Ma ko hi si blema nɛ e kɛ Babɛl he kɛ we. A tsɛɛ jamɛ a ma a ke Ur. Nihi nɛ a hi lejɛ ɔ ja we Yehowa, a jaa mawu kpahi. Se nyumu ko ngɛ Ur ma a mi nɛ lɛɛ e jaa Yehowa. E biɛ ji Abraham.

Yehowa de Abraham ke: ‘Jee o ma a mi, kɛ o weku li a ngɔ kɛ ya zugba nɛ ma tsɔɔ mo ɔ nɔ.’ Mawu wo lɛ si ke: ‘O ma ba pee ma agbo, nɛ ma pee ní kpakpahi ha nihi babauu ngɛ zugba a nɔ ngɛ o he je.’

Abraham li he nɛ Yehowa ke e ya a lɛɛ, se e ngɔ e hɛ kɛ fɔ Yehowa nɔ, nɛ e bu Yehowa tue. Abraham kɛ e yo Sara, kɛ e nyɛminyumu bi Lɔt, kɛ e papaa Tera ngɔ níhi nɛ maa hia mɛ ɔ, nɛ a je blɔ hiami ɔ sisi.

Bɔɔbɔɔbɔɔ ɔ, Abraham kɛ e weku ɔ ya su he nɛ Yehowa suɔ kaa a ya a. A tsɛɛ lejɛ ɔ ke Kaanan. Jamɛ a be ɔ mi ɔ, Abraham ye jeha 75. Mawu kɛ Abraham tu munyu ngɛ lejɛ ɔ, nɛ e wo lɛ si ke: ‘Zugba a nɛ ma ngɔ kɛ ha o bimɛ ji nɛ ɔ nɛ.’ Se Abraham kɛ Sara bwɔ, nɛ a be bi hulɔ. Lɔ ɔ kɛ Yehowa si womi ɔ ma plɛ kɛ ba mi ha kɛɛ??

Abraham yo ji Sara, nɛ a hi Ur jehahi fuu. Nɔ́ ko nɔ́ ko hia we mɛ ngɛ Ur, se a je ma a mi, nɛ a ya hi bo tsu mi. Se e hɛwi Sara kaa a je Ur ma a mi, ejakaa e ngɔ e hɛ kɛ fɔ Yehowa nɔ.

Sara suɔ kaa e ma ná bi, enɛ ɔ he ɔ, e de Abraham ke: ‘Ke ye mawayo Hagar fɔ ɔ, ma nyɛ ma ngɔ jokuɛ ɔ kaa ye bi.’ Pee se ɔ, Hagar ba fɔ binyumu. A wo lɛ biɛ ke Ishmɛl.

Jeha komɛ a se benɛ Abraham ye jeha 99, nɛ Sara hu ye jeha 89 ɔ, nibwɔ etɛ komɛ ba slaa mɛ. Abraham kɛ mɛ ya hi tso ko sisi nɛ a ye ní. Anɛ o le nihi nɛ nibwɔ ɔmɛ ji lo? A ji Mawu bɔfohi! A de Abraham ke: ‘Jeha be nɛ ɔ mi ɔ, o kɛ o yo ɔ ma fɔ binyumu.’ Jamɛ a be ɔ mi ɔ, Sara ngɛ bo tsu ɔ mi nɛ e ngɛ mɛ tue bue. E muɔ, nɛ e bi e he ke: ‘Imi nɛ i bwɔ kikɛ ɔ, anɛ ma nyɛ ma fɔ lo?’

E nɔ jeha a, Sara fɔ binyumu kaa bɔ nɛ Yehowa bɔfo ɔ wo si ɔ. Abraham wo jokuɛ ɔ biɛ ke Isak. Biɛ Isak ɔ sisi ji “Muɔ.”

Benɛ Isak ye maa pee jeha enuɔ ɔ, Sara to he hɛ kaa Ishmɛl yeɔ Isak he fɛu. Sara suɔ kaa e maa bu Isak he, enɛ ɔ he ɔ, e de Abraham ke e fiee Hagar kɛ Ishmɛl kɛ je we ɔ mi. Jinɛ Abraham sume kaa e maa fiee mɛ. Se Yehowa de Abraham ke: ‘Moo bu Sara tue. Ma hyɛ Ishmɛl nɔ. Se Isak lɛɛ, e nɔ lɛ ye si womi ɔmɛ maa gu kɛ ba mi.’