Lɔt hi e tsɛwayo Abraham ngɔ ngɛ Kaanan zugba a nɔ. Abraham kɛ Lɔt ba ná lohwehi fuu ngɛ lejɛ ɔ. Enɛ ɔ he ɔ, he nɛ a ngɛ ɔ klee we ha mɛ. Abraham de Lɔt ke: ‘Wɔ tsuo wa be nyɛe maa hi he kake hu. I kpa mo pɛɛ, moo ngɔ zugba a he nɛ o suɔ, konɛ imi hu ma ngɔ he kpa.’ Enɛ ɔ tsɔɔ kaa Abraham fo we lɛ nɔ kake too e nɔ́ mi. Aloo kɛ o susu kɛɛ?

Lɔt na zugba a he ko nɛ ngɛ fɛu ngɛ ma ko nɛ a tsɛɛ ke Sodom ɔ kasa nya. Nyu kɛ nga mumu ngɛ lejɛ ɔ. Enɛ ɔ he ɔ, e kɛ e weku ɔ ya hi lejɛ ɔ.

Nihi nɛ a ngɛ Sodom ɔ peeɔ ní yayahi. Ma ko hu ngɛ Sodom kasa nya nɛ a tsɛɛ ke Gomora. Nihi nɛ a ngɛ lejɛ ɔ hu peeɔ ní yayahi. Níhi nɛ a peeɔ ɔ hí kulaa, enɛ ɔ he ɔ, Yehowa pee e juɛmi kaa e ma kpata a hɛ mi. Se Mawu suɔ kaa e ma he Lɔt kɛ e weku ɔ a yi wami. Enɛ ɔ he ɔ, e tsɔ bɔfohi enyɔ konɛ a ya bɔ mɛ kɔkɔ. Bɔfo ɔmɛ de Lɔt kɛ e weku ɔ ke: ‘Nyɛɛ je ma nɛ ɔ mi esɔ! Ejakaa Yehowa ma ba kpata ma nɛ ɔ hɛ mi.’

Se Lɔt ngɛ bɔfo ɔmɛ se kpɛe. E lilaa si hluu. Enɛ ɔ he ɔ, bɔfo ɔmɛ pɛtɛ Lɔt kɛ e yo ɔ, kɛ e biyi enyɔ ɔmɛ a nine si, nɛ a kɛ mɛ je ma a mi amlɔ nɔuu. A de mɛ ke: ‘Nyɛɛ tu fo esɔesɔ nɛ nyɛ kɛ he nyɛ yi wami! Nyɛ ko hyɛ nyɛ se. Ke nyɛ hyɛ nyɛ se ɔ, nyɛ ma gbo!’

Benɛ a ya su ma ko nɛ a tsɛɛ ke Zoa a mi ɔ, Yehowa ha nɛ la nɛ ngɛ tsoe gegeege je hiɔwe ba sã Sodom kɛ Gomora ma a. A kpata ma enyɔ nɛ ɔmɛ a hɛ mi kulaa. Lɔt yo ɔ plɛ pee ngo kpɔ, ejakaa e gbo Yehowa tue, nɛ e hyɛ e se. Se akɛnɛ Lɔt kɛ e biyi ɔmɛ bu Yehowa tue he je ɔ, a yi ná wami. E maa dɔ Lɔt wawɛɛ kaa e yo ɔ gbo Yehowa tue, nɛ e maa dɔ e biyi ɔmɛ hu kaa a yayo pee jã. Se a bua jɔ kaa a bu nɔ́ nɛ Yehowa de mɛ ɔ tue.

Abraham tsɔɔ e bi Isak kaa e he hia nɛ e suɔ Yehowa, konɛ e ná hemi kɛ yemi hu kaa Yehowa si womi ɔmɛ tsuo maa ba mi. Se benɛ Isak ye jeha 25 ɔ, Yehowa de Abraham ke e pee nɔ́ ko. Nɔ́ nɛ Yehowa de lɛ ke e pee ɔ he wa wawɛɛ. Mɛni Yehowa de lɛ ke e pee?

Mawu de Abraham ke: ‘I kpa mo pɛɛ, moo ngɔ o bi kake too ɔ kɛ ya sã afɔle ha mi ngɛ yoku ko nɔ ngɛ Moria zugba a nɔ.’ Abraham li nɔ́ he je nɛ Yehowa de lɛ ke e pee jã. Se kɛ̃ ɔ, e bu Yehowa tue.

E nɔ jena mɔtu mla a, Abraham kɛ e bi Isak, kɛ e tsɔli enyɔ je kɛ ho Moria ya. Ligbi etɛ se ɔ, a na yoku ɔ ngɛ tsitsaa. Abraham de e tsɔli ɔmɛ ke a mlɛ konɛ e kɛ Isak nɛ a ya sã afɔle ngɛ yoku ɔ nɔ nɛ a ba. Abraham ha nɛ Isak tloo lɛ́, nɛ lɛ hu e hɛɛ ha. Isak bi e papaa ke: ‘Jije lohwe nɛ waa kɛ maa sã afɔle ɔ ngɛ?’ Abraham de lɛ ke: ‘Ye bi, Yehowa ma ha wɔ.’

Benɛ a ya su yoku ɔ nɔ ɔ, a ma afɔle sami la tɛ. Kɛkɛ nɛ Abraham fĩ Isak nine kɛ e nane, nɛ e kɛ lɛ fɔ afɔle sami la tɛ ɔ nɔ.

Benɛ Abraham wo e ha a nɔ ɔ, Yehowa bɔfo ko tsɛ Abraham kɛ je hiɔwe nɛ e de lɛ ke: ‘Koo gbe nyumuyo ɔ! Jehanɛ lɛɛ i ná le kaa o ngɛ hemi kɛ yemi ngɛ Mawu mi, ejakaa o suɔ nɛ o maa ngɔ o bi ɔ kɛ sã afɔle.’ Kɛkɛ nɛ Abraham na jijɔ ko nɛ e koli bɛ tso ko. Abraham he sɔ kɛ pɛne Isak, nɛ e ngɔ jijɔ ɔ mohu kɛ sã afɔle ɔ.

Kɛ je jamɛ a ligbi ɔ nɔ ɔ, Yehowa bɔni Abraham tsɛmi ke e huɛ. O le nɔ́ he je lo? Nɔ́ he je ji kaa, nɔ́ fɛɛ nɔ́ nɛ Yehowa ma de Abraham ke e pee ɔ, e peeɔ. Ke e li nɔ́ he je nɛ Yehowa ke e pee nɔ́ ko po ɔ, e bɔɔ mɔde nɛ e peeɔ.

Yehowa kpale kai Abraham si nɛ e wo lɛ ɔ. E de lɛ ke: ‘Ma jɔɔ mo, nɛ ma ha nɛ o bimɛ aloo o nina maa hiɛ fuu.’ Enɛ ɔ tsɔɔ kaa Yehowa maa gu Abraham weku ɔ nɔ kɛ jɔɔ nihi nɛ a peeɔ nɔ́ kpakpa a tsuo.