1, 2. Mɛni kpɔ mi nɔ hyɛli komɛ yɔse ngɛ asafohi fuu a mi?

E PIƐ bɔɔ nɛ kpɔ mi nɔ hyɛlɔ ɔ kɛ asafo mi nikɔtɔma amɛ maa gbe kpe nɛ e kɛ mɛ ngɛ pee ɔ nya. Benɛ e hyɛ nyɛmimɛ nyumu nɛ ɔmɛ a hɛ mi kɛ kpe ɔ, e ná suɔmi nɛ mi wa kɛ ha mɛ, ejakaa a ngɛ mɔde bɔe wawɛɛ. A ti ni komɛ wa ngɛ jeha mi nɛ a ma nyɛ ma fɔ lɛ po. Se nɔ́ ko ngɛ lɛ haoe, nɛ jamɛ a nɔ́ ɔ he hia. E bi mɛ ke, “Nyɛmimɛ, anɛ nyɛ ngɛ nyɛmimɛ nyumuhi tsɔsee konɛ a nyɛ nɛ a tsu blɔ nya ní tsumihi fuu ngɛ asafo ɔ mi lo?” Asafo mi nikɔtɔma amɛ le kaa benɛ kpɔ mi nɔ hyɛlɔ ɔ ba slaa mɛ nyɔhiɔ ekpa nɛ be ɔ, e wo mɛ he wami kaa a ná deka kɛ tsɔse nyɛmimɛ nyumuhi nɛ ngɛ asafo ɔ mi ɔ. Nyagbe ɔ, asafo mi nɔkɔtɔma a kake ha heto ke, “Ngɛ anɔkuale mi ɔ, wa nyɛ we nɛ waa pee nɔ́ ko tsɔ ngɛ he.” Asafo mi nikɔtɔma kpa amɛ hu kplɛɛ nɔ jã.

² Ke asafo mi nɔkɔtɔma ji mo ɔ, eko ɔ, mo hu o ma de jã. Kpɔ mi nɔ hyɛli komɛ yɔseɔ kaa e he hia nɛ asafo mi nikɔtɔmahi fuu nɛ a ngɔ be fuu kɛ tsɔse nyɛmimɛ nihewi kɛ nyumuhi nɛ a wa konɛ a da níhi a nya ngɛ asafo ɔ mi. Se eko ɔ, enɛ ɔ peemi he maa wa wawɛɛ. Mɛni he je?

3. (a) Mɛni Baiblo ɔ de nɛ tsɔɔ kaa e he hia nɛ wa tsɔse ni kpahi, nɛ mɛni he je nɛ e sa kaa wɔ tsuo wa bua nɛ jɔ jã peemi he? (Hyɛ sisi ningma.) (b) Mɛni he je nɛ eko ɔ, e maa ye ha asafo mi nikɔtɔma komɛ kaa a ma tsɔse nyɛmimɛ nyumuhi ɔ?

³ Ke asafo mi nɔkɔtɔma ji mo ɔ, atsinyɛ jemi ko be he kaa o le kaa e sa kaa o ná deka kɛ tsɔse nyɛmimɛ nyumuhi.a (Hyɛ sisi ningma.) O le hu kaa loko asafohi nɛ a ngɛ mwɔnɛ ɔ, kɛ asafohi nɛ a ma tsɔ hwɔɔ se ɔ tsuo a he maa wa a, e he hia nɛ wa ná nyɛmimɛ nyumuhi fuu. (Kane Yesaya 60:22.) Baiblo ɔ tsɔɔ kaa e sa nɛ o “tsɔɔ ni kpahi” ní. (Kane 2 Timoteo 2:2.) Se kɛ̃ ɔ, e he ma nyɛ maa wa kaa o ma ná deka kɛ pee jã. E sa nɛ o tsu o weku mi bimɛ a hiami níhi a he ní kɛ ha mɛ, nɛ o tsu mo nitsɛ o ní tsumi hulɔ. E sa nɛ o tsu asafo ɔ mi hiami níhi kɛ ní kpahi hu nɛ a he hia a he ní. Akɛnɛ ní tsumihi fuu ngɛ he je ɔ, nyɛ ha nɛ wa susu nɔ́ he je nɛ e he hia kaa o ná deka kɛ tsɔse ni kpahi ɔ he nɛ waa hyɛ.

KOO TO TSLE

4. Be komɛ ɔ, mɛni he je nɛ asafo mi nikɔtɔmahi gblaa a nane si kaa a ma tsɔse nyɛmimɛ nyumuhi ɔ?

⁴ Mɛni he je nɛ eko ɔ, e he maa wa ha nɔ ko kaa e ma ná deka kɛ tsɔse nyɛmimɛ nyumuhi ngɛ asafo ɔ mi ɔ? Eko ɔ, ni komɛ ma de ke: ‘Asafo ɔ mi ní tsumi komɛ ngɛ nɛ a he hia wawɛɛ nɛ e sa kaa a tsu he ní mla. Enɛ ɔ he ɔ, ke i tsɔse we nyɛmimɛ nyumuhi amlɔ nɔuu ɔ, lɔ ɔ be nɔ́ ko puɛe ngɛ asafo ɔ mi.’ Anɛ e ji anɔkuale lo? Eko ɔ, ní komɛ ngɛ nɛ e he maa hia kaa o tsu a he ní amlɔ nɔuu mohu lɛɛ, se ke o gbla o nane si ngɛ nyɛmimɛ nyumuhi a tsɔsemi he ɔ, e ma nyɛ maa ye asafo ɔ awi.

5, 6. Mɛni wa ma nyɛ maa kase ngɛ bɔ nɛ e sa kaa lɔle kudɔlɔ ko nɛ hyɛ e lɔle nɔ ha a mi? Kɛ waa kɛ enɛ ɔ ma nyɛ maa to nyɛmimɛ nyumuhi nɛ a ma tsɔse mɛ ngɛ asafo ɔ mi ɔ he ha kɛɛ?

⁵ Mo susu nɔ́ hetomi nɔ́ nɛ ɔ he nɛ o hyɛ. Lɔle kudɔlɔ le kaa loko e lɔle ɔ ma nyɛ ma tsu ní daa a, e he hia nɛ e tsake nu nɛ ngɛ lɔle ɔ mi ɔ kpamkpam. Se eko ɔ, e ma susu kaa pɛtloo nɛ e maa po kɛ wo lɔle ɔ mi ɔ he hia wawɛɛ pe lɔle ɔ mi nu nɛ e maa hi tsakee ɔ, ejakaa ke e pui pɛtloo wui lɔle ɔ mi ɔ, lɔle ɔ be nyɛe. Ke e be deka a, eko ɔ, e ma susu kaa e ma tsake nu ɔ pee se. Ke e tsakee we nu nɛ ngɛ lɔle ɔ mi ɔ po ɔ, lɔle ɔ ma nyɛ ma tsu ní be saii. Se enɛ ɔ kɛ haomi ma nyɛ maa ba. Ke e he hia kaa lɔle kudɔlɔ nɛ tsake nu nɛ ngɛ lɔle ɔ mi ɔ nɛ e pee we jã a, kɛ yaa kɛ yaa a, lɔle ɔ ma puɛ. Nyagbenyagbe ɔ, e ma puɛ be kɛ sika fuu kɛ dla lɔle ɔ. Mɛni enɛ ɔ tsɔɔ?

⁶ Enɛ ɔ tsɔɔ kaa e sa nɛ asafo mi nikɔtɔmahi nɛ a tsu níhi nɛ a he hia a a he ní mla. Ke a pee we jã a, lɔ ɔ maa ye asafo ɔ awi. Kaa bɔ nɛ e sa nɛ lɔle kudɔlɔ nɛ po pɛtloo kɛ wo e lɔle mi ɔ, jã kɛ nɛ e sa kaa asafo mi nikɔtɔmahi nɛ a bɔ mɔde nɛ a ‘le níhi nɛ a he hia a mi tso.’ (Filipi Bi 1:10) Se eko ɔ, asafo mi nikɔtɔma komɛ kɛ a be tsuo tsuɔ níhi nɛ a he hia a he ní hluu po kaa a ná we deka kɛ tsɔse nyɛmimɛ nyumuhi. A ngɛ kaa lɔle kudɔlɔ ɔ nɛ e tsakee we e lɔle ɔ mi nu ɔ. Ke asafo mi nikɔtɔmahi tsɔse we nyɛmimɛ nyumuhi mla a, e maa su be nɛ a be nyɛmimɛ nyumuhi fuu nɛ a tsɔse mɛ náe konɛ a tsu níhi a he ní ngɛ asafo ɔ mi.

7. Kɛ e sa kaa waa na asafo mi nikɔtɔmahi nɛ a náa deka kɛ tsɔseɔ nyɛmimɛ nyumuhi ɔ ha kɛɛ?

⁷ Enɛ ɔ he ɔ, ko susu kaa e he hia we nɛ a tsɔse nyɛmimɛ nyumuhi amlɔ nɔuu. Asafo mi nikɔtɔmahi nɛ a hyɛɛ nɔ́ kɛ yaa tsitsaa nɛ a náa deka kɛ tsɔseɔ ni kpahi ɔ ngɛ nile, nɛ nyɛmimɛ nyumuhi kɛ yihi tsuo náa a he se. (Kane 1 Petro 4:10.) Mɛni blɔ nɔ asafo ɔ náa a he se ngɛ?

NYƐƐ KƐ NYƐ BE NƐ TSU NÍ SAMINYA

8. (a) Mɛni he je nɛ e sa kaa asafo mi nikɔtɔmahi nɛ a tsɔse ni kpahi ɔ? (b) Mɛni e he hia kaa asafo mi nikɔtɔmahi nɛ a ya sɔmɔɔ ngɛ hehi nɛ fiɛɛli fuu a he hia ngɛ ɔ nɛ a pee? (Hyɛ daka nɛ ji, “Ní Tsumi Ko Nɛ He Hia.”)

⁸ E sa nɛ asafo mi nikɔtɔmahi nɛ a ngɛ níhi a si kpami wawɛɛ po ɔ, nɛ a ba a he si, nɛ a le kaa ní tsumihi fuu ngɛ nɛ ke a bɔni bwɔmi pɛ a be nyɛe ma tsu hu. (Mika 6:8) Jehanɛ se hu ɔ, e sa nɛ asafo mi nikɔtɔmahi nɛ a le kaa ‘be yayami ma nyɛ ma ba ná mɛ tlukaa’ nɛ lɔ ɔ ma ha nɛ e maa ye ha mɛ kaa a ma tsu a blɔ nya ní tsumihi. (Fiɛlɔ 9:11, 12; Yakobo 4:13, 14) Enɛ ɔ he ɔ, akɛnɛ a suɔ Yehowa we bi nɛ a susuɔ a he he je ɔ, a bɔɔ mɔde wawɛɛ nɛ a tsɔɔ nyɛmimɛ nihewi níhi nɛ a kase jehahi babauu nɛ be ɔ.​—Kane La 71:17, 18.

9. Mɛni maa ba hwɔɔ se nɛ lɔ ɔ he ɔ, e he hia kaa a tsɔse nyɛmimɛ nyumuhi?

⁹ Jehanɛ se hu ɔ, asafo ɔ náa asafo mi nikɔtɔmahi nɛ a tsɔseɔ nyɛmimɛ nyumuhi ɔ a he se, ejakaa lɔ ɔ haa nɛ asafo ɔ he waa. Tsɔsemi nɛ ɔ dlaa nyɛmimɛ nyumuhi fuu konɛ a ye bua nɛ kake peemi nɛ hi nyɛmimɛ a kpɛti ngɛ asafo ɔ mi, nɛ a nyɛ nɛ a ye Mawu anɔkuale. Enɛ ɔ he hia ngɛ nyagbe ligbi nɛ ɔmɛ a mi, nɛ e he maa hia ngɛ haomi ngua a nɛ ma a hu mi. (Ezekiel 38:10-12; Mika 5:5, 6) Enɛ ɔ he ɔ, asafo mi nikɔtɔmahi nɛ wa suɔ, nyɛ ná deka kɛ tsɔse nyɛmimɛ nyumuhi. Nyɛɛ je sisi kɛ je mwɔnɛ ɔ.

10. Mɛni eko ɔ, e ma bi nɛ asafo mi nɔkɔtɔma ko nɛ e pee konɛ e ná be kɛ tsɔse nyɛmimɛ nyumuhi?

¹⁰ Wa le kaa nyɛ be deka kulaa, ejakaa nyɛ tsuɔ níhi nɛ a he hia ngɛ asafo ɔ mi ɔ a he ní. Enɛ ɔ he ɔ, e ma nyɛ ma bi nɛ nyɛɛ ngɔ be nɛ nyɛɛ kɛ tsuɔ jamɛ a ní ɔmɛ a he ní ɔ eko kɛ tsɔse nyɛmimɛ nyumuhi. (Fiɛlɔ 3:1) Jã nɛ nyɛ maa pee ɔ, maa tsɔɔ kaa nyɛɛ kɛ nyɛ be ngɛ ní tsue saminya, nɛ asafo ɔ ma ná he se hwɔɔ se.

MO DLA NÍ KASELƆ Ɔ TSUI

11. (a) Mɛni sa kadimi ngɛ nɔ́ nɛ asafo mi nikɔtɔmahi nɛ a je ma slɔɔtoslɔɔtohi a nɔ ɔ de ngɛ nyɛmimɛ nyumuhi a tsɔsemi he ɔ he? (b) Ngɛ Abɛ 15:22 ɔ nya a, mɛni he je nɛ e he hia nɛ wa susu munyuhi nɛ asafo mi nikɔtɔma kpahi tu ɔ he ɔ?

¹¹ Asafo mi nikɔtɔma komɛ nyɛ nɛ a tsɔse nyɛmimɛ nyumuhi nɛ a ngɛ babauu tsue ngɛ asafo ɔ mi. Lingmi nɛ ɔ, a bi mɛ blɔ nɔ nɛ a gu kɛ pee jã.b (Hyɛ sisi ningma.) E ngɛ mi kaa a je ma ekpaekpahi a nɔ mohu lɛɛ, se mɛ tsuo a gbi kɔ. Mɛni enɛ ɔ tsɔɔ? E tsɔɔ kaa ngɛ ‘asafo tsuaa asafo mi ngɛ he tsuaa he’ ɔ, ke a da Baiblo ɔ nɔ kɛ tsɔse nɔ ko ɔ, nɔ ɔ náa he se. (1 Korinto Bi 4:17) Enɛ ɔ he ɔ, ngɛ munyu nɛ ɔ kɛ munyu nɛ wa maa kase kɛ nyɛɛ enɛ ɔ se ɔ mi ɔ, wa ma susu ní komɛ nɛ asafo mi nikɔtɔma nɛ ɔmɛ de ɔ a he. (Abɛ 15:22) Amlɔ nɛ ɔ, wa ma tsɛ asafo mi nikɔtɔma amɛ ke tsɔɔli, nɛ wa ma tsɛ nyɛmimɛ nyumuhi nɛ a ngɛ mɛ tsɔsee ɔ hu ke ní kaseli.

12. Mɛni e he hia kaa tsɔɔlɔ ko nɛ e pee, nɛ mɛni he je?

¹² Kekleekle ɔ, e he hia nɛ tsɔɔlɔ ɔ nɛ dla ní kaselɔ ɔ tsui. Mɛni he je nɛ enɛ ɔ he hia a? Kaa bɔ nɛ e he hia kaa ngmɔ hulɔ nɛ dla zugba a loko e du ní ɔ, jã kɛ̃ nɛ e he hia nɛ tsɔɔlɔ ɔ hu nɛ dla ní kaselɔ ɔ tsui loko e tsɔɔ lɛ ní hehi. Mɛni blɔ nɔ tsɔɔlɔ ko maa gu kɛ dla e ní kaselɔ ko tsui? E ma nyɛ maa kase tsɔɔli kpakpahi nɛ a hi si blema a. A ti nɔ kake ji gbalɔ Samuel.

13-15. (a) Mɛni Yehowa de Samuel kaa e pee? (b) Mɛni blɔ nɔ Samuel gu kɛ dla Saul tsui kɛ ha ní tsumi ehe nɛ a kɛ maa wo e dɛ ɔ? (Moo hyɛ foni nɛ ngɛ ní kasemi ɔ sisije ɔ.) (d) Mɛni he je nɛ mwɔnɛ ɔ, e sa kaa asafo mi nikɔtɔmahi nɛ a susu nɔ́ nɛ Samuel pee ɔ he ɔ?

¹³ Ligbi ko ɔ, Yehowa de gbalɔ Samuel kaa e pee nɔ́ ko. Jamɛ a be ɔ mi ɔ, Samuel bwɔ. Nɔ́ nɛ ɔ ya nɔ maa pee jeha 3,000 ji nɛ ɔ. Yehowa de lɛ ke: “Hwɔɔ, maa pee be nɛ ɔ mi ɔ, ma tsɔ nyumu ko nɛ je Benyamin wɛtso ɔ mi kɛ ba o ngɔ. Moo pɔ lɛ nu nɛ e ba ye ganɔ ngɛ ye ma, Israel ɔ nya.” (1 Samuel 9:15, 16) Yehowa suɔ kaa Samuel nɛ pɔ nɔ kpa ko nu konɛ nɔ ɔ nɛ nyɛɛ Israel ma a hɛ mi. Enɛ ɔ ha nɛ Samuel na kaa e be Israel ma a hɛ mi nyɛɛe hu. E le kaa e he maa hia nɛ e dla nɔ ɔ kɛ ha ní tsumi ehe nɛ a kɛ ma e dɛ womi ɔ, enɛ ɔ he ɔ, e susu e yi mi nɛ e ná juɛmi ko.

¹⁴ E nɔ jena a, Samuel kɛ Saul kpe, nɛ Yehowa de Samuel ke: ‘Nyumu ɔ ji nɛ ɔ nɛ.’ Amlɔ nɔuu ɔ, Samuel tsu e yi mi tomi ɔ he ní. E pee nɔ́ ko nɛ ma ha nɛ e ná Saul he blɔ konɛ a sɛɛ ní. Samuel ngmɛ Saul kɛ e tsɔlɔ ɔ okplɔɔ. E ha mɛ sɛ̃ ngɛ okplɔɔ ɔ yi, nɛ e ha mɛ lo kpɔ kpakpa. Samuel de Saul ke: “Moo ye, ejakaa i je blɔ ngɔ to ha mo nɛ o ba ye kikɛmɛ a be nɛ ɔ.” Benɛ a ye ní ɔ ta a, Samuel kɛ Saul ho e we mi ya. Benɛ a ngɛ blɔ nɔ kɛ yaa a, mɛ ni enyɔ ɔmɛ a sɛɛ ní kɛ bua jɔmi. Benɛ a ya su Samuel we ɔ mi ɔ, a kuɔ kɛ ho tsu ɔ yi mi ya. Samuel kɛ Saul sɛɛ ní ngɛ “tsu ɔ yi mi” hluu kɛ ya si benɛ a ya hwɔ si. E nɔ jena a, Samuel pɔ Saul nu, e fĩɔ e nya he, nɛ e ha lɛ blɔ tsɔɔmihi fuu. Lɔ ɔ se ɔ, Saul je, nɛ e dla e he kɛ ha níhi nɛ maa ya nɔ pee se ɔ.​—1 Samuel 9:17-27; 10:1.

¹⁵ Samuel pɔ Saul nu konɛ Saul nɛ nyɛɛ ma a hɛ mi. Ngɛ anɔkuale mi ɔ, enɛ ɔ ngɛ ekpa kulaa ngɛ nyɛminyumu ko nɛ a ma tsɔse lɛ konɛ e ba pee asafo mi nɔkɔtɔma aloo asafo mi sɔmɔlɔ ɔ he. Se kɛ̃ ɔ, asafo mi nikɔtɔmahi ma nyɛ maa kase níhi fuu nɛ a he hia ngɛ bɔ nɛ Samuel plɛ kɛ dla Saul tsui ha a mi. Nyɛ ha nɛ wa susu ní nɛ ɔmɛ a kpɛti enyɔ a he nɛ waa hyɛ.

TSƆƆLI NƐ A JEƆ A TSUI MI KƐ TSƆƆ NÍ NƐ A JI HUƐMƐ KPAKPAHI HULƆ

16. (a) Benɛ Israel bi ɔmɛ de Samuel kaa e wo matsɛ ha mɛ ɔ, kɛ Samuel pee e ní ha kɛɛ? (b) Kɛ Samuel pee e ní ha kɛɛ benɛ Yehowa de lɛ ke e pɔ Saul nu ɔ?

¹⁶ Moo je o tsui mi, ko lilaa si. Sisije ɔ, benɛ Samuel ná le kaa Israel bi ɔmɛ ngɛ hlae nɛ adesa nɛ ye a nɔ matsɛ ɔ, e gba e nya nɛ e susu kaa a je e se. (1 Samuel 8:4-8) Samuel sume kaa e maa wo matsɛ ha mɛ, enɛ ɔ he ɔ, Yehowa de lɛ si etɛ kaa e bu ma bi ɔmɛ tue. (1 Samuel 8:7, 9, 22) E ngɛ mi kaa Samuel bua juɛ nɔ́ nɛ ma bi ɔmɛ ngɛ bie kaa e pee ha mɛ ɔ he lɛɛ, se e ji nɔ nɛ ma ba da e nane mi ɔ he hunga, nɛ e ná we e he abofu hulɔ. Benɛ Yehowa de Samuel kaa e ya pɔ Saul nu ɔ, Samuel tui tsle kulaa. E je e tsui mi nɛ e bu tue, pi kaa e sa kaa e pee jã kɛkɛ he je nɛ e pee jã ngɛ, se mohu suɔmi nɛ e ngɛ ha Yehowa a he je.

17. Mwɔnɛ ɔ, mɛni asafo mi nikɔtɔmahi peeɔ kɛ kaseɔ Samuel, nɛ mɛni haa nɛ a náa bua jɔmi?

¹⁷ Mwɔnɛ ɔ, asafo mi nikɔtɔmahi fuu nɛ a ngɛ níhi a si kpami ɔ kase Samuel nɛ a je suɔmi mi nɛ a tsɔse nyɛmimɛ nyumu kpahi. (1 Petro 5:2) Asafo mi nikɔtɔma nɛ ɔmɛ jeɔ a tsui mi nɛ a tsɔɔ nyɛmimɛ nyumuhi ní, nɛ a yi gbeye kaa a kɛ a blɔ nya ní tsumi ɔmɛ ekomɛ maa wo nyɛmimɛ nyumu nɛ ɔmɛ a dɛ. Mohu ɔ, a naa mɛ kaa a he hia wawɛɛ, nɛ a ji nihi nɛ a ma nyɛ maa ‘piɛɛ a he kɛ tsu’ asafo ɔ mi hiami níhi a he ní. (2 Korinto Bi 1:24; Hebri Bi 13:16) Ke asafo mi nikɔtɔma nɛ ɔmɛ nɛ a fo we mɛ pɛ a nɔ́ mi ɔ na kaa ní kaseli ɔmɛ kɛ nyɛmihi nɛ a ngɛ ɔ ngɛ Yehowa we bi ye buae ɔ, a bua jɔɔ.​—Bɔfo Ɔmɛ A Ní Tsumi 20:35.

18, 19. Mɛni blɔ nɔ asafo mi nɔkɔtɔma ko maa gu kɛ dla ní kaselɔ ko tsui, nɛ mɛni he je nɛ enɛ ɔ he hia?

¹⁸ Moo pee a huɛ, koo pee tsɔɔlɔ kɛkɛ. Benɛ Samuel kɛ Saul kpe ɔ, jinɛ Samuel ko nyɛ plɛ nu kɛ pue Saul yi mi amlɔ nɔuu konɛ e kɛ pɔ lɛ nu kaa matsɛ. Jinɛ e ko nyɛ pee jã mohu lɛɛ, se ke e pee jã a, matsɛ ehe ɔ ko nyɛ we Mawu we bi a hɛ mi nyɛɛmi. Samuel ngɔ be kɛ dla Saul tsui kɛ ha ní tsumi ehe nɛ a kɛ maa wo e dɛ ɔ. Loko e maa pɔ Saul nu ɔ, e kɛ lɛ bla kɛ ye ní, nɛ a slaa si, nɛ a sɛɛ ní be kɛkɛɛ, nɛ a jɔɔ a he po. Samuel mlɛ nɛ e pɔ Saul nu ngɛ be nɛ sa mi.

¹⁹ Mwɔnɛ ɔ hu jã ji bɔ nɛ e ji. Loko asafo mi nɔkɔtɔma ko ma tsɔse nyɛminyumu ko ɔ, e sa nɛ e bɔ mɔde nɛ e kɛ lɛ nɛ bɔ huɛ. Akɛnɛ e slo si fɔfɔɛ, kɛ bɔ nɛ nihi peeɔ a ní ha ngɛ ma tsuaa ma nɔ he je ɔ, e slo nɔ́ nɛ asafo mi nɔkɔtɔma tsuaa asafo mi nɔkɔtɔma maa pee konɛ e ha ní kaselɔ ɔ tsui nɛ nɔ e mi. Se kɛ̃ ɔ, ngɛ he saisaa nɛ o ngɛ ɔ, ke o be deka po ɔ, mo ná be kɛ ha ní kaselɔ ɔ. Ke o pee jã a, e maa na kaa o buɔ e he akɔtaa. (Kane Roma Bi 12:10.) Ngɛ anɔkuale mi ɔ, ke o jeɔ suɔmi mi nɛ o susuɔ ní kaseli ɔmɛ a he ɔ, a bua jɔɔ wawɛɛ nitsɛ.

20, 21. (a) Kɛ o maa kale tsɔɔlɔ kpakpa ha kɛɛ? (b) Mɛni wa maa kase ngɛ munyu nɛ nyɛɛ se ɔ mi?

²⁰ Ngɛ anɔkuale mi ɔ, tsɔɔlɔ kpakpa suɔ kaa e ma tsɔse nihi. Se e sa nɛ e ná suɔmi kɛ ha nɔ nɛ e ngɛ lɛ tsɔsee ɔ hulɔ. (Kɛ to Yohane 5:20 ɔ he.) Mɛni he je nɛ enɛ ɔ he hia? Ejakaa ke ní kaselɔ ɔ le kaa o susuɔ e he wawɛɛ ɔ, e maa je e tsui mi kɛ kase nɔ́ nɛ o ngɛ lɛ tsɔɔe ɔ. Enɛ ɔ he ɔ, asafo mi nikɔtɔmahi, nyɛɛ bɔ mɔde nɛ nyɛɛ kɛ nyɛ ní kaseli ɔmɛ nɛ bɔ huɛ, se pi ní kɛkɛ nɛ nyɛ maa tsɔɔ mɛ.​—Abɛ 17:17; Yohane 15:15.

²¹ Ke asafo mi nɔkɔtɔma ko dla ní kaselɔ ko tsui ta a, e ma nyɛ ma bɔni lɛ tsɔsemi. Mɛni blɔhi a nɔ nɛ asafo mi nɔkɔtɔma a maa gu kɛ pee jã? Wa ma susu enɛ ɔ he ngɛ munyu nɛ nyɛɛ se ɔ mi.

1. (a) Mɛni Mawu sɔmɔli le kɛ je blema kɛ kɔ tsɔsemi he, nɛ kɛ waa kɛ enɛ ɔ tsuɔ ní mwɔnɛ ɔ ha kɛɛ? (b) Mɛni he wa ma susu ngɛ munyu nɛ ɔ mi?

KƐ JE blema tɔɔ nɛ Mawu we bi le kaa ke a tsɔse nihi nɛ a le nɔ́ ko peemi saminya a, e yeɔ bua wawɛɛ. Kaa nɔ hyɛmi nɔ́ ɔ, Baiblo ɔ tu Abram tsɔli ɔmɛ a he munyu kaa a ji nihi nɛ a “le ta hwumi,” enɛ ɔ he ɔ, a nyɛ nɛ a hwu ta kɛ kpɔ̃ Lot. (1 Mose 14:14-16) Lali nɛ a hi si ngɛ Matsɛ David be ɔ mi ɔ laa kɛ jeɔ Yehowa yi, ejakaa a ‘le lami saminya.’ (1 Kronika 25:7) Ngɛ anɔkuale mi ɔ, a tsɔse nimli nɛ ɔmɛ, lɔ ɔ he je nɛ a le a ní tsumi ɔmɛ tsumi saminya a nɛ. Mwɔnɛ ɔ, e sa nɛ waa hwu kɛ si Satan kɛ e je ɔ. (Efeso Bi 6:11-13) Jehanɛ se hu ɔ, wa bɔɔ mɔde wawɛɛ kɛ jeɔ Yehowa yi kɛ gu e biɛ ɔ he munyu nɛ wa tuɔ kɛ tsɔɔ nihi ɔ nɔ. (Hebri Bi 13:15, 16) Kaa bɔ nɛ e ji ngɛ Mawu sɔmɔli nɛ a hi si blema a blɔ fa mi ɔ, wɔ hu ja a tsɔse wɔ loko wa ma nyɛ maa ye manye. Yehowa kɛ ní tsumi wo asafo mi nikɔtɔma amɛ a dɛ konɛ a tsɔse nyɛmimɛ nyumuhi. (2 Timoteo 2:2) Mɛni blɔhi a nɔ asafo mi nikɔtɔma komɛ guu kɛ tsɔseɔ nyɛmimɛ nyumuhi konɛ a nyɛ nɛ a hyɛ Yehowa we bi a nɔ?

YE BUA NÍ KASELƆ Ɔ NƐ SUƆMI NƐ E NGƐ HA YEHOWA A MI NƐ WA

2. Loko asafo mi nɔkɔtɔma ko maa tsɔɔ ní kaselɔ ko nɔ́ ehe ko ɔ, mɛni e ma nyɛ maa pee, nɛ mɛni he je?

² Wa ma nyɛ maa ngɔ asafo mi nɔkɔtɔma kɛ to ngmɔ hulɔ ko he. Loko ngmɔ hulɔ ko ma du ní ɔ, eko ɔ, e he maa hia nɛ e ngɔ kuku zu kɛ futu zu ɔ konɛ ke e du ní ɔ, ní ɔmɛ nɛ a wa saminya. Jã kɛ̃ nɛ e ji ngɛ asafo mi nɔkɔtɔma hu blɔ fa mi. Eko ɔ, e he maa hia nɛ e kɛ ní kaselɔ ɔ nɛ susu Baiblo sisi tomi mlaa komɛ a he kɛ dla lɛ loko e tsɔɔ lɛ ní hehi. Enɛ ɔ ma ha nɛ ní kaselɔ ɔ ma nyɛ maa ngɔ nɔ́ nɛ a ngɛ lɛ tsɔɔe ɔ kɛ tsu ní.​—1 Timoteo 4:6.

3. (a) Ke o kɛ ní kaselɔ ko ngɛ ní sɛɛe ɔ, kɛ Yesu munyu nɛ ngɛ Marko 12:29, 30 ɔ maa ye bua mo ha kɛɛ? (b) Kɛ asafo mi nɔkɔtɔma ko sɔlemi ma nyɛ maa ye bua ní kaselɔ ko ha kɛɛ?

³ E he hia nɛ o le bɔ nɛ ní kaselɔ ɔ nu anɔkuale ɔ sisi nɛ e kɛ ngɛ ní tsue ngɛ e si himi mi ha. O ma nyɛ ma bi lɛ bɔ nɛ e he nɔ nɛ e jɔɔ kɛ ha Yehowa a saa yi mi kpɔhi nɛ e mwɔɔ ɔ a he ha. Sane bimi nɛ ɔ ma nyɛ ma ha nɛ nyɛɛ sɛɛ ní kɛ kɔ bɔ nɛ waa kɛ wa tsui tsuo ma nyɛ ma sɔmɔ Yehowa ha a he. (Kane Marko 12:29, 30.) Eko ɔ, o kɛ nyɛminyumu ɔ ma nyɛ ma bla kɛ sɔle konɛ o bi Yehowa nɛ e ye bua lɛ kɛ e mumi klɔuklɔu ɔ ngɛ e tsɔsemi ɔ mi. Ke e na kaa o je o tsui mi nɛ o sɔle kɛ ha lɛ ɔ, lɔ ɔ ma nyɛ maa wo lɛ he wami konɛ e tsu babauu!

4. (a) Moo tsɔɔ Baiblo mi munyu ko nɛ o kɛ ma nyɛ maa ye bua ní kaselɔ ko konɛ e ya e hɛ mi. (b) Ke asafo mi nikɔtɔmahi ngɛ nihi tsɔsee ɔ, mɛni oti e sa kaa a kɛ ma a hɛ mi?

⁴ Ke o bɔni nɔ ko tsɔsemi ɔ, e maa hi kaa o kɛ lɛ ma susu Baiblo mi munyuhi nɛ ma ha nɛ e na kaa e sa nɛ e ye bua nihi, e pee e he nɔ ko nɛ nihi ma nyɛ maa fĩa kɛ fɔ e nɔ, nɛ e ba e he si ɔ he. (1 Matsɛmɛ 19:19-21; Nehemia 7:2; 13:13; Bɔfo Ɔmɛ A Ní Tsumi 18:24-26) E he hia nɛ ní kaselɔ ɔ nɛ ná su nɛ ɔmɛ, ejakaa a ngɛ kaa kuku zu ngɛ ngmɔ ní sisi. Su nɛ ɔmɛ maa ye bua ní kaselɔ ɔ konɛ e ya e hɛ mi mlamlaamla. Asafo mi nɔkɔtɔma ko nɛ e ngɛ France nɛ a tsɛɛ lɛ ke Jean-Claude tsɔɔ kaa ke e ngɛ nɔ ko tsɔsee ɔ, oti nɛ e kɛ maa e hɛ mi ji kaa e maa ye bua ní kaselɔ ɔ konɛ e da Baiblo sisi tomi mlaahi a nɔ kɛ mwɔ e yi mi kpɔ. E de ke: “Ngɛ be nɛ sa mi ɔ, i kɛ ní kaselɔ ɔ wa kaneɔ ngmami ko nɛ ma ‘bli e hɛngmɛ’ konɛ e na ‘nyakpɛ níhi’ nɛ ngɛ Mawu Munyu ɔ mi ɔ.” (La 119:18) Mɛni blɔ komɛ a nɔ nɛ o maa gu kɛ wo ní kaselɔ ko he wami?

TSƆƆ LƐ OTIHI NƐ E KƐ MA NYƐ MAA MA E HƐ MI KƐ NƆ́ HE JE

5. (a) Mɛni he je nɛ e he hia kaa a kɛ ní kaselɔ ko nɛ susu otihi nɛ e kɛ ma nyɛ maa ma e hɛ mi ngɛ Yehowa sɔmɔmi mi ɔ he ɔ? (b) Mɛni he je nɛ e sa kaa asafo mi nikɔtɔmahi nɛ a tsɔse nihi be mi nɛ a wɛ ɔ? (Hyɛ sisi ningma.)

⁵ Mo bi ní kaselɔ ɔ otihi nɛ e kɛ ma e hɛ mi ngɛ Yehowa sɔmɔmi mi. Ke e kɛ oti ko mɛ e hɛ mi ɔ, moo ye bua lɛ konɛ e kɛ oti nɛ e ma nyɛ maa su he nɛ ma e hɛ mi. Ke o ngɛ lɛ oti ko nɛ mo nitsɛ o kɛ ma o hɛ mi nɛ o su he, nɛ lɔ ɔ ha nɛ o ná bua jɔmi dee ɔ, o kɛ gɛjɛmi nɛ tu he munyu. Enɛ ɔ peemi yi nɛ e woɔ yiblii wawɛɛ. Asafo mi nɔkɔtɔma ko nɛ e ngɛ Afrika nɛ a tsɛɛ lɛ ke Victor de ke: “Benɛ i wɛ ɔ, asafo mi nɔkɔtɔma ko bi mi sane komɛ kɛ kɔ otihi nɛ i kɛ ma ye hɛ mi ɔ he. Sanehi nɛ e bi mi ɔ ha nɛ i bɔni ye sɔmɔmi ní tsumi ɔ he susumi wawɛɛ.” Asafo mi nikɔtɔmahi nɛ a ngɛ níhi a si kpami ɔ tsɔɔ kaa e he hia nɛ a tsɔse nyɛmimɛ nyumuhi be mi nɛ a wɛ, eko ɔ, benɛ a ye kɛ je jeha nyɔngma kɛ etɛ kɛ yaa. O ma nyɛ maa da jeha nɛ a ye ɔ nɔ kɛ ha mɛ ní tsumi ko ngɛ asafo ɔ mi nɛ a tsu. Ke a tsɔse nyɛmimɛ nyumuhi be mi nɛ a wɛ ɔ, lɔ ɔ ma nyɛ maa ye bua mɛ nɛ a kɛ a juɛmi maa ma otihi nɛ a kɛ ma a hɛ mi ɔ nɔ, nɛ ke a ba wa po ɔ, nɔ́ ko be a juɛmi jee ngɛ nɔ.​—Kane La 71:5, 17.a (Hyɛ sisi ningma.)

6. Mɛni ji blɔ ko nɛ he hia nɛ Yesu gu nɔ kɛ tsɔse nihi?

⁶ Ke o ngɛ ní kaselɔ ko he wami woe kaa e sɔmɔ ɔ, koo tsɔɔ lɛ nɔ́ nɛ e sa kaa e pee kɛkɛ. E sa nɛ o tsɔɔ lɛ nɔ́ he je nɛ e sa kaa e pee jã a hulɔ. Yesu nɛ ji Tsɔɔlɔ Ngua a de e bɔfo ɔmɛ kaa a ya fiɛɛ. Se kekleekle ɔ, e tsɔɔ mɛ nɔ́ he je nɛ e sa kaa a ya fiɛɛ ɔ. E de mɛ ke: ‘A ha mi he blɔ ngɛ níhi tsuo nɛ ngɛ hiɔwe kɛ zugba a nɔ. Lɔ ɔ he ɔ, nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli.’ (Mateo 28:18, 19) Kɛ o ma plɛ kɛ kase blɔ nɔ nɛ Yesu gu kɛ tsɔse nihi ɔ ha kɛɛ?

7, 8. (a) Kɛ asafo mi nikɔtɔmahi ma plɛ kɛ kase blɔ nɔ nɛ Yesu gu kɛ tsɔse nihi ɔ ha kɛɛ? (b) Mɛni he je nɛ e he hia kaa a je ní kaselɔ ko yi ɔ? (d) Mɛni ga womihi ma nyɛ maa ye bua asafo mi nikɔtɔmahi konɛ a nyɛ nɛ a tsɔse nihi? (Hyɛ daka nɛ e yi ji, “Bɔ Nɛ Nyɛ Ma Plɛ Kɛ Tsɔse Nihi Ha.”)

⁷ Ke o de nyɛminyumu ko kaa e tsu nɔ́ ko ɔ, moo ngɔ Baiblo ɔ kɛ tsɔɔ lɛ nɔ́ he je nɛ e he hia kaa e tsu jamɛ a ní tsumi ɔ. Ke o peeɔ jã a, lɔ ɔ tsɔɔ kaa o ngɛ lɛ ye buae nɛ e da Baiblo sisi tomi mlaahi a nɔ kɛ tsu níhi a he ní mohu pe mlaahi. Kaa nɔ hyɛmi nɔ́ ɔ, ke o de nyɛminyumu ko kaa e ha nɛ he nɛ a guu kɛ yaa Matsɛ Yemi Asa a nɔ ɔ nɛ tsɔ, nɛ́ nɔ́ ko nɛ ko plaa nɔ ko ngɛ lejɛ ɔ, o kɛ lɛ ma nyɛ ma susu munyu nɛ ngɛ Tito 2:10 he. Moo tsɔɔ lɛ bɔ nɛ ní tsumi nɛ e ma tsu ɔ ma ha nɛ nihi a bua maa jɔ Matsɛ Yemi sɛ gbi ɔ he ha. Jehanɛ se hu ɔ, mo de ní kaselɔ ɔ kaa e susu nihi nɛ a jeha ya hɛ mi ngɛ asafo ɔ mi ɔ a he, kɛ nɔ́ nɛ e maa pee kɛ ye bua mɛ. Ke o kɛ ní kaselɔ ɔ sɛsɛɔ níhi kaa kikɛ ɔ a he ɔ, lɔ ɔ maa ye bua lɛ nɛ e ma susu ni kpahi a he, nɛ e be ní tsumi ɔ bue kaa e ji nɔ́ ko nɛ e sa kaa a pee kɛkɛ nɛ e ngɛ pee. Ke e naa bɔ nɛ nyɛmimɛ nyumuhi kɛ yihi náa e ní tsumi ɔ he se ha a, e tsui maa nɔ e mi kaa e ngɛ nyɛmimɛ ɔmɛ sɔmɔe.

⁸ Ke ní kaselɔ ɔ kɛ gahi nɛ o woɔ lɛ ɔ hu tsuɔ ní ɔ, bɔɔ mɔde nɛ o je e yi. Mɛni he je nɛ enɛ ɔ peemi he hia? Kaa bɔ nɛ ke a du ní nɛ nyu haa nɛ e waa a, jã kɛ̃ nɛ ke a jeɔ ní kaselɔ ko hu yi ɔ, e yaa e hɛ mi ngɛ Yehowa sɔmɔmi mi.​—Kɛ to Mateo 3:17 ɔ he.

NYAGBA KPA KO

9. (a) Mɛni he je nɛ eko ɔ, e yeɔ ha asafo mi nikɔtɔmahi nɛ a ngɛ mahi nɛ a ngɛ sika a, a nɔ kaa a ma tsɔse nyɛmimɛ nyumuhi ɔ? (b) Mɛni he je nɛ nyɛmimɛ nihewi komɛ kɛ Mawu sɔmɔmi pee we nɔ́ titli ngɛ a si himi mi ɔ?

⁹ Eko ɔ, e yeɔ ha asafo nikɔtɔmahi nɛ a ngɛ mahi nɛ sika ngɛ mi ɔ a mi kaa a maa wo nyɛminyumuhi nɛ a baptisi mɛ nɛ a ye jeha 20 aloo 30 kɛ se ɔ he wami konɛ a tsu babauu ngɛ asafo ɔ mi. Asafo mi nikɔtɔma komɛ nɛ a ngɛ níhi a si kpami, nɛ a ngɛ mahi maa pee 20 a nɔ ɔ tsɔɔ nɔ́ he je nɛ a susu kaa nyɛmimɛ nihewi sume kaa a ma tsu babauu ngɛ asafo ɔ mi ɔ. A ti nihi fuu tsɔɔ kaa be mi nɛ nyɛmimɛ nihewi nɛ ɔmɛ wɛ ɔ, a fɔli yi bua mɛ konɛ a ngɔ Yehowa sɔmɔmi mi otihi kɛ ma a hɛ mi. Nɛ ke nyɛmimɛ nihewi nɛ ɔmɛ a ti ni komɛ suɔ kaa a ma tsu babauu ɔ, a fɔli woɔ mɛ he wami konɛ a ya sukuu kɛ ya tsitsaa, aloo a hla ní tsumi ko ngɛ je ɔ mi nɛ a tsu! Enɛ ɔ he ɔ, a kɛ Mawu sɔmɔmi pee we nɔ́ titli ngɛ a si himi mi.​—Mateo 10:24.

10, 11. (a) Kɛ asafo mi nɔkɔtɔma ko ma plɛ kɛ ye bua nyɛminyumu ko bɔɔbɔɔbɔɔ konɛ e tsake e susumi ha kɛɛ? (b) Mɛni ngmamihi asafo mi nɔkɔtɔma ko kɛ ma nyɛ maa wo nyɛminyumu ko he wami, nɛ mɛni he je? (Hyɛ sisi ningma.)

¹⁰ Ke e ngɛ kaa nɔ́ nɛ nyɛminyumu ko sume kaa e maa pee babauu ngɛ asafo ɔ mi ɔ, e ma bi mɔde bɔmi kɛ tsui si tomi loko a ma nyɛ ma tsake e susumi, se e maa hi kɛ̃. Ke ngmɔ hulɔ ko suɔ kaa tso ko nɛ wa tlɔmɔɔ ɔ, e kudɔɔ lɛ bɔɔbɔɔbɔɔ. Jã kɛ̃ nɛ bɔɔbɔɔbɔɔ ɔ, mo hu o ma nyɛ maa ye bua nyɛminyumu ko konɛ e bua nɛ jɔ kaa e maa pɛtɛ blɔ nya ní tsumihi a he ngɛ asafo ɔ mi. Se kɛ gu mɛni blɔ nɔ?

¹¹ Mo ná nyɛminyumu ɔ he deka nɛ o kɛ lɛ nɛ bɔ huɛ. Ha nɛ e le kaa e he hia ngɛ asafo ɔ mi. Lɔ ɔ se ɔ, kɛ yaa kɛ yaa a, o kɛ lɛ nɛ hi si nɛ nyɛ susu ngmamihi nɛ maa ye bua lɛ nɛ e susu e he nɔ nɛ e jɔɔ kɛ ha Yehowa a he. (Fiɛlɔ 5:4; Yesaya 6:8; Mateo 6:24, 33; Luka 9:57-62; 1 Korinto Bi 15:58; 2 Korinto Bi 5:15; 13:5) Moo ngɔ sane bimihi nɛ nyɛɛ se nɛ ɔ kɛ tsu ní konɛ o munyu ɔ nɛ sɛ e tsui mi: ‘Mɛni si o wo Yehowa benɛ o jɔɔ o he nɔ kɛ ha lɛ ɔ? Benɛ a baptisi mo ɔ, kɛ o susu kaa Yehowa nu he ha kɛɛ?’ (Abɛ 27:11) ‘Nɛ Satan hu nɛɛ, kɛ o susu kaa e nu he ha kɛɛ?’ (1 Petro 5:8) Ngmami nɛ ɔmɛ ma nyɛ ma ná nyɛminyumu ɔ nɔ he wami konɛ munyu ɔ nɛ sɛ e tsui mi.​—Kane Hebri Bi 4:12.b (Hyɛ sisi ningma.)

NÍ KASELI, NYƐƐ YE ANƆKUALE

12, 13. (a) Mɛni su nɛ Elisha je kpo benɛ e ji ní kaselɔ ɔ? (b) Mɛni blɔ nɔ Yehowa gu kɛ jɔɔ Elisha ngɛ anɔkuale nɛ e ye ɔ he?

¹² Nyɛmimɛ nihewi, asafo ɔ hia nyɛ yemi kɛ buami! Mɛni su maa ye bua nyɛ konɛ nyɛɛ ye manye ngɛ Yehowa sɔmɔmi mi? Bɔ nɛ pee nɛ waa na sane bimi nɛ ɔ heto ɔ, nyɛ ha nɛ wa susu níhi nɛ ya nɔ ngɛ ní kaselɔ ko nɛ e hi si blema nɛ a tsɛɛ lɛ ke Elisha a he nɛ waa hyɛ.

¹³ Maa pee jeha 3,000 nɛ be ɔ, gbalɔ Eliya tsɛ Elisha kaa e ba ye bua lɛ. Jamɛ a be ɔ mi ɔ, Elisha ji niheyo wayoo. Elisha kplɛɛ nɔ amlɔ nɔuu, nɛ e kɛ anɔkuale yemi ya sɔmɔ gbalɔ ɔ. (2 Matsɛmɛ 3:11) Eliya ngɔ maa pee jeha ekpa kɛ tsɔse Elisha. Lɔ ɔ se ɔ, benɛ e piɛ bɔɔ nɛ Eliya maa gbe e ní tsumi nya ngɛ Israel ɔ, gbalɔ ɔ de Elisha ke e ma nyɛ ma kpa lɛ sɔmɔmi. Se Elisha de si etɛ sɔuu ke: “I be o he jee.” Elisha fia e pɛɛ si kaa e maa ya nɔ ma sɔmɔ e tsɔɔlɔ ɔ. Yehowa jɔɔ Elisha ngɛ anɔkuale nɛ e ye ɔ he je, nɛ benɛ lasiogblee sá Eliya kɛ je ɔ, Yehowa ha nɛ e na kɛ e hɛngmɛ.​—2 Matsɛmɛ 2:1-12.

14. (a) Mɛni ní kaseli nɛ a ngɛ mwɔnɛ ɔ ma nyɛ maa kase ngɛ Elisha he? (b) Mɛni he je nɛ e he hia wawɛɛ kaa ní kaselɔ nɛ ye anɔkuale ɔ?

¹⁴ Ke o ji ní kaselɔ ɔ, mɛni o ma nyɛ maa kase ngɛ Elisha he? Ní tsumi saisaa nɛ a ma kɛ wo o dɛ ɔ, moo kplɛɛ nɔ amlɔ nɔuu. Mo kai kaa o tsɔɔlɔ ɔ ji o huɛ. Ha nɛ e le kaa o bua jɔ nɔ́ nɛ e ngɛ pee ha mo ɔ he, nɛ o de lɛ kaa o suɔ nɛ e ya nɔ nɛ e tsɔɔ mo ní. Nɔ́ nɛ he hia pe kulaa ji kaa o kɛ anɔkuale yemi ma tsu ní tsumihi nɛ a kɛ maa wo o dɛ ɔ. Mɛni he je? Ke tsɔɔlɔ ɔ na kaa o ji nɔ ko nɛ e yeɔ anɔkuale nɛ́ a ma nyɛ maa fĩa kɛ fɔ e nɔ ɔ, asafo mi nikɔtɔma amɛ ma nyɛ ma ná nɔ mi mami kaa Yehowa suɔ kaa a ngɔ blɔ nya ní tsumihi babauu kɛ wo o dɛ ngɛ asafo ɔ mi.​—La 101:6; kane 2 Timoteo 2:2.

NYƐƐ BU ASAFO MI NIKƆTƆMAHI NƐ A NGƐ NÍHI A SI KPAMI Ɔ

15, 16. (a) Mɛni blɔhi a nɔ Elisha gu kɛ je bumi kpo kɛ ha e tsɔɔlɔ ɔ ngɛ? (Moo hyɛ foni nɛ ngɛ ní kasemi ɔ sisije ɔ.) (b) Mɛni he je nɛ gbali kpa amɛ he Elisha ye ɔ?

¹⁵ Elisha sane ɔ ha nɛ wa na hu kaa e he hia nɛ nyɛmimɛ nyumuhi nɛ a ngɛ mwɔnɛ ɔ nɛ je bumi kpo kɛ ha asafo mi nikɔtɔmahi nɛ a ngɛ níhi a si kpami ɔ. Pee se ɔ, benɛ Eliya kɛ Elisha ya slaa gbali a kuu ko ngɛ Yeriko ɔ, mɛ ni enyɔ ɔmɛ a ya Yordan Pa a nya. Kɛkɛ nɛ “Eliya je e tade ɔ, nɛ e koklo lɛ, nɛ e kɛ fia nyu ɔ mi. Nyu ɔ mi gba kɛ ya hiɛ kɛ hiɛ.” Mɛ ni enyɔ ɔmɛ tsuo a nyɛɛ zugba gbigbli nɔ kɛ be, nɛ ‘benɛ a yaa a, a ngɛ ní sɛɛe.’ Elisha bu nɔ́ tsuaa nɔ́ nɛ e tsɔɔlɔ ɔ de ɔ tue, nɛ e ya nɔ nɛ e kase ní kɛ je e ngɔ. Elisha susuu we kɔkɔɔkɔ kaa e le nɔ́ tsuaa nɔ́. Lɔ ɔ se ɔ, lasiogblee sa Eliya kɛ je Elisha he, nɛ Elisha kpale kɛ ho Yordan Pa a nya ya. Benɛ e su pa a nya a, e kɛ Eliya tade ɔ fia nyu ɔ mi nɛ e bi ke: ‘Jije Yehowa, Eliya Mawu ɔ ngɛ?’ Benɛ e de jã a, pa a mi gba hiɛ kɛ hiɛ ekohu.​—2 Matsɛmɛ 2:8-14.

¹⁶ Anɛ o to he hɛ kaa kekleekle nyakpɛ nɔ́ nɛ Elisha pee ɔ ngɛ kaa nyagbe nyakpɛ nɔ́ nɛ Eliya pee ɔ lo? Mɛni wa kaseɔ ngɛ enɛ ɔ mi? Elisha susuu we kaa akɛnɛ a ngɔ nɔ́ tsuaa nɔ́ kɛ wo e dɛ he je ɔ, e sa nɛ e tsake níhi a hɛ mi konɛ e je ekpa ngɛ Eliya nɔ́ ɔ he. Mohu ɔ, e pee e ní kaa Eliya pɛpɛɛpɛ. Enɛ ɔ tsɔɔ kaa Elisha je bumi kpo kɛ ha e tsɔɔlɔ ɔ, nɛ enɛ ɔ ha gbali kpa amɛ he Elisha ye. (2 Matsɛmɛ 2:15) Elisha sɔmɔ kaa gbalɔ jeha 60 sɔuu. Yehowa ha lɛ he wami nɛ e pee nyakpɛ níhi fuu po pe Eliya. Mɛni ní kaseli nɛ a ngɛ mwɔnɛ ɔ ma nyɛ maa kase ngɛ munyu nɛ ɔ mi?

17. (a) Mɛni ní kaseli nɛ a ngɛ mwɔnɛ ɔ hu ma nyɛ maa kase ngɛ Elisha he? (b) Ngɛ be nɛ sa mi ɔ, mɛni blɔ Yehowa maa jɔɔ ní kaseli nɛ a yeɔ anɔkuale ɔ?

¹⁷ Ke a ngɔ blɔ nya ní tsumihi fuu kɛ wo o dɛ ngɛ asafo ɔ mi ɔ, ko susu kaa e sa nɛ o tsake níhi a hɛ mi. Mo kai kaa loko a ma tsake níhi a hɛ mi ɔ, a daa asafo ɔ mi hiami níhi, aloo blɔ tsɔɔmi nɛ je Yehowa asafo ɔ ngɔ ɔ nɔ kɛ peeɔ jã. Koo te si kɛkɛ nɛ o tsake níhi a hɛ mi. Elisha kɛ níhi nɛ Eliya tsɔɔ lɛ ɔ tsu ní kɛ tsɔɔ kaa e ngɛ bumi ha Eliya. Enɛ ɔ ha gbali kpa amɛ he lɛ ye. Jã kɛ̃ nɛ ke mo hu o kɛ níhi nɛ o tsɔɔli ɔmɛ jeɔ Baiblo ɔ mi kɛ tsɔɔ mo ɔ tsu ní ɔ, lɔ ɔ tsɔɔ kaa o ngɛ bumi kɛ ha asafo mi nikɔtɔmahi nɛ a ngɛ níhi a si kpami ɔ, nɛ o nyɛmimɛ nyumuhi kɛ yihi hu ma he mo maa ye. (Kane 1 Korinto Bi 4:17.) Ke o bɔni níhi a si kpami nami, nɛ e he hia kaa a pee tsakemi ko ngɛ asafo ɔ mi ɔ, e sa nɛ mo hu o fĩ se. Enɛ ɔ ma ha nɛ nyɛ we asafo ɔ kɛ Yehowa blɔ nya tomi ɔ nɛ ngɛ e hɛ mi yae ɔ maa nyɛɛ daa. Nɛ ngɛ be nɛ sa mi ɔ, Yehowa ma nyɛ maa ye bua mo nɛ o ma tsu ní po pe o tsɔɔli ɔmɛ kaa bɔ nɛ e ji ngɛ Elisha blɔ fa mi ɔ.​—Yohane 14:12.

18. Mɛni he je nɛ e he hia wawɛɛ nɛ a tsɔse nyɛmimɛ nyumuhi ngɛ asafo ɔmɛ a mi ɔ?

¹⁸ Wa he ye kaa ga womihi nɛ ngɛ munyu nɛ ɔ, kɛ munyu nɛ wa kase kɛ sɛ enɛ ɔ hlami ɔ mi ɔ maa wo asafo mi nikɔtɔmahi fuu he wami konɛ a ná deka kɛ tsɔse nyɛmimɛ nyumuhi. Wa sɔlemi ji kaa nyɛmimɛ nyumuhi fuu maa ngɔ a he kɛ ha konɛ a tsɔse mɛ, nɛ́ a ngɔ nɔ́ nɛ a kase ɔ kɛ ye bua Yehowa we bi. Enɛ ɔ maa ye bua asafohi tsuo ngɛ je kɛ wɛ, nɛ e maa ye bua wa ti nɔ tsuaa nɔ konɛ waa ya nɔ nɛ waa ye anɔkuale ngɛ haomi be nɛ ngɛ wa hɛ mi kɛ ma a mi hulɔ.