Benɛ slaali nɛ a je Israel ɔ ya Yɛriko ma a mi ɔ, a ya hi yo ko nɛ a tsɛɛ lɛ ke Rahab ɔ we mi. Yɛriko matsɛ ɔ nu he, nɛ e tsɔ ta buli kɛ ya Rahab we ɔ mi. Rahab ngɔ slaali enyɔ ɔmɛ kɛ laa ngɛ e tsu ɔ yi mi, nɛ e ha nɛ ta buli ɔmɛ gu he kpa. E de slaali ɔmɛ ke: ‘Ma ye bua nyɛ ejakaa i le kaa Yehowa piɛɛ nyɛ he, nɛ nyɛ nine maa su zugba a nɔ. I kpa nyɛ pɛɛ nɛ nyɛɛ wo mi si kaa nyɛ ma he ye weku ɔ yi wami.’

Slaali ɔmɛ de Rahab ke: ‘Wa ngɛ mo si woe kaa nɔ ko nɔ ko hɛ mi be kpatae ngɛ o we ɔ mi. Moo fi kpa tsutsu ngɛ o saflɛ ɔ he, nɛ nɔ́ ko be o weku ɔ pee.’

Rahab kɛ kpa ko kple slaali ɔmɛ si kɛ gu saflɛ mi. Slaali ɔmɛ pue nɔ kɛ ho yoku ɔmɛ a nɔ ya nɛ a ya laa a he ngɛ lejɛ ɔ ligbi etɛ loko a ho Yoshua ngɔ ya. Israel bi ɔmɛ dla a he nɛ a po Yɔdan Pa a konɛ a ya ngɔ zugba a. Yɛriko ma a ji kekleekle ma nɛ Israel bi ɔmɛ ngɔ. Yehowa de Israel bi ɔmɛ ke a nyɛɛ kɛ bɔle ma a si kake daa ligbi. E ha nɛ a pee jã ligbi ekpa. Se ngɛ ligbi kpaagone ɔ nɔ ɔ, a nyɛɛ kɛ bɔle ma a si kpaago. Lɔ ɔ se ɔ, osɔfo ɔmɛ kpa a bɛ ɔmɛ, nɛ ta buli ɔmɛ kpa ngmlaa wawɛɛ. Kɛkɛ nɛ Yɛriko gbogbo ɔ hule kɛ pue si! Rahab we ɔ ngɛ gbogbo ɔ nɔ, se e hule we. Rahab kɛ e weku ɔ yi na wami ejakaa Rahab ngɔ e hɛ kɛ fɔ Yehowa nɔ.

Mahi nɛ ngɛ Kaanan zugba a nɔ ɔ nu Yɛriko hɛ mi kpatami ɔ he. Matsɛmɛ nɛ a yeɔ ma nɛ ɔmɛ a nɔ ɔ to kaa a maa pee kake konɛ a kɛ Israel bi ɔmɛ nɛ hwu ta. Se Gibiɔn bi ɔmɛ lɛɛ a ná juɛmi kpa ko. A wo tade gbagbɛhi kɛ ya Yoshua ngɔ, nɛ a de lɛ ke: ‘Wa je he ko tsitsaa. Wa nu Yehowa, nyɛ Mawu ɔ he. Níhi tsuo nɛ e pee ngɛ Ijipt kɛ Moab ɔ hu, wa nu he. Nyɛɛ wo wɔ si kaa nyɛ be wa hɛ mi kpatae, konɛ wa sɔmɔ nyɛ.’

Yoshua he nɔ́ nɛ a de ɔ ye, nɛ e kplɛɛ nɔ kaa a be a hɛ mi kpatae. Ligbi etɛ se ɔ, Yoshua ná le kaa Gibiɔn bi ɔmɛ be tsitsaa. Mamoo mɛ hu a ngɛ Kaanan zugba a nɔ. Yoshua bi Gibiɔn bi ɔmɛ ke: ‘Mɛni he je nɛ nyɛ sisi wɔ ɔ?’ A ha lɛ heto ke: ‘Wa ye gbeye wawɛɛ! Wa le kaa Yehowa nyɛ Mawu ɔ lɛ ngɛ ta hwue ha nyɛ ɔ nɛ. Wa kpa nyɛ pɛɛ, nyɛ ko gbe wɔ.’ Yoshua ye e si womi ɔ nɔ, lɔ ɔ he ɔ, e ngmɛɛ a he.

E kɛ we kulaa nɛ Kaanan matsɛmɛ enuɔ kɛ a ta buli ya tua Gibiɔn bi ɔmɛ. Yoshua kɛ e ta buli ɔmɛ nyɛɛ nyɔnyɔɔnyɔ, nɛ a ya ye bua Gibiɔn bi ɔmɛ. E nɔ jena mɔtu ɔ nɔuu nɛ ta a je sisi. Kaanan bi ɔmɛ bɔni fo tumi ngɛ ta a nya. Ke nɔ nɛ ɔ gu hiɛ, kɛkɛ nɔ nɛ ɔ hu gu hiɛ. Se Yehowa ha nɛ gbiɛ ngo ngu nguahi nɛ́ kɛ pue nihi nɛ a tu fo ɔ tsuo a nɔ. Kɛkɛ nɛ Yoshua kpa Yehowa pɛɛ kaa e ha nɛ pu ɔ nɛ da si. Mɛni he je nɛ Yoshua de Yehowa ke e ha nɛ pu ɔ nɛ da si, be mi nɛ pu ɔ dɛ si hyɛ ɔ? Ejakaa Yoshua ngɛ hemi kɛ yemi ngɛ Yehowa mi. Jamɛ a ligbi ɔ, pu ɔ nɔɛ si kɛ ya si benɛ Israel bi ɔmɛ ye Kaanan matsɛmɛ ɔmɛ, kɛ a ta buli ɔmɛ a nɔ kunimi.