Mɛni Baiblo ɔ De Ngɛ Bloonya Yemi He?

Nɔ́ nɛ Baiblo ɔ de

Baiblo ɔ tsɔɔ we be tutuutu nɛ a kɛ fɔ Yesu, nɛ e de we ke waa ye e fɔmi ligbi hulɔ. Womi nɛ ji McClintock and Strong’s Cyclopedia a de ke: “Mawu fã we wɔ ke waa ye Bloonya, nɛ a de we nɔ́ ko ngɛ Bloonya yemi he ngɛ Somi He ɔ mi.”

Yi nɔ sanehi hu tsɔɔ kaa Bloonya yemi je wɔ jali a kusumi mi. Baiblo ɔ tsɔɔ kaa ke wa ngɛ blɔ ko nɛ Mawu kplɛɛ we nɔ gue kɛ ngɛ lɛ jae ɔ, e bua be he jɔe.​—2 Mose 32:5-7.

Bloonya Yemi Kusumi ɔ He Yi Nɔ Sane

1. Yesu fɔmi ligbi yemi: “Kristofohi nɛ a hi si ngɛ kekleekle jeha lafa a mi ɔ yi [Yesu] fɔmi ligbi ejakaa a le kaa fɔmi ligbi yemi ji wɔ jali a kusumi.”​—The World Book Encyclopedia.

2. December 25: Odase ko kulaa be nɛ tsɔɔ kaa a fɔ Yesu ngɛ ligbi nɛ ɔ nɔ. Eko ɔ, jami nya dali ɔmɛ nɛ a hla be nɛ ɔ konɛ e kɛ wɔ jali a gbijlɔhi nɛ a yeɔ ngɛ ahlabata be mi ɔ nɛ ya nɔ ligbi kake nɔ.

3. Ní kemi, ní yemi kɛ he nya buamihi: Womi ko nɛ a tsɛɛ ke The Encyclopedia Americana a de ke: “Ke Roma bi ngɛ a gbijlɔ ko nɛ a yeɔ ngɛ December mi nɛ a tsɛɛ ke Saturnalia a yee ɔ, ní yemi, ní numi, ní kemi, okplɔɔ ngmɛmi, kanlɛ sumi kɛ he nya buami slɔɔtohi yaa nɔ. Níhi nɛ yaa nɔ ngɛ bloonya yemi mi ɔ fuu je Saturnalia gbijlɔ nɛ ɔ mi.” Womi ko nɛ a tsɛɛ ke Encyclopædia Britannica a hu de ke, ke a ngɛ Saturnalia gbijlɔ yeɔ ɔ, “nɔ ko nɔ ko yɛ ní tsumi.”

4. Bloonya kanehi: Womi nɛ ji The Encyclopedia of Religion ɔ de ke: Nihi nɛ ngɛ Yuropa ma amɛ a mi ɔ ngɔ ɔ “kanehi kɛ tso slɔɔtohi” kɛ dlaa a wehi a mi ke a ngɛ gbijlɔ nɛ ɔ yee ngɛ ahlabata be mi kɛ yi mi tomi kaa a kɛ maa fiee mumi yayamihi.

5. Mistletoe tso kɛ holly tso: “Druid bi heɔ yeɔ kaa he wami ko ngɛ mistletoe tso ɔ mi. A jaa tso nɛ a tsɛɛ ke holly ɔ, kɛ yi mi tomi kaa lɔ ɔ ma ha nɛ pu ɔ maa kpale kɛ ba.”​—The Encyclopedia Americana.

6. Bloonya tso: “Wɔ jali nɛ a hi Yuropa a jaa tsohi wawɛɛ. Benɛ a tsake ba pee Kristofohi po ɔ, a kpa we tso jami.” Blɔhi nɛ a guu nɔ kɛ ja tsohi eko ji kaa, ke a ngɛ gbijlɔhi yee ngɛ ahlabata be mi ɔ, nihi “ngɔɔ tso ko nɛ a tsɛɛ ke Yule ɔ kɛ maa a sinyahi a nya loo a wehi a mi.”​—Encyclopædia Britannica.