Moo po binyɛ ko nɛ ngɛ suɔmi nɛ e ngɛ dlae ha e binyumuyo ko konɛ e ya sukuu ɔ he foni nɛ o hyɛ. E bɔ mɔde nɛ e du ha lɛ, nɛ e wo tadehi nɛ a he tsɔ kɛ ha lɛ. Fɔlɔ ɔ peeɔ jã be fɛɛ be, nɛ enɛ ɔ haa nɛ jokuɛ ɔ náa nɔmlɔ tso mi he wami kpakpa, nɛ ni kpahi naa kaa e fɔli ɔmɛ ngɛ e nɔ hyɛe saminya. Kaa bɔ nɛ fɔli suɔ nɛ a bimɛ a he nɛ tsɔ be fɛɛ be ɔ, jã kɛ̃ nɛ Yehowa nɛ ji wa Tsɛ ɔ hu suɔ nɛ wa he nɛ tsɔ ngɛ nɔmlɔ tso mi, ngɛ wa munyu tutui kɛ wa ní peepeehi tsuo a mi. Ke wa he tsɔ ɔ, wɔ nitsɛmɛ wa náa he se, nɛ jehanɛ se hu ɔ, e woɔ Yehowa hɛ mi nyami.

1. Mɛni wa maa pee konɛ wa he nɛ tsɔ ngɛ nɔmlɔ tso mi?

Yehowa de wɔ ke: “E sa nɛ nyɛɛ pee klɔuklɔu.” (1 Petro 1:​16) Loko wa ma nyɛ maa pee klɔuklɔu ɔ, ja wa je mi bami he tsɔ, nɛ wa he tsɔ ngɛ nɔmlɔ tso mi hulɔ. Loko wa he ma nyɛ ma tsɔ ɔ, ja wa duɔ be fɛɛ be, nɛ wa haa nɛ wa tadehi, wa wehi kɛ wa lɔlehi a he tsɔɔ nyaii. Jehanɛ se hu ɔ, wa ma nyɛ maa ye bua kɛ dla Matsɛ Yemi Asa a nɔ. Ke wa he tsɔ ɔ, e woɔ Yehowa hɛ mi nyami.​—2 Korinto Bi 6:​3, 4.

2. Mɛni suhi kɛ ní peepeehi nɛ e sa nɛ wa kua konɛ wa he nɛ tsɔ?

Baiblo ɔ woɔ wɔ he wami kaa, “wa fɔ he lo mi kɛ mumi mi mu fɛɛ mu ngɛ wa he.” (2 Korinto Bi 7:1) Enɛ ɔ tsɔɔ kaa, e sa nɛ wa kua nɔ́ fɛɛ nɔ́ nɛ ma puɛ wa nɔmlɔ tso ɔ aloo wa juɛmi ɔ. E sa nɛ níhi nɛ wa susuɔ a he ɔ nɛ sa Yehowa hɛ mi, enɛ ɔ he ɔ, wa bɔɔ mɔde kaa wa ma kua susumi yayahi. (La 104:​34) Jehanɛ se hu ɔ, wa bɔɔ mɔde kaa wa ma ha nɛ munyu fɛɛ munyu nɛ maa je wa nya a he nɛ tsɔ.​—Kane Kolose Bi 3:8.

Mɛni ji nɔ́ kpa ko nɛ be hae nɛ wa he nɛ tsɔ ngɛ nɔmlɔ tso mi aloo je mi bami mi? Ní komɛ ngɛ nɛ a ma nyɛ ma puɛ wa nɔmlɔ tso ɔ. Enɛ ɔ he ɔ, wa nui taba loo sigaleti, wa nui tsopa yayahi, nɛ waa kɛ tsopa kpahi hu tsu we ní ngɛ blɔ yaya nɔ. Ke wa yu wa he ngɛ ní nɛ ɔmɛ a he ɔ, lɔ ɔ haa nɛ wa náa nɔmlɔ tso mi he wami kpakpa, nɛ jehanɛ se hu ɔ, lɔ ɔ tsɔɔ kaa wa ngɛ bumi kɛ ha wami nɛ Mawu kɛ ke wɔ ɔ. Ke wa bɔ mɔde nɛ wa fiɛ we wa fɔmi níhi a he, nɛ wa yu wa he ngɛ ajuama bɔmi fonihi loo videohi a hyɛmi he ɔ, wa he ma tsɔ ngɛ je mi bami mi. (La 119:​37; Efeso Bi 5:5) E he ma nyɛ maa wa ha wɔ kaa wa maa yu wa he kɛ je ní peepee nɛ ɔmɛ a he, se Yehowa ma nyɛ maa ye bua wɔ konɛ waa pee jã.​—Kane Yesaya 41:​13.

MOO KASE BABAUU

3. Ke wa he tsɔ ɔ, e woɔ Yehowa hɛ mi nyami

Ke wa kane mlaahi nɛ Yehowa kɛ ha Israel bi ɔmɛ ɔ, e haa nɛ wa naa bɔ nɛ e we bi a he nɛ́ ma tsɔ ɔ he hia lɛ ha. Nyɛɛ kane 2 Mose 19:​10 kɛ 30:​17-​19, nɛ nyɛ susu sane bimihi nɛ nyɛɛ se nɛ ɔmɛ a he:

• Ngɛ ngmami nɛ ɔmɛ a nya a, kɛ Yehowa naa wa he nɛ ma tsɔ ɔ ha kɛɛ?

• Mɛni wa ma nyɛ maa pee be fɛɛ be konɛ wa he nɛ tsɔ?

Loko wa he ma tsɔ ɔ, e biɔ be kɛ mɔde bɔmi wawɛɛ. Se wa ma nyɛ maa pee jã ngɛ he fɛɛ he nɛ wa ngɛ, ke wa ngɛ sika jio, wa be sika jio. Mo je VIDEO ɔ, nɛ nyɛ susu sane bimi nɛ nyɛɛ se ɔ he.

VIDEO: Mawu Suɔ Nihi Nɛ A He Tsɔ (4:10)

• Mɛni he je nɛ ke wa níhi a he tsɔ ɔ, e haa nɛ wa fiɛɛmi ní tsumi ɔ hɛ mi baa nyami ɔ?

4. Bɔɔ mɔde nɛ o ye su yayahi a nɔ

Ke o nuɔ sigaleti aloo o kɛ tsopahi tsuɔ ní ngɛ blɔ yaya nɔ ɔ, lɛɛ o le bɔ nɛ su nɛ ɔ nɔ yemi ma nyɛ maa ye ha. Se mɛni ma nyɛ maa ye bua mo? Mo susu bɔ nɛ su nɛ ɔ ngɛ mo awi yee ha a he. Nyɛɛ kane Mateo 22:​37-​39, nɛ nyɛ susu bɔ nɛ taba numi aloo tsopa nɛ nɔ ko kɛ ma tsu ní ngɛ blɔ yaya nɔ ɔ saa . . .

• huɛ bɔmi nɛ e ngɛ nɔ ɔ kɛ Yehowa a kpɛti ɔ he ha.

• nɔ ɔ weku kɛ nihi nɛ a bɔle lɛ ɔ a he ha.

Moo pee níhi nɛ maa ye bua mo konɛ o nyɛ nɛ o ye su yayahi a nɔ.a Mo je VIDEO ɔ.

VIDEO: Moo Ye O He Nɔ (2:47)

Nyɛɛ kane Filipi Bi 4:​13, nɛ nyɛ susu sane bimi nɛ ɔ he:

• Mɛni blɔ nɔ nɛ sɔlemi nɛ nɔ ko maa sɔle be fɛɛ be, Baiblo ɔ nɛ e maa kase daa, kɛ asafo mi kpe nɛ e maa ya be fɛɛ be ɔ maa ye bua lɛ konɛ e ná kã kɛ ye su yaya ko nɔ?

5. Moo hwu kɛ si susumi kɛ ní peepeehi nɛ a he tsɔ we

Nyɛɛ kane Kolose Bi 3:​5, nɛ nyɛ susu sane bimihi nɛ nyɛɛ se nɛ ɔmɛ a he:

• Kɛ wa plɛ kɛ le kaa ajuama bɔmi he fonihi loo videohi a hyɛmi, sɛ gbi loo fonihi nɛ tleɔ bɔmi nami akɔnɔ si nɛ a kɛ maneɔ nɔ, kɛ nɔ nitsɛ e fɔmi níhi a he fiɛmi ji ní peepeehi nɛ a he tsɔ we ngɛ Yehowa hɛ mi ha kɛɛ?

• Anɛ o susu kaa nile ngɛ mi kaa Yehowa hyɛɛ blɔ kaa wa je mi bami he nɛ tsɔ lo? Mɛni he je nɛ o susu jã a?

Moo hyɛ blɔ nɔ nɛ o maa gu kɛ hwu kɛ si susumi yayahi. Mo je VIDEO ɔ.

VIDEO: Moo Pee Níhi Nɛ Ma Ha Nɛ O He Nɛ Tsɔ Be Fɛɛ Be (1:51)

Yesu ngɔ nɔ́ he tomi nɔ́ ko kɛ tsu ní kɛ tsɔɔ kaa e sa nɛ waa pee nɔ́ fɛɛ nɔ́ nɛ wa ma nyɛ konɛ wa je mi bami he nɛ tsɔ. Nyɛɛ kane Mateo 5:​29, 30, nɛ nyɛ susu sane bimi nɛ ɔ he:

• Pi nɛ Yesu ngɛ tsɔɔe kaa waa ye wa nɔmlɔ tso ɔ awi, mohu ɔ, nɔ́ nɛ e ngɛ tsɔɔe ji kaa waa pee nɔ́ ko. Mɛni nɔ ko ma nyɛ maa pee konɛ e kua susumi yayahi?b

Ke o ngɛ mɔde bɔe kaa o maa hwu kɛ si susumi yayahi ɔ, Yehowa bua jɔɔ o mɔde bɔmi ɔ he wawɛɛ. Nyɛɛ kane La 103:​13, 14, nɛ nyɛ susu sane bimi nɛ ɔ he:

• Ke e he wa kɛ ha mo kaa o maa ye su yaya ko nɔ ɔ, kɛ ngmami nɛ ɔ maa ye bua mo ha kɛɛ konɛ o kɔni mi ko jɔ̃?

O kɔni mi ko jɔ̃!

E yi kulaa kaa nɔ ko maa nu he kaa e nine nyɛ si, lɔ ɔ he ɔ, e be nyɛe maa pee nɔ́ ko hu. Se mo susu nɔ́ nɛ ɔ he nɛ o hyɛ: Ke fo tulɔ ko ngɛ fo tue nɛ e tɛ si nɛ e nɔ si ɔ, lɔ ɔ tsɔɔ we kaa e kpe ngɛ fo tumi ɔ mi, loo e sa nɛ e je fo tumi ɔ sisi ekohu. Jã nɔuu kɛ̃ nɛ ke o kɛ o he ya wo su yaya a mi ekohu ɔ, lɔ ɔ tsɔɔ we kaa o be nyɛe maa ye jamɛ a su yaya a nɔ. Nɛ lɔ ɔ hu tsɔɔ we kaa mɔde nɛ o bɔ kaa o kɛ o he be jamɛ a su yaya a mi woe hu ɔ pee yaka. E ma nyɛ maa ba lɛ jã be komɛ kaa nɔ ɔ kɛ e he maa kpale ya wo ní peepee nɛ ɔmɛ a mi. Se ke e ba jã a, o kɔni mi ko jɔ̃! Ngɛ Yehowa yemi kɛ buami nya a, o ma nyɛ maa ye jamɛ a su yaya a nɔ.

NYA MWƆMI

Ke wa ha nɛ wa nɔmlɔ tso, wa juɛmi kɛ wa je mi bami he tsɔ ɔ, e woɔ Yehowa hɛ mi nyami.

Mi Nylɔmi

• Mɛni he je nɛ e he hia wawɛɛ nɛ wa he nɛ tsɔ ɔ?

• Mɛni o ma nyɛ maa pee konɛ o he nɛ tsɔ ngɛ nɔmlɔ tso mi?

• Mɛni o ma nyɛ maa pee konɛ níhi nɛ o susuɔ a he, kɛ o je mi bami he nɛ tsɔ be fɛɛ be?

NÍ KPAHI NƐ MAA YE BUA MO

Ke o be nɔ́ ko tsɔ po ɔ, mɛni ji ní komɛ nɛ o ma nyɛ maa pee konɛ o he nɛ tsɔ?

Nɔmlɔ Tso Mi He Wami Nami Kɛ Falefale Peemi​—Dɛ Fɔmi (3:01)

Moo hyɛ ní komɛ nɛ o ma nyɛ maa pee konɛ o kpa taba loo sigaleti numi.

“Blɔ Nɔ Nɛ O Maa Gu Kɛ Kpa Sigaleti Loo Taba Numi” (O Hɛ Nɛ Tsɛ̃!, May 2010)

Moo hyɛ bɔ nɛ ajuama bɔmi he fonihi loo videohi a hyɛmi yeɔ nɔ awi ha.

“Ajuama Bɔmi He Níhi​—E Yeɔ Nɔ Awi Aloo E Yi Nɔ Awi?” (Hwɔɔmi Mɔ ɔ, August 1, 2013)

Moo hyɛ blɔ nɔ nɛ nyumu ko gu kɛ kpa ajuama bɔmi he fonihi kɛ videohi a hyɛmi.

“Ye Nine Nyɛ Si Si Abɔ Loko I Nyɛ Kpa” (Hwɔɔmi Mɔ ɔ mi munyu)

Nihi fuu a bua jɔɛ he kaa a maa sɛɛ bɔmi nami he ní. Se ke Baiblo ɔ ngɛ bɔmi nami he munyu tue ɔ, e tuɔ he munyu ngɛ blɔ nɛ ngɛ tɛ̃ɛ nɛ bu ngɛ he nɔ. Wa náa nɔ́ nɛ Baiblo ɔ de kɛ kɔ bɔmi nami he ɔ he se. Nile ngɛ nɔ́ nɛ Baiblo ɔ de kɛ kɔ bɔmi nami he ɔ mi, ejakaa Baiblo ɔ je Yehowa nɛ ji wa Bɔlɔ ɔ ngɔ. E le nɔ́ nɛ hi kɛ ha wɔ. E tsɔɔ wɔ nɔ́ nɛ e sa kaa waa pee konɛ waa sa e hɛ mi, kɛ nɔ́ nɛ ma ha nɛ wa ná bua jɔmi ngɛ si himi mi kɛ ya neneene.

1. Mɛni ji Yehowa susumi ngɛ bɔmi nami he?

Bɔmi nami ji nike ní nɛ Yehowa kɛ ha adesahi. E suɔ kaa bɔmi nami nɛ ha nyumu kɛ yo nɛ a sɛ gba si himi mi ɔ bua jɔmi. Kɛ gu nike ní nɛ ɔ nɔ ɔ, nyumu kɛ yo nɛ a sɛ gba si himi mi ɔ ma nyɛ ma fɔ bimɛ. Jehanɛ hu ɔ, e haa nɛ a jeɔ suɔmi kpo kɛ tsɔɔ a sibi, nɛ e haa nɛ a náa a sibi a he bua jɔmi. Enɛ ɔ he je nɛ Mawu Munyu ɔ de ke, o kɛ ‘o nihe mi yo kpeekpee ɔ nɛ ná bua jɔmi’ ɔ nɛ. (Abɛ 5:​18, 19) Yehowa hyɛɛ blɔ kaa Kristofohi nɛ a sɛ gba si himi mi ɔ nɛ a ye a sibi anɔkuale, enɛ ɔ he ɔ, a be suɔe nɛ a puɛ gba kɔkɔɔkɔ.​—Kane Hebri Bi 13:4.

2. Mɛni ji ajuama bɔmi?

Baiblo ɔ de ke: “Ajuama bɔli . . . a nine be Mawu Matsɛ Yemi ɔ nɔ sue.” (1 Korinto Bi 6:​9, 10) Nihi nɛ a ngma Baiblo ɔ ngɛ Hela gbi mi ɔ ngɔ munyungu nɛ ji por·neiʹa kɛ kale ajuama bɔmi ní peepee slɔɔtohi. Ní peepee nɛ ɔmɛ ekomɛ ji, (1) nihi nɛ a sɛ we gba si himi mi nɛ a kɛ a sibi náa bɔmi,a (2) nyumu kɛ nyumu loo yo kɛ yo nɛ a náa bɔmi, kɛ (3) nɔmlɔ kɛ lohwe nɛ a náa bɔmi. Ke wa ‘yu wa he ngɛ ajuama bɔmi he’ ɔ, lɔ ɔ ma ha nɛ waa sa Yehowa hɛ mi, nɛ wɔ nitsɛmɛ hu wa ma ná he se.​—1 Tɛsalonika Bi 4:3.

MOO KASE BABAUU

3. Tuu ajuama bɔmi nya fo

Benɛ yo ko ngɛ hlae nɛ e kɛ nyumu anɔkualetsɛ ko nɛ a tsɛɛ lɛ ke Yosef nɛ ná bɔmi ɔ, Yosef kua. Nyɛɛ kane 1 Mose 39:​1-12, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni wo Yosef he wami nɛ e tu fo ɔ?​—Hyɛ kuku 9.

• Anɛ o susu kaa yi mi kpɔ nɛ Yosef mwɔ ɔ da lo? Mɛni he je?

VIDEO: Nyɛɛ Tu Ajuama Bɔmi Nya Fo (5:06)

Yehowa suɔ kaa wɔ tsuo wa kua ajuama bɔmi ní peepeehi. Nyɛɛ kane 1 Korinto Bi 6:​18, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni si fɔfɔɛhi lɛ ma nyɛ ma ha nɛ nɔ ko kɛ e he nɛ wo ajuama bɔmi mi?

• Kɛ o ma plɛ kɛ tu ajuama bɔmi nya fo ha kɛɛ?

4. O ma nyɛ maa ye ajuama bɔmi he kahi a nɔ

VIDEO: Moo Kane Baiblo ɔ Be Fɛɛ Be Konɛ E Ye Bua Mo Nɛ O Ye Kahi A Nɔ (3:02)

• Benɛ nyɛminyumu ɔ nɛ wa na ngɛ video ɔ mi ɔ ba yɔse kaa ní komɛ nɛ e ngɛ a he susue, kɛ e ní peepee ma nyɛ ma ha nɛ e je e yo ɔ se ɔ, mɛni e pee?

Be komɛ ɔ, e be gbɔjɔɔ ha Kristofohi nɛ a yeɔ anɔkuale ɔ po kaa a ma ha nɛ a susumihi a he nɛ tsɔ. Mɛni o ma nyɛ maa pee konɛ o kpa ní yayahi a he susumi? Nyɛɛ kane Filipi Bi 4:​8, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni níhi nɛ e sa kaa wa susu a he?

• Kɛ Baiblo ɔ nɛ wa maa kane, kɛ wa he nɛ waa kɛ maa wo Yehowa sɔmɔmi mi vii ɔ, maa ye bua wɔ ha kɛɛ konɛ wa kua níhi nɛ ma ha nɛ waa pee yayami ɔ?

5. Wa náa Yehowa mlaa amɛ a he se

VIDEO: Niheyo Nɛ E Be Juɛmi ɔ (9:31)

• Mɛni niheyo ɔ pee nɛ lɔ ɔ ha nɛ e sɛ ka mi?​—Hyɛ Abɛ 7:​8, 9.

• Kaa bɔ nɛ a tsɔɔ ngɛ Abɛ 7:​23, 26, ke nɔ ko kɛ e he wo ajuama bɔmi mi ɔ, lɔ ɔ ma nyɛ maa ngɔ haomihi fuu kɛ ba. Ke wa ha nɛ wa je mi bami he tsɔ ɔ, mɛni nyagbahi nɛ lɔ ɔ ma ha nɛ waa yu wa he ngɛ a he?

• Ke wa je mi bami he tsɔ ɔ, kɛ lɔ ɔ maa ye bua wɔ ha kɛɛ konɛ wa ná bua jɔmi kɛ ya neneene?

Ni komɛ susu kaa nɔ́ nɛ Baiblo ɔ de ngɛ nyumu kɛ nyumu loo yo kɛ yo a bɔmi nami he ɔ tsɔɔ we suɔmi. Se Yehowa Mawu nɛ e ngɛ suɔmi ɔ suɔ kaa nɔ fɛɛ nɔ nɛ ná bua jɔmi kɛ ya neneene. Se loko wa ma nyɛ ma ná bua jɔmi kɛ ya neneene ɔ, ja wa ye e mlaa amɛ a nɔ. Nyɛɛ kane 1 Korinto Bi 6:​9-11, nɛ nyɛ susu sane bimi nɛ ɔ he:

• Anɛ nyumu kɛ nyumu loo yo kɛ yo a bɔmi nami pɛ ji ní peepeehi nɛ Mawu buɔ mɛ kaa a ji níhi nɛ sɛ lo?

E he hia nɛ wɔ tsuo waa pee tsakemi bɔ nɛ pee nɛ waa sa Mawu hɛ mi. Anɛ se nami ngɛ jã nɛ wa maa pee ɔ he lo? Nyɛɛ kane La 19:​8, 11, nɛ nyɛ susu sane bimihi nɛ nyɛɛ se nɛ ɔmɛ a he:

• Ke o hyɛ ɔ, anɛ nile ngɛ mi kaa Yehowa wo mlaahi kɛ kɔ je mi bami he lo? Mɛni he je nɛ o de jã a?

NYA MWƆMI

Bɔmi nami ji nike ní nɛ Yehowa kɛ dloo nihi nɛ a sɛ gba si himi mi ɔ konɛ e ha mɛ bua jɔmi.

Mi Nylɔmi

• Mɛni ji ajuama bɔmi ní peepee komɛ?

• Mɛni maa ye bua wɔ konɛ waa yu wa he ngɛ ajuama bɔmi ní peepeehi a he?

• Ke waa kɛ Yehowa je mi bami he mlaa amɛ tsuɔ ní ɔ, kɛ wa ma ná he se ha kɛɛ?

NÍ KPAHI NƐ MAA YE BUA MO

Moo kase nɔ́ he je nɛ Mawu suɔ kaa nyumu kɛ yo nɛ́ a suɔ kaa a maa hi si ɔ nɛ a sɛ gba si himi mi ɔ he ní.

“Mɛni Nɛ Baiblo ɔ De Ngɛ Nihi Enyɔ Nɛ A Hiɔ Si Kaa Nɔ Kɛ E Yo Be Mi Nɛ A Sɛ We Gba Si Himi Mi ɔ He?” (Munyu nɛ ɔ ngɛ Intanɛti ɔ nɔ)

Moo hyɛ nɔ́ he je nɛ mlaa nɛ Baiblo ɔ wo kɛ kɔ nyumu kɛ nyumu loo yo kɛ yo a bɔmi nami he ɔ tsɔɔ we kaa e sa nɛ waa nyɛ jamɛatsɛ ɔmɛ.

“Anɛ Nyumu Kɛ Nyumu Loo Yo Kɛ Yo A Bɔmi Nami Ji Ní Peepee Nɛ Dɛ Lo?” (Munyu nɛ ɔ ngɛ Intanɛti ɔ nɔ)

Moo hyɛ bɔ nɛ Mawu mlaa nɛ kɔɔ bɔmi nami he ɔ poɔ wa he piɛ ha.

“Anɛ Nyumu Tso Nɛ A Kɛ Woɔ Nya Mi Loo Yo Hé Nɛ A Lɔɔ ɔ Ji Bɔmi Nami Lo?” (Munyu nɛ ɔ ngɛ Intanɛti ɔ nɔ)

Ngɛ níhi a si kpami nɛ ji “A Je Bumi Kpo Kɛ Tsɔɔ Mi” ɔ mi ɔ, moo hyɛ nɔ́ nɛ ye bua nyumu ko nɛ́ be ko nɛ be ɔ, e kɛ nyumuhi náa bɔmi ɔ nɛ́ e pee tsakemi ngɛ e si himi mi konɛ e sa Mawu hɛ mi.

“Baiblo ɔ Tsakeɔ Nihi A Si Himi” (Hwɔɔmi Mɔ, April 1, 2011)

Ngɛ he komɛ ɔ, nihi fuu he ye kaa ja nɔ ko sɛ gba si himi mi loko e ma ná bua jɔmi. Se pi nihi tsuo nɛ a sɛ gba si himi mi nɛ a ngɛ bua jɔmi, nɛ pi nihi tsuo nɛ a sɛ we gba si himi mi nɛ a be bua jɔmi. Ngɛ anɔkuale mi ɔ, Baiblo ɔ tsɔɔ kaa gba si himi ji nike ní, nɛ ke nɔ ko sɛ we mi hu, e ji nike ní.

1. Mɛni se nɛ nihi nɛ a sɛ we gba si himi mi ɔ náa?

Baiblo ɔ de ke: ‘Nɔ fɛɛ nɔ nɛ e maa sɛ gba si himi mi ɔ ma ná he se, se nɔ fɛɛ nɔ nɛ e be gba si himi mi sɛe ɔ, e ma ná he se saminya.’ (Kane 1 Korinto Bi 7:​32, 33, 38.) Ngɛ mɛni blɔ nɔ nɛ ke nɔ ko sɛ we gba si himi mi ɔ, “e ma ná he se saminya?” Kristofohi nɛ a sɛ we gba si himi mi ɔ be he piɛɛli nɛ́ e ma bi nɛ a tsu a hiami níhi a he ní ha mɛ. Enɛ ɔ haa nɛ a náa be fuu kɛ peeɔ ní kpahi. A ti ni komɛ nyɛɔ nɛ a tsuɔ babauu ngɛ Yehowa sɔmɔmi mi ngɛ blɔhi fuu a nɔ. Kaa nɔ hyɛmi nɔ́ ɔ, a hiaa blɔ kɛ yaa he kpahi nɛ a ya fiɛɛɔ sane kpakpa a. Nɔ́ nɛ pe kulaa a, a ma nyɛ ma ná be fuu kɛ pee níhi nɛ ma ha nɛ a hɛ kɛ su Yehowa he.

2. Mɛni se nami komɛ lɛ ngɛ gba si himi mi nɛ nɔ ko maa sɛ ngɛ blɔ nɛ da nɔ ɔ he?

Kaa bɔ nɛ ke nɔ ko sɛ we gba si himi mi nɛ e náa he se ngɛ blɔ komɛ a nɔ ɔ, jã kɛ̃ nɛ nihi nɛ a sɛ gba si himi mi ɔ hu náa he se ngɛ blɔ komɛ a nɔ. Baiblo ɔ de ke, ‘ni enyɔ hi pe nɔ kake.’ (Fiɛlɔ 4:9) Kristofohi nɛ a sɛ gba si himi mi nɛ́ a kɛ Baiblo sisi tomi mlaahi tsuɔ ní ɔ naa kaa nɔ́ nɛ ngmami ɔ de nɛ ɔ ji anɔkuale. Nihi nɛ a sɛ gba si himi mi ɔ wo si kaa a maa suɔ a sibi, a maa bu a sibi, nɛ a ma ná a sibi a he bua jɔmi be fɛɛ be. Enɛ ɔ haa nɛ a nuɔ he kaa a ngɛ slɔkee pe nihi nɛ a ngɛ kaa nɔ kɛ e yo se a sɛ we gba si himi mi ɔ. Jehanɛ hu ɔ, a bimɛ ɔmɛ maa nu he kaa a ngɛ slɔkee.

3. Kɛ Yehowa naa gba si himi ha kɛɛ?

Benɛ Yehowa to gba si himi kekle nɔ́ ɔ he blɔ nya a, e de ke: ‘Nyumu ma si e tsɛ kɛ e nyɛ, nɛ e maa ngɔ e he ya mɛtɛ e yo he nɛ a maa pee nɔ kake.’ (1 Mose 2:​24) Yehowa suɔ kaa huno kɛ e yo nɛ a suɔ a sibi, nɛ a mɛtɛ a sibi a he be abɔ nɛ a ngɛ wami mi ɔ. E ngmɛ blɔ kaa nɔ́ pɛ nɛ a ma nyɛ maa da nɔ kɛ po gba mi ji, ke nɔ kake puɛ gba. Ngɛ si fɔfɔɛ nɛ ɔ mi ɔ, Yehowa ha nɔ nɛ a je e se ɔ he blɔ kaa e ma nyɛ maa mwɔ e yi mi kpɔ kaa e maa po gba a mi.a (Mateo 19:9) Yehowa ha we Kristofohi he blɔ kaa a hi he piɛɛli enyɔ loo nɔ́ nɛ hiɛ pe jã.​—1 Timoteo 3:2.

MOO KASE BABAUU

4. Ke o sɛ we gba si himi mi ɔ, ngɔɔ nike ní nɛ ɔ kɛ tsu ní saminya

Yesu na gba si himi mi nɛ ni komɛ sɛ we ɔ kaa nike ní. (Mateo 19:​11, 12) Nyɛɛ kane Mateo 4:​23, nɛ nyɛ susu sane bimi nɛ ɔ he:

• Kɛ Yesu ngɔ nike ní nɛ ji gba si himi mi nɛ e sɛ we ɔ kɛ sɔmɔ e Tsɛ ɔ, nɛ e kɛ ye bua ni kpahi ha kɛɛ?

Kristofohi nɛ a sɛ we gba si himi mi ɔ ma nyɛ ma ná bua jɔmi ke a ngɔ a be kɛ sɔmɔ Yehowa kaa bɔ nɛ Yesu pee ɔ. Mo je VIDEO ɔ, nɛ nyɛ susu sane bimi nɛ nyɛɛ se ɔ he.

VIDEO: Nihi Nɛ A Sɛ We Gba Si Himi Mi Nɛ A Sɔmɔɔ Yehowa (3:11)

• Mɛni blɔhi a nɔ nɛ Kristofo no ko ma nyɛ maa ngɔ gba si himi mi nɛ e sɛ we ɔ kɛ sɔmɔ Yehowa konɛ e ná bua jɔmi?

Anɛ o le lo?

Baiblo ɔ tsɔɔ we jeha nɛ e sa kaa nɔ ko nɛ ye loko e sɛ gba si himi mi. Se mohu ɔ, e wo nihewi kɛ yihewi he wami kaa a mlɛ kɛ yaa si a maa “be nihewi [kɛ yihewi] a we akɔnɔ be ɔ nya.” Be nɛ ɔ ji be nɛ bɔmi nami he numi mi waa wawɛɛ, nɛ e ma nyɛ ma ha nɛ e he nɛ wa ha nɔ ko kaa e maa mwɔ yi mi kpɔhi nɛ da.​—1 Korinto Bi 7:36.

5. O kɛ nile nɛ hla nɔ nɛ o kɛ maa sɛ gba si himi mi

Yi mi kpɔ nɛ o maa mwɔ ngɛ nɔ nɛ o kɛ maa sɛ gba si himi mi he ɔ ji yi mi kpɔ ko nɛ he hia wawɛɛ. Nyɛɛ kane Mateo 19:​4-6, 9, nɛ nyɛ susu sane bimi nɛ ɔ he:

• Mɛni he je nɛ e sɛ nɛ Kristofo no ko kɛ oya yemi nɛ sɛ gba si himi mi ɔ?

Baiblo ɔ ma nyɛ maa ye bua mo konɛ o le níhi nɛ sa kaa o hla ngɛ nɔ ko nɛ o kɛ lɛ maa sɛ gba si himi mi ɔ he. Nɔ́ nɛ he hia pe kulaa a, mo hla nɔ ko nɛ e suɔ Yehowa.b Nyɛɛ kane 1 Korinto Bi 7:39 kɛ 2 Korinto Bi 6:14. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:

• Mɛni he je nɛ e sa nɛ waa kɛ wa nyɛmimɛ Kristofohi pɛ nɛ sɛ gba si himi mi ɔ?

• Kɛ o susu kaa Yehowa maa nu he ha kɛɛ, ke o kɛ nɔ ko nɛ sɔmɔ we Yehowa sɛ gba si himi mi?

6. Moo na gba si himi kaa bɔ nɛ Yehowa naa lɛ ɔ

Ngɛ blema Israel ɔ, nyumu komɛ kɛ a yihi po gba mi ngɛ juɛmi nɛ dɛ nɛ nyumu ɔmɛ hɛɛ ɔ he je. Nyɛɛ kane Malaki 2:​13, 14, 16, nɛ nyɛ susu sane bimi nɛ ɔ he:

• Mɛni he je nɛ ke nɔ ko kɛ e he piɛɛlɔ po gba mi be mi nɛ pi nɛ nɔ kake puɛ gba a, Yehowa sume ɔ?

Mo je VIDEO ɔ, nɛ nyɛ susu sane bimi nɛ nyɛɛ se ɔ he.

VIDEO: Nɔ́ Nɛ Mawu Ngɔ Kɛ Tsa a, Adesa Ko Gba Mi (4:30)

• Ke o he piɛɛlɔ ɔ sɔmɔ we Yehowa a, mɛni o ma nyɛ maa pee konɛ bua jɔmi nɛ hi nyɛ gba si himi ɔ mi?

7. Moo ngɔ gba si himi he mlaahi nɛ Yehowa wo ɔ kɛ tsu ní.

VIDEO: O Ma Nyɛ Maa Ye Yehowa Mlaahi Nɛ Kɔɔ Gba Si Himi He ɔ Nɔ (4:14)

Nyɛɛ kane Hebri Bi 13:​4, nɛ nyɛ susu sane bimihi nɛ nyɛɛ se nɛ ɔmɛ a he:

• Anɛ o susu kaa wa ma nyɛ maa ye Yehowa mlaahi nɛ kɔɔ gba si himi he ɔ nɔ lo? Mɛni he je nɛ o de jã a?

Yehowa hyɛɛ blɔ kaa Kristofohi nɛ a sɛ gba si himi mi ɔ nɛ́ a ngɔ a gba a kɛ wo mlaa sisi, nɛ ke a maa po gba a mi hu ɔ, a pee jã ngɛ mlaa nya kaa bɔ nɛ ngɛ mahi fuu a mi ɔ, amlaalo ɔmɛ hyɛɛ blɔ kaa nihi nɛ a pee ɔ. Nyɛɛ kane Tito 3:1, nɛ nyɛ susu sane bimi nɛ ɔ he:

• Ke o sɛ gba si himi mi ɔ, anɛ nyɛɛ kɛ nyɛ gba a wo mlaa sisi lo?

NYA MWƆMI

Gba si himi ji nike ní nɛ je Yehowa ngɔ. Ke nɔ ko sɛ we mi hu, e ji nike ní nɛ je Yehowa ngɔ. Nihi nɛ a sɛ gba si himi mi kɛ nihi nɛ a sɛ we gba si himi mi ɔ tsuo ma nya ma ná bua jɔmi ke a pee Yehowa suɔmi nya ní ngɛ a si himi mi.

Mi Nylɔmi

• Ngɛ mɛni blɔ nɔ nɛ nɔ ko nɛ e sɛ we gba si himi mi ɔ kɛ e be ma nyɛ ma sɔmɔ Yehowa saminya?

• Mɛni he je nɛ Baiblo ɔ de ke waa kɛ wa nyɛmimɛ Kristofohi pɛ nɛ sɛ gba si himi mi ɔ?

• Mɛni nɔ pɛ nɛ Ngmami ɔ tsɔɔ kaa nɔ ko ma nyɛ maa da kɛ po gba mi?

NÍ KPAHI NƐ MAA YE BUA MO

Ke a ke waa sɛ gba si himi mi “ngɛ Nyɔmtsɛ ɔ mi pɛ” ɔ, mɛni e tsɔɔ?

“Sane Bimihi Nɛ Je Ní Kaneli A Ngɔ” (Hwɔɔmi Mɔ, July 1, 2004)

Moo hyɛ videohi enyɔ nɛ maa ye bua mo nɛ o mwɔ yi mi kpɔ nɛ da kɛ kɔ nyɛɛmi nɛ a kɛ sɛɛ gba si himi mi, kɛ gba si himi he.

O He Nɛ O Ma Dla Kɛ Ha Gba Si Himi Mi Sɛmi 11:53

Moo hyɛ nɔ́ he je nɛ nyɛminyumu ko nuɔ he kaa níhi nɛ Yehowa ha lɛ ɔ he jua wa kulaa pe níhi nɛ e ngmɛɛ a he ɔ.

I Hyɛ Blɔ Kaa E Ma Ba Kase Anɔkuale ɔ 1:​56

Mɛni níhi nɛ e sa kaa nɔ ko nɛ susu a he loko e mwɔ e yi mi kpɔ kaa e maa po gba mi loo e maa je gba?

“Mo Ná Bumi Kɛ Ha ‘Nɔ́ Nɛ Mawu Ngɔ Kɛ Tsa’ a” (Hwɔɔmi Mɔ, December 2018)

Ngɛ je ɔ mi tsuo ɔ, nihi hɛɛ susumi ekpaekpa ngɛ dã he. Ni komɛ suɔ kaa a kɛ a huɛmɛ ma bla kɛ nu dã be komɛ. Ni komɛ hu mwɔ a yi mi kpɔ kaa a be dã nue kulaa. Se ni komɛ hu lɛɛ, a nuɔ hluu kɛ ya siɔ a deɔ. Mɛni ji nɔ́ nɛ Baiblo ɔ de ngɛ dã he?

1. Anɛ e ji tɔmi kaa nɔ ko maa nu dã nɛ nya wa lo?

Baiblo ɔ tsi we dã numi nya. Se mohu ɔ, benɛ e ngɛ ní kpakpahi nɛ Mawu kɛ ha adesahi ɔ a he munyu tue ɔ, e de kɛ piɛɛ he kaa, Mawu “haa lɛ dã nɛ ma ha lɛ bua jɔmi.” (La 104:​14, 15) Baiblo ɔ ha nɛ wa le kaa nyumuhi kɛ yihi anɔkualetsɛmɛ komɛ nɛ a hi si blema a nu wai.​—1 Timoteo 5:23.

2. Mɛni ga womi nɛ Baiblo ɔ kɛ ha nihi nɛ a suɔ kaa a maa nu dã a?

Yehowa tu munyu kɛ si dã fuu numi, kɛ dã demi. (Galatia Bi 5:​21) Baiblo ɔ de ke: ‘Ko ya piɛɛ nihi nɛ nuu wai fuu tsɔ ɔ a he.’ (Abɛ 23:​20) Ke wa hla kaa waa kɛ nihi ma bla kɛ nu dã aloo wɔ pɛ wa maa nu dã a, e sɛ nɛ waa nu kɛ be nɔ, ejakaa e be hae nɛ wa susu níhi a he saminya, loo waa hyɛ wa munyu tutui, wa ní peepee, kɛ wa nɔmlɔ tso ɔ nɔ saminya. Ke wa be nyɛe maa ye wa he nɔ ɔ, lɛɛ e maa hi kaa wa ma kpa dã numi kulaa.

3. Mɛni wa ma nyɛ maa pee kɛ tsɔɔ kaa wa buɔ yi mi kpɔhi nɛ nihi mwɔɔ ngɛ dã he ɔ?

E sa nɛ wa ti nɔ fɛɛ nɔ nɛ mwɔ e yi mi kpɔ ke ji e maa nu dã nɛ nya wa aloo e be nue. Ke nɔ ko hla kaa e maa nu dã bɔɔ ɔ, e sɛ nɛ waa kojo lɛ, nɛ ke nɔ ko hu hla kaa e be dã nue ɔ, e sɛ nɛ waa nyɛ e nɔ kaa e nu. (Roma Bi 14:​10) Ke dã nɛ wa maa nu ɔ ma gba ni kpahi a nya a, wa maa wa juɛmi nya si kaa wa be nue. (Kane Roma Bi 14:​21.) Wa hlaa ‘nɔ́ nɛ maa hi kɛ ha ni kpahi, se pi kɛ ha [wɔ nitsɛmɛ wa] he.’​—Kane 1 Korinto Bi 10:​23, 24.

MOO KASE BABAUU

4. Moo mwɔ o yi mi kpɔ ke ji o maa nu dã aloo o be nue

Kɛ Yesu na dã numi ha kɛɛ? Kekleekle nyakpɛ nɔ́ nɛ e pee ɔ maa ye bua mo nɛ o na heto ɔ. Nyɛɛ kane Yohane 2:​1-​11, nɛ nyɛ susu sane bimihi nɛ nyɛɛ se nɛ ɔmɛ a he:

• Ngɛ nyakpɛ nɔ́ nɛ ɔ mi ɔ, mɛni wa ma nyɛ maa kase ngɛ bɔ nɛ Yesu naa dã ha, kɛ bɔ nɛ e naa nihi nɛ a nuɔ dã ha a mi?

• Akɛnɛ Yesu tsi we dã numi nya he je ɔ, kɛ e sa nɛ Kristofo no nɛ na nɔ ko nɛ suɔ kaa e maa nu dã a ha kɛɛ?

Se kɛ̃ ɔ, he blɔ nɛ Kristofo no ko ngɛ kaa e ma nyɛ maa nu dã a tsɔɔ we kaa be fɛɛ be ɔ, nile ngɛ mi kaa e maa pee jã. Nyɛɛ kane Abɛ 22:​3, nɛ nyɛ susu he ke ji e sa nɛ nɔ ko nɛ nu dã ngɛ si fɔfɔɛhi nɛ nyɛɛ se nɛ ɔmɛ a mi aloo e ko nu:

• O yaa hɛɛ lɔle aloo o kɛ klama ko yaa tsu ní.

• Ke yo hɛɛ hɔ.

• Dɔkita de mo ke o ko nu dã.

• O nyɛ we o he nɔ yemi ngɛ dã numi he.

• Mlaa ngmɛ́ mo blɔ kaa o nu dã.

• O kɛ nɔ ko ngɛ nɛ e ma e juɛmi nya si kaa e be dã nue ejakaa e he wa ha lɛ kaa e ma kpa dã numi be ko nɛ be ɔ.

Ke o ngɛ yo kpeemi loo he nya buami kpa ko he blɔ nya toe ɔ, anɛ e sa nɛ o gba dãhi nɛ a nya wa ngɛ sisi lo? Bɔ nɛ pee nɛ o na níhi nɛ maa ye bua mo nɛ o mwɔ yi mi kpɔ ngɛ sane nɛ ɔ he ɔ, mo je VIDEO ɔ.

VIDEO: Anɛ E Sa Kaa Ma Gba Dã Ngɛ He Nya Buami Ko Sisi Lo? (2:41)

Nyɛɛ kane Roma Bi 13:13 kɛ 1 Korinto Bi 10:31, 32. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:

• Kɛ sisi tomi mlaa nɛ ɔ maa ye bua mo ha kɛɛ konɛ o mwɔ yi mi kpɔ nɛ maa sa Yehowa hɛ mi?

5. Moo ma o juɛmi nya si ngɛ dã abɔ nɛ o maa nu ɔ he

Ke o hla kaa o maa nu dã nɛ nya wa a, mo kai kaa, e ngɛ mi kaa Yehowa de we ke wa ko nu dã mohu lɛɛ, se e de ke e ji tɔmi kaa nɔ ko maa nu dã fuu. Mɛni he je? Nyɛɛ kane Hosea 4:​11, 18, nɛ nyɛ susu sane bimi nɛ ɔ he:

• Mɛni ma nyɛ maa ba ke nɔ ko nu dã fuu?

Mɛni ma nyɛ maa ye bua wɔ konɛ wa ko nu dã fuu? Ke wa maa nu dã a, e sa nɛ waa pee jã ngɛ blɔ nɛ tsɔɔ bumi nɔ, nɛ waa le wa gbɔjɔmihi. Nyɛɛ kane Abɛ 11:​2, nɛ nyɛ susu sane bimi nɛ ɔ he:

• Ke o hla kaa o maa nu dã a, mɛni he je nɛ nile ngɛ mi kaa o maa ma o juɛmi nya si ngɛ dã abɔ nɛ o maa nu ɔ he ɔ?

6. Mɛni maa ye bua nɔ ko konɛ e ko nu dã kɛ be nɔ?

VIDEO: ‘Si Himi Ba Gbe Ye Nya’ (6:32)

• Ngɛ video ɔ mi ɔ, kɛ Dmitry peeɔ e ní ha kɛɛ ke e de dã?

• Anɛ e nyɛ kpa dã numi ngɛ be kpiti mi lo?

• Mɛni ji nɔ́ nɛ ye bua lɛ nɛ nyagbenyagbe ɔ, e kpa dã numi?

Nyɛɛ kane 1 Korinto Bi 6:​10, 11, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni Baiblo ɔ de ngɛ dã demi he?

• Mɛni tsɔɔ kaa nɔ ko nɛ e nuɔ dã kɛ beɔ nɔ ɔ ma nyɛ ma tsake?

Nyɛɛ kane Mateo 5:​30, nɛ nyɛ susu sane bimi nɛ ɔ he:

• Nɔ ko nine nɛ e maa po ɔ tsɔɔ kaa nɔ ɔ kɛ níhi maa sã afɔle bɔ nɛ pee nɛ e sa Yehowa hɛ mi. Mɛni o ma nyɛ maa pee ke e he wa ha mo kaa o maa yu o he ngɛ dã nɛ a nuɔ kɛ beɔ nɔ ɔ he?a

Nyɛɛ kane 1 Korinto Bi 15:​33, nɛ nyɛ susu sane bimi nɛ ɔ he:

• Ke o kɛ nihi nɛ a suɔ dã fuu numi bɔɔ ɔ, kɛ lɔ ɔ ma ná o nɔ he wami ha kɛɛ?

NYA MWƆMI

Yehowa ha wɔ dã konɛ wa ná bua jɔmi. Se e de ke, e ji tɔmi kaa nɔ ko maa nu dã fuu loo e maa de dã.

Mi Nylɔmi

• Mɛni Baiblo ɔ de ngɛ dã he?

• Mɛni oslaahi lɛ ngɛ dã nɛ́ a nuɔ kɛ beɔ nɔ ɔ he?

• Mɛni wa maa pee kɛ tsɔɔ kaa wa buɔ yi mi kpɔhi nɛ ni kpahi mwɔɔ ngɛ dã numi he ɔ?

NÍ KPAHI NƐ MAA YE BUA MO

Mɛni blɔ nɔ nɛ nihewi kɛ yihewi maa gu kɛ mwɔ yi mi kpɔ nɛ da ngɛ dã he?

Susu Nɔ́ Nɛ Maa Je Dã Numi Mi Kɛ Ba a He (2:31)

Moo hyɛ nɔ́ nɛ o ma nyɛ maa pee ke o ngɛ dã numi he nyagba.

“Hyɛ Bɔ Nɛ O Kɛ Dã Ma Tsu Ní Ha a Saminya” (Hwɔɔmi Mɔ, January 1, 2010)

Anɛ e sa kaa Kristofohi nɛ a wo dã nɔ kɛ tsɔɔ a sibi loko a nu lo?

“Sane Bimihi Nɛ Je Ní Kaneli A Ngɔ” (Hwɔɔmi Mɔ, February 15, 2007)

Ngɛ munyu nɛ ji “I Nuɔ Dã Wawɛɛ Nitsɛ” ɔ mi ɔ, moo hyɛ nɔ́ nɛ ye bua nyumu ko nɛ e kpa dã numi.

“Baiblo ɔ Tsake ɔ Nihi A Si Himi” (Hwɔɔmi Mɔ, May 1, 2012)