGƐ MAWU MUNYU Ɔ MI | 1 SAMUEL 14-15

“Tue Bumi Hi Pe Afɔle Sami”

w07 6/15 26 ¶4

Yehowa Bua Jɔɔ Tue Nɛ O Buɔ Lɛ ɔ He

Yehowa ji Bɔlɔ, enɛ ɔ he ɔ, e níhi ji he lo nya níhi nɛ wa ngɛ ɔ tsuo. Ke jã ji sane ɔ, lɛɛ anɛ nɔ́ ko ngɛ nɛ wa ma nyɛ ma ha lɛ lo? Ee, nɔ́ ko ngɛ nɛ he jua wa nɛ waa kɛ ma nyɛ ma ha lɛ. Mɛni ji jamɛ a nɔ́ ɔ? Wa maa na heto ɔ ngɛ kɔkɔ bɔmi nɛ nyɛɛ se nɛ ɔ mi, e de ke: “Ye bi, pee o he ní lelɔ, nɛ ma ná bua jɔmi, konɛ ma na nɔ́ kpakpa ko ma de nɔ nɛ ngɛ mi ahlua bɔe ɔ.” (Abɛ 27:11) Enɛ ɔ tsɔɔ kaa nɔ́ nɛ wa ma nyɛ ma ha Mawu ji kaa wa maa bu lɛ tue. E ngɛ mi kaa wa si fɔfɔɛ ngɛ slɔɔto nɛ wa je he slɔɔtohi mohu lɛɛ, se ke wa buɔ Yehowa tue ɔ, e ma ha nɛ munyu nɛ Satan Abosiami tu kaa adesa ko be nyɛe maa ye Mawu anɔkuale ke e kɛ kahi ngɛ kpee ɔ maa pee lakpa. E ji he blɔ ngua nɛ wa ná kaa wa maa pee jã!

Ngmami ɔ Mi Junehi

it-1 493

Mi Mi Sami

Ke nɔ nyɛmi ha nɛ wa je mi mi sami kpo be mi nɛ e kɛ Yehowa suɔmi nya ní kɔ we ɔ, e ma nyɛ ma ha nɛ waa sɛ haomi mi. Wa na enɛ ɔ heii ngɛ nɔ́ nɛ ba Matsɛ Saul nɔ ɔ mi. Yehowa de kɛ fɔ si kaa a ma kpata Amalek bi ɔmɛ a hɛ mi, ejakaa mɛ ji kekleekle nihi nɛ a ya tua Israel bi ɔmɛ benɛ a je Egipt kɛ ma a. Enɛ ɔ he ɔ, Yehowa fã Saul kaa e ko na mɛ mɔbɔ nɛ e mi mi ko sã lɛ ngɛ a he hulɔ. Se akɛnɛ e we bi ɔmɛ ngɛ e nɔ nyɛe he je ɔ, e kɛ blɔ tsɔɔmi nɛ Yehowa ha lɛ ɔ tsu we ní kɛ pi si. Enɛ ɔ he ɔ, Yehowa kua Saul kaa matsɛ. (1Sam 15:2-24) Ke nɔ ko ngɛ bu nɛ mi kuɔ kɛ ha blɔhi a nɔ nɛ Yehowa guɔ kɛ peeɔ níhi nɛ e ngɔ Yehowa anɔkuale nɛ e maa ye ɔ kɛ ye kekleekle blɔ he ngɛ e si himi mi ɔ, lɔ ɔ be hae nɛ e ya pee yayami kaa bɔ nɛ Saul pee ɔ nɛ́ Yehowa nɛ ba kua lɛ.

MARCH 21-27

Ngmami ɔ Mi Junehi

it-2 871-872

Saul

Benɛ Yehowa kua Saul nɛ e pɔ David nu kaa e ma ba ye Israel bi ɔmɛ a nɔ matsɛ se ɔ, Yehowa mumi ɔ je Saul nɔ. Kɛ je lɔ ɔ se ɔ, ‘mumi yayami ko nɛ je Yehowa ngɔ ɔ ba hao ɔ lɛ.’ Akɛnɛ Yehowa je e mumi ɔ ngɛ Saul nɔ he je ɔ, e ngmɛ blɔ nɛ mumi yayami ko ba hao lɛ. Enɛ ɔ ha nɛ Saul ná we tue mi jɔmi, e mi mi fuɔ mlamlaamla nɛ e susuɔ níhi a he ngɛ blɔ nɛ dɛ nɔ. Yehowa tue nɛ Saul bui ɔ tsɔɔ kaa níhi nɛ ngɛ e juɛmi kɛ e tsui mi ɔ hí sãasãa, enɛ ɔ he je nɛ Mawu mumi ɔ pui Saul he piɛ hu ɔ nɛ, nɛ mumi yayami ba hao ɔ lɛ ɔ nɛ. Akɛnɛ Yehowa je e mumi ɔ ngɛ Saul nɔ nɛ́ e ngmɛ blɔ nɛ “mumi yayami” ba hao lɛ he je ɔ, a ma nyɛ ma de ke ‘mumi yayami ɔ je Yehowa ngɔ,’ enɛ ɔ lɛ ha nɛ Saul sɔmɔli ɔmɛ de kaa ‘mumi yayami nɛ je Mawu ngɔ’ ɔ nɛ. Ngɛ nɔ́ nɛ Saul tsɔli ɔmɛ a kpɛti nɔ kake de ɔ nya a, Saul bi konɛ David nɛ ba hi saku fiae ha lɛ bɔ nɛ pee nɛ be fɛɛ be nɛ “mumi yayami” ɔ ma ba hao lɛ ɔ, e tsui he nɛ jɔ.​—1Sam 16:14-23; 17:15.

MARCH 28–APRIL 3

JUETLI NƐ NGƐ MAWU MUNYU Ɔ MI | 1 SAMUEL 18-19

“Yaa Nɔ Nɛ O Ba O He Si Ke O Ye Manye”

w04 4/1 15 ¶4

Yaa Nɔ Nɛ O Ngɔ O Hɛ Kɛ Fɔ Mawu Mumi ɔ Nɔ Ke O Si Fɔfɔɛ Tsake

E be kɛe nɛ jokuɛ nyumuyo nɛ ɔ nɛ hyɛɛ tohi a nɔ ɔ ma ba he biɛ wawɛɛ. A ngɔ lɛ kɛ ba matsɛ ɔ we ɔ konɛ e ba sɔmɔ matsɛ ɔ nɛ e fia saku ha lɛ. E gbe tatsɛ kpanaa nɛ ji Goliat nɛ́ e he ngɛ gbeye nɛ́ ta buli nɛ a ngɛ Israel nɛ a ngɛ níhi a si kpami po ngɛ gbeye yee kaa a kɛ lɛ maa hwu ta a. Enɛ ɔ he ɔ, a ngɔ lɛ kɛ da ta buli ɔmɛ a nya nɛ e kɛ Filisti bi ɔmɛ hwu ta nɛ e ye a nɔ kunimi. Ma a mi bi ɔmɛ ba ná suɔmi kɛ ha David, enɛ ɔ ha nɛ a po lahi kɛ wo e hɛ mi nyami. Matsɛ Saul ga woli ɔmɛ a kpɛti nɔ kake sɛ hlami nɛ e kale David nɛ ji niheyo ɔ kaa e ji nɔ ko nɛ e ‘le saku fiami saminya, jehanɛ ɔ se hu nyumu katsɛ kɛ ta hwulɔ ji lɛ, e nya mi tsɔ nɛ e he ngɛ fɛu.’​—1 Samuel 16:18; 17:23, 24, 45-51; 18:5-7.

Ngmami ɔ Mi Junehi

it-2 695-696

Gbalɔ

E ngɛ mi kaa Yehowa kɛ e mumi ɔ lɛ hla gbali mohu lɛɛ, se enɛ ɔ tsɔɔ we kaa be fɛɛ be ɔ, Yehowa mumi ɔ jeɔ sɛ gbi kpo kɛ tsɔɔ mɛ. Mohu ɔ, Mawu ‘mumi ɔ baa a nɔ’ ngɛ be pɔtɛɛ komɛ a mi nɛ e tsɔɔ mɛ nɔ́ nɛ e sa nɛ a de. (Eze 11:4, 5; Mika 3:8) Enɛ ɔ náa a nɔ he wami wawɛɛ nɛ e woɔ mɛ he wami nɛ a tuɔ munyu. (1Sam 10:10; Yer 20:9; Amos 3:8) Ke e ba jã a, pi níhi nɛ a ngɛ nyakpɛ pɛ nɛ a peeɔ, se mohu ɔ, bɔ nɛ a nuɔ he ha a hu ngɛ nyakpɛ, nɛ enɛ ɔ jeɔ kpo heii ngɛ a munyu tumi kɛ a ní peepee mi. Enɛ ɔ ma nyɛ maa pee yi tomi kake he je nɛ ni komɛ ‘pee a ní kaa gbali’ ɔ nɛ. (1Sam 10:6-11; 19:20-24; Yer 29:24-32; kɛ to Nít 2:4, 12-17; 6:15; 7:55 ɔ he.) A juɛmi nɛ a kɛ maa a ní tsumi ɔ nɔ kɛ kã nɛ́ a kɛ tsuɔ a ní tsumi ɔ ma nyɛ ma ha nɛ a ní peepee nɛ je ekpa nɛ ni kpahi po maa na mɛ kaa a yi ngɛ puɛe, jã nɛ asafoatsɛ ɔmɛ na gbalɔ ɔ nɛ ba pɔ Yehu nu ɔ nɛ. Se kɛ̃ ɔ, benɛ asafoatsɛ ɔmɛ na kaa nyumu ɔ nɛ baa ji gbalɔ ɔ, a kɛ hɛdɔ kplɛɛ e sɛ gbi ɔ nɔ. (2Ma 9:1-13; kɛ to Nít 26:24, 25 ɔ he) Benɛ Saul ngɛ David hlae nɛ e gbe lɛ nɛ Mawu mumi ɔ ha nɛ e ‘pee e ní kaa gbalɔ’ ɔ, e je e he tade ɔmɛ nɛ e “hɛɛ e he gu jamɛ a ligbi ɔ piani kɛ nyɔ mi tsuo,” enɛ ɔ ha nɛ David nyɛ nɛ e tu fo. (1Sam 19:18–20:1) Enɛ ɔ tsɔɔ we kaa gbali hɛɛ a he gu be fɛɛ be, ejakaa pi jã ji bɔ nɛ Baiblo tsɔɔ. Ngɛ si fɔfɔɛ kpahi enyɔ nɛ Baiblo ɔ tu he munyu ɔ mi ɔ, e tsɔɔ kaa gbali ɔmɛ pee jã ngɛ yi mi tomi ko he je, konɛ a kɛ ma a gbami munyu komɛ a nɔ mi. (Yes 20:2-4; Mika 1:8-11) Ke Yehowa ha nɛ Saul hɛɛ e hu gu konɛ e kɛ ha nɛ e na kaa e ji nɔmlɔ gu ko kɛkɛ jio, e kɛ tsɔɔ kaa e kua lɛ kaa matsɛ jio, aloo he blɔ kɛ he wami nɛ e ngɛ ɔ sui lɛ Yehowa nɔ́ ɔ jio, aloo ngɛ yi mi tomi kpa komɛ a he jio, ngmami ɔ tsɔɔ we.

APRIL 4-10

w08 2/15 8 ¶7

O Kɛ Yehowa Mlaa Amɛ Nɛ Tsu Ní

Mawu suɔ nɛ waa pee huɛmɛ nɛ a ma nyɛ maa ngɔ hɛ kɛ fɔ a nɔ. (Abɛ 17:17) Matsɛ Saul bi Yonatan kɛ David pee huɛ. Benɛ Yonatan nu kaa David gbe Goliat ɔ, “Yonatan kɛ David nu huɛ; nɛ Yonatan suɔ David kaa lɛ nitsɛ e he.” (1 Sam. 18:1, 3) Benɛ Saul ngɛ hlae nɛ e gbe David po ɔ, Yonatan bɔ David kɔkɔ kaa e tu fo. Benɛ David tu fo se ɔ, Yonatan kɛ lɛ ya kpe nɛ e kɛ lɛ so. E piɛ nguɛ nya nɛ Saul gbe Yonatan ngɛ David he munyu kpakpa nɛ e tu ɔ he je, se pee se ɔ, Yonatan kɛ David ya kpe ekohu nɛ a wo a huɛ bɔmi ɔ mi he wami. (1 Sam. 20:24-41) Ngɛ a nyagbe kpemi nɛ a kpe ɔ mi ɔ, Yonatan wo hemi kɛ yemi nɛ David ngɛ ngɛ ‘Mawu mi ɔ mi he wami.’​—1 Sam. 23:16-18.

w09 10/15 19 ¶11

Yaa Nɔ Nɛ O Po Huɛ Bɔmi Nɛ Ngɛ O Kɛ Ni Kpahi Nyɛ Kpɛti ɔ He Piɛ Ngɛ Je Nɛ Suɔmi Be Mi ɔ Mi

Moo ye anɔkuale. Solomon ngma ke: “Huɛ nitsɛ jeɔ suɔmi kpo be fɛɛ be, nɛ e ji nyɛmi nɛ a fɔ kɛ ha haomi behi.” (Abɛ 17:17, NW) Eko ɔ, be nɛ Solomon ngɛ munyu nɛ ɔmɛ ngmae ɔ, e kai huɛ bɔmi kpakpa nɛ ya nɔ ngɛ e papaa nɛ ji David kɛ Yonatan a kpɛti ɔ. (1 Sam. 18:1) Matsɛ Saul suɔ nɛ e bi Yonatan nɛ ba ye matsɛ ngɛ Israel. Se Yonatan le kaa Yehowa hla David kaa lɛ nɛ e ma ba ye matsɛ ngɛ Israel. Yonatan pee we e ní kaa Saul, e hɛ kɔɛ David nɔ. Jehanɛ ɔ se hu ɔ, David hɛ mi nyami nɛ a wo ɔ ha we nɛ e mi mi nɛ fu nɛ e ma we e nya ngɔ fɔ lakpa munyuhi nɛ Saul tu kɛ kɔɔ David he ɔ hu nɔ. (1 Sam. 20:24-34) Anɛ wa peeɔ wa ní kaa Yonatan lo? Ke wa huɛmɛ a nine su he blɔhi a nɔ ɔ, anɛ wa bua jɔɔ lo? Ke a kɛ nyagbahi ngɛ kpee ɔ, anɛ wa woɔ a bua nɛ wa yeɔ bua mɛ lo? Nɛ ke nɔ ko ye wa huɛ ko he sieku ɔ, anɛ waa kɛ oya yemi heɔ yeɔ lo? Aloo kaa bɔ nɛ Yonatan pee ɔ, wa yeɔ wa huɛ ɔ anɔkuale nɛ wa fãa e he lo?

Ngmami ɔ Mi Junehi

w05 3/15 24 ¶4

Otihi Nɛ Ngɛ Samuel Kekleekle Womi ɔ Mi

21:12, 13. Yehowa hyɛɛ blɔ kaa waa kɛ wa juɛmi kɛ wa nyɛmihi ma tsu nyagbahi nɛ waa kɛ kpeɔ ngɛ si himi mi ɔ a he ní. E ha wɔ e Munyu ɔ nɛ a je mumi mi kɛ ngma, nɛ haa nɛ wa hɛ kãa si, wa náa nile kɛ nyɛmi nɛ a kɛ susuɔ nɔ́ he ɔ. (Abɛ 1:4) Jehanɛ ɔ hu ɔ, wa ngɛ Kristofohi nyumuhi nɛ a hla mɛ kaa asafo mi nikɔtɔmahi nɛ a yeɔ bua wɔ.

APRIL 18-24

JUETLI NƐ NGƐ MAWU MUNYU Ɔ MI | 1 SAMUEL 23-24

“Moo To O Tsui Si Kɛ Mlɛ Yehowa”

w04 4/1 16 ¶8

Yaa Nɔ Nɛ O Ngɔ O Hɛ Kɛ Fɔ Mawu Mumi ɔ Nɔ Ke O Si Fɔfɔɛ Tsake

David sume kaa e maa ye Saul awi. Akɛnɛ e ngɛ hemi kɛ yemi nɛ e toɔ e tsui si he je ɔ, e ngmɛɛ sane ɔ he kɛ ha Yehowa. Benɛ matsɛ Saul je tɛ puɔ ɔ mi ɔ, David tsɛ lɛ nɛ e de lɛ ke: ‘Yehowa maa kojo i kɛ mo wa kpɛti, nɛ e maa wo mo hiɔ ngɛ nɔ́ nɛ o ngɛ mi pee nɛ ɔ he; imi lɛɛ ye nine be o he sae.’ (1 Samuel 24:12) E ngɛ mi kaa David le kaa nɔ́ nɛ Saul ngɛ pee ɔ dɛ mohu lɛɛ, se David pee we nɔ́ ko nɛ e kɛ ye lɛ nitsɛ e he lue nɛ e kɛ Saul tu we munyu basabasa hulɔ, jehanɛ se hu, e tu we e he munyu yaya kɛ tsɔɔ ni kpahi. Ngɛ si fɔfɔɛ kpa komɛ a mi ɔ, David kua kaa e ma tsu sanehi a he ní ngɛ lɛ nitsɛ e dɛ he, mohu ɔ, e ngɔ e hɛ kɛ fɔ Yehowa nɔ konɛ lɛ nitsɛ e tsu sanehi a he ní.​—1 Samuel 25:32-34; 26:10, 11.

w04 6/1 22-23

Anɛ Níhi Nɛ Yaa Nɔ Ngɛ O Si Himi Mi ɔ Lɛ Kudɔɔ O Ní Peepee Lo?

Nɔ́ etɛne nɛ wa kaseɔ ji kaa e sɛ nɛ waa pee níhi nɛ e kɛ Baiblo sisi tomi mlaahi kɔ we kɛ tsake si fɔfɔɛhi nɛ waa kɛ kpeɔ ɔ, mohu ɔ, e sa nɛ waa mlɛ Yehowa. Kaselɔ Yakobo ngma ke: “Nyɛ ha nɛ si fimi nɛ gbe e ní tsumi ɔ nya, konɛ nyɛɛ hi kɛ pi si, nɛ nyɛ he nɛ su ngɛ blɔ fɛɛ blɔ nɔ, nɛ nɔ́ ko nɔ́ ko nɛ ko hia nyɛ.” (Yakobo 1:4) Ke waa kɛ ka ko ngɛ kpee ɔ, e sɛ nɛ waa pee nɔ́ ko nɛ kɛ Baiblo sisi tomi mlaahi kɔ we kɛ po ka a se, mohu ɔ, e sa nɛ wa fĩ si, jã nɛ wa maa pee ɔ ma ha nɛ wa si fimi ɔ maa “gbe e ní tsumi ɔ nya.” Kɛkɛ ɔ, a maa ka wa hemi kɛ yemi ɔ nɛ a maa tsu he, nɛ e he wami nɛ ha nɛ wa nyɛ fĩ si ɔ maa je kpo heii. Jã nɛ Yosef kɛ David hu pee. A pee we nɔ́ ko nɛ ma ha nɛ Yehowa mi mi ma fu mɛ kɛ po nyagba nɛ a kɛ kpe ɔ se. Mohu ɔ, a bɔ a he mɔde ngɛ si fɔfɔɛ ɔ mi. A mlɛ Yehowa, nɛ e jɔɔ mɛ ngɛ jã nɛ a pee ɔ he. Yehowa gu a nɔ nɛ e kɛ kpɔ̃ e we bi nɛ e tsɔɔ mɛ blɔ.​—1 Mose 41:39-41; 45:5; 2 Samuel 5:4, 5.

Eko ɔ, wɔ hu waa kɛ si fɔfɔɛ komɛ maa kpe nɛ e maa pee wɔ kaa waa pee nɔ́ ko nɛ kɛ Baiblo sisi tomi mlaahi kɔ we kɛ tsu he ní. Kaa nɔ hyɛmi nɔ́ ɔ, anɛ o kɔni mi jɔ̃ akɛnɛ o nɛ́ nɔ ko nɛ sa nɛ o kɛ lɛ maa sɛ gba si himi mi ɔ lo? Ke jã a, lɛɛ mo kua níhi nɛ maa pee ka kɛ ha mo kaa o maa bu Yehowa mlaa nɛ ji kaa waa sɛ gba si himi mi “ngɛ Nyɔmtsɛ ɔ mi pɛ” ɔ tue. (1 Korinto Bi 7:39) Anɛ o kɛ nyagbahi ngɛ kpee ngɛ o gba si himi ɔ mi lo? Bɔɔ mɔde nɛ o kɛ o he piɛɛlɔ ɔ nɛ pee kake kɛ tsu nyagba amɛ a he ní, mohu pe nɛ o maa ngmɛ blɔ nɛ je ɔ mumi ɔ nɛ woɔ gba jemi kɛ gba mi pomi mi he wami ɔ nɛ ná o nɔ he wami. (Malaki 2:16; Efeso Bi 5:21-33) Anɛ sika he nyagba nɛ o kɛ ngɛ kpee ɔ ha nɛ e he wa ha mo kaa o maa hyɛ o weku ɔ nɔ lo? Yehowa nɛ o maa mlɛ ɔ tsɔɔ kaa o be níhi nɛ teɔ si kɛ woɔ ma a mlaa a pee konɛ o kɛ ná sika. (La 37:25; Hebri Bi 13:18) Ngɛ anɔkuale mi ɔ, e sa nɛ wɔ tsuo waa bɔ mɔde nɛ wa tsu si fɔfɔɛhi nɛ waa kɛ ngɛ kpee ɔmɛ a he ní, nɛ waa pee níhi nɛ ma ha nɛ Yehowa maa na nɔ́ ko nɛ e maa da nɔ kɛ jɔɔ wɔ. Be mi nɛ wa yaa nɔ nɛ wa peeɔ jã a, nyɛ ha nɛ waa fia wa pɛɛ si kaa wa maa mlɛ Yehowa nɛ e tsu nyagba a he ní.​—Mika 7:7.

APRIL 25–MAY 1

JUETLI NƐ NGƐ MAWU MUNYU Ɔ MI | 1 SAMUEL 25-26

“Anɛ O He Numi Lɛ Kudɔɔ O Ní Peepee Lo?”

ia 78 ¶10-12

E Kɛ Nile Tsu Ní

Kɛ ta buli nɛ a tsuɔ ní wawɛɛ nɛ ɔmɛ kɛ Nabal to nɔ hyɛli ɔmɛ ye ha kɛɛ? Jinɛ ta buli nɛ ɔmɛ ko nyɛ nuu to nɛ ɔmɛ eko fɛɛ eko nɛ a suɔ nɛ́ a gbe. Se a pee we nɔ́ ko kaa jã, mohu ɔ, a po Nabal jijɔ ɔmɛ kɛ e tsɔli ɔmɛ a he piɛ. (Kane 1 Samuel 25:15, 16.) Jijɔhi kɛ a nɔ hyɛli kɛ nyagbahi fuu kpeɔ. Ngɛ jamɛ a be ɔ mi ɔ, lohwe awi yeli pɔ he wawɛɛ, nɛ akɛnɛ Israel woyi je huzu ɔ kɛ ma kpahi a he kɛ we he je ɔ, juli kɛ awi yeli pɔɔ mɛ tuami.

E he ma nyɛ maa wa kaa ta buli nɛ ɔmɛ tsuo maa na niye ní nɛ a maa ye ngɛ nga a nɔ. Enɛ ɔ he ɔ, David tsɔ e tsɔli nyɔngma kɛ ya Nabal ngɔ kaa e ye bua mɛ. Be nɛ David kɛ tsɔ e tsɔli ɔmɛ ɔ sa wawɛɛ. E ji be nɛ a kɛ sãa jijɔhi a he bwɔmi. Ke e su jamɛ a be ɔ, a nyaa nɛ a keɔ nihi ní faa. Jehanɛ hu ɔ, munyuhi nɛ David kɛ tsu ní ɔ sa, nɛ e je bumi mi kɛ tu munyu. Eko ɔ, akɛnɛ Nabal wa pe David he je ɔ, e ngɔ munyu nɛ ji “o binyumu David” kɛ tsu ní kɛ tsɔɔ kaa e ngɛ bu nɛ mi kuɔ kɛ ha Nabal. Se kɛ Nabal pee e ní ha kɛɛ?​—1 Sam. 25:5-8.

Niheyo ɔ nɛ e ba bɔ Abigail amaniɛ ɔ tsɔɔ kaa Nabal mi mi fu nɛ e “kuɛ wo mɛ.” Nabal kpɛletsɛ ɔ tsɔɔ kaa e kɛ e we abolo, nyu kɛ lohwehi nɛ a he jua wa a be David kɛ e tsɔli ɔmɛ hae. E ye David he fɛu nɛ e tsɔɔ kaa e he be se nami nɛ e ngɔ lɛ kɛ to nyɔguɛ nɛ tu fo kɛ je e nyɔmtsɛ he ɔ he. Eko ɔ, susumi nɛ Nabal ná ngɛ David he ɔ ngɛ kaa susumi nɛ Saul hu ná ngɛ David he ɔ. Se pi jã nɛ Yehowa naa David. Mawu suɔ David nɛ e nɛ́ lɛ kaa e ji nyɔguɛ nɛ e tsɔ atua, mohu ɔ, e na lɛ kaa nɔ ko nɛ ma ba ye matsɛ ngɛ Israel hwɔɔ se.​—1 Sam. 25:10, 11, 14.

ia 80 ¶18

E Kɛ Nile Tsu Ní

Abigail ngɔ tɔmi ɔ kɛ fɔ e nɔ nɛ e kpa David pɛɛ kaa e ngɔ kɛ ke lɛ. Abigail tsɔɔ kaa e huno ɔ biɛ ɔ sisi ji kuasia nɛ kuasiahi a sane pɛ e yeɔ. Eko ɔ, e de jã konɛ e kɛ tsɔɔ kaa e sɛ kulaa nɛ David nɛ nihi buu lɛ ɔ nɛ ya gbla nyumu kaa kikɛ ɔ tue. E ngɛ hɛ kɛ nɔ fɔmi ngɛ David mi kaa nɔ ko nɛ Yehowa hla lɛ ejakaa e le kaa ‘Yehowa tahi lɛ e ngɛ hwue ɔ nɛ.’ Jehanɛ ɔ se hu ɔ, e tsɔɔ kaa e le si nɛ Yehowa wo kaa David ma ba ye matsɛ ɔ, ejakaa e de ke: ‘Yehowa maa wo mo ganɔ ngɛ Israel.’ Nɛ e wo David he wami hu kaa e ko pee nɔ́ ko nɛ ma ha nɛ e ye muɔ he fɔ aloo nɛ ma ha nɛ e ma ‘pia e he’ pee se nɛ́ e he nile ba bu lɛ fɔ. (Kane 1 Samuel 25:24-31.) Munyu nɛ taa nɔ tsui he ji nɛ ɔ nɛ!

Ngmami ɔ Mi Junehi

ia 80 ¶16

E Kɛ Nile Tsu Ní

Anɛ enɛ ɔ tsɔɔ kaa Abigail ngɛ si tee kɛ wo he blɔ nɛ e huno ɔ ngɛ kaa wekuyi ɔ lo? Dɛbi. Moo kadi kaa Nabal pee nɔ nɛ Yehowa pɔ lɛ nu ɔ yi wu tso ní, enɛ ɔ ko nyɛ ngɔ nyumuhi nɛ a ngɛ Nabal we ɔ mi nɛ a pee we nɔ́ ko ɔ a wami kɛ ko wo oslaa mi. Kaa Abigail pee we sane ɔ he nɔ́ ko ɔ, anɛ eko ɔ, lɔ ɔ ko ha we nɛ e ye muɔ he fɔ kaa e huno ɔ lo? Ngɛ si fɔfɔɛ nɛ ɔ mi ɔ, e sa nɛ e ngɔ e he si nɛ e maa ba kɛ ha Mawu ɔ kɛ ye kekleekle blɔ he mohu pe e huno ɔ.