NÍHI NƐ MAA YE BUA WEKUHI | GBA SI HIMI
Ajuama Bɔmi He Fonihi Kɛ Videohi A Hyɛmi Ma Nyɛ Ma Puɛ O Gba Si Himi ɔ
E yo ɔ ba na nɔ́ nɛ e huno ɔ hii pee ngɛ laami mi ɔ. E huno ɔ kpa lɛ pɛɛ wawɛɛ. E wo si kaa e ma kpa, nɛ e pee jã—kɛ ya si be ko. Kɛkɛ nɛ e kpale ya pee ekohu, nɛ e yo ɔ ba ná le, nɛ e kpa lɛ pɛɛ kaa e be pee hu.
Anɛ o ngɛ si fɔfɔɛ ko kaa jã mi lo? Ke jã a, lɛɛ e he hia nɛ o yɔse bɔ nɛ ajuama bɔmi he fonihi kɛ videohi nɛ o ngɛ hyɛe ɔ ngɛ o he piɛɛlɔ ɔ awi yee ha, kɛ blɔ nɔ nɛ o maa gu kɛ kpa su nɛ ɔ kulaa.a
Ngɛ munyu nɛ ɔ mi ɔ
Nɔ́ nɛ e sa nɛ o le
Ajuama bɔmi he fonihi kɛ videohi a hyɛmi ma nyɛ ma puɛ gba si himi. E ma nyɛ ma ha nɛ he piɛɛlɔ nɛ́ e hyɛ we ní peepee nɛ ɔ mi mi nɛ fu, nɛ e be e he piɛɛlɔ nɛ e hyɛɔ ɔ hee maa ye hu.b
Yogbayo nɛ́ e huno hyɛɛ ajuama bɔmi he fonihi loo videohi ɔ ma nyɛ ma ná he numihi nɛ nyɛɛ se ɔmɛ:
E maa nu he kaa e huno ɔ yi lɛ anɔkuale. Yogbayo ko nɛ a tsɛɛ lɛ ke Sarah de ke, “I nu he kaa nɔ́ nɛ ye huno ɔ puɛ gba si abɔ.”
E maa nu he kaa e he sui. Yogbayo ko de ke ajuama bɔmi he fonihi kɛ videohi nɛ e huno ɔ hii hyɛe ɔ ha nɛ e nuɔ he kaa “e he be fɛu nɛ zo gbeɔ lɛ.”
E be e huno ɔ hee maa ye hu. Yogbayo ko nɛ a tsɛɛ lɛ Helen ɔ de ke, “Ye yi mi tɛ̃ mi ngɛ nɔ́ fɛɛ nɔ́ nɛ ye huno ɔ peeɔ ɔ he.”
E maa pee yeyeeye. Yogbayo ko nɛ a tsɛɛ lɛ ke Catherine de ke, “Ye huno ɔ ní peepee ɔ haa nɛ i haoɔ ngɛ ye si himi mi be fɛɛ be.”
Mo susu nɔ́ nɛ ɔ he: Baiblo ɔ de hunomɛ kaa a suɔ a yi ɔmɛ. (Efeso Bi 5:25) Ke huno ko haa nɛ e yo ɔ náa he numihi nɛ a wo ta kɛ sɛ hlami ɔ eko ɔ, anɛ lɔ ɔ tsɔɔ kaa e suɔ e yo ɔ lo?
Nɔ́ nɛ o ma nyɛ maa pee
E be gbɔjɔɔ kaa nɔ ko ma kpa ajuama bɔmi he fonihi aloo videohi a hyɛmi. Yogbayo ko nɛ a tsɛɛ lɛ ke Stacey de ke, “Ye huno ɔ nyɛ nɛ e kpa sigaleti kɛ wii kɛ dã numi, se loloolo ɔ, e nyɛ we nɛ e kpa ajuama bɔmi he fonihi kɛ videohi a hyɛmi.”
Ke o ngɛ si fɔfɔɛ nɛ ɔ mi ɔ, ga womi nɛ nyɛɛ se ɔ ma nyɛ maa ye bua mo konɛ o kpa su nɛ ɔ kulaa.
Moo le nɔ́ he je nɛ ajuama bɔmi he fonihi loo videohi ji nɔ́ yaya a. Ajuama bɔmi he fonihi loo videohi a hyɛmi haa nɛ nɔ peeɔ níhi nɛ e susuɔ kaa e ma ha lɛ bua jɔmi be mi nɛ́ e susuu we ni kpahi a he. Ní peepee nɛ ɔ puɛɔ suhi nɛ haa nɛ gba si himi peeɔ kpakpa a, nɛ́ ji suɔmi, kɛ anɔkuale yemi, nɛ jehanɛ hu e be hae nɛ o he piɛɛlɔ ɔ nɛ e he mo nɛ e ye. Jehanɛ hu ɔ, ke nɔ ko peeɔ jã a, e tsɔɔ kaa e bui Yehowa Mawu, nɛ ji Nɔ Nɛ To gba si himi sisi ɔ.
Baiblo sisi tomi mlaa: “Ha gba hɛ mi nɛ ba nyami.”—Hebri Bi 13:4.
Ko pia nɔ ko ngɛ o ní peepee ɔ he. Ko de ke, ‘Kaa ye yo ɔ jeɔ suɔmi kpo kɛ tsɔɔ mi wawɛɛ ɔ, jinɛ i ko hyɛ we ajuama bɔmi he fonihi loo videohi.’ E sɛ nɛ o pia o yo ɔ, ejakaa lɔ ɔ ma ha nɛ o na nɔ́ ko kɛ je o nya konɛ o kpale ya hyɛ ajuama bɔmi he fonihi loo videohi ekohu ke o yo ɔ pee we nɔ́ nɛ o ngɛ blɔ hyɛe ɔ ha mo.
Baiblo sisi tomi mlaa: “Nɔ fɛɛ nɔ ɔ, lɛ nitsɛ e we akɔnɔ nɛ e hii lɛ gblae nɛ e hii lɛ sisie ɔ nɛ e kaa lɛ.”—Yakobo 1:14.
O kɛ o he piɛɛlɔ ɔ nɛ sɛɛ ní kɛ je o tsui mi, nɛ́ o ko laa lɛ nɔ́ ko nɔ. Huno ko nɛ a tsɛɛ le ke, Kevin ɔ de ke: “I kɛ ye yo ɔ sɛɛɔ ní, nɛ i biɔ lɛ ke ji i ya nɔ nɛ i hyɛ nɔ́ ko nɛ tleɔ bɔmi nami he numi si, aloo i yu ye he kɛ je he. Kɛ gu enɛ ɔ nɛ i peeɔ ɔ nɔ ɔ, e nui he kaa i ngɛ nɔ́ ko pee kɛ ngɛ lɛ lae.”
Baiblo sisi tomi mlaa: “Wa suɔ kaa wa maa ba wa je mi ngɛ anɔkuale yemi mi ngɛ nɔ́ fɛɛ nɔ́ mi.”—Hebri Bi 13:18.
O hɛ nɛ hi o he nɔ be fɛɛ be. Ke jehahi fuu ba be, nɛ o nu he kaa o nyɛ nɛ o ye su yaya nɛ ɔ nɔ po ɔ, su nɛ ɔ ma nyɛ maa kpale ba ekohu. Kevin, nɛ wa wo e ta kɛ sɛ hlami ɔ de ke: “I nyɛ nɛ i kpa ajuama bɔmi he fonihi kɛ videohi a hyɛmi jeha nyɔngma sɔuu, nɛ lɔ ɔ ha nɛ i ná nɔ mi mami kaa ye nyagba a se po. Se su nɛ ɔ pee kaa lohwe dikalɔ ko nɛ e buu si nɛ́ e ngɛ be nɛ sa hlae nɛ e tua mi.”
Baiblo sisi tomi mlaa: “Ha nɛ nɔ nɛ e susu kaa e daa si ɔ nɛ e hyɛ nɛ hi konɛ e ko nɔ si.”—1 Korinto Bi 10:12.
Ke o kɛ ajuama bɔmi he fonihi a hyɛmi he ka kpe ɔ, moo mlɛ. O be nyɛe maa tsi akɔnɔ yaya a nya nɛ́ e ko ba, se o ma nyɛ maa hla kaa o ma tsu akɔnɔ ɔ nya ní aloo o be jã pee. He numi ɔ se maa po—eko ɔ, e se ma nyɛ maa po ngɛ be kpiti mi, ke ji kaa o bɔ mɔde kaa o ma susu ní kpahi a he mohu.
Baiblo sisi tomi mlaa: “E sa nɛ nyɛ ti nɔ fɛɛ nɔ nɛ e le bɔ nɛ e ma kudɔ lɛ nitsɛ e nɔmlɔ tso ɔ ha ngɛ klɔuklɔu peemi kɛ bumi mi, pi kɛ hɛkɔ, kɛ bɔmi nami he akɔnɔ nɛ́ e nɔ hí yemi”—1 Tɛsalonika Bi 4:4, 5.
Moo yu o he kɛ je si fɔfɔɛhi nɛ ma nyɛ ma ha nɛ o hyɛ ajuama bɔmi he fonihi loo videohi ɔ a he. Womi ko nɛ ji Willpower’s Not Enough ɔ de ke, “Ke o ná nɛ o ya je si fɔfɔɛ ko nɛ ma nyɛ maa pee ka kɛ ha mo ɔ mi ɔ, e ngɛ kaa nɔ́ nɛ o su la ko. Nɔ́ pɛ nɛ e hia ji nu bɔɔ . . . kɛkɛ pe la a ma bɔni tsomi ɔ nɛ.”
Baiblo sisi tomi mlaa: ‘Yayami ko nɛ kó ye ye nɔ.’—La 119:133.
O kɔni mi ko jɔ̃. E ma nyɛ ma he be kɛkɛɛ—loo jehahi fuu po—loko o he piɛɛlɔ ɔ ma he mo maa ye ekohu. Se níhi a si kpami tsɔɔ kaa jã maa hi peemi.
Baiblo sisi tomi mlaa: “Suɔmi toɔ e tsui si.”—1 Korinto Bi 13:4.
a E ngɛ mi kaa munyu nɛ ɔ tu hunomɛ a he munyu mohu lɛɛ, se sisi tomi mlaahi nɛ wa susu he ɔ kɔɔ yigbayihi nɛ a hyɛɛ ajuama bɔmi he fonihi kɛ videohi ɔ a he hulɔ.
b Gba si himi he piɛɛli komɛ susuɔ kaa ke a hyɛɛ ajuama bɔmi he fonihi kɛ videohi kɛ bla a, e ma nyɛ ha nɛ a gba a nɛ pee kpakpa. Se ngɛ anɔkuale mi ɔ, ní peepee nɛ ɔ teɔ si kɛ woɔ Baiblo sisi tomi mlaahi.—Abɛ 5:15-20; 1 Korinto Bi 13:4, 5; Galatia Bi 5:22, 23.