Mose hi Midian zugba a nɔ jeha 40. E ngɔ yo nɛ e fɔ bimɛ. Ligbi ko nɛ e ngɛ e to ɔmɛ a nɔ hyɛe ngɛ Sinai Yoku ɔ kasa nya a, e na nɔ́ ko nɛ ngɛ nyakpɛ. E na mio tso ko nɛ ngɛ tsoe, se mio tso ɔ sɛ̃! Benɛ Mose hɛ kɛ su tso ɔ he konɛ e hyɛ nɔ́ nɛ ngɛ nɔ yae ɔ, e nu nɛ gbi ko pɛ kɛ je tso ɔ mi ke: ‘Mose! Koo ba o hɛ mi hu! Je o tokota a, ejakaa zugba klɔuklɔu nɔ o daa si ngɛ ɔ nɛ.’ Yehowa lɛ gu bɔfo ko nɔ nɛ e kɛ Mose tu munyu ɔ nɛ.

Mose ye gbeye, lɔ ɔ he ɔ, e ngɔ nɔ́ kɛ ha e hɛ mi. Gbi ɔ de ke: ‘I na bɔ nɛ Israel bi ɔmɛ ngɛ nɔ́ nae ha a. Ma kpɔ mɛ kɛ je Ijipt bi ɔmɛ a dɛ mi, nɛ ma ngɔ mɛ kɛ ya zugba kpakpa ko nɔ. Mo lɛ o maa nyɛɛ ye we bi ɔmɛ a hɛ mi kɛ je Ijipt.’ Anɛ o susuu we kaa nɔ́ nɛ ɔ maa pee Mose nyakpɛ lo?

Mose bi ke: ‘Ke i ya Israel bi ɔmɛ a ngɔ nɛ a bi mi ke mɛnɔ lɛ tsɔ mi ɔ, kɛ ma de mɛ kɛɛ?’ Mawu ha lɛ heto ke: ‘Mo de Israel bi ɔmɛ ke, Yehowa nɛ ji Abraham, kɛ Isak, kɛ Yakɔb a Mawu ɔ lɛ tsɔ mo.’ Mose kpale bi Mawu ke: ‘Nɛ ke a bui mi tue hu nɛɛ?’ Yehowa ha nɛ Mose ná nɔ mi mami kaa e maa ye bua lɛ. Yehowa ha nɛ Mose sake tso nɛ e hɛɛ ɔ kɛ fɔ zugba. Kɛkɛ nɛ tso ɔ plɛ pee sinɔ! Benɛ Mose nu sinɔ ɔ hlemi ɔ, sinɔ ɔ plɛ pee tso ekohu. Lɔ ɔ se ɔ, Yehowa de Mose ke: ‘Ke o pee okadi nɛ ɔ kɛ tsɔɔ mɛ ɔ, a maa na kaa imi lɛ i tsɔ mo.’

Mose de Yehowa ke: ‘I li munyu tumi kpakpa ko.’ Yehowa wo lɛ si ke: ‘Ma tsɔɔ mo nɔ́ nɛ o ma de, nɛ ma ha nɛ o nyɛmi Aaron nɛ ye bua mo.’ Benɛ Mose na kaa Yehowa piɛɛ e he ɔ, e kɛ e yo kɛ e bimɛ ɔmɛ kpale kɛ ho Ijipt ya.

Farao ha nɛ Israel bi ɔmɛ tsu ní wawɛɛ kaa nyɔguɛhi. Yehowa tsɔ Mose kɛ Aaron nɛ a ya de Farao ke: ‘Ha ye ma a nɛ ho, konɛ a ya ja mi ngɛ nga a nɔ.’ Farao he nɔ wolɔ ɔ de mɛ ke: ‘Pi ye kɔmɔ ji nɔ́ nɛ Yehowa ngɛ dee ɔ. I be hae nɛ Israel bi ɔmɛ nɛ a je.’ Lɔ ɔ he ɔ, Farao ha nɛ a tsu ní wawɛɛ pe kekle ɔ po. Yehowa maa tsɔɔ Farao kaa e ngɛ he wami pe lɛ. Anɛ o le nɔ́ nɛ Yehowa pee lo? E ha nɛ Haomi Nyɔngma ba Ijipt zugba a nɔ. Yehowa de Mose ke: ‘Farao sume nɛ e maa pee nɔ́ nɛ i ngɛ lɛ dee ɔ. Hwɔɔ mɔtu ɔ, Farao maa ya Nilo Pa a nya. Yaa e ngɔ ngɛ lejɛ ɔ, nɛ o ya de lɛ ke akɛnɛ e ngmɛɛ we ye we bi ɔmɛ a he he je ɔ, Nilo Pa a ma plɛ pee muɔ.’ Mose pee kaa bɔ nɛ Mawu de lɛ ɔ, nɛ e ho Farao ngɔ ya. Aaron ngɔ e tso ɔ kɛ fia Nilo Pa a ngɛ Farao hɛ mi, nɛ pa a plɛ pee muɔ. Nyu ɔ bɔni fu jemi, lohi nɛ a ngɛ pa a mi ɔ hu gbo, nɛ a nyɛ we nɛ a nu nyu nɛ ngɛ Nilo Pa a mi ɔ. Se loloolo ɔ, Farao ngmɛɛ we Israel bi ɔmɛ a he nɛ a ho.

Ligbi kpaago se ɔ, Yehowa tsɔ Mose kɛ ya Farao ngɔ. Mose ya de Farao ke: ‘Ke o ngmɛɛ we ye ma a he nɛ a ho ɔ, ovɔnɔhi loo kuɔwihi maa ba Ijipt zugba a nɔ tsuo.’ Aaron wo e tso ɔ nɔ, kɛkɛ nɛ ovɔnɔhi ba Ijipt zugba a nɔ tsuo. Nihi na ovɔnɔhi ngɛ a wehi a mi, a na mɛ ngɛ a sahi a nɔ, kɛ a tsesihi a mi. A na ovɔnɔhi ngɛ he fɛɛ he! Farao ya de Mose ke e kpa Yehowa pɛɛ konɛ haomi nɛ ɔ se nɛ po. Farao wo si kaa e maa ngmɛɛ Israel bi ɔmɛ a he. Lɔ ɔ he ɔ, Yehowa ha nɛ ovɔnɔ ɔmɛ kpa mɛ haomi, nɛ Ijipt bi ɔmɛ bua ovɔnɔhi nɛ gbo ɔ a nya ngɛ hehi fuu kaa bɔ nɛ a buaa zia nya a. Enɛ ɔ ha nɛ ma a mi tsuo bɔni fu jemi. Se loloolo ɔ, Farao ha we nɛ Israel bi ɔmɛ nɛ a je.

Lɔ ɔ se ɔ, Yehowa de Mose ke: ‘Ha nɛ Aaron nɛ ngɔ e tso ɔ kɛ fia zugba, kɛkɛ ɔ, bunyuku ɔ ma plɛ pee lohwe tsɔwi nɛ a ngɛ kaa pwɔmi nɛ a kɔɔ nɔ.’ Benɛ Aaron pee jã a, lohwe tsɔwi nɛ ɔmɛ ba ma a mi he fɛɛ he. Farao we bi komɛ de lɛ ke: ‘Haomi nɛ ɔ je Mawu ngɔ.’ Se kɛ̃ ɔ, Farao ngmɛɛ we Israel bi ɔmɛ a he.