Yuda bi ɔmɛ si Yehowa si abɔ nɛ a ya ja lakpa mawuhi. Yehowa bɔ mɔde kaa e maa ye bua mɛ jehahi babauu. E tsɔ gbali fuu konɛ a bɔ mɛ kɔkɔ, se a bui tue. Mohu ɔ, a ye gbali ɔmɛ a he fɛu. Mɛni Yehowa pee loko a kpa amaga jami?

Nebukadneza nɛ ji Babilon matsɛ ɔ ngɔ ma amɛ kakaaka. Benɛ e ye Yerusalɛm nɔ kunimi ɔ, e nu Matsɛ Yehoyakin, nimli ngua amɛ, ta buli ɔmɛ, kɛ nihi nɛ a le ga ní tsumihi kɛ ho Babilon ya. E ngɔ níhi nɛ a he jua wa nɛ a ngɛ Yehowa sɔlemi we ɔ hulɔ. Lɔ ɔ se ɔ, Nebukadneza pee Zedekia Yuda matsɛ.

Sisije ɔ, Zedekia buɔ Nebukadneza tue. Mahi nɛ bɔle mɛ, kɛ lakpa gbali ɔmɛ wo Zedekia ga kaa e te si kɛ si Babilon matsɛ ɔ. Se Yeremia bɔ lɛ kɔkɔ ke: ‘Ke o te si kɛ wo Babilon matsɛ ɔ, nɔ gbemi, kɛ hwɔ, kɛ hiɔ maa ba Yuda.’

Benɛ Zedekia ye matsɛ jeha kpaanyɔ ɔ, e pee e juɛmi kaa e maa te si kɛ wo Babilon matsɛ ɔ. E de Ijipt ta buli ɔmɛ kaa a ye bua lɛ. Kɛkɛ nɛ Nebukadneza tsɔ e ta buli ɔmɛ konɛ a ya tua Yerusalɛm ma a. Ta buli ɔmɛ ya bɔle ma a kɛ kpe. Yeremia de Zedekia ke: ‘Yehowa ke, ke nyɛ ngmɛɛ nyɛ he kɛ ha Babilon bi ɔmɛ ɔ, nyɛɛ kɛ ma a tsuo yi ma ná wami. Se ke nyɛ pee we jã a, Babilon bi ɔmɛ maa sã Yerusalɛm ma a, nɛ a maa nuu nyɛ kɛ ho.’ Zedekia de ke: ‘I be ma a he ngmɛɛe ha mɛ!’

Jeha kake kɛ fã se ɔ, Babilon ta buli ɔmɛ ku Yerusalɛm gbogbo ɔmɛ, nɛ a tsɔ ma a la. A sã sɔlemi we ɔ, nɛ a gbe nihi fuu, nɛ a nuu nimli akpehi abɔ kɛ je.

Zedekia tu fo kɛ je Yerusalɛm, se Babilon bi ɔmɛ nyɛɛ e se. A ya nu lɛ ngɛ he ko nɛ e kɛ Yɛriko he kɛ we, nɛ a kɛ lɛ ya ha Nebukadneza. Babilon matsɛ ɔ ha nɛ a gbe Zedekia binyumu ɔmɛ ngɛ e hɛ mi. Lɔ ɔ se ɔ, a ywia Zedekia hɛ ngmɛ, nɛ a wo lɛ tsu, nɛ e gbo ngɛ lejɛ ɔ pee se. Se Yehowa wo Yuda bi ɔmɛ si ke: ‘Jeha 70 se ɔ, ma ngɔ nyɛ kɛ ya nyɛ ma a mi ngɛ Yerusalɛm.’

Mɛni a maa pee nihewi kɛ zangmawi nɛ a nuu mɛ kɛ ho Babilon ya a? Anɛ a maa ya nɔ nɛ a ye Yehowa anɔkuale lo?

Benɛ Nebukadneza ngɔ Yuda nimli titli ɔmɛ kɛ ho Babilon ya a, e ha nɛ nyumu ko nɛ a tsɛɛ lɛ ke Ashpinaz nɛ e tsuɔ ní ngɛ e we ɔ mi ɔ hyɛ a nɔ. Nebukadneza de Ashpinaz ke e hla nyumuwi nɛ a ngɛ he wami nɛ a nɔ tsɔ ngɛ ni ɔmɛ a kpɛti. A ma tsɔse nyumuwi nɛ ɔmɛ jeha etɛ. Tsɔsemi ɔ ma dla mɛ kɛ ha ní tsumi nguahi ngɛ Babilon. E sa nɛ nyumuwi nɛ ɔmɛ nɛ a kase ní ngmami, kɛ ní kanemi, nɛ́ a nyɛ nɛ a tu Babilon bi ɔmɛ a gbi nɛ ji Akadia a hulɔ. E sa nɛ a ye niye ní nɛ matsɛ ɔ kɛ e nimeli ɔmɛ yeɔ ɔ eko. Nyumuwi nɛ ɔmɛ a kpɛti nihi eywiɛ ji Daniɛl, Hanania, Mishael, kɛ Azaria. Ashpinaz ha mɛ Babilon biɛhi nɛ ji, Belteshaza, Shadrak, Meshak, kɛ Abɛdnego. Anɛ tsɔsemi nɛ a ma ná a ma ha nɛ a ma kpa Yehowa sɔmɔmi lo?

Nyumuwi eywiɛ nɛ ɔmɛ fia a pɛɛ si kaa a maa bu Yehowa tue. A le kaa e sɛ nɛ a ye matsɛ ɔ niye ní ɔ, ejakaa Yehowa Mlaa a tsɔɔ kaa niye ní ɔ ekomɛ a he tsɔ we. Enɛ ɔ he ɔ, a de Ashpinaz ke: ‘Wa kpa mo pɛɛ, ko ha wɔ matsɛ ɔ niye ní ɔ eko.’ Ashpinaz de mɛ ke: ‘Ke nyɛ yi ní ɔ, nɛ matsɛ ɔ na kaa nyɛ flãã a, e maa gbe mi!’

Daniɛl ná juɛmi ko. E de nɔ nɛ ngɛ a nɔ hyɛ ɔ ke: ‘Wa kpa mo pɛɛ nɛ o ha wɔ ba kɛ nyu pɛ ligbi nyɔngma. Lɔ ɔ se ɔ, o kɛ wɔ nɛ to nyumuwi kpa amɛ nɛ a yeɔ matsɛ ɔ niye ní ɔ he nɛ o hyɛ.’ Nɔ hyɛlɔ ɔ kplɛɛ nɔ́ nɛ e de ɔ nɔ.

Ligbi nyɔngma se ɔ, a na kaa Daniɛl kɛ e huɛmɛ etɛ ɔmɛ plɔke pe nyumuwi kpa amɛ tsuo. Yehowa bua jɔ kaa a bu lɛ tue, nɛ e ha Daniɛl nile konɛ e nu ninahi kɛ nlamihi a sisi.

Benɛ a tsɔɔ mɛ ní ɔ ta a, Ashpinaz ngɔ nyumuwi ɔmɛ kɛ ho Matsɛ Nebukadneza ngɔ ya. Matsɛ ɔ kɛ mɛ tu munyu nɛ e na kaa Daniɛl, Hanania, Mishael, kɛ Azaria le ní, nɛ a hɛ mi ka si pe nyumuwi kpa amɛ tsuo. Matsɛ ɔ hla nihewi eywiɛ nɛ ɔmɛ konɛ a tsu ní ngɛ e we ɔ mi. Ke matsɛ ɔ ngɛ ga womi ko hlae ɔ, mɛ ji nihi nɛ e ma bi. Yehowa ha nɛ a le ní pe matsɛ ɔ ga woli kɛ e kunya yeli ɔmɛ tsuo.

E ngɛ mi kaa Daniɛl, Hanania, Mishael, kɛ Azaria ya je ma kpa nɔ lɛɛ, se a hɛ ji nɔ kaa a ji Yehowa sɔmɔli. Ke mo hu o ngɛ he ko nɛ o fɔli be lejɛ ɔ, anɛ o hɛ maa hi Yehowa nɔ lo?