Moo Pee Mawu Huɛ Kɛ Ya Neneene!

E biɔ mɔde bɔmi loko o ma ná huɛ; nɛ e biɔ mɔde bɔmi loko nɔ ko maa ya nɔ maa pee o huɛ. A maa jɔɔ mo babauu ke o bɔ mɔde nɛ o pee Mawu huɛ, nɛ o hɛɛ mi kɛ ya si nyagbe ɔ. Yesu de nihi nɛ a ná hemi kɛ yemi ngɛ e mi ɔ ke: “Anɔkuale ɔ ma ha nyɛ maa ye nyɛ he.” (Yohane 8:32) Kɛ munyu nɛ ɔ tsɔɔ kɛɛ?

O ma nyɛ maa ye o he amlɔ nɛ ɔ. O ma nyɛ maa ye o he kɛ je lakpa tsɔɔmihi kɛ lakpa munyuhi nɛ Satan gbɛ kɛ fia amɛ a he. O ma nyɛ maa ye o he kɛ je hɛ nɔ kami nɛ nimli ayɔhi abɔ nɛ a li Yehowa be ɔ he. (Romabi 8:22) Mawu huɛmɛ yeɔ a he kɛ jeɔ ‘gbenɔ gbeye yemi’ po he.—Hebribi 2:14, 15.

O ma nyɛ ma ná he yemi ngɛ Mawu je he ɔ mi. Mɛni he yemi nɛ se be o ma ná ngɛ hwɔɔ se kikɛ! O maa ye o he kɛ je ta hwumi, hiɔ kɛ basabasa peemi he ngɛ Paradeiso zugba a nɔ. O ma ná he yemi kɛ je ohia kɛ hwɔ he. O maa ye o he ngɛ bwɔmi kɛ gbenɔ he. O ma ná he yemi kɛ je gbeye yemi, yi mi wami kɛ dami sane yemi nɛ́ be ɔ he. Baiblo ɔ de ngɛ Mawu he ke: “O bliɔ o dɛ mi, nɛ o haa nɔ́ tsuaa nɔ́ nɛ ngɛ hɛ ngmengmle tɔɔ.”—La 145:16.

Mawu huɛmɛ maa hi si kɛ ya neneene. Neneene wami ji níke ní nɛ he jua wa nɛ́ Mawu ma ha nihi tsuo nɛ suɔ kaa a kɛ lɛ maa bɔ huɛ ɔ. (Romabi 6:23) Moo lɛɛ, susu nɔ́ nɛ wami nɛ́ nyagbe be he ɔ ma ji ha mo he nɛ o hyɛ!

O ma ná be kɛ pee níhi fuu. Eko ɔ, o maa suɔ kaa o kase sanku fiami. Aloo o maa suɔ nɛ́ o kase ní tɛnimi loo kapitɛ nítsumi. Eko ɔ, o maa suɔ kaa o kase lohwehi kɛ tsohi a he ní, aloo o hia blɔ kɛ ya hyɛ mahi kɛ nimli kpahi komɛ. Neneene wami nɛ o ma ná a ma ha o nyɛ nɛ́ o pee enɛ ɔmɛ tsuo!

O ma ná be kɛ pee huɛmɛ fuu. Si nɛ o maa hi daa a ma ha o le nihi babauu nɛ́ mɛ hu a ba plɛ Mawu huɛmɛ. O ma ba le he bemihi nɛ a ngɛ kɛ a su kpakpahi, nɛ a maa pee mo hu o huɛmɛ. O maa suɔ mɛ, nɛ mɛ hu a maa suɔ mo. (1 Korintobi 13:8) Wami nɛ be nyagbe ma ha o pee nɔ tsuaa nɔ ngɛ zugba a nɔ huɛ! Nɔ́ nɛ pe lɛ tsuo ji kaa, o kɛ Yehowa kpɛti huɛ bɔmi ɔ mi maa wa wawɛɛ nitsɛ ngɛ́ jeha babauu se. E ba mi kaa o maa pee Mawu huɛ kɛ ya neneene!