E Sa Kaa O Kase Mawu He Ní

Ke o maa pee Mawu huɛ ɔ, e sa kaa o kase e he ní. Anɛ o huɛmɛ le o biɛ, nɛ a kɛ tsɛɛ mo lo? A peeɔ ja. Mawu hu suɔ kaa o le e biɛ, nɛ o ngɔ kɛ tsɛ lɛ. Mawu biɛ ji Yehowa. (La 83:18; Mateo 6:9) E sa nɛ́ o le nɔ́ nɛ e suɔ kɛ nɔ́ nɛ e sume. E sa nɛ o le nihi nɛ ji e huɛmɛ kɛ nihi nɛ ji e henyɛli. E yeɔ be loko a leɔ nɔ ko. Baiblo ɔ de kaa e ji níle blɔ kaa o maa to be kɛ ha Yehowa he ní kasemi.—Efesobi 5:15, 16.

Mawu huɛmɛ peeɔ nɔ́ nɛ sa e hɛ mi. Mo susu o huɛmɛ a he nɛ o hyɛ. Ke o peeɔ mɛ yayami nɛ o peeɔ níhi nɛ a sume hulɔ ɔ, anɛ a maa ya nɔ maa pee o huɛmɛ lo? Dɛbi kulaa! Jã kɛ̃, ke o suɔ nɛ́ o pee Mawu huɛ ɔ, e sa kaa o pee nɔ́ nɛ sa e hɛ mi.—Yohane 4:24.

Pi jamihi tsuo nɛ haa nɔ kɛ Mawu peeɔ huɛ. Yesu, nɛ ji Mawu huɛ pe kulaa a, tu blɔhi enyɔ komɛ a he munyu. Blɔ ɔ kake ngɛ gbajaa nɛ nimli babauu ngɛ nɔ nyɛɛe. Jamɛ a blɔ ɔ kɛ nɔ yaa hɛ mi kpatami mi. Blɔ enyɔne ɔ ngɛ tokofii nɛ nimli bɔbɔyoo pɛ lɛ a ngɛ nɔ nyɛɛe. Blɔ nɛ ɔ kɛ nɔ yaa neneene wami mi. Enɛ ɔ tsɔɔ kaa ke o suɔ nɛ o pee Mawu huɛ ɔ, lɛɛ e sa kaa o le anɔkuale blɔ nɛ a guu nɔ kɛ jaa lɛ ɔ.—Mateo 7:13, 14.