NÍ KASEMI 05
Baiblo ɔ Mi Munyu Ɔmɛ Ji Sɛ Gbi Nɛ Je Mawu Ngɔ
Baiblo ɔ ji nike ní nɛ je Yehowa ngɔ. Womi kakaaka 66 lɛ ngɛ Baiblo ɔ mi. Se eko ɔ, o ma bi ke: ‘Jije Baiblo ɔ je kɛ ba? Mɛnɔ lɛ ha nɛ a ngma Baiblo ɔ?’ Loko wa ma ha sane bimi nɛ ɔmɛ a heto ɔ, ha nɛ wa susu bɔ nɛ wa plɛ kɛ ná Baiblo ɔ he.
1. Ke nimli lɛ a ngma Baiblo ɔ, lɛɛ mɛni he je nɛ wa deɔ ke e ji Mawu Munyu ɔ?
Nihi maa pee 40 nɛ a ngma Baiblo ɔ. A ngɔ maa pee jeha 1,600 kɛ ngma Baiblo ɔ. A je e ngmami sisi kɛ je jeha 1513 loko a fɔ Kristo, nɛ a gbe nya ngɛ jeha 98 ɔ mi ngɛ Kristo fɔmi se. A ti ni komɛ ji ngmɔ huli, wo hɛli, to hyɛli, gbali, kojoli, kɛ matsɛmɛ. E ngɛ mi kaa nihi slɔɔtohi nɛ a ngma Baiblo ɔ mohu lɛɛ, se níhi nɛ a ngma a kɛ a he kpa gbi. Mɛni ha nɛ e ba lɛ jã a? Ejakaa Mawu ji nɔ nɛ ha nɛ a ngma Baiblo ɔ nɛ. (Kane 1 Tɛsalonika Bi 2:13.) Nihi nɛ a ngma Baiblo ɔ ngmɛ mɛ nitsɛmɛ a susumihi. Mohu ɔ, ‘mumi klɔuklɔu lɛ kudɔ mɛ nɛ a tu munyu nɛ je Mawu ngɔ.’a (2 Petro 1:21) Mawu ngɔ e mumi klɔuklɔu ɔ kɛ ye bua nyumu nɛ ɔmɛ nɛ a ngma e susumihi.—2 Timoteo 3:16.
2. Mɛnɔmɛ nɛ a ma nyɛ ma ná Baiblo ɔ he se?
Mawu de ke ‘je ma fɛɛ je ma kɛ wɛtso kɛ gbi kɛ nihi’ tsuo nɛ a ngɛ je ɔ mi ɔ ma ná sane kpakpa nɛ ngɛ Baiblo ɔ mi ɔ he se. (Kane Kpo Jemi 14:6.) Mwɔnɛ ɔ, a tsɔɔ Baiblo ɔ sisi kɛ ya gbihi fuu a mi pe womi kpahi tsuo. Jehanɛ se hu ɔ, nihi babauu nɛ a ngɛ je kɛ wɛ ɔ ngɛ Baiblo ɔ eko ngɛ mɛ nitsɛmɛ a je gbi mi.
3. Mɛni blɔ nɔ Yehowa gu kɛ baa Baiblo ɔ yi?
A ngma Baiblo ɔ mi munyu ɔmɛ ngɛ níhi nɛ ma nyɛ ma puɛ nɔ. Se nihi nɛ a bua jɔ Baiblo ɔ he ɔ hyɛ nɔ́ nɛ a ngma momo ɔ nɔ nɛ a kpale ngma e mi munyu ɔmɛ kɛ wo womi kpahi a mi. E ngɛ mi kaa nihi nɛ a hɛɛ blɔ nya a bɔ mɔde kaa a ma kpata Baiblo ɔ hɛ mi, nɛ jami hɛ mi nyɛɛli hu sume kaa nihi nɛ a kane Baiblo ɔ mohu lɛɛ, se ni komɛ ngɔ a wami kɛ wo oslaa mi kɛ po Baiblo ɔ he piɛ. Yehowa ngmɛ́ blɔ nɛ nɔ́ ko aloo nɔ ko nɛ tsi e sɛ gbi ɔ nɛ e suɔ kaa e kɛ ma ha wɔ ɔ nya. Baiblo ɔ de ke: ‘Wa Mawu ɔ munyu ɔ ngɛ kɛ yaa neneene.’—Yesaya 40:8.
MOO KASE BABAUU
Moo kase bɔ nɛ Mawu ngɔ e mumi klɔuklɔu ɔ kɛ ye bua nihi nɛ a ngma Baiblo ɔ, bɔ nɛ e baa yi ha, kɛ bɔ nɛ e ha nɛ nihi babauu a nine su nɔ ha a he ní fuu.
4. Mawu Munyu ɔ nitsɛ tsɔɔ nɔ nɛ ha nɛ a ngma Baiblo ɔ
Mo je VIDEO ɔ. Lɔ ɔ se ɔ, nyɛɛ kane 2 Timoteo 3:16, nɛ nyɛ susu sane bimihi nɛ nyɛɛ se nɛ ɔmɛ a he.
Ke nimli lɛ a ngma Baiblo ɔ, mɛni he je nɛ a deɔ ke e ji Mawu Munyu ɔ?
Anɛ o susu kaa nile ngɛ mi kaa wa ma he ye kaa Mawu lɛ e de nihi e susumihi nɛ a ngma lo?
Nɔ ko ma nyɛ ma de nɔ kpa kaa e ngma sɛ womi ha lɛ, se sɛ gbi nɛ ngɛ sɛ womi ɔ mi ɔ, pi nɔ nɛ e ngma a nɔ́, mohu ɔ, nɔ nɛ e de lɛ kaa e ngma a nɔ́. Jã kɛ̃ nɛ adesahi lɛ a ngma Baiblo ɔ, se sɛ gbi nɛ ngɛ mi ɔ je Mawu ngɔ
5. Ni komɛ ka kaa a ma kpata Baiblo ɔ hɛ mi, se a yi manye
Akɛnɛ Baiblo ɔ je Mawu ngɔ he je ɔ, e baa yi kɛ ba si mwɔnɛ ɔ. Kɛ je blema tɔɔ nɛ ni komɛ nɛ a hɛɛ blɔ nya a bɔ mɔde kaa a ma kpata Baiblo ɔ hɛ mi. Jami hɛ mi nyɛɛli ɔmɛ hu sume nɛ nihi nɛ a kane Baiblo ɔ. Se ngɛ si temi kɛ womihi, kɛ mɔde nɛ a bɔ kaa a maa gbe nihi ngɛ Baiblo ɔ he ɔ tsuo se ɔ, ni komɛ ngɔ a wami kɛ wo oslaa mi kɛ po Baiblo ɔ he piɛ. Ke o suɔ nɛ o le a kpɛti nɔ kake he ní ɔ, mo je VIDEO ɔ, lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
Amlɔ nɛ ɔ nɛ o ba le mɔde nɛ nihi bɔ, kɛ a wami nɛ́ a kɛ wo oslaa mi kɛ po Baiblo ɔ he piɛ ɔ, anɛ lɔ ɔ wui mo he wami nɛ́ o kane Baiblo ɔ lo? Mɛni he je nɛ o de jã a?
Nyɛɛ kane La 119:97, nɛ nyɛ susu sane bimi nɛ ɔ he:
Mɛni lɛ wo nihi babauu he wami nɛ a kɛ a wami wo oslaa mi konɛ a nyɛ nɛ a tsɔɔ Baiblo ɔ sisi nɛ a gba kɛ ha nihi ɔ?
6. Womi nɛ nɔ fɛɛ nɔ ma ná he se
Baiblo ɔ ji womi nɛ́ a tsɔɔ sisi nɛ́ a gba pe womi kpahi tsuo nɛ́ ngɛ je ɔ mi. Nyɛɛ kane Ní Tsumi 10:34, 35, nɛ́ nyɛ susu sane bimihi nɛ nyɛɛ se nɛ ɔmɛ a he:
Mɛni he je nɛ Mawu suɔ kaa a tsɔɔ e Munyu ɔ sisi konɛ nihi fuu nɛ́ ngɛ je ɔ mi ɔ a nine nɛ́ su nɔ ɔ?
Mɛni lɛ o bua jɔ he ngɛ Baiblo ɔ he?
Lɔ ɔ ji kaa
nihi tsuo
nɛ́ a ngɛ je ɔ mi ɔ
ma nyɛ ma ná Baiblo ɔ eko ngɛ gbi nɛ a nu sisi ɔ mi
A pee Baiblo mluku ɔ aloo e fã ko
ngɛ gbihi nɛ hiɛ pe
3,000
sɔuu mi
5,000,000,000
Akɔtaa bumi tsɔɔ kaa a pee Baiblo ɔ ayɔ akpe enuɔ sɔuu.
Womi kpa ko be nɛ a pee nɛ e hiɛmi su yibɔ nɛ ɔ
NI KOMƐ DEƆ KE: “Baiblo ɔ ji blema womi ko nɛ nihi ngma.”
Kɛ o susu kɛɛ?
Mɛni odase lɛ tsɔɔ kaa Baiblo ɔ ji Mawu Munyu?
NYA MWƆMI
Baiblo ɔ ji Mawu Munyu, nɛ e ha nɛ a baa yi kɛ ba si mwɔnɛ ɔ konɛ adesahi tsuo a nine nɛ su nɔ.
Mi Nylɔmi
Ke a de ke Mawu kɛ mumi klɔuklɔu ɔ ye bua nihi nɛ a ngma Baiblo ɔ, mɛni lɔ ɔ tsɔɔ?
Mɛni nɛ o bua jɔ he ngɛ bɔ nɛ a baa Baiblo ɔ yi, kɛ bɔ nɛ a tsɔɔ sisi nɛ a gba ha nihi ɔ he?
Amlɔ nɛ ɔ nɛ́ o ba le mɔde nɛ́ Mawu bɔ, nɛ́ e ha nɛ a baa Baiblo ɔ yi, konɛ e nyɛ nɛ e kɛ mo nɛ sɛɛ ní ɔ, mɛni lɔ ɔ tsɔɔ mo ngɛ Mawu he?
NÍ KPAHI NƐ MAA YE BUA MO
Moo kane Baiblo ɔ yi nɔ sane he ní—kɛ je be nɛ a ngma, kɛ ba si mwɔnɛ ɔ.
“Blɔ Nɔ Nɛ A Gu Kɛ Baa Baiblo ɔ Yi Nɛ Wa Nine Su Nɔ Mwɔnɛ ɔ” (O Hɛ Nɛ Tsɛ̃!, November 2007)
Moo kase nyagbahi etɛ komɛ nɛ Baiblo ɔ gblee mi ɔ he ní.
“Baiblo ɔ—E Nyɛ Gblee Si Himihi Nɛ A Mi Wa Mi” (Hwɔɔmi Mɔ ɔ mi munyu)
Moo hyɛ bɔ nɛ nihi ngɔ a wami kɛ wo oslaa mi ha kɛ tsɔɔ Baiblo ɔ sisi.
A hyɛ Baiblo ɔ nɔ nɛ a ngma e mi munyu ɔmɛ kɛ fɔ si, nɛ a tsɔɔ sisi kɛ ya gbi kpahi a mi si abɔ. Kɛ o ma plɛ kɛ ná nɔ mi mami kaa e mi munyu ɔmɛ tsakee we ha kɛɛ?
“Anɛ Sɛ Gbi Nɛ Ngɛ Baiblo ɔ Mi ɔ Tsake Lo?” (Munyu nɛ ɔ ngɛ Intanɛti ɔ nɔ)
a Wa maa kase ngɛ Ní Kasemi 07 ɔ mi kaa mumi klɔuklɔu ɔ ji Mawu he wami nɛ e kɛ tsuɔ ní.