Benɛ Israel bi ɔmɛ je Sinai Yoku ɔ he ɔ, a gu Paran nga a nɔ kɛ ya su he ko nɛ a tsɛɛ ke Kadɛsh. Benɛ a su lejɛ ɔ, Yehowa de Mose ke: ‘Moo hla nyumu kake kɛ je wɛtso fɛɛ wɛtso mi, konɛ o tsɔ mɛ ni 12 ɔmɛ nɛ a ya slaa Kaanan zugba nɛ i kɛ ma ha Israel bi ɔmɛ ɔ.’ Lɔ ɔ he ɔ, Mose hla nyumuhi 12 nɛ e de mɛ ke: ‘Nyɛɛ ya Kaanan zugba a nɔ nɛ nyɛ ya hyɛ kaa zugba a hi kɛ ha ngmɔ peemi lo? Nyɛɛ hyɛ hu kaa ni ɔmɛ nɛ a ngɛ zugba a nɔ ɔ a he wa loo a he wɛ. Jehanɛ hu ɔ, nyɛɛ hyɛ ke ji ni ɔmɛ ngɛ bo tsuhi a mi, aloo a ngɛ ma nguahi a mi.’ Slaali 12 ɔmɛ nɛ Yoshua kɛ Kalɛb hu piɛɛ he ɔ je kɛ ho Kaanan zugba a nɔ ya.

Ligbi 40 se ɔ, slaali ɔmɛ kpale kɛ ba. A ngɔ zugba a nɔ tso yiblii ko nɛ ngɔɔ, kɛ ngmɔkɔ kɛ wai yiblii kɛ ba. Slaali ɔmɛ de ke: ‘Wa na kaa e ji zugba kpakpa, se nimli nɛ a ngɛ zugba a nɔ ɔ a he wa, nɛ a fia gbogbohi nɛ a ya hiɔwe kɛ wo ma amɛ a he.’ Kɛkɛ nɛ Kalɛb de ke: ‘Wa ma nyɛ maa ngɔ zugba a. Nyɛ ha nɛ waa ya piɔ!’ O le nɔ́ he je nɛ Kalɛb de jã a lo? Kalɛb kɛ Yoshua ngɔ a hɛ kɛ fɔ Yehowa nɔ. Se slaali nyɔngma amɛ nɛ a piɛ ɔ de ke: ‘Dɛbi! Nimli nɛ a ngɛ lejɛ ɔ je oblai! Wa ngɛ kaa adodohi ngɛ a hɛ mi.’

Enɛ ɔ ha nɛ Israel bi ɔmɛ a kɔni mi jɔ̃. A tu munyu huitihuiti, nɛ a de a sibi ke: ‘Nyɛ ha nɛ wa hla nɔ kpa nɛ e nyɛɛ wa hɛ mi, konɛ waa kpale kɛ ho Ijipt ya. Mɛni he je nɛ e sa nɛ waa ya Kaanan zugba a nɔ nɛ wa ya gbo ngɛ lejɛ ɔ?’ Yoshua kɛ Kalɛb de ke: ‘Nyɛ ko tsɔ Yehowa hɛ mi atua, nɛ nyɛ ko ye gbeye hulɔ. Yehowa maa bu wa he.’ Se Israel bi ɔmɛ bui tue. Jinɛ a ngɛ hlae nɛ a gbe Yoshua kɛ Kalɛb po!

Mɛni Yehowa pee ngɛ sane ɔ he? E de Mose ke: ‘Ngɛ níhi fuu nɛ i pee kɛ ha Israel bi ɔmɛ tsuo se ɔ, loloolo ɔ, a bui mi tue. Enɛ ɔ he ɔ, a maa hi nga a nɔ jeha 40, nɛ a ma gbo ngɛ nga a nɔ. A bimɛ ɔmɛ kɛ Yoshua kɛ Kalɛb pɛ ji nihi nɛ ma ngɔ si womi zugba a kɛ ha.’

Benɛ Israel bi ɔmɛ ngɛ nga a nɔ ɔ, Kora, kɛ Datan, kɛ Abiram, kɛ nyumuhi 250 te si kɛ wo Mose. A de Mose ke: ‘O ngɛ nɔ́ ko pee tsɔ! Mɛni he je nɛ mo lɛ e sa kaa o nyɛɛ wa hɛ mi, nɛ mɛni he je nɛ e sa kaa Aaron hu nɛ e pee osɔfo nɔkɔtɔma? Yehowa kɛ wɔ tsuo ngɛ, pi o kɛ Aaron pɛ.’ Yehowa bua jɔɛ nɔ́ nɛ a pee ɔ he. Ngɛ e hɛ mi ɔ, a tsɔ atua kɛ si lɛ!

Mose de Kora kɛ e se nyɛɛli ɔmɛ ke: ‘Hwɔɔ mɔtu ɔ, nyɛɛ ngɔ tsopa kɛ e he via kɛ wo la jemi níhi a mi kɛ ba kpe he bo tsu ɔ he. Yehowa maa tsɔɔ wɔ nɔ nɛ lɛ nitsɛ e hla.’

E nɔ jena a, Kora kɛ nyumuhi 250 nɛ a piɛɛ e he ɔ kɛ Mose ya kpe ngɛ kpe he bo tsu ɔ he. A sã tsopa kɛ e he via kaa nɔ́ nɛ osɔfohi ji mɛ. Kɛkɛ nɛ Yehowa de Mose kɛ Aaron ke: ‘Nyɛ je nyɛ he kɛ je Kora kɛ e we bi ɔmɛ a he.’

Kora ya ná Mose ngɛ kpe he bo tsu ɔ he, se Datan, kɛ Abiram kɛ a weku ɔmɛ lɛɛ a yɛ. Yehowa de Israel bi ɔmɛ ke a hɛ kɛ je Kora, kɛ Datan kɛ Abiram a bo tsu ɔmɛ a he. Amlɔ nɔuu nɛ Israel bi ɔmɛ je lejɛ ɔ. Datan, kɛ Abiram kɛ a weku li ɔmɛ ya da si ngɛ a bo tsu ɔmɛ a nya. Tlukaa a, zugba a mi gba enyɔ nɛ e mii mɛ! La je hiɔwe ba sã Kora kɛ e se nyɛɛli 250 ɔmɛ nɛ a ngɛ kpe he bo tsu ɔ he ɔ hulɔ.

Kɛkɛ nɛ Yehowa de Mose ke: ‘Ngɔɔ dɛma tso kake ngɛ wɛtso fɛɛ wɛtso dɛ, nɛ o ngma wɛtso ɔmɛ a hɛ mi nyɛɛli ɔmɛ a biɛ ngɛ a dɛma tso ɔmɛ a he. Se nɔ́ nɛ Levi wɛtso ɔ kɛ maa ba a, moo ngma Aaron biɛ ngɛ he. Ngɔɔ dɛma tso ɔmɛ ya pue bo tsu ɔ mi. Nɔ nɛ ma hla a, e tso ɔ ma tsɛ̃ mɔmɔ.’

E nɔ jena a, Mose ngɔ tso ɔmɛ kɛ ba tsɔɔ wɛtso ɔmɛ a hɛ mi nyɛɛli ɔmɛ. Aaron tso ɔ tsɛ̃ mɔmɔ nɛ e wo yiblii nɛ fu. Yehowa pee enɛ ɔ kɛ tsɔɔ kaa e hla Aaron kaa osɔfo nɔkɔtɔma.