Yehowa de Mose ke: ‘Moo kuɔ yoku ɔ kɛ ba ye ngɔ. Ma ngma ye mlaa amɛ ngɛ tɛ tɛtlɛɛhi a nɔ kɛ ha mo.’ Mose kuɔ kɛ ya yoku ɔ nɔ, nɛ e ya hi lejɛ ɔ ligbi 40 nyɔ kɛ pia. Benɛ Mose ngɛ yoku ɔ nɔ ɔ, Yehowa ngma Mlaa Nyɔngma amɛ ngɛ tɛ tɛtlɛɛ enyɔ nɔ, nɛ e kɛ ha lɛ.

Be komɛ a se ɔ, Israel bi ɔmɛ bɔni susumi kaa Mose je a he. Lɔ ɔ he ɔ, a de Aaron ke: ‘Wa suɔ nɛ nɔ ko nɛ nyɛɛ wa hɛ mi. Moo pee mawu ko ha wɔ!’ Aaron de mɛ ke: ‘Nyɛɛ ngɔ nyɛ sika tsu ɔmɛ kɛ ba.’ E sile sika tsu ɔ, nɛ e kɛ pee na bi amaga. Ni ɔmɛ de ke: ‘Na bi nɛ ɔ ji wa Mawu nɛ e je wɔ kɛ je Ijipt ɔ nɛ!’ A bɔni sika tsu na bi ɔ jami, nɛ a bua jɔ wawɛɛ. Anɛ tɔmi ngɛ nɔ́ nɛ a pee ɔ he lo? Ee, ejakaa ma a wo Yehowa si kaa a ma ja lɛ pɛ. Se a yi a si womi ɔ nɔ.

Yehowa na nɔ́ nɛ ya nɔ ɔ tsuo, lɔ ɔ he ɔ, e de Mose ke: ‘Kple si kɛ ya ma a ngɔ. A bui mi tue, nɛ a ngɛ lakpa mawu jae.’ Mose kple si kɛ je yoku ɔ nɔ kɛ e dɛ mi tɛ tɛtlɛɛ enyɔ ɔmɛ.

Benɛ Mose ngɛ ma a he sue ɔ, e nu kaa nihi ngɛ lae. Kɛkɛ nɛ e na kaa a ngɛ doe nɛ a ngɛ si kplae ha na bi ɔ. Mose mi mi fu wawɛɛ. E ngɔ tɛ tɛtlɛɛ ɔmɛ kɛ fia si, nɛ a ywia. E ku amaga a kɛ pue si nɔuu. Kɛkɛ nɛ e bi Aaron ke: ‘Kɛ pee kɛɛ nɛ ma a plɛ o yi mi nɛ o pee yayami agbo nɛ ɔ?’ Aaron de ke: ‘O mi mi nɛ ko fu mi. O le bɔ nɛ nimli nɛ ɔmɛ ngɛ ha. A ke a ngɛ mawu ko hlae nɛ a ma ja, lɔ ɔ he ɔ, i sake a sika tsu ɔ kɛ pue la mi nɛ na bi nɛ ɔ je mi kɛ ba!’ E sɛ nɛ Aaron ko pee jã. Mose kpale kuɔ yoku ɔ ekohu nɛ e ya kpa Yehowa pɛɛ konɛ e ngɔ ma a he yayami kɛ pa mɛ.

Yehowa ngɔ nihi nɛ a suɔ kaa a maa bu lɛ tue ɔ a he yayami kɛ pa mɛ. Anɛ o na nɔ́ he je nɛ e he hia kaa Israel bi ɔmɛ nɛ a bu Mose nɛ ji a hɛ mi nyɛɛlɔ ɔ tue lo?

Benɛ Mose ngɛ Sinai Yoku ɔ nɔ ɔ, Yehowa de lɛ ke e ma bo tsu ko nɛ ngɛ slɔɔto konɛ Israel bi ɔmɛ nɛ a ja lɛ ngɛ lejɛ ɔ. A tsɛɔ bo tsu nɛ ɔ ke kpe he bo tsu. A ma nyɛ maa ngɔ bo tsu ɔ kɛ ya he fɛɛ he nɛ a maa ya.

Yehowa de ke: ‘Mo de ni ɔmɛ nɛ a ha nɔ́ nɛ a ma nyɛ konɛ a kɛ pee kpe he bo tsu ɔ.’ Israel bi ɔmɛ ha sika tsu, sika hiɔ, akɔblee, tɛhi nɛ a he jua wa, kɛ junehi. A ngɔ lohwe he bwɔmi, kɛ lohwe he womi, kɛ bo, kɛ ní kpahi fuu hu kɛ ba. A je a tsui mi nɛ a ha níhi fuu kɛ ya si benɛ Mose de mɛ ke: ‘E hi! Nyɛ ko ngɔ nɔ́ ko kɛ ba hu.’

Nyumuhi kɛ yihi nɛ a le ga ní tsumi slɔɔtohi ye bua kɛ ma kpe he bo tsu ɔ. Yehowa ha mɛ nile konɛ a kɛ tsu ní ɔ. Ni komɛ tslɔ kpa, ni komɛ lo bo, nɛ ni komɛ hu lo ní kɛ wo bo ɔmɛ a mi. Ni komɛ tsu tɛhi a he ní, ni komɛ ngɔ sika tsu kɛ sɔ̃ níhi, nɛ ni komɛ hu hlɔ tsohi.

Ni ɔmɛ ma kpe he bo tsu ɔ kaa bɔ nɛ Yehowa de mɛ ke a pee ɔ. A pee bo ko nɛ ngɛ fɛu kɛ po kpe he bo tsu ɔ mi enyɔ. A tsɛɛ fã kake ke He Klɔuklɔu, nɛ a tsɛɛ fã kake ɔ hu ke He Klɔuklɔu Pe Kulaa. Somi daka nɛ a kɛ akasia tso kɛ sika tsu pee ɔ ngɛ He Klɔuklɔu Pe Kulaa a. Kane tso, kɛ okplɔɔ, kɛ la tɛ nɛ a kɛ maa sã tsopa kɛ e he via ngɛ He Klɔuklɔu ɔ, nɛ akɔblee sowe kɛ bɔ sami la tɛ hu ngɛ kpo ɔ nɔ. Somi daka a kaiɔ Israel bi ɔmɛ kaa a wo Yehowa si ke a maa ye e mlaa amɛ a nɔ. Mɛni ji somi? E ji si womi ko nɛ ngɛ slɔɔto.

Yehowa hla Aaron kɛ e binyumu ɔmɛ konɛ a tsu ní kaa osɔfohi ngɛ kpe he bo tsu ɔ mi. A ní tsumi ji kaa a maa hyɛ kpe he bo tsu ɔ nɔ saminya, nɛ a maa sã bɔhi ha Yehowa ngɛ lejɛ ɔ. Aaron nɛ e ji osɔfo nɔkɔtɔma a pɛ lɛ e ngɛ he blɔ kaa e maa sɛ He Klɔuklɔu Pe Kulaa a. E yaa He Klɔuklɔu Pe Kulaa a si kake daa jeha nɛ e ya sãa afɔle kɛ haa e kɛ e weku ɔ, kɛ Israel ma a tsuo ngɛ a yayami ɔmɛ a he je.

Benɛ Israel bi ɔmɛ je Ijipt ɔ, jeha kake se nɛ a ma kpe he bo tsu ɔ. Amlɔ nɛ ɔ lɛɛ a ná he ko nɛ a ma ja Yehowa ngɛ.

Yehowa ha nɛ bɔku ko ba da kpe he bo tsu ɔ yi mi, nɛ e hɛ mi nyami ɔ hyi lejɛ ɔ tɔ. Ke bɔku ɔ da si ngɛ kpe he bo tsu ɔ yi mi ɔ, Israel bi ɔmɛ hiɛ blɔ. Se ke bɔku ɔ je bo tsu ɔ yi mi pɛ kɛkɛ Israel bi ɔmɛ le kaa e sa nɛ a tsa a blɔ hiami ɔ nɔ. A gbɛɔ bo tsu ɔ nɛ a nyɛɛɔ bɔku ɔ se.