NÍ KASEMI 49
Mɛni O Maa Pee Konɛ Bua Jɔmi Nɛ Hi O Weku ɔ Mi?—Fã 1
Nyumu kɛ yo nɛ a sɛ gba si himi mi ehe ɔ hyɛɔ blɔ kaa bua jɔmi nɛ a ná ngɛ yo kpeemi ligbi ɔ nɔ ɔ maa hi si daa. E ma nyɛ maa ba mi jã hulɔ. Kristofohi nɛ a sɛ gba si himi mi be kɛkɛɛ, nɛ́ a ngɔ Baiblo ɔ mi ga womi kɛ tsu ní ɔ na kaa e ma nyɛ maa ba mi jã.
1. Mɛni ga womi nɛ Baiblo ɔ kɛ ha hunomɛ?
Yehowa ngɔ he blɔ kɛ wo huno ɔ dɛ kaa e pee weku ɔ yi. (Kane Efeso Bi 5:23.) Yehowa hyɛɔ blɔ kaa huno ɔ nɛ mwɔ yi mi kpɔhi nɛ maa ye bua weku ɔ. Baiblo ɔ wo hunomɛ ga ke: “Nyɛɛ ya nɔ nɛ nyɛɛ suɔ nyɛ yi ɔmɛ.” (Efeso Bi 5:25) Mɛni enɛ ɔ tsɔɔ? Huno nɛ e suɔ e yo ɔ kɛ lɛ yeɔ ngɛ mi mi jɔmi mi ke a ngɛ we mi kɛ benɛ a je kpo. E poɔ e yo ɔ he piɛ kɛ jeɔ níhi nɛ maa ye lɛ awi ɔ he, nɛ e peeɔ nɔ́ fɛɛ nɔ́ nɛ e ma nyɛ konɛ e tsu e hiami níhi a he ní ha lɛ konɛ e yo ɔ bua nɛ jɔ. (1 Timoteo 5:8) Nɔ́ nɛ he hia pe kulaa ji, e yeɔ bua e yo ɔ konɛ huɛ bɔmi gbagbanii nɛ hi e kɛ Yehowa a kpɛti. (Mateo 4:4) Kaa nɔ hyɛmi nɔ́ ɔ, e kɛ e yo ɔ ma nyɛ maa sɔle nɛ a kane Baiblo ɔ kɛ bla. Ke huno ɔ jeɔ suɔmi mi kɛ hyɛɛ e yo ɔ nɔ ɔ, lɔ ɔ haa nɛ huɛ bɔmi kpakpa hiɔ nyumu ɔ kɛ Yehowa a kpɛti.—Kane 1 Petro 3:7.
2. Mɛni ga womi nɛ Baiblo ɔ kɛ ha yigbayihi?
Mawu Munyu ɔ de yigbayihi kaa e sa nɛ a ‘je bumi nɛ mi kuɔ kpo kɛ ha a hunomɛ.’ (Efeso Bi 5:33) Mɛni blɔ nɔ nɛ yogbayo maa gu kɛ pee jã? E ma nyɛ ma susu su kpakpahi nɛ e huno ɔ ngɛ, kɛ mɔde nɛ e ngɛ bɔe konɛ e hyɛ lɛ kɛ a bimɛ ɔmɛ a nɔ ɔ he. Jehanɛ hu ɔ, e ma nyɛ ma je bumi kpo kɛ gu e huno ɔ yi mi kpɔhi nɛ e ma fĩ se, munyu nɛ e kɛ lɛ maa tu ngɛ bumi mi kɛ e he munyu kpakpa nɛ e maa tu ɔ nɔ, ke e huno ɔ sɔmɔ we Yehowa po.
3. Mɛni nɛ huno kɛ e yo maa pee konɛ suɔmi nɛ ngɛ a kpɛti ɔ mi nɛ wa?
Baiblo ɔ de ngɛ nihi nɛ a sɛ gba si himi mi ɔ a he ke: “Mɛ ni enyɔ ɔmɛ a maa pee he lo kake.” (Mateo 19:5) Enɛ ɔ tsɔɔ kaa e sa nɛ a bɔ mɔde wawɛɛ kaa a be blɔ ngmɛe nɛ nɔ́ ko nɛ puɛ suɔmi nɛ ngɛ a kpɛti ɔ. Ke a náa be kɛ haa a sibi, nɛ a jeɔ a tsui mi kɛ sɛɛɔ ní, nɛ a deɔ a sibi bɔ nɛ a nuɔ he ha ngɛ níhi a he ɔ, e ma ha nɛ suɔmi nɛ ngɛ a kpɛti ɔ mi maa wa. Ngɛ Yehowa se ɔ, a ha we nɛ nɔ́ ko aloo nɔ kpa ko he nɛ hia mɛ pe a he piɛɛlɔ ɔ. A hyɛɛ saminya konɛ a kɛ nɔ kpa ko nɛ ko bɔ ngɛ blɔ nɛ sɛ nɔ.
MOO KASE BABAUU
Moo hyɛ Baiblo sisi tomi mlaahi nɛ ma nyɛ ma ha nɛ o gba a nɛ pee gbugbuugbu.
4. Hunomɛ, nyɛɛ suɔ nyɛ yi ɔmɛ nɛ nyɛɛ hyɛ a nɔ saminya
Baiblo ɔ de ke, ‘e sa kaa hunomɛ nɛ a suɔ a yi ɔmɛ kaa mɛ nitsɛmɛ a nɔmlɔ tso ɔmɛ.’ (Efeso Bi 5:28, 29) Mɛni lɔ ɔ tsɔɔ? Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Mɛni ji ní komɛ nɛ huno ma nyɛ maa pee kɛ tsɔɔ kaa e suɔ e yo, nɛ e hyɛɔ e nɔ saminya?
Nyɛɛ kane Kolose Bi 3:12, nɛ́ nyɛ susu sane bimi nɛ ɔ he:
Mɛni blɔ nɔ nɛ huno ko maa gu kɛ je su nɛ ɔmɛ kpo ngɛ e gba si himi ɔ mi?
5. Yigbayihi, nyɛɛ suɔ nyɛ hunomɛ nɛ nyɛɛ ba nyɛ he si kɛ ha mɛ
Baiblo ɔ woɔ yigbayihi he wami kaa a ba a he si kɛ ha a hunomɛ ke a huno ɔmɛ sɔmɔɔ Yehowa jio, a sɔmɔ we lɛ jio. Nyɛɛ kane 1 Petro 3:1, 2, nɛ́ nyɛ susu sane bimihi nɛ nyɛɛ se nɛ ɔmɛ a he:
Ke o huno ɔ sɔmɔ we Yehowa a, atsinyɛ jemi ko be he kaa o maa suɔ nɛ e ba sɔmɔ lɛ. Mɛni ji blɔ nɛ hi pe kulaa nɔ nɛ o maa gu kɛ ye bua lɛ? Fiɛɛmi nɛ o maa hi fiɛɛe ha lɛ be fɛɛ be ɔ lo, aloo su kpakpa kpo nɛ o ma je, kɛ o he si nɛ o maa ba kɛ ha lɛ? Mɛni he je?
Ke huno ko kɛ e yo ngɛ yi mi kpɔ ko mwɔe nɛ a kɛ a sibi kpa gbi ɔ, e yeɔ bua saminya. Se be komɛ ɔ, e ma nyɛ maa ba kaa yo ɔ kɛ e huno ɔ be gbi kpae. Ke e ba jã a, yo ɔ ma nyɛ maa je mi mi jɔmi kɛ bumi mi kɛ tsɔɔ e susumi. Se e sa nɛ e yɔse kaa Yehowa ha hunomɛ he blɔ kaa a mwɔ yi mi kpɔ nɛ sa kɛ ha a weku ɔ. E sa nɛ e bɔ mɔde nɛ e fĩ yi mi kpɔ nɛ e huno ɔ maa mwɔ ɔ se. Ke e pee jã a, e ma ha nɛ bua jɔmi maa hi we ɔ mi. Nyɛɛ kane 1 Petro 3:3-5, nɛ́ nyɛ susu sane bimi nɛ ɔ he:
Kɛ Yehowa nuɔ he ha kɛɛ ke yogbayo baa e he si kɛ haa e huno?
6. Nyɛ ma nyɛ ma tsu nyagbahi nɛ ngɛ nyɛ gba si himi ɔ mi ɔ he ní
Gba si himi ko be nɛ nyagba be mi. Enɛ ɔ he ɔ, e sa nɛ hunomɛ kɛ a yihi nɛ a pee kake kɛ tsu nyagba amɛ a he ní. Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
Ngɛ video ɔ mi ɔ, mɛni tsɔɔ kaa nyumu ɔ kɛ e yo ɔ a kpɛti ngɛ puɛe?
Mɛni a pee konɛ a gba a nɛ pee gbugbuugbu?
Nyɛɛ kane 1 Korinto Bi 10:24 kɛ Kolose Bi 3:13. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:
Ngɛ mɛni blɔ nɔ nɛ ke nihi nɛ a sɛ gba si himi mi ɔ kɛ ga womi nɛ ɔ tsu ní ɔ, e ma ha nɛ a gba a nɛ pee gbugbuugbu?
Baiblo ɔ de ke e sa nɛ waa bu wa sibi. Mi mi jɔmi kpo nɛ wa ma je kɛ tsɔɔ wa sibi ɔ tsɔɔ kaa wa ngɛ bumi kɛ ha wa sibi. Nyɛɛ kane Roma Bi 12:10, nɛ́ nyɛ susu sane bimi nɛ ɔmɛ a he:
Anɛ e sa nɛ huno loo yogbayo nɛ mlɛ nɛ e he piɛɛlɔ ɔ nɛ je bumi kpo kɛ tsɔɔ lɛ kekle loko lɛ hu e pee jã lo? Mɛni he je nɛ o de jã a?
NI KOMƐ DEƆ KE: “Kake peemi be wa kpɛti kaa sa a.”
Mɛni blɔ nɔ o maa gu kɛ tsɔɔ mɛ kaa Baiblo ɔ ma nyɛ maa ye kɛ bua mɛ?
NYA MWƆMI
Huno kɛ yogbayo ma nyɛ ma ná bua jɔmi ke a ngɛ suɔmi kɛ ha a sibi, a buɔ a sibi, nɛ a kɛ Baiblo sisi tomi mlaahi tsuɔ ní.
Mi Nylɔmi
Mɛni huno ma nyɛ maa pee kɛ ye bua konɛ bua jɔmi nɛ hi e gba si himi ɔ mi?
Mɛni yogbayo ma nyɛ maa pee kɛ ye bua konɛ bua jɔmi nɛ hi e gba si himi ɔ mi?
Ke o sɛ gba si himi mi ɔ, mɛni Baiblo sisi tomi mlaa lɛ maa ye bua mo konɛ o gba si himi ɔ nɛ pee gbugbuugbu?
NÍ KPAHI NƐ MAA YE BUA MO
Moo kase níhi nɛ o ma nyɛ maa pee konɛ bua jɔmi nɛ hi o weku ɔ mi ɔ he ní.
Moo hyɛ la ko nɛ a pee lɛ video nɛ tsɔɔ jɔɔmihi nɛ nihi nɛ a sɛ gba si himi mi ɔ ma ná ke a kɛ Mawu blɔ tsɔɔmi tsu ní.
Moo hyɛ nɔ́ nɛ yigbayihi a he si nɛ a maa ba kɛ ha a hunomɛ ɔ tsɔɔ.
“Yigbayihi, Mɛni He Je Nɛ E Sa Nɛ Nyɛɛ Ba Nyɛ He Si Kɛ Ha Nyɛ Hunomɛ ɔ?” (Hwɔɔmi Mɔ, May 15, 2010)
Kɛ gba si himi he piɛɛli komɛ nyɛ nɛ a ye nyagbahi nɛ a mi wa nɛ a kɛ kpe ngɛ a gba a mi, nɛ́ gba mi pomi hu piɛɛ he ɔ nɔ ha kɛɛ?