ANƐ O LE LO?

Munyu nɛ ji, “nyumu nɛ a puɛ lɛ” loo a ta lɛ nɛ a kɛ tsu ní ngɛ Baiblo ɔ mi ɔ tsɔɔ mɛni?

Ngɛ blema a, a puɛɛ nyumu komɛ nɛ a kɛ gblaa a tue. Ekomɛ hu lɛɛ a puɛɛ mɛ ke a nu mɛ ngɛ ta mi loo ke a pee mɛ nyɔguɛhi. A puɛɛ nyumuhi nɛ a ngɛ he kɛ nɔ fɔmi ngɛ a mi ɔ konɛ a hyɛ yihi a wehi, loo matsɛ ko yihi nɛ a ngɛ matsɛ we ɔ a nɔ. Kaa nɔ hyɛmi nɔ́ ɔ, Hegai kɛ Shaashgaz nɛ a ji nyumuhi nɛ a puɛ mɛ ɔ sɔmɔ kaa Persia Matsɛ Ahasuerus, nɛ a tsɛɛ lɛ hu ke Xerxes nɛ sɛ hlami ɔ yihi kɛ e plãhi a he buli.​—Ester 2:3, 14.

Se pi nihi tsuo nɛ Baiblo ɔ tu a he munyu ke a puɛ mɛ ɔ nɛ a puɛ mɛ niinɛ. Womi mi leli komɛ tsɔɔ kaa munyu nɛ ɔ kɔɔ ma nikɔtɔmahi nɛ a haa mɛ ní tsumi ngɛ matsɛ we ɔ hu a he. Enɛ ɔ ma nyɛ ma kɔ Yeremia huɛ Ebedmelek, kɛ Etiopia no ko nɛ Baiblo ɔ tsɔɔ we e biɛ, nɛ fiɛɛlɔ Filipo fiɛɛ kɛ ha lɛ ɔ he. E ngɛ heii kaa Ebedmelek ji ma nɔkɔtɔma, ejakaa e nyɛ yaa Matsɛ Zedekia hɛ mi. (Yeremia 38:7, 8) A tu Etiopia no nɛ “ya Yerusalem ya ja Mawu” ɔ he munyu kaa lɛ nɛ e hyɛɛ manyɛ ɔ juetli nɔ.​—Bɔfo Ɔmɛ A Ní Tsumi 8:27.

Mɛni he je nɛ to hyɛli nɛ a hi si blema a gbaa jijɔhi kɛ apletsihi a mi ɔ?

Be nɛ Yesu ngɛ kojomi nɛ maa ba hwɔɔ se ɔ he munyu tue ɔ, e de ke: ‘Ligbi ɔ nɛ Nɔmlɔ Bi ɔ maa ba kaa matsɛ ɔ, e ma gba nihi a mi kaa bɔ nɛ to hyɛlɔ gbaa jijɔ, kɛ apletsi mi ɔ.’ (Mateo 25:31, 32) Mɛni he je nɛ to hyɛli gbaa jijɔhi kɛ apletsihi a mi ɔ?

Behi fuu ɔ, to hyɛli haa nɛ jijɔhi kɛ apletsihi blaa kɛ yeɔ ní ngɛ ligbi ɔ mi. Ke je jɔ ɔ, a kpakaa mɛ kɛ ya woɔ to tsu mi bɔ nɛ pee nɛ fiɛ̃ ko ye mɛ, konɛ a kɛ bu a he kɛ je lohwe awi yeli, kɛ juli a he. (1 Mose 30:32, 33; 31:38-40) A kɛ jijɔ ɔmɛ woɔ to tsu kpa mi, nɛ a kɛ apletsi ɔmɛ hu woɔ to tsu kpa mi bɔ nɛ pee nɛ apletsihi nɛ a hɛ mi jɔɛ ɔ nɛ a ko ye jijɔhi nɛ a ngɛ kpoo ɔ awi, titli ɔ, jijɔ eyo ɔmɛ kɛ jijɔ bimɛ ɔmɛ. Womi ko nɛ a tsɛɛ ke, All Things in the Bible ɔ tsɔɔ kaa to hyɛlɔ jeɔ jijɔhi kɛ jeɔ apletsihi a he ke jijɔ ɔmɛ “ngɛ fɔe, ke a ngɛ a nyɔ nyu gblae, aloo ke a ngɛ a he bwɔmi sãe.” Lɔ ɔ he ɔ, Yesu nɔ́ hetomi nɔ́ ɔ ji níhi nɛ blema Israel bi ɔmɛ le loo a peeɔ ejakaa tohi kɛ to hyɛli pɔ he ngɛ lejɛ ɔ.