Ke Nɔ Ko Maa Ya Nɔ Maa Pee O Huɛ Ɔ, Ja O Pee O He Huɛ Nitsɛ

Huɛ bɔmi daa si ngɛ suɔmi nɔ. Benɛ o ngɛ Yehowa he ní kasee babauu ɔ, jã nɔuu nɛ suɔmi nɛ o ngɛ kɛ ha lɛ ɔ hu mi maa hi wae. Nɛ benɛ suɔmi nɛ o ngɛ kɛ ha lɛ ɔ mi ngɛ wae ɔ, kɛkɛ ɔ, bɔnɛ o hlaa kaa o ma sɔmɔ lɛ ɔ hu mi maa wa. Enɛ ɔ maa wo mo he wami konɛ o pee Yesu Kristo kaselɔ. (Mateo 28:19) Ke o ba piɛɛ Yehowa Odasefoli a weku nɛ ngɛ bua jɔmi ɔ he ɔ, o ma ná Mawu huɛ bɔmi kɛ ya neneene. Lɛɛ mɛni e sa kaa o pee mɔ?

E sa kaa o ye Mawu mlaa amɛ a nɔ kɛ tsɔɔ suɔmi nɛ́ o ngɛ ha lɛ. “Ejakaa ke wa suɔ Mawu ɔ, wa yeɔ e mlaa amɛ a nɔ. Nɛ e mlaa amɛ a nɔ yemi wɛ kulaa.”—1 Yohane 5:3.

Ngɔɔ nɔ́ nɛ o ngɛ kasee ɔ kɛ tsu ní. Yesu gba sane ko nɛ́ tsɔɔ enɛ ɔ nya. Ní lelɔ ko ma e tsu ngɛ tɛsa nɔ. Nyumu kuasia ko hu ma e tsu ngɛ zia nɔ. Benɛ hiɔmi ngua ko ba nɛ ɔ, tsu ɔ nɛ a ma ngɛ tɛsa nɔ hule we, se tsu nɛ a ma ngɛ zia nɔ ɔ lɛɛ e hule butuu. Yesu de ke nɔ tsuaa nɔ nɛ nuɔ e munyu ɔ nɛ e kɛ tsuɔ ní ɔ ngɛ kaa ní lelɔ ɔ nɛ ma e tsu ɔ ngɛ tɛsa nɔ ɔ. Se nihi nɛ nuɔ e munyu ɔ se a yi nɔ ɔ ngɛ kaa nyumu kuasia nɛ ma e tsu ɔ ngɛ zia nɔ ɔ. Nyumuhi enyɔ nɛ ɔmɛ a ti mɛnɔ o suɔ nɛ́ o pee.—Mateo 7:24-27.

He nɔ jɔɔmi. Enɛ ɔ tsɔɔ kaa o ma de Yehowa ngɛ sɔlemi mi kaa o suɔ nɛ́ o pee e suɔmi nya ní kɛ ya neneene. Mawu suɔmi nya ní nɛ o maa pee ɔ lɛ tsɔɔ kaa Yesu Kristo kaselɔ ji mo.—Mateo 11:29.

Baptisimi. “Ha nɛ a baptisi mo nɛ́ o tsɛ e biɛ konɛ a fɔ o he yayami ɔmɛ ngɔ pue he.”—Bɔfo 22:16, NW.

Ngɔɔ o he kɛ wo Mawu sɔmɔmi mi kulaa. “Nɔ́ tsuaa nɔ́ nɛ nyɛ ngɛ pee ɔ, nyɛɛ je nyɛ tsui mi kɛ pee kaa nɔ́ nɛ Nyɔmtsɛ ɔ nyɛ ngɛ pee ha, se pi adesa.”—Kolosebi 3:23.