A Da Si Nɛ A Ye Bua

Ligbi ko ɔ, Bob hɛɛ lɔle kɛ yaa e we mi ngɛ Alberta, Canada. Jamɛ a ligbi ɔ, kɔɔhiɔ ngɛ fiae, nɛ fiɛ̃ hu ngɛ yee wawɛɛ nitsɛ. Bob lɔle ɔ hɛɛ fo maa pee kilomita 100 (si tomi 60) ngɛ ngmlɛfia kake mi. Si kake too ɔ, e lɔle ɔ se tai ɔ kake pɛ, se e li. Jamɛ a be ɔ mi ɔ, e piɛɛ maa pee kilomita 5 (si tomi 3) pɛ nɛ e maa su e we ɔ mi.

Pee se ɔ, e ngma sɛ womi kɛ ya ha Yehowa Odasefohi nɛ a ngɛ e kpɔ ɔ mi ɔ, nɛ e tsɔɔ nɔ́ nɛ ya nɔ ɔ ngɛ sɛ womi ɔ mi. E ngma ke, “Benɛ odasefohi nihewi etɛ kɛ yihewi enyɔ komɛ nɛ a ngɛ a lɔle mi ɔ su ye kasa nya a, a ba a lɔle glaasi ɔ si nɛ a de mi ke ye lɔle tai ɔ pɛ. Wɔ tsuo wa da si ngɛ lɔle blɔ ɔ tue, nɛ a de mi ke a suɔ kaa a ma tsake ye tai ɔ kɛ ha mi. I li po ke ji i ngɛ lɔle tai kpa kɛ jack ngɛ ye lɔle ɔ mi. I hii si ngɛ ye glɔtsɛmɛ a sɛ ɔ mi, nɛ a sɛ lɔle ɔ sisi nɛ a na tai kɛ jack, nɛ a tsake ye tai ɔ kɛ ha mi. Kɔɔhiɔ ɔ mi jɔ wawɛɛ nitsɛ, nɛ snoo hu ngɛ nɛe. Tadehi nɛ a wo ɔmɛ a he tsɔ saminya, se a tsake ye tai ɔ ha mi, nɛ i nyɛ nɛ i tsa ye blɔ hiami ɔ nɔ. Jinɛ imi nitsɛ i ko nyɛ we ye tai ɔ tsakemi.

“I naa Odasefohi nihewi etɛ kɛ yihewi enyɔ ɔmɛ si wawɛɛ. A ba kpɔ ɔ mi konɛ a ba slaa nihi ngɛ a wehi a mi nɛ a fiɛɛ kɛ ha mɛ. Ngɛ anɔkuale mi ɔ, a kɛ nɔ́ nɛ a ngɛ nihi tsɔɔe ɔ ngɛ ní tsue. Kaa pi nɛ a ye bua mi ɔ, jinɛ ye ní ko pee mɔbɔ wawɛɛ, ye hɛ sa nɔ́ nɛ a pee kɛ ha mi ɔ. O ma de ke a ji bɔfohi nɛ Mawu tsɔ mɛ kaa a ba ye bua mi jamɛ a ligbi ɔ.”