NÍ KASEMI 48
O Kɛ Nile Nɛ Hla Huɛmɛ
Huɛmɛ nɛ waa kɛ mɛ bɔɔ gbagbanii ɔ haa nɛ wa bua jɔɔ ngɛ be kpakpahi a mi, nɛ a woɔ wɔ he wami ngɛ haomi behi a mi. Se Baiblo ɔ bɔ wɔ kɔkɔ kaa pi nɔ fɛɛ nɔ nɛ e ji huɛ kpakpa. Lɛɛ mɛni blɔ nɔ o maa gu kɛ hla huɛmɛ kpakpahi? Mo susu sane bimihi nɛ nyɛɛ se nɛ ɔmɛ a he.
1. Kɛ huɛmɛ nɛ o maa hla a ma ná o nɔ he wami ha kɛɛ?
Behi fuu ɔ, wa peeɔ wa ní kaa bɔ nɛ nihi nɛ waa kɛ mɛ bɔɔ ɔ hu peeɔ ɔ, ke a peeɔ ní kpakpahi jio, ní yayahi jio. Ke wa naa wa sibi hɛ mi kɛ hɛ mi aloo waa kɛ mɛ bɔɔ ngɛ Intanɛti ɔ nɔ po ɔ, a ní peepee ma nyɛ ma ná wa nɔ he wami. Baiblo ɔ de ke, “Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi [nihi nɛ a sume Yehowa a] bɔɔ ɔ, haomi lɛ baa e nɔ.” (Abɛ 13:20) Huɛmɛ nɛ a suɔ Yehowa nɛ a jaa lɛ ɔ ma nyɛ maa ye kɛ bua mo konɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa, nɛ́ o mwɔ yi mi kpɔhi nɛ da. Se ke waa kɛ nihi nɛ a be suɔmi ko kɛ ha Yehowa nɛ a sɔmɔ we lɛ ɔ bɔɔ gbagbanii ɔ, a ma nyɛ ma je wɔ kɛ je Yehowa he. Enɛ ɔ he je nɛ Baiblo ɔ woɔ wɔ he wami kaa waa kɛ nile nɛ hla huɛmɛ ɔ nɛ. Ke wa huɛmɛ suɔ Mawu ɔ, waa kɛ mɛ tsuo ma ná wa sibi a nɔ he wami ngɛ blɔ kpakpa nɔ. Lɔ ɔ ma ha nɛ waa ‘ya nɔ nɛ waa hi wa sibi he wami woe, nɛ waa hi wa sibi fiae kɛ hi si mae.’—1 Tɛsalonika Bi 5:11.
2. Kɛ nihi nɛ o kɛ mɛ maa pee o huɛmɛ ɔ ma ha nɛ Yehowa nɛ nu he ha kɛɛ?
Pi nɔ fɛɛ nɔ kɛkɛ nɛ Yehowa kɛ peeɔ huɛ. “Nihi nɛ peeɔ nɔ́ nɛ da lɛ e kɛ bɔɔ.” (Abɛ 3:32) Kɛ Yehowa maa nu he ha kɛɛ ke waa kɛ nihi nɛ a sume lɛ ɔ pee huɛ? E maa dɔ lɛ wawɛɛ! (Kane Yakobo 4:4.) Se ke wa kua huɛmɛ yayahi, nɛ wa hɛ kɛ su Yehowa kɛ nihi nɛ a suɔ lɛ ɔ a he ɔ, Yehowa bua maa jɔ nɛ e maa ngɔ wɔ kɛ pee e huɛmɛ.—La 15:1-4.
MOO KASE BABAUU
Moo kase nɔ́ he je nɛ e he hia wawɛɛ kaa waa kɛ huɛmɛ kpakpahi maa bɔ, kɛ nɔ́ nɛ o maa pee kɛ ná o kɛ ni kpahi nyɛ huɛ bɔmi ɔ he se ɔ he ní.
3. Moo hyɛ nɛ hi nɛ o kɛ huɛ yayahi nɛ ko bɔ
Nihi nɛ a sume Mawu nɛ a kɛ e mlaahi tsu we ní ɔ ji huɛmɛ yayahi. Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Ngɛ mɛni blɔ nɔ nɛ waa kɛ huɛ yayahi ma bɔni bɔmi nɛ wa be lee?
Nyɛɛ kane 1 Korinto Bi 15:33, nɛ́ nyɛ susu sane bimihi nɛ nyɛɛ se nɛ ɔmɛ a he:
Mɛnɔmɛ lɛ ke o kɛ mɛ ngɛ bɔe ɔ, a ji huɛmɛ yayahi? Mɛni he je?
Nyɛɛ kane La 119:63, nɛ́ nyɛ susu sane bimi nɛ ɔ he:
Mɛni ma ha nɛ o na kaa nɔ ko ji huɛ kpakpa?
Ke tso yiblii kake sa a, e ma nyɛ ma puɛ tso yiblii kpa amɛ tsuo. Ke o kɛ huɛ yaya ko bɔɔ ɔ, kɛ e ma ná o nɔ he wami ha kɛɛ?
4. Nihi nɛ e slo a jeha kɛ a si fɔfɔɛ ngɛ wa nɔ́ ɔ he ɔ ma nyɛ maa pee wa huɛmɛ kpakpahi
Baiblo ɔ tu David kɛ Yonatan nɛ a hi si ngɛ blema Israel ɔ a he munyu. Yonatan wa kulaa pe David, nɛ e ji matsɛ ɔ bi hulɔ, se a huɛ bɔmi ɔ mi wa wawɛɛ nitsɛ. Nyɛɛ kane 1 Samuel 18:1, nɛ́ nyɛ susu sane bimi nɛ ɔ he:
Mɛni he je nɛ pi be fɛɛ be nɛ e sa kaa nihi nɛ waa kɛ mɛ maa pee huɛ ɔ nɛ́ a pee wa juami bi, aloo nihi nɛ a si himi ngɛ kaa wa nɔ́ ɔ?
Nyɛɛ kane Roma Bi 1:11, 12, nɛ́ nyɛ susu sane bimi nɛ ɔ he:
Ngɛ mɛni blɔ nɔ nɛ huɛmɛ nɛ a suɔ Yehowa a ma nyɛ maa wo a sibi he wami?
Ngɛ video nɛ ɔ mi ɔ, moo hyɛ bɔ nɛ nyɛminyumu ko plɛ kɛ ná huɛmɛ ngɛ hehi nɛ e hyɛ we blɔ ɔ ha. Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
Ngɛ video ɔ mi ɔ, mɛni he je nɛ Akil fɔli ɔmɛ hao ngɛ huɛmɛ nɛ e kɛ bɔɔ ngɛ sukuu ɔ he ɔ?
Mɛni he je nɛ sisije ɔ, e bua jɔ e kɛ mɛ a huɛ bɔmi ɔ he ɔ?
Mɛni e pee nɛ́ lɔ ɔ ha nɛ e ba ná bua jɔmi?
5. Nɔ́ nɛ o maa pee konɛ huɛ bɔmi kpakpa nɛ hi o kɛ ni kpahi nyɛ kpɛti
Moo hyɛ nɔ́ nɛ o maa pee konɛ o ná huɛmɛ kpakpahi, kɛ nɔ́ nɛ o maa pee konɛ mo nitsɛ hu o pee huɛ kpakpa. Mo je VIDEO ɔ.
Nyɛɛ kane Abɛ 18:24 kɛ 27:17, nɛ́ nyɛ susu sane bimihi nɛ nyɛɛ se nɛ ɔmɛ a he:
Mɛni huɛmɛ nitsɛnitsɛ peeɔ kɛ yeɔ bua a sibi?
Anɛ huɛ bɔmi nɛ ngɛ o kɛ ni kpahi nyɛ kpɛti ɔ ngɛ jã lo? Ke pi jã a, lɛɛ mɛni o maa pee konɛ nyɛ huɛ bɔmi ɔ nɛ pee kpakpa?
Nyɛɛ kane Filipi Bi 2:4, nɛ́ nyɛ susu sane bimi nɛ ɔ he:
Ke o suɔ nɛ o ná huɛmɛ kpakpahi ɔ, lɛɛ e sa nɛ mo nitsɛ hu o pee o he huɛ kpakpa. Mɛni blɔ nɔ o maa gu kɛ pee jã?
Ke o suɔ nɛ o ná huɛmɛ kpakpahi ɔ, lɛɛ e sa nɛ mo nitsɛ hu o pee o he huɛ kpakpa
NI KOMƐ DEƆ KE: “O kɛ nɔ fɛɛ nɔ ko ma nyɛ maa pee huɛ.”
Kɛ o susu kɛɛ?
NYA MWƆMI
Ke waa kɛ nile hla wa huɛmɛ ɔ, wa ma ha nɛ Yehowa bua maa jɔ, nɛ wɔ nitsɛmɛ hu wa ma ná he se.
Mi Nylɔmi
Mɛni he je nɛ nihi nɛ wa hlaa kaa wa huɛmɛ ɔ he hia Yehowa a?
Mɛnɔmɛ nɛ e sɛ nɛ waa kɛ mɛ nɛ bɔ huɛ?
Mɛni o maa pee konɛ huɛ bɔmi nɛ mi wa nɛ hi o kɛ nihi nɛ a suɔ Yehowa a nyɛ kpɛti?
NÍ KPAHI NƐ MAA YE BUA MO
Moo hyɛ bɔ nɛ ke waa kɛ nihi nɛ a suɔ Yehowa bɔɔ ɔ, a maa ye bua wɔ ngɛ behi nɛ a mi wa mi ha.
“Mo Ná Huɛmɛ Kpakpahi Loko Nyagbe ɔ Nɛ Ba” (Hwɔɔmi Mɔ, November 2019)
Moo hyɛ níhi nɛ o ma nyɛ maa pee konɛ o ná huɛmɛ kpakpahi.
Mɛni e sa nɛ o le kɛ kɔ huɛ bɔmi ngɛ Intanɛti ɔ nɔ ɔ he?
Ngɛ munyu nɛ ji “I Suɔ Wawɛɛ Kaa Ma Ná Tsɛ” ɔ mi ɔ, moo hyɛ nɔ́ nɛ ha nɛ nyumu ko tsake nihi nɛ e kɛ mɛ bɔɔ ɔ.