Sane Bimihi Nɛ Je Ní Kaneli A Ngɔ

Mɛni he je nɛ Yehowa Odasefohi tɛniɔ bɔfo Paulo kaa nɔ ko nɛ e yi mi kpa a?

Paulo fonihi nɛ ngɛ wa womi ɔmɛ a mi ɔ ji fonihi nɛ a tɛni. Nihi nɛ a tsuaa si kɛ hlaa blema sanehi a mi ɔ nɛ nɔ́ ko pɔtɛɛ nɛ tsɔɔ bɔ nɛ Paulo ngɛ ha konɛ waa da lɔ ɔ nɔ kɛ tɛni e fonihi.

Se kɛ̃ ɔ, ní komɛ ngɛ nɛ yeɔ bua wɔ nɛ wa leɔ bɔ nɛ eko ɔ, Paulo ngɛ ha. Kaa nɔ hyɛmi nɔ́ ɔ, March 1, 1902 Zion’s Watch Tower a de ke: “Womi nɛ ji ‘Acts of Paul and Thecla’ nɛ a ngma maa pee jeha 150 ngɛ Kristo fɔmi se ɔ kale Paulo saminya, nɛ jã ji bɔ nɛ nihi fuu he ye. Ngɛ womi ɔ mi ɔ, a tsɔɔ kaa nɔmlɔ wayo ji lɛ, e yi mi kpa, e to gɛdɛ, e ngɛ kpikpitii, e hɛ se bwɔmi tsa, nɛ e gugwɔ ngɛ piɔɔ.’”

The Oxford Dictionary of the Christian Church (jeha 1997 nɔ́ ɔ) de ngɛ jamɛ a blema womi ɔ he ke: “E sɛ nɛ e pee wɔ nyakpɛ kaa ‘Acts of Paul and Thecla’ womi ɔ deɔ níhi nɛ a ji anɔkuale.” Nihi nɛ a hi si blema a buɔ ‘Acts of Paul and Thecla’ womi ɔ wawɛɛ. Odase nɛ tsɔɔ jã ji kaa womi nɛ ɔ kakaaka 80 nɛ a kɛ nine ngma ngɛ Hela gbi kɛ gbi kpahi a mi lɛ ngɛ mwɔnɛ ɔ. Enɛ ɔ he ɔ, bɔ nɛ wa tɛniɔ Paulo fonihi ha kɛ bɔ nɛ blema womi komɛ kale lɛ ha a kɔ.

Se e sɛ nɛ wa hɛ nɛ je nɔ kaa ní kpahi ngɛ nɛ a he hia kulaa pe bɔ nɛ Paulo nɔmlɔ tso ɔ ngɛ ha. Benɛ Paulo ngɛ e sɔmɔmi ní tsumi ɔ tsue po ɔ, ni komɛ de ngɛ e he ke, ‘ke lɛ nɔmlɔ ɔ nitsɛ e ngɛ hiɛ ɔ, kɛkɛ e he jɔ, nɛ e munyu ɔmɛ hu a be hanɔ.’ (2 Kor. 10:10) E sɛ nɛ wa hɛ nɛ je nɔ hu kaa Yesu gu nyakpɛ blɔ nɔ kɛ ha nɛ e ba pee Kristofo no. Paulo tsu ní kaa “buɛ nɛ a hla kɛ ha [Kristo] konɛ e ngɔ [Yesu] biɛ ɔ kɛ ya ha je ma amɛ.” (Níts. 9:3-5, 15; 22:6-8) Jehanɛ hu ɔ, mo susu se namihi nɛ wa náa kɛ jeɔ Baiblo mi womihi nɛ Yehowa ngɔ e mumi klɔuklɔu ɔ kɛ ye bua Paulo nɛ e ngma a he nɛ o hyɛ.

Paulo kɛ níhi nɛ e pee loko a ba pee Kristofo no ɔ fĩɛ, nɛ e de we nɔ́ ko ngɛ e nɔmlɔ tso ɔ he hulɔ. (Níts. 26:4, 5; Filip. 3:4-6) E de ke: “Imi ji bɔfo ɔmɛ a kpɛti nɔ nyafii pe kulaa, nɛ i sɛ kaa a tsɛɔ mi bɔfo.” (1 Kor. 15:9) Pee se ɔ, e ngma ke: “Imi nɛ i ji nɔmlɔ nyafii pe kulaa ngɛ ni klɔuklɔu ɔmɛ a kpɛti ɔ, a ngɔ dloomi nɛ ɔ kɛ ha mi konɛ ma jaje Kristo ɔ ní nami nɛ mi kuɔ ɔ he sane kpakpa a kɛ tsɔɔ je ma amɛ.” (Efe. 3:8) Ngɛ anɔkuale mi ɔ, sɛ gbi nɛ ɔ he hia wawɛɛ pe bɔ nɛ eko ɔ, Paulo nɔmlɔ tso ɔ ngɛ ha tutuutu.