Bɛnhadad nɛ ji Siria bi ɔmɛ a matsɛ ɔ ha nɛ e ta buli ya tua Israel bi ɔmɛ si abɔ. Se be fɛɛ be nɛ a maa pee a juɛmi kaa a ma ya tua Israel bi ɔmɛ ɔ, gbalɔ Elisha bɔɔ Israel matsɛ ɔ kɔkɔ nɛ e tuɔ fo. Enɛ ɔ he ɔ, Bɛnhadad pee e juɛmi kaa e ma ha nɛ a nu Elisha. Benɛ Bɛnhadad nu kaa Elisha ho Dotan ya a, e tsɔ Siria ta buli ɔmɛ kɛ ho lejɛ ɔ ya konɛ a ya nu lɛ.

Siria bi ɔmɛ ya su Dotan nyɔ mi. Benɛ je na nɛ Elisha tsɔlɔ ɔ je kpo ɔ, e na kaa ta buli fuu bɔle ma a kɛ kpe. E tsui po wawɛɛ, nɛ e kpa ngmlaa nɛ e de ke: ‘Elisha, kɛ wa maa pee kɛɛ?’ Elisha de lɛ ke: ‘Nihi nɛ a kɛ wɔ ngɛ ɔ hiɛ pe mɛ.’ Amlɔ nɔuu ɔ, Yehowa ha nɛ Elisha tsɔlɔ ɔ na la okpɔngɔhi, kɛ la ta zugba lɛhi ngɛ yoku ɔmɛ nɛ bɔle ma a nɔ.

Benɛ Siria ta buli ɔmɛ bɔ mɔde kaa a maa nu Elisha a, e sɔle ke: ‘Yehowa, i kpa mo pɛɛ nɛ o ha nɛ a hɛ ngmɛ nɛ yu.’ Ta buli ɔmɛ ngɛ nɔ́ hyɛe mohu lɛɛ, se si kake too ɔ, a li he nɛ a ngɛ hu. Elisha de ta buli ɔmɛ ke: ‘Nyɛ laa blɔ. Nyɛɛ nyɛɛ ye se, konɛ ma ya tsɔɔ nyɛ nyumu ɔ nɛ nyɛ ngɛ hlae ɔ.’ A nyɛɛ Elisha se kɛ ya Samaria tɔɔ. Lejɛ ɔ nɛ Israel bi ɔmɛ a matsɛ ɔ ngɛ ɔ nɛ.

Benɛ Siria bi ɔmɛ na kaa he nɛ a ngɛ ji nɛ ɔ, nɔ́ ko hí peemi. Israel matsɛ ɔ bi Elisha ke: ‘Ma gbe mɛ lo?’ Anɛ Elisha susu kaa e ná he blɔ nɛ e kɛ maa gbe nihi nɛ a suɔ kaa a maa ye lɛ awi ɔ lo? Dɛbi. Elisha de ke: ‘Koo gbe mɛ. Ha mɛ nɔ́ ko nɛ a ye, nɛ o ha nɛ a kpale kɛ ho a ma mi ya.’ Matsɛ ɔ ngmɛ mɛ okplɔɔ, nɛ e ha nɛ a kpale kɛ ho a ma mi ya.

Jezebɛl ngɛ biyo ko nɛ a tsɛɛ lɛ ke Atalia. Lɛ hu e yi mi wa kaa e nyɛ Jezebɛl nɔuu. Yuda matsɛ ɔ yo ji Atalia. Benɛ Atalia huno ɔ gbo ɔ, e binyumu ba bɔni matsɛ yemi. Se benɛ Atalia binyumu ɔ hu ba gbo ɔ, Atalia nitsɛ bɔni Yuda ma a nɔ yemi. E bɔ mɔde kaa e ma kpata nyumuhi tsuo nɛ a ngɛ he blɔ kaa a yeɔ matsɛ ɔ a hɛ mi, konɛ e ná he blɔ nɛ e ye ma a nɔ. E gbe lɛ nitsɛ e bibimɛ po. Nɔ fɛɛ nɔ yeɔ lɛ gbeye.

Yehoyada nɛ ji Osɔfo Nɔkɔtɔma a kɛ e yo Yehosheba le kaa nɔ́ nɛ Atalia ngɛ pee ɔ hí kulaa. Yehoyada kɛ e yo ɔ pee nɔ́ ko nɛ ma nyɛ ma ha nɛ Atalia nɛ gbe mɛ. Nɔ́ nɛ a pee ji kaa a ngɔ Atalia bibi ɔ kake kɛ ya laa. E ji bimwɔyo, nɛ e biɛ ji Yoash. A tsɔse Yoash ngɛ sɔlemi we ɔ.

Benɛ Yoash ye jeha kpaago ɔ, Yehoyada bua ma nikɔtɔma amɛ kɛ Levi bi ɔmɛ a nya nɛ e de mɛ ke: ‘Nyɛɛ da si ngɛ sɔlemi we ɔ agbo ɔmɛ a nya. Nyɛ ko ha nɛ nɔ ko nɛ sɛ mi.’ Lɔ ɔ se ɔ, Yehoyada wo Yoash matsɛ konɛ e ye Yuda ma a nɔ, nɛ e bu lɛ matsɛ pɛɛ. Yuda bi ɔmɛ kpa ngmlaa ke: ‘Matsɛ ɔ se nɛ kɛ ngɛ je mi!’

Manyɛ Atalia nu ngmlaa a he, nɛ e pee esɔ kɛ ho sɔlemi we ɔ ya. Benɛ e na matsɛ ehe ɔ, e kpa ngmlaa wawɛɛ ke: “Nyɛ tsɔ atuã! Nyɛ tsɔ atuã!” Kɛkɛ nɛ ma nikɔtɔma amɛ nu manyɛ yiwutsotsɛ ɔ kɛ je, nɛ a ya gbe lɛ. Se mɛni a maa pee ngɛ ní yayahi nɛ e tsɔɔ ma mi bi ɔmɛ ɔ he?

Yehoyada ye bua ma mi bi ɔmɛ nɛ a wo Yehowa si kaa a ma ja lɛ pɛ. Yehoyada ha nɛ a hule Baal jami he ɔ, nɛ a ywia amaga amɛ tsuo kɛ pue si. E ha nɛ osɔfo ɔmɛ kɛ Levi bi ɔmɛ ya tsu ní ngɛ sɔlemi we ɔ konɛ ma a nɛ sɔmɔ Yehowa ngɛ lejɛ ɔ ekohu. E ha nɛ ni komɛ daa sɔlemi we ɔ agbo ɔ nya, konɛ nihi nɛ a he tsɔ we nɛ a ko sɛ mi. Lɔ ɔ se ɔ, Yehoyada kɛ ma nikɔtɔma amɛ ngɔ Yoash kɛ ho matsɛ we ɔ ya, nɛ a ha nɛ e hi matsɛ sɛ ɔ nɔ. Yuda bi ɔmɛ a bua jɔ wawɛɛ nitsɛ. Lɔ ɔ se ɔ, a nyɛ nɛ a sɔmɔ Yehowa ejakaa a gbe Atalia yiwutsotsɛ ɔ, nɛ a ja we Baal hu. Anɛ o na bɔ nɛ kã nɛ Yehoyada pee ɔ ye bua nihi fuu ha lo?