Benɛ Adam kɛ Hawa je Eden abɔɔ ɔ mi se ɔ, a fɔ bimɛ fuu. Nɔ nɛ a fɔ kekle ji Kain. Lɔ ɔ se ɔ, a fɔ Habɛl. Kain ba pee ngmɔ hulɔ, nɛ Habɛl hu ba pee to hyɛlɔ.

Ligbi ko ɔ, Kain kɛ Habɛl sã afɔle kɛ ha Yehowa. O le nɔ́ nɛ ji afɔle lo? Afɔle ji nike ní ko nɛ ngɛ slɔɔto kulaa. Yehowa bua jɔ nike ní nɛ Habɛl kɛ ha lɛ ɔ he, se e bua jɔɛ Kain nɔ́ ɔ he. Enɛ ɔ ha nɛ Kain mi mi fu wawɛɛ. Yehowa bɔ Kain kɔkɔ kaa abofu nɛ e ná a ma nyɛ ma ha nɛ e pee yayami. Se Kain bui Yehowa tue.

Mohu ɔ, Kain de Habɛl ke: ‘Ha nɛ waa ho nga a nɔ ya.’ Benɛ mɛ ni enyɔ ɔmɛ pɛ a ngɛ nga a nɔ ɔ, Kain fia e nyɛmi ɔ nɔ́, nɛ e gbe lɛ. Mɛni Yehowa pee ngɛ sane ɔ he? Yehowa fiee Kain kɛ je e weku li a kpɛti kɛ ho he ko tsitsaa ya. Yehowa ha we nɛ e kpale kɛ ba e weku li ɔmɛ a ngɔ hu.

Mɛni wa ma nyɛ maa kase ngɛ sane nɛ ɔ mi? Ke nɔ́ ko ngɛ nɔ yae nɛ wa bua jɔɛ he ɔ, eko ɔ, lɔ ɔ ma ha nɛ wa mi mi ma fu. Se ke wa na kaa wa mi mi ngɛ hlae ma fu ɔ, e sa nɛ waa ye wa he nɔ. Nɛ ke ni kpahi hu na kaa wa mi mi fu, nɛ a de wɔ ke waa ngmɛɛ sane ɔ he ɔ, e sa nɛ waa ngmɛɛ he. Ke pi jã a, abofu ɔ mi maa wa, nɛ wa maa pee nɔ́ yaya.

Habɛl suɔ Yehowa, nɛ e pee nɔ́ nɛ da. Enɛ ɔ he ɔ, Yehowa hɛ be e nɔ jee gblegbleegble. Ke Mawu pee zugba a paradeiso ɔ, e ma tle Habɛl si kɛ ba wami mi ekohu.

Bɔɔbɔɔbɔɔ ɔ, nimli a he ba hiɛ ngɛ zugba a nɔ. A kpɛti nihi fuu peeɔ ní yayahi. Bɔfohi nɛ a ngɛ hiɔwe ɔ po a kpɛti ni komɛ pee ní yayahi. A je hiɔwe nɛ a ba hi zugba a nɔ. Anɛ o le nɔ́ he je nɛ a pee jã lo? A pee jã konɛ a nyɛ nɛ a tsake a he kɛ pee nimli, nɛ a ngɔ yihi.

Bɔfo ɔmɛ kɛ yi ɔmɛ fɔ binyumuhi. A bimɛ ɔmɛ ba pee nimli nɛ a ngɛ he wami. A he ngɛ gbeye, nɛ a yeɔ nihi awi. Yehowa bua jɔɛ níhi nɛ ngɛ nɔ yae ɔ he. Enɛ ɔ he ɔ, e pee e juɛmi kaa e maa ngɔ nyu kpekpemi kɛ kpata nimli yayami ɔmɛ a hɛ mi.

Se nyumu ko ngɛ nɛ lɛɛ e pee we ní yayahi. E suɔ Yehowa. A tsɛɛ lɛ ke Noa. E ngɛ yo, kɛ bimɛ nyumuhi etɛ. A tsɛɛ e bimɛ ɔmɛ ke, Shɛm, Ham, kɛ Yafɛt. E bimɛ ɔmɛ hu ngɛ yihi. Yehowa de Noa ke e kpɛ daka agbo nɛ ma nyɛ maa da nyu hɛ mi, konɛ ke Nyu Kpekpemi ɔ ba a, e kɛ e weku ɔ a hɛ mi nɛ ko kpata. Yehowa de Noa ke e ngɔ lohwehi fuu kɛ wo daka a mi, konɛ mɛ hu a hɛ mi nɛ ko kpata.

Noa bɔni daka a kpɛmi nɔuu. Noa kɛ e weku ɔ ngɔ maa pee jeha 50 kɛ kpɛ daka a. A kpɛ daka a kaa bɔ nɛ Yehowa ngɛ hlae ɔ pɛpɛɛpɛ. Jamɛ a be ɔ mi ɔ, Noa bɔ ni ɔmɛ kɔkɔ kaa Nyu Kpekpemi ko maa ba. Se a ti nɔ ko bui lɛ tue.

Nyagbe kulaa a, be nɛ e sa kaa a sɛ daka a mi ɔ ba su. Ha nɛ waa hyɛ nɔ́ nɛ ba.