Mose kɛ Aaron ya de Farao sɛ gbi nɛ Mawu ha mɛ ɔ. A de lɛ ke: ‘Ke o ha we nɛ ye ma a nɛ ya a, ma ha nɛ pwɔlwɛhi maa ba zugba a nɔ tsuo.’ Pwɔlwɛhi ya sɛ sikatsɛmɛ nɛ a ngɛ Ijipt kɛ ohiatsɛmɛ hu a wehi a mi. Zugba a nɔ tsuo hyi tɔ kɛ pwɔlwɛhi. Se pwɔlwɛ ɔmɛ hɛwi Israel bi ɔmɛ ngɛ Goshen ma a mi. Haomi eywiɛne nɛ ɔ kɛ ekpahi nɛ nyɛɛ se ɔ ba Ijipt bi ɔmɛ pɛ a nɔ. Farao de Mose kɛ Aaron ke: ‘Nyɛ kpa Yehowa pɛɛ konɛ pwɔlwɛ ɔmɛ nɛ a je. Nyɛ we bi ɔmɛ ma nyɛ maa je.’ Se benɛ Yehowa ha nɛ pwɔlwɛ ɔmɛ je ɔ, Farao tsake e juɛmi. Mɛni he je nɛ Farao tue mi ti kikɛ ɔ?

Yehowa de ke: ‘Ke Farao kplɛɛ we nɛ ye we bi ɔmɛ nɛ a ho ɔ, hiɔ maa sɛ lohwehi tsuo nɛ a ngɛ Ijipt ɔ a kpɛti, nɛ a ma gbo.’ E nɔ jena a, lohwe ɔmɛ bɔni gbomi. Se Israel bi ɔmɛ lɛɛ a lohwe ɔmɛ gbo we. Loloolo ɔ, Farao kplii e tsui, nɛ e ngmɛɛ we Israel bi ɔmɛ a he.

Lɔ ɔ se ɔ, Yehowa de Mose ke e kpale kɛ ya Farao ngɔ, nɛ e fĩa la zu kɛ wo kɔɔhiɔ ɔ mi. La zu ɔ plɛ pee bunyuku ngɛ kɔɔhiɔ ɔ mi tsuo, nɛ e pue Ijipt bi ɔmɛ a nɔ. Bunyuku ɔ ha nɛ Ijipt bi ɔmɛ kɛ a lohwe ɔmɛ tsuo a he pee pa. Enɛ ɔ tsuo se ɔ, Farao ngmɛɛ we Israel bi ɔmɛ a he.

Yehowa kpale tsɔ Mose kɛ ya Farao ngɔ kɛ sɛ gbi nɛ ɔ: ‘Loloolo ɔ, o sume nɛ o maa ngmɛɛ ye we bi ɔmɛ a he lo? Hwɔɔ ɔ, ma ha gbiɛ ngo ngu maa nɛ ngɛ ma a mi.’ E nɔ jena a, Yehowa ha nɛ gbiɛ ngo ngu kɛ la nɛ. Jamɛ a be ɔ mi nɔuu hu ɔ, oslabai ngɛ gbae. A nɛ haomi ko kaa kikɛ ngɛ Ijipt hyɛ. Tsohi kɛ níhi nɛ a du ɔ tsuo hɛ mi kpata, se níhi nɛ ngɛ Goshen ɔ lɛɛ nɔ́ ko kɔ we he. Farao de ke: ‘Ke nyɛ kpa Yehowa pɛɛ nɛ gbiɛ ngo ngu ɔ kpa nɛmi ɔ, ma ngmɛɛ nyɛ he nɛ nyɛɛ ho.’ Se benɛ gbiɛ ngo ngu ɔ kpa nɛmi ɔ, Farao tsake e juɛmi.

Lɔ ɔ se ɔ, Mose de Farao ke: ‘Ke gbiɛ ngo ngu ɔ nɛ ta a, baalɛhi ma ba ye tso fɛɛ tso nɛ piɛ nɛ maa piɛ ɔ.’ Baalɛhi babauu ba ye ngmɔ ní ɔmɛ kɛ tsohi tsuo. Farao de ke: ‘Nyɛ kpa Yehowa pɛɛ nɛ e ha nɛ baalɛ ɔmɛ nɛ a je.’ Se benɛ Yehowa ha nɛ baalɛ ɔmɛ je ɔ, Farao ngmɛɛ we Israel bi ɔmɛ a he.

Yehowa de Mose ke: ‘Mo wo o nine nɔ kɛ tsɔɔ hiɔwe.’ Benɛ e pee jã pɛ kɛkɛ nɛ je ɔ mi wo diblii. Ijipt bi ɔmɛ nɛ́ nɔ́ ko nɔ́ ko ligbi etɛ sɔuu. Israel bi ɔmɛ lɛɛ, a we ɔmɛ a mi wui diblii.

Farao de Mose ke: ‘O kɛ o we bi ɔmɛ ma nyɛ maa ya. Nyɛ lohwe ɔmɛ lɛɛ nyɛ si mɛ.’ Mose de lɛ ke: ‘E sa nɛ waa kɛ wa lohwe ɔmɛ nɛ ya, konɛ wa nyɛ nɛ waa sã afɔle ha wa Mawu ɔ.’ Farao mi mi fu wawɛɛ, nɛ e de ke: ‘Jee ye hɛ mi kɛ ho! Ke o ba da ye hɛ mi ekohu ɔ, ma gbe mo.’

Mose wo Farao si kaa e be e ngɔ bae hu. Se loko e maa je Farao ngɔ ɔ, e de lɛ ke: ‘Nyɔ nɛ ɔ mi ɔ, bitɛte fɛɛ bitɛte nɛ ngɛ Ijipt ɔ ma gbo, kɛ je Farao bitɛte ɔ nɔ, kɛ yaa si nyɔguɛ ɔmɛ a bitɛtehi a nɔ.’

Yehowa de Israel bi ɔmɛ ke a ye niye ní slɔɔto ko. E de mɛ ke: ‘Nyɛɛ gbe apletsi loo jijɔ nɛ ye jeha kake, nɛ nyɛɛ ngɔ muɔ ɔ eko kɛ kpa sinya tso ɔmɛ a he. Nyɛɛ sã lo ɔ, nɛ nyɛɛ ngɔ abolo kplolo kɛ ye. Nyɛ dla nyɛ he, nyɛɛ wo tokota, nɛ nyɛɛ pee klaalo. Ma ha nyɛ maa ye nyɛ he nyɔ nɛ ɔ mi.’ Hyɛ bɔ nɛ Israel bi ɔmɛ a bua maa jɔ ha.

Jamɛ a nyɔ ɔ mi ɔ, Yehowa bɔfo ko ya we fɛɛ we mi ngɛ Ijipt. Bitɛtehi nɛ a ngɛ wehi nɛ a kɛ muɔ kpa we a he ɔ mi ɔ gbo. Se bɔfo ɔ be wehi nɛ a kɛ muɔ diki he ɔ he. Ijipt bitɛtehi nɛ a je sikatsɛmɛ a weku mi, kɛ ni nɛmɛ nɛ a je ohiatsɛmɛ a weku mi ɔ tsuo gbo. Se Israel bi ɔmɛ lɛɛ a bimɛ ɔmɛ ekoeko gbo we.

Farao bitɛte ɔ po gbo. Piɔ lɛɛ Farao na kaa e be nyɛe hu. Amlɔ nɔuu nɛ e de Mose kɛ Aaron ke: ‘Nyɛɛ pee esɔ nɛ nyɛɛ je hiɛ ɔ kɛ ho. Nyɛɛ ho nɛ nyɛ ya ja nyɛ Mawu ɔ. Nyɛɛ kɛ nyɛ lohwe ɔmɛ nɛ ho!’

Israel bi ɔmɛ je Ijipt jamɛ a nyɔ ɔ mi ɔ. Jamɛ a be ɔ mi ɔ, nyɔhiɔ ɔ je kpo wawɛɛ. A nyɛɛ ngɛ weku nya weku nya, kɛ wɛtso nya wɛtso nya. Nyumu ɔmɛ a hiɛmi ji 600,000, nɛ yihi, kɛ jokuɛwi fuu hu piɛɛ he. Ni kpahi hu piɛɛ a he nɛ tsa pi Israel bi ji mɛ. Mɛ hu a suɔ nɛ a ya ja Yehowa. Jehanɛ lɛɛ Israel bi ɔmɛ ye a he kulaa!

Daa jeha a, a yeɔ niye ní nɛ ngɛ slɔɔto nɛ Yehowa de mɛ ke a ye ɔ, nɛ a kɛ kaiɔ bɔ nɛ Yehowa plɛ kɛ kpɔ mɛ ɔ. A tsɛɛ nɔ́ nɛ ɔ ke He Tsɔmi.