Ligbi ko nyɔ mi ɔ, Matsɛ Nebukadneza nla nlami ko nɛ ngɛ gbeye wawɛɛ. Enɛ ɔ he ɔ, e hao wawɛɛ nɛ e nyɛ we nɛ e hwɔ mahe. E tsɛ e kunya yeli ɔmɛ kɛ ba e ngɔ, nɛ e de mɛ ke: ‘Nyɛɛ tsɔɔ mi nlami nɛ i nla a sisi.’ A de lɛ ke: ‘Nɛnɛ, mo de wɔ nlami ɔ.’ Se Nebukadneza de mɛ ke: ‘Dɛbi! Nyɛ de mi nlami nɛ i nla a, ke pi jã a, ma gbe nyɛ.’ A kpale de lɛ ke: ‘Mo de wɔ nlami nɛ o nla a, kɛkɛ ɔ, wa maa tsɔɔ mo sisi.’ E de mɛ ke: ‘Nyɛ tsuo nyɛ ngɛ hlae nɛ nyɛɛ mlɔɔ ye hɛ mi. Nyɛ de mi nlami nɛ i nla a!’ A de lɛ ke: ‘Nɔ ko be nɛ e ma nyɛ maa pee nɔ́ nɛ o ngɛ dee ɔ. Nɔ́ nɛ o ke waa pee ɔ be hie peemi.’

Nebukadneza mi mi fu wawɛɛ, enɛ ɔ he ɔ, e wo mlaa ke a gbe ní leli ɔmɛ tsuo ngɛ ma a mi. Daniɛl, Shadrak, Meshak, kɛ Abɛdnego hu piɛɛ nihi nɛ matsɛ ɔ fã ke a gbe mɛ ɔ he. Daniɛl kpa matsɛ ɔ pɛɛ konɛ e ha mɛ be bɔɔ. E kɛ e huɛmɛ ɔmɛ sɔle, nɛ a de Yehowa ke e ye bua mɛ. Mɛni Yehowa pee kɛ ye bua mɛ?

Yehowa je Nebukadneza nlami ɔ kɛ tsɔɔ Daniɛl ngɛ nina mi, nɛ e tsɔɔ lɛ nlami ɔ sisi. E nɔ jena a, Daniɛl ya matsɛ ɔ tsɔlɔ ɔ ngɔ nɛ e de lɛ ke: ‘Koo gbe ní leli ɔmɛ a ti nɔ ko. Ma nyɛ ma tsɔɔ nlami nɛ matsɛ ɔ nla a sisi.’ Tsɔlɔ ɔ ngɔ Daniɛl kɛ ho Nebukadneza ngɔ ya. Daniɛl de matsɛ ɔ ke: ‘Mawu je nɔ́ nɛ maa ba hwɔɔ se ɔ kɛ tsɔɔ mo. Nlami nɛ o nla a ji nɛ ɔ nɛ: O na amaga ngua ko. A kɛ sika tsu lɛ pee amaga a yi, e gugue ɔ, a kɛ sika hiɔ nɛ pee, e mlɛ mi kɛ e fiɔ ɔ, a kɛ akɔblee nɛ pee. A kɛ dade nɛ pee e nane tsohi, nɛ e nanewɛɛ ɔmɛ ɔ, a kɛ dade pee fã, nɛ a kɛ zu pee fã. Kɛkɛ nɛ tɛ ko je yoku ko nɔ nɛ e ba fia amaga a nanewɛɛ ɔmɛ. Amaga a ywia wɔtsɔwɔtsɔ nɛ e pee kaa bunyuku, nɛ kɔɔhiɔ ba muɔ lɛ kɛ je. Tɛ ɔ plɛ pee yoku agbo ko nɛ ha je ɔ mi tsuo.’

Daniɛl de matsɛ ɔ ke: ‘Nlami nɛ o nla a sisi ji nɛ ɔ nɛ: O matsɛ yemi ɔ ji yi nɛ a kɛ sika tsu pee ɔ nɛ. Sika hiɔ ɔ ji matsɛ yemi kpa nɛ maa ba ngɛ o se. Lɔ ɔ se ɔ, matsɛ yemi kpa ko nɛ ngɛ kaa akɔblee maa ba, nɛ e maa ye je ɔ tsuo nɔ. Matsɛ yemi kpa nɛ maa ba ngɛ lɔ ɔ se ɔ he maa wa kaa dade. Nyagbe kulaa a, matsɛ yemi ɔ mi ma gba, nɛ fã he maa wa kaa dade, nɛ fã hu maa pee kaa zu. Tɛ ɔ nɛ plɛ pee yoku ɔ ji Mawu Matsɛ Yemi ɔ nɛ. E ma kpata matsɛ yemi kpa amɛ tsuo a hɛ mi, nɛ e maa hi si kɛ ya neneene.’

Nebukadneza kpla si ngɛ Daniɛl hɛ mi, nɛ e kɛ e hɛ mi bu si. E de Daniɛl ke: ‘O Mawu ɔ lɛ je nlami nɛ ɔ kpo kɛ tsɔɔ mo. Mawu ko be kaa lɛ.’ Nebukadneza ha we nɛ a gbe Daniɛl, mohu ɔ, e ngɔ lɛ kɛ da ní leli ɔmɛ tsuo a nya, nɛ e pee lɛ nɔ yelɔ ngɛ Babilon kpokpa a nɔ. Anɛ o na bɔ nɛ Yehowa plɛ kɛ ha Daniɛl sɔlemi ɔ heto ha lo?

Benɛ Matsɛ Nebukadneza nla nlami nɛ kɔɔ amaga a he ɔ se ɔ, e pee sika tsu amaga agbo ko. E ngɔ amaga a kɛ ya ma Dura zugba kplanaa a nɔ, nɛ e tsɛ nimli nguahi nɛ a ngɛ ma a mi ɔ konɛ a ba bua a he nya ngɛ amaga a hɛ mi. Shadrak, kɛ Meshak, kɛ Abɛdnego hu piɛɛ ni ɔmɛ a he. Matsɛ ɔ de ni ɔmɛ ke: ‘Ke nyɛ nu nɛ titimatihi, kɛ bɛhi, kɛ saku slɔɔtoslɔɔtohi ngɛ pɛe ɔ, nyɛ kpla si nɛ nyɛ ja amaga a. Nɔ nɛ be si kplae ɔ, a ma sake lɛ kɛ fɔ flɔɔnɔɔ kɛ e mi la nɛ ngɛ tsoe gegeege mi.’ Anɛ Hebri bi etɛ ɔmɛ ma kpla si ha amaga a, aloo a ma ja Yehowa pɛ?

Matsɛ ɔ ha nɛ a bɔni la a fiami. Ni ɔmɛ tsuo kpla si nɛ a ja amaga a, se Shadrak, kɛ Meshak, kɛ Abɛdnego lɛɛ a kpla we si. Ni ɔmɛ a ti ni komɛ to he hɛ nɛ a de matsɛ ɔ ke: ‘Jamɛ a Hebri bi etɛ ɔmɛ kua si kplami ha amaga a.’ Nebukadneza ha nɛ a tsɛ mɛ kɛ ba, nɛ e de mɛ ke: ‘Ma ha nyɛ he blɔ ekohu nɛ́ nyɛ ja amaga a. Ke nyɛ ja we amaga a, ma sake nyɛ kɛ wo flɔɔnɔɔ ɔ mi. Mawu ko be nɛ e ma nyɛ ma he nyɛ yi wami.’ A ha lɛ heto ke: ‘E he hia we nɛ o ha wɔ he blɔ kpa ko hu. Wa Mawu ɔ ma nyɛ ma he wa yi wami. Nɛnɛ, ke wa Mawu ɔ he we wa yi wami po ɔ, wa be amaga a jae.’

Nebukadneza mi mi fu wawɛɛ. E de ni ɔmɛ ke: ‘Nyɛɛ wo flɔɔnɔɔ ɔ mi la nɛ e dɔ la si kpaago pe bɔ nɛ e dɔɔ la daa a!’ Lɔ ɔ se ɔ, e de e ta buli ɔmɛ ke: ‘Nyɛɛ fi nyumu nɛ ɔmɛ, nɛ nyɛ sake mɛ kɛ wo flɔɔnɔɔ ɔ mi!’ Akɛnɛ flɔɔnɔɔ ɔ mi dɔ la wawɛɛ he je ɔ, benɛ ta buli ɔmɛ su flɔɔnɔɔ ɔ he ɔ, ta buli ɔmɛ gbo nɔuu. Hebri bi etɛ ɔmɛ nɔ la a mi. Se benɛ Nebukadneza hyɛ flɔɔnɔɔ ɔ mi ɔ, e na kaa pi nihi etɛ nɛ a ngɛ flɔɔnɔɔ ɔ mi, mohu ɔ, e na nihi eywiɛ nɛ a ngɛ nyɛɛe ngɛ mi. E bi e ga woli ɔmɛ ke: ‘Anɛ pi nihi etɛ nɛ wa sake kɛ pue la a mi lo? I na nihi eywiɛ, nɛ a ti nɔ kake ngɛ kaa bɔfo!’

Nebukadneza hɛ kɛ su flɔɔnɔɔ ɔ he bɔɔ, nɛ e hia ngmlaa ke: ‘Mawu nɛ e nɔ kuɔ pe kulaa a tsɔli, nyɛɛ je kpo!’ E pee ni ɔmɛ tsuo nyakpɛ kaa Shadrak, kɛ Meshak, kɛ Abɛdnego je kpo ngɛ la a mi, nɛ nɔ́ ko pee we mɛ. A he ko he ko sɛ̃, a yi bwɔmi, kɛ a tade ɔmɛ hu sɛ̃, nɛ la su ku po ji fu ngɛ a he.

Nebukadneza de ke: ‘Shadrak, kɛ Meshak, kɛ Abɛdnego a Mawu ɔ kle. E tsɔ e bɔfo, nɛ e ba he a yi wami. Mawu kpa ko kɛ a Mawu ɔ sɔɛ.’

Anɛ mo hu o fia o pɛɛ si kaa ke o kɛ haomi saisaa ko kpe ɔ, o maa ye Yehowa anɔkuale kaa bɔ nɛ Hebri bi etɛ ɔmɛ pee ɔ lo?