Mawu Huɛmɛ Peeɔ Ní Kpakpahi

Ke o ngɛ huɛ ko nɛ o bua jɔ e he nɛ o ngɛ bumi ha lɛ ɔ, o bɔɔ mɔde kaa o maa kase lɛ. Baiblo ɔ deɔ ke: “[Yehowa] hi nɛ e da.” (La 25:8) Ke o maa pee Mawu huɛ ɔ, lɛɛ e sa nɛ o pee nɔmlɔ kpakpa nɛ́ peeɔ nɔ́ nɛ da. Baiblo ɔ deɔ ke: “Nyɛɛ pee Mawu kaseli kaa bimɛ nɛ e suɔ, nɛ nyɛɛ nyɛɛ ngɛ suɔmi mi.” (Efesobi 5:1, 2, Somi He Ɔ) Blɔhi komɛ nɛ o ma nyɛ maa gu nɔ kɛ pee ja ji nɛ ɔ nɛ:

Ye bua ni kpahi. “Nyɛ ha nɛ waa pee nihi tsuo kpakpa.”—Galatabi 6:10, NW.

Mo tsu ní wawɛɛ. “Nɔ nɛ juɔ ɔ, e ko ju hu. Se mohu e ngɔ e nguɛ nyɔngma kɛ tsu ní wawɛɛ.”—Efesobi 4:28.

Ha o he nɛ tsɔ ngɛ nɔmlɔtso kɛ jemiba mi. “Nyɛ ha waa tsu wa he kɛ je helo kɛ mumi mi mu níhi tsuo he, konɛ wa he nɛ tsɔ kɛ pi si ngɛ Mawu gbeye yemi mi.”—2 Korintobi 7:1, NW.

O kɛ o wekuli nɛ́ hi si ngɛ suɔmi kɛ bumi mi. “E sa kaa nyɛ ti nɔ tsuaa nɔ nɛ́ suɔ e yo kaa bɔnɛ e suɔ lɛ nitsɛ e he, nɛ yogbayo tsuaa yogbayo nɛ́ [ngɔ] bu [nɛ mi kuɔ kɛ ha] e huno. Bimɛ, nyɛɛ bu nyɛ fɔli tue.”—Efesobi 5:33–6:1.

Mo je suɔmi kpo ha ni kpahi. “Nyɛ ha waa suɔ wa sibi, ejakaa suɔmi ɔ, Mawu ngɔ nɛ e je.”—1 Yohane 4:7.

Moo ye ma a mlaahi a nɔ. “Nɔ tsuaa nɔ nɛ́ ba e he si ha ma nɔyeli, . . . Lɔɔ he ɔ, bɔnɛ ji nɔ tsuaa nɔ blɔ nya a, nyɛɛ pee ha lɛ. Ma tó nɛ sa kaa nyɛɛ wo ɔ, nyɛɛ wo.”—Romabi 13:1, 7.