Nyumu ko hi Uz zugba a nɔ nɛ e sɔmɔ Yehowa. A tsɛɛ lɛ ke Hiob. Sikatsɛ ji lɛ, nɛ e ngɛ bimɛ fuu. E mi mi jɔ, nɛ e yeɔ bua ohiatsɛmɛ kɛ yihi nɛ a hunomɛ gbo. E yeɔ bua jokuɛwi nɛ a fɔli gbo hulɔ. Hiob peeɔ nɔ́ nɛ da, se anɛ lɔ ɔ tsɔɔ kaa haomi ko be nyɛe maa ba e nɔ lo?

Satan Abosiami hii Hiob hyɛe, se Hiob li. Yehowa de Satan ke: ‘Anɛ o to ye tsɔlɔ Hiob he hɛ lo? Nɔ ko be zugba a nɔ nɛ e ngɛ kaa lɛ. E buɔ mi tue, nɛ e peeɔ nɔ́ nɛ da.’ Satan de ke: ‘Hiob buɔ mo tue ejakaa o buɔ e he, nɛ o jɔɔ lɛ. O ha lɛ zugba kɛ lohwehi fuu. Mo he ní ɔmɛ tsuo ngɛ e dɛ, nɛ o hyɛ kaa e ma ja mo lo.’ Yehowa de Satan ke: ‘O ma nyɛ maa ka Hiob. Se o be he blɔ nɛ o gbeɔ lɛ.’ Mɛni he je nɛ Yehowa ngmɛ Satan blɔ kaa e ka Hiob ɔ? E le kaa Hiob maa ye lɛ anɔkuale.

Satan ngɔ haomi fuu kɛ ba Hiob nɔ konɛ e kɛ ka lɛ. Kekleekle ɔ, e ha nɛ Sabea bi ɔmɛ ya ju Hiob nahi kɛ e tejihi. Lɔ ɔ se ɔ, e ha nɛ la sã Hiob jijɔ ɔmɛ tsuo nɛ a gbo. E ha nɛ Kaldea bi ɔmɛ hu ya ju Hiob afukpɔngɔ ɔmɛ. A gbe Hiob tsɔli ɔmɛ nɛ a hyɛɛ e lohwe ɔmɛ a nɔ ɔ hulɔ. Nɔ́ nɛ ngɛ aywilɛho pe kulaa ji kaa, benɛ Hiob bimɛ ɔmɛ ngɛ ní yee, nɛ a ngɛ ní nue ɔ, tsu nɛ a ngɛ mi ɔ hule kɛ pue a nɔ, nɛ mɛ tsuo a gbo. Nɔ́ nɛ ɔ hao Hiob wawɛɛ, se e kpa we Yehowa jami.

Satan suɔ kaa Hiob nɛ na nɔ́ pe jã po. Lɔ ɔ he ɔ, e ha nɛ Hiob he tsuo pee pa, nɛ e ye lɛ wawɛɛ. E li nɔ́ he je nɛ jamɛ a haomi ɔmɛ tsuo ba e nɔ. Se kɛ̃ ɔ, e kpa we Yehowa jami. Mawu na níhi nɛ ya nɔ ɔ tsuo, nɛ e bua jɔ Hiob he.

Jehanɛ ɔ, Satan ha nɛ nyumu etɛ komɛ ya ka Hiob. Nyumu ɔmɛ de Hiob ke: ‘Eko ɔ, o pee yayami ko kɛ laa, nɛ Mawu ngɛ o tue gblae.’ Hiob de mɛ ke: ‘I pee we yayami ko.’ Hiob ba bɔni susumi kaa Yehowa lɛ ngɔ haomi ɔmɛ kɛ ba e nɔ, nɛ e de ke Mawu pee we nɛ hi.

Jamɛ a be ɔ mi ɔ, niheyo ko nɛ a tsɛɛ lɛ ke Elihu ngɛ Hiob kɛ e huɛmɛ etɛ ɔmɛ a ní sɛɛmi ɔ tue bue. Elihu de mɛ ke: ‘Nɔ́ nɛ nyɛ tsuo nyɛ de ɔ dɛ. Wa be nyɛe maa le Yehowa juɛmi tsuo. E be nyɛe maa pee yayami kɔkɔɔkɔ. E naa nɔ́ fɛɛ nɔ́, nɛ e yeɔ bua nihi nɛ a ngɛ nɔ́ nae ɔ.’

Lɔ ɔ se ɔ, Yehowa kɛ Hiob tu munyu nɛ e bi lɛ ke: ‘Benɛ i ngɛ hiɔwe kɛ zugba a bɔe ɔ, jije o ngɛ? Mɛni he je nɛ o ke i pee we nɛ hi ɔ? O tu munyu mohu lɛɛ, se pi nɔ́ fɛɛ nɔ́ nɛ o le.’ Hiob kplɛɛ nɔ kaa e tɔ̃, nɛ e de Mawu ke: ‘I tɔ̃. I nu o he, se kpaako i le mo nitsɛnitsɛ. Nɔ́ ko be nɛ o be nyɛe maa pee. I kpa mo pɛɛ, nɔ́ nɛ i de ɔ dɛ.’

Benɛ Satan ka Hiob ta a, Yehowa ha nɛ Hiob ná he wami ekohu, nɛ e ha lɛ níhi babauu pe sa a. Hiob ná bua jɔmi, nɛ e se kɛ ngɛ je mi loko e gbo. Yehowa jɔɔ Hiob ejakaa e bu lɛ tue ngɛ haomi behi po a mi. Ke mo hu o kɛ haomi ko nɛ mi wa kpe ɔ, anɛ o maa ya nɔ ma ja Yehowa kaa bɔ nɛ Hiob pee ɔ lo?

Benɛ Yakɔb kɛ e weku ɔ ya hi Ijipt ɔ, biɛ nɛ nihi kɛ tsɛɔ mɛ ji Israel bi. Ngɛ Yakɔb kɛ Yosɛf a gbenɔ se ɔ, Farao kpa ko ba bɔni matsɛ yemi. Farao nɛ ɔ ye gbeye kaa Israel bi ɔmɛ a he ma ba wa pe Ijipt bi ɔmɛ. Enɛ ɔ he ɔ, e ha nɛ Israel bi ɔmɛ pee a nyɔguɛhi. E ha nɛ a po bliikisi, nɛ a tsu ní wawɛɛ ngɛ ngmɔhi a mi. Ijipt bi ɔmɛ wa Israel bi ɔmɛ yi mi wawɛɛ, se ngɛ lɔ ɔ tsuo se ɔ, Israel bi ɔmɛ a he ba hiɛ kulaa pe kekle ɔ. Farao bua jɔɛ nɔ́ nɛ ngɛ nɔ yae ɔ he. Enɛ ɔ he ɔ, e wo mlaa ke a gbe binyumuhi tsuo nɛ Israel bi ɔmɛ ma fɔ ɔ. Tse o na kaa mlaa nɛ ɔ maa wo Israel bi ɔmɛ a he gbeye, aloo?

Yo ko nɛ e ji Israel no nɛ a tsɛɛ lɛ ke Yokebɛd ɔ fɔ binyumuyo ko nɛ e he ngɛ fɛu wawɛɛ. Akɛnɛ e sume nɛ a gbe e bi ɔ he je ɔ, e kɛ lɛ wo kusii loo kɛtɛ mi, nɛ e ngɔ lɛ kɛ ya laa ngɛ gla amɛ a mi ngɛ Nilo Pa a mi. Miriam nɛ ji, bimwɔyo ɔ nyɛmiyo ya laa e he ngɛ he ko nɛ kɛ lejɛ ɔ kɛ we konɛ e hyɛ kaa mɛni maa ba lo.

Farao biyo ɔ ba ngɛ due ngɛ pa a mi nɛ e na kusii ɔ. E na bimwɔyo ko nɛ e ngɛ ya foe ngɛ kusii ɔ mi. Bimwɔyo ɔ he pee lɛ mɔbɔ. Miriam ba bi Farao biyo ɔ ke: ‘O suɔ nɛ ma ya hla yo ko nɛ e ma nyɛ maa hyɛ jokuɛ ɔ nɔ ha mo lo?’ Benɛ Farao biyo ɔ kplɛɛ nɔ ɔ, Miriam ya tsɛ lɛ nitsɛ e mami Yokebɛd kɛ ba. Farao biyo ɔ de Yokebɛd ke: ‘Ngɔɔ jokuɛ nɛ ɔ, nɛ o hyɛ e nɔ ha mi nɛ ma wo mo hiɔ.’

Benɛ jokuɛ ɔ ba wa a, Yokebɛd ngɔ lɛ kɛ ya ha Farao biyo ɔ. Farao biyo ɔ wo lɛ biɛ ke Mose, nɛ e tsɔse lɛ kaa lɛ nitsɛ e bi. A tsɔse Mose kaa matsɛ bi, nɛ nɔ́ ko he hia we lɛ. Se Mose hɛ ji Yehowa nɔ gblegbleegble. E le kaa Israel no ji lɛ, se pi Ijipt no. E mwɔ e yi mi kpɔ kaa e ma sɔmɔ Yehowa.

Benɛ Mose ye jeha 40 ɔ, e ma e juɛmi nya si kaa e maa ye bua e nyɛmimɛ Israel bi ɔmɛ. Ligbi ko ɔ, Mose na kaa Ijipt no ko ngɛ Israel nyɔguɛ ko kongoe. Mose fia Ijipt no ɔ nɔ́ nɛ e gbo, nɛ e pu lɛ ngɛ zia a mi. Benɛ Farao nu nɔ́ nɛ ba a, e ka kaa e maa gbe Mose. Se Mose tu fo kɛ ho Midian zugba a nɔ ya, nɛ Yehowa hyɛ e nɔ ngɛ lejɛ ɔ.