Babɛl Mɔ ɔ

Nyu Kpekpemi ɔ se ɔ, Noa binyumu ɔmɛ kɛ a yi ɔmɛ fɔ bimɛ fuu. A he ba hiɛ wawɛɛ, nɛ bɔɔbɔɔbɔɔ ɔ, a gbɛ fĩa je ɔ mi kaa bɔ nɛ Yehowa de mɛ ke a pee ɔ.

Se a ti ni komɛ bui Yehowa tue. A de ke: ‘Nyɛ ha nɛ waa po ma ngua ko kɛ ha wa he, nɛ waa ma mɔ nɛ e yi mi nɛ ya su hiɔwe. Ke wa pee jã a, wa ma he biɛ.’

Yehowa bua jɔɛ nɔ́ nɛ a ngɛ pee ɔ he. Enɛ ɔ he ɔ, e pee e juɛmi kaa e ma ha nɛ a kpa mɔ ɔ mami. Anɛ o le nɔ́ nɛ Yehowa pee lo? Si kake too ɔ, e tsaka gbi nɛ a ngɛ tue ɔ, nɛ a bɔni gbi slɔɔtoslɔɔtohi tumi. A nui nɔ́ nɛ a sibi ngɛ dee ɔ sisi. Enɛ ɔ he ɔ, a kpa mɔ ɔ mami. Biɛ nɛ a wo ma nɛ a ngɛ poe ɔ ji Babɛl. Babɛl sisi ji “Juɛmi Nɛ Futu.” Nimli ɔmɛ bɔni ma a mi jemi, nɛ bɔɔbɔɔbɔɔ ɔ, a gbɛ fĩa je ɔ mi tsuo. Se a ya nɔ nɛ a pee ní yayahi ngɛ hehi nɛ a ya hi ɔ. Jamɛ a be ɔ mi ɔ, anɛ ni komɛ ngɛ zugba a nɔ nɛ a suɔ Yehowa lo? Wa maa na heto ɔ ngɛ yi nɛ nyɛɛ se ɔ mi.