Nineve ji Asiria ma ngua. Nihi nɛ a ngɛ lejɛ ɔ peeɔ ní yayamihi. Yehowa de gbalɔ Yona ke e ya de Nineve ma mi bi ɔmɛ ke a kpa ní yayami ɔmɛ peemi. Se Yona tu fo kɛ ho he kpa ya. E ya sɛ mele ko nɛ e yaa Tarsis ɔ mi, nɛ e je.

Benɛ a yaa ngɛ wo ɔ nɔ ɔ, kɔɔhiɔ ngua ko fia, nɛ nihi nɛ a tsuɔ ní ngɛ mele ɔ mi ɔ a tsui po. A sɔle ha a mawu ɔmɛ nɛ a bi ke: ‘Mɛni he je nɛ nɔ́ nɛ ɔ ngɛ nɔ yae ɔ?’ Pee se kulaa a, Yona de mɛ ke: ‘Imi lɛ i pee. Yehowa de mi ke ma pee nɔ́ ko, se i pee we nɛ i tu fo. Nyɛ sake mi kɛ fɔ̃ wo ɔ mi, kɛkɛ kɔɔhiɔ ɔ ma kpa fiami.’ Nihi nɛ a tsuɔ ní ngɛ mele ɔ mi ɔ sume nɛ a sake Yona kɛ fɔ̃ wo ɔ mi. Se Yona ke doo e suɔ nɛ a sake lɛ kɛ fɔ̃ wo ɔ mi. Benɛ a sake Yona kɛ fɔ̃ wo ɔ mi ɔ, kɔɔhiɔ kpa fiami.

Yona susu kaa e ma gbo. Benɛ e ngɛ mue kɛ yaa wo ɔ sisi ɔ, e sɔle ha Yehowa. Yehowa ha nɛ lo agbo ko mi Yona, se Yona gbo we. Benɛ Yona ngɛ lo ɔ muklii mi ɔ, Yona sɔle nɛ e de Yehowa ke: ‘I ngɛ mo si woe kaa ma bu mo tue be fɛɛ be.’ Yona ye ligbi etɛ ngɛ lo ɔ mi mi, se Yehowa bu e he nɛ e gbo we. Yehowa ha nɛ lo ɔ vie Yona kɛ fɔ wo ɔ nya he ko.

Yehowa he Yona yi wami. Se anɛ lɔ ɔ tsɔɔ kaa Yona be Nineve yae hu lo? Dɛbi, e tsɔɔ we jã. Yehowa kpale de Yona ke e ho Nineve ya. Jehanɛ lɛɛ Yona bu Yehowa tue. E ya lejɛ ɔ nɛ e ya de jamɛ a yayami peeli ɔmɛ ke: ‘Ngɛ ligbi 40 mi ɔ, a ma kpata Nineve hɛ mi.’ Se nyakpɛ nɔ́ ko ba. Nineve bi ɔmɛ bu Yona tue, nɛ a kpa ní yayami ɔmɛ peemi. Nineve matsɛ ɔ de ma mi bi ɔmɛ ke: ‘Nyɛ kpa Mawu pɛɛ, nɛ nyɛ tsake nyɛ tsui. Eko ɔ, e be wa hɛ mi kpatae.’ Benɛ Yehowa na kaa Nineve bi ɔmɛ tsake a tsui ɔ, e kpataa we a hɛ mi.

Yona mi mi fu kaa Yehowa kpataa we ma a hɛ mi. Mo susu he nɛ o hyɛ: Yehowa to e tsui si, nɛ e na Yona mɔbɔ. Se Yona lɛɛ Nineve bi ɔmɛ a ní pee we lɛ mɔbɔ. E ya hi tso ko nɛ e ha kɛ pee hɔ̃ ɔ sisi ngɛ ma a se, nɛ e tu e hɛ mi. Si kake too ɔ, tso ɔ gbo, nɛ Yona mi mi fu. Yehowa de Yona ke: ‘O bua jɔ tso nɛ ɔ he wawɛɛ pe Nineve bi ɔmɛ. I na mɛ mɔbɔ, nɛ a yi ná wami.’ Mɛni he je nɛ e dɔ mo kaa i na mɛ mɔbɔ ɔ? Nineve bi ɔmɛ a he hia kulaa pe tsohi.

Asiria Nɔ Yemi ɔ ngɔ Israel wɛtso nyɔngma matsɛ yemi ɔ kɛ wo a nɔ yemi ɔ sisi konɛ a ye a nɔ. Senakerib, nɛ ji Asiria matsɛ ɔ suɔ kaa e maa ngɔ Yuda wɛtso enyɔ matsɛ yemi ɔ hu kɛ piɛɛ he. E bɔni Yuda ma amɛ ngɔmi kakaaka. Se ma nɛ e bua jɔ he kaa e maa ngɔ ji Yerusalɛm. Senakerib li kaa Yehowa ngɛ Yerusalɛm ma a he bue.

Hezekia nɛ ji Yuda matsɛ ɔ ha Senakerib sika fuu konɛ e ngmɛɛ Yerusalɛm ma a he. Senakerib ngɔ sika a mohu lɛɛ, se e tsɔ e ta buli ɔmɛ kɛ ho Yerusalɛm ya konɛ a ya tua ma a. Benɛ Yerusalɛm bi ɔmɛ na kaa e piɛ bɔɔ nɛ Asiria bi ɔmɛ maa su a he ɔ, a tsui po. Hezekia de mɛ ke: ‘Nyɛ ko ye gbeye. Asiria bi ɔmɛ a he wa mohu lɛɛ, se Yehowa ma ha nɛ wa he maa wa pe mɛ.’

Senakerib tsɔ Rabshake ɔ nɛ ji e tsɔlɔ ɔ kɛ ho Yerusalɛm ya, konɛ e ya ye ma mi bi ɔmɛ a he fɛu. Rabshake ɔ ya da Yerusalɛm gbogbo ɔ se nɛ e kpa ngmlaa ke: ‘Yehowa be nyɛe maa ye bua nyɛ. Nyɛ ko ha nɛ Hezekia nɛ mlɔɔ nyɛ. Mawu ko be nyɛe ma kpɔ̃ nyɛ ngɛ wa dɛ.’

Hezekia sɔle nɛ e bi Yehowa nɔ́ nɛ e sa kaa e pee. Yehowa ha lɛ heto ke: ‘O tsui nɛ ko po ngɛ nɔ́ nɛ Rabshake ɔ de ɔ he. Senakerib be nyɛe maa ngɔ Yerusalɛm ma a.’ Lɔ ɔ se ɔ, Senakerib ngma womi kɛ ya ha Hezekia. E ngma ngɛ womi ɔ mi ke: ‘Moo lɛɛ moo ngmɛɛ ma a he ha wɔ. Yehowa be nyɛe ma he nyɛ yi wami.’ Hezekia sɔle nɛ e de ke: ‘Yehowa, i kpa mo pɛɛ nɛ o he wa yi wami, konɛ nɔ fɛɛ nɔ nɛ na kaa mo pɛ ji anɔkuale Mawu.’ Yehowa de Hezekia ke: ‘Asiria matsɛ ɔ be Yerusalɛm bae. Ma bu ye ma a he.’

Senakerib susu kaa e be kɛe nɛ e maa ngɔ Yerusalɛm ma a. Asiria ta buli ɔmɛ ya to si ngɛ Yerusalɛm ma a se he ko. Se ligbi ko nyɔ mi ɔ, Yehowa tsɔ bɔfo ko kɛ ya lejɛ ɔ. Bɔfo ɔ gbe ta buli 185,000! Matsɛ Senakerib ta buli katsɛmɛ ɔmɛ tsuo gbo. Akɛnɛ a kpata Senakerib we bi ɔmɛ a hɛ mi he je ɔ, e kpale kɛ ho we mi ya. Yehowa bu Hezekia kɛ Yerusalɛm ma a he kaa bɔ nɛ e wo si ɔ. Ke o ngɛ Yerusalɛm jamɛ a be ɔ mi ɔ, anɛ o ko ngɔ o hɛ kɛ fɔ̃ Yehowa nɔ lo?