Kɛ Je Yesu Si Temi Nɔ Kɛ Ya Su Paulo Tsu Womi Nɔ

A tle Yesu si ngɛ e gbenɔ se ligbi etɛne ɔ nɔ. Jamɛ a ligbi ɔ, e je e he kpo kɛ tsɔɔ e se nyɛɛli ɔmɛ si enuɔ. Yesu ya nɔ nɛ e je e he kpo kɛ tsɔɔ mɛ ligbi 40. Lɔɔ se ɔ, Yesu ho hiɔwe ya benɛ e kaseli ɔmɛ ekomɛ ngɛ lɛ hyɛe. Ligbi nyɔngma se ɔ, Mawu ha mumi klɔuklɔu ba Yesu se nyɛɛli nɛ a ngɛ mlɛe ngɛ Yerusalem ɔ nɔ.

Pee se ɔ, Mawu henyɛli ha nɛ a nu bɔfo ɔmɛ kɛ wo tsu, se hiɔwe bɔfo ko ba je mɛ kɛ je tsu ɔ mi. Henyɛli komɛ fiaa Stefano tɛ nɛ e gbo. Se wa maa na bɔnɛ Yesu hla henyɛli nɛ ɔmɛ a kpɛti nɔ kake kɛ pee e sɔmɔlɔ pɔtɛɛ ha. Nɛ lɛ ji nɔ nɛ ba plɛ pee bɔfo Paulo ɔ nɛ. Kɛkɛ nɛ jeha etɛ kɛ fã se ngɛ Yesu gbenɔ se ɔ, Mawu tsɔ bɔfo Petro nɛ e ya fiɛɛ kɛ ha Kornelio nɛ e pi Yudano ɔ kɛ e we mi bi.

Maa pee jeha 13 se ɔ, Paulo je e blɔ hiami fiɛɛmi nítsumi ɔ sisi. Timoteo piɛɛ e he ngɛ e blɔ hiami enyɔne ɔ mi. Wa maa kase bua jɔmi nɛ Paulo kɛ e blɔ hiami he piɛɛli ɔmɛ ná ngɛ a Mawu sɔmɔmi mi ɔ he ní. Nyagbe ɔ, a wo Paulo tsu ngɛ Roma. Jeha enyɔ se ɔ, a ngmɛɛ e he, se pee se ɔ, a nu lɛ kɛ wo tsu ekohu nɛ a gbe lɛ. Níhi nɛ ya nɔ ngɛ Mi Gbami KPAAGO nɛ ɔ mi ɔ, ngɔ maa pee jeha 32.