Yosɛf ji Yakɔb binyumu ɔmɛ a kpɛti nɔ kake. E nyɛmimɛ nikɔtɔma amɛ na kaa a papaa suɔ Yosɛf sane pe mɛ. Kɛ o susu kaa Yosɛf nyɛmimɛ ɔmɛ pee a ní ngɛ enɛ ɔ he ha kɛɛ? Yosɛf he pee mɛ tai, nɛ a nyɛ lɛ. Pee se ɔ, Yosɛf nla nlami komɛ, nɛ e de e nyɛmimɛ ɔmɛ. A nu nlami ɔmɛ sisi kaa a ma kpla si ha Yosɛf ligbi ko. Enɛ ɔ he ɔ, a nyɛ Yosɛf wawɛɛ!

Ligbi ko ɔ, Yosɛf nyɛmimɛ ɔmɛ ngɛ to hyɛe ngɛ he ko nɛ kɛ Shekem ma a he kɛ we. Yakɔb tsɔ Yosɛf konɛ e ya hyɛ kaa e nyɛmimɛ ɔmɛ ngɛ saminya lo. Benɛ a na Yosɛf nɛ e ma ngɛ tsitsaa a, a de a sibi ke: ‘Nyɛ nɛ́ nlalɔ ɔ nɛ e ma. Nyɛ ha nɛ waa gbe lɛ!’ A nu lɛ pani nya nɛ a kɛ lɛ wo muɔ ko nɛ e mi kuɔ mi. Se a kpɛti nɔ kake nɛ a tsɛɛ lɛ ke Yuda a de mɛ ke: ‘Nyɛ ko gbe lɛ! Mohu ɔ, nyɛ ha nɛ waa jua lɛ kaa nyɔguɛ.’ Lɔ ɔ he ɔ, a jua lɛ kɛ ha Midian jua yeli komɛ nɛ a yaa Ijipt, nɛ a ha mɛ sika hiɔ yi 20.

Kɛkɛ nɛ Yosɛf nyɛmimɛ ɔmɛ ngɔ e tade gagaa a kɛ sɔ apletsi muɔ mi, nɛ a kɛ tade ɔ ya ha a papaa, nɛ a bi lɛ ke: ‘Pi o bi ɔ tade ji nɛ ɔ lo?’ Enɛ ɔ ha nɛ Yakɔb susu kaa lohwe awi yelɔ ko gbe Yosɛf. E ye awyilɛho wawɛɛ, nɛ nɔ ko nyɛ we nɛ e wo e bua.

Benɛ jua yeli ɔmɛ ya su Ijipt ɔ, a jua Yosɛf kɛ ha ma nɔkɔtɔma ko nɛ a tsɛɛ lɛ ke Pɔtifa. Se Yehowa ye bua Yosɛf. Pɔtifa na kaa Yosɛf hɛ mi wa kɛ ní tsumi, nɛ e yeɔ anɔkuale. Enɛ ɔ he ɔ, Pɔtifa ha nɛ Yosɛf hyɛ e níhi tsuo nɔ.

Pɔtifa yo ɔ na kaa Yosɛf he ngɛ fɛu, nɛ e ngɛ he wami hulɔ. Daa ligbi ɔ, yo ɔ deɔ Yosɛf ke e kɛ lɛ nɛ ná bɔmi. Mɛni Yosɛf maa pee? E kua, nɛ e de ke: ‘Dɛbi! E sɛ kaa ma pee jã. Ye nyɔmtsɛ ɔ heɔ mi yeɔ, nɛ e yo ji mo. Ke i kɛ mo ná bɔmi ɔ, i pee yayami kɛ si Mawu!’

Ligbi ko ɔ, Pɔtifa yo ɔ ka kaa e kɛ Yosɛf ma ná bɔmi. E nu Yosɛf tade ɔ, se Yosɛf ma fo kɛ je e he. Benɛ Pɔtifa ba we mi ɔ, e yo ɔ de lɛ ke Yosɛf ba tua lɛ. E tui e huno ɔ anɔkuale. Pɔtifa mi mi fu wawɛɛ, nɛ e ha nɛ a wo Yosɛf tsu. Se Yehowa hɛ ji Yosɛf nɔ.

Benɛ Yosɛf ngɛ tsu womi he ɔ, Farao nɛ e ji Ijipt matsɛ ɔ, nla nlami komɛ. Nɔ ko nyɛ we nɛ e tsɔɔ lɛ nlami ɔmɛ a sisi. Farao tsɔli ɔmɛ a kpɛti nɔ kake de lɛ ke Yosɛf ma nyɛ maa tsɔɔ lɛ e nlami ɔmɛ a sisi. Farao ha nɛ a ya tsɛ Yosɛf kɛ ba nɔuu.

Farao bi lɛ ke: ‘Anɛ o ma nyɛ maa tsɔɔ ye nlami ɔmɛ a sisi lo?’ Yosɛf de Farao ke: ‘Niye ní fuu maa ba Ijipt zugba a nɔ jeha kpaago, nɛ jeha kpaago nɛ maa nyɛɛ se ɔ, hwɔ nɛ nya wa maa ba. Mo hla nɔ ko nɛ e le ní, konɛ e bua niye ní fuu nya kɛ to, bɔ nɛ pee nɛ hwɔ ko gbe o ma mi bi ɔmɛ.’ Farao de lɛ ke: ‘I suɔ nɛ o tsu jamɛ a ní tsumi ɔ! Ye se ɔ, mo lɛ o ngɛ!’ Mɛni ha nɛ Yosɛf nyɛ nɛ e nu Farao nlami ɔmɛ a sisi ɔ? Yehowa lɛ ye bua lɛ.

Yosɛf ngɔ jeha kpaago kɛ bua niye ní fuu nya. Kaa bɔ nɛ Yosɛf de ɔ, hwɔ ba je ɔ mi tsuo. Nihi je je ɔ mi he fɛɛ he kɛ ba Yosɛf ngɔ nɛ a ba he niye ní. Yakɔb, nɛ ji Yosɛf papaa nu kaa niye ní ngɛ Ijipt, lɔ ɔ he ɔ, e tsɔ e binyumuhi nyɔngma konɛ a ya he niye ní ngɛ Ijipt kɛ ba.

Benɛ Yakɔb binyumu ɔmɛ ya su Yosɛf ngɔ pɛ nɛ Yosɛf le a mi tso. Se mɛɛ lɛɛ a li e mi tso. Mɛ tsuo a kpla si ha lɛ kaa bɔ nɛ e nla ngɛ e jokuɛ mi ɔ. Yosɛf ngɛ hlae nɛ e maa hyɛ kaa jehanɛ lɛɛ e nyɛmimɛ ɔmɛ suɔ e sane lo. Lɔ ɔ he ɔ, e de mɛ ke: ‘Slaali ji nyɛ. Nyɛ ba konɛ nyɛ ba hyɛ he nɛ wa ma a he wɛ ngɛ.’ A de lɛ ke: ‘Dɛbi! Wa je Kaanan zugba a nɔ, nɛ nyɛmimɛ ji wɔ. A fɔ wɔ nimli 12. Se wa nyɛmi ɔ kake gbo, nɛ wayo ɔ hu ngɛ wa papaa ngɔ.’ Kɛkɛ nɛ Yosɛf de mɛ ke: ‘Ke nyɛ ngɔ nyɛ senɔ ɔ kɛ ba tsɔɔ mi ɔ, ma he nyɛ ma ye.’ Lɔ ɔ he ɔ, a kpale a se kɛ ho a papaa ngɔ ya.

Benɛ a niye ní ɔ ya ta a, Yakɔb kpale tsɔ e binyumu ɔmɛ kɛ ho Ijipt ya ekohu. Jehanɛ lɛɛ, a kɛ a senɔ Benyamin hu ya. Yosɛf ngɛ hlae nɛ e ka e nyɛmimɛ ɔmɛ nɛ e hyɛ. Enɛ ɔ he ɔ, e ngɔ e sika hiɔ kplu ko kɛ wo Benyamin kotoku nɛ niye ní ngɛ mi ɔ mi, nɛ e bua nɛ e de e nyɛmimɛ ɔmɛ ke mɛ lɛ a ju e kplu ɔ. Benɛ Yosɛf tsɔli ɔmɛ na kplu ɔ ngɛ Benyamin kotoku ɔ mi ɔ, e pee Yosɛf nyɛmimɛ ɔmɛ nyakpɛ. A kpa Yosɛf pɛɛ kaa e ngmɛɛ Benyamin he, nɛ e gbla mɛ mohu a tue.

Enɛ ɔ ha nɛ Yosɛf na kaa e nyɛmimɛ ɔmɛ tsake niinɛ. Yosɛf nyɛ we nɛ e ye e he nɔ hu. E bɔni ya fomi, nɛ e de mɛ ke: ‘Imi ji nyɛ nyɛmi Yosɛf ɔ nɛ. Ye papaa ngɛ je mi lo?’ Nɔ́ nɛ ɔ pee e nyɛmimɛ ɔmɛ nyakpɛ wawɛɛ. E de mɛ ke: ‘Nyɛ ko hao ngɛ nɔ́ nɛ nyɛ pee mi ɔ he. Mawu tsɔ mi kɛ sɛ nyɛ hlami konɛ ma ba he nyɛ yi wami. Nyɛɛ pee esɔ nɛ nyɛ ya ngɔ ye papaa kɛ ba.’

A kpale a se nɛ a ya de a papaa sane kpakpa nɛ a nu ɔ, nɛ a ngɔ lɛ kɛ ho Ijipt ya. Jeha babauu se ɔ, Yosɛf kpale na e papaa ekohu.