Mɛnɔ Ji Mawu?

Nihi fuu deɔ ke a he Mawu ye. Se ke o bi mɛ kaa mɛnɔ ji Mawu ɔ, e slo nɔ́ nɛ a ti nɔ fɛɛ nɔ ma de mo. Ni komɛ naa Mawu kaa kojolɔ ko nɛ e yi mi wa, nɛ nɔ́ nɛ e suɔ kaa e maa pee pɛ ji kaa e maa gbla nihi a tue ngɛ a tɔmihi a he. Ngɛ ni kpahi hu a blɔ fami ɔ, akɛnɛ a naa Mawu kaa nɔ ko nɛ e ngɛ suɔmi nɛ e kɛ yayami paa nɔ he je ɔ, a peeɔ nɔ́ nɛ a suɔ. Se ni komɛ hu susuɔ kaa Mawu kɛ wa kpɛti kɛ, nɛ e pee we wa he akɔtaa. Akɛnɛ e slo nɔ fɛɛ nɔ kɛ bɔ nɛ e susuɔ ngɛ sane nɛ ɔ he he je ɔ, e peeɔ nihi fuu kaa wa be nyɛe maa le nɔ nɛ Mawu ji.

Anɛ e he hia nɛ waa le nɔ nɛ Mawu ji lo? Ee, e he hia. Ke wa le nɔ tutuutu nɛ Mawu ji ɔ, lɔ ɔ ma ha nɛ wa maa le nɔ́ he je nɛ wa ngɛ wami mi, nɛ wa tsui maa nɔ wa mi. (Ní Tsumi 17:26-28) Ke o hɛ kɛ su Mawu he haa a, lɛ e hu e maa suɔ mo wawɛɛ nɛ e maa ye bua mo. (Yakobo 4:8) Nɔ́ nɛ pe kulaa ji kaa ke o ba le Mawu saminya a, o ma nyɛ maa hi si kɛ ya neneene.​—Yohane 17:3.

Mɛni blɔ nɔ o maa gu kɛ le Mawu? Kaa nɔ hyɛmi nɔ́ ɔ, mo susu nɔ ko nɛ o le lɛ saminya, eko ɔ, o huɛ ko nɛ nyu bi ngɛ o kɛ lɛ nyɛ kpɛti ɔ he nɛ o hyɛ. Kɛ nyɛ huɛ bɔmi ɔ je sisi ha kɛɛ? Eko ɔ, o ba le e biɛ, e subai, níhi nɛ e suɔ kɛ níhi nɛ e sume, níhi nɛ e pee kɛ níhi nɛ e to kaa e maa pee kɛ ní kpahi. Ní nɛ ɔmɛ lɛ ha nɛ o kɛ lɛ nu huɛ ɔ nɛ. Ke wa ma de ɔ, o kase e he ní.

Jã kɛ̃ nɛ wa ma nyɛ maa le nɔ nɛ Mawu ji ke ji kaa wa susu níhi nɛ nyɛɛ se ɔmɛ a he:

• KƐ A TSƐƐ MAWU KƐƐ?

• MƐNI SUHI NƐ MAWU NGƐ?

• MƐNI NÍHI NƐ MAWU PEE?

• MƐNI E MAA PEE HWƆƆ SE?

• KE O BA LE MAWU Ɔ, KƐ O MA NÁ HE SE HA KƐƐ?

A da Baiblo ɔ nɔ kɛ ha sane bimi nɛ ɔmɛ a heto ngɛ womi tɛtlɛɛ nɛ ɔ mi. Pi nɔ nɛ Mawu ji ɔ pɛ nɛ womi tɛtlɛɛ nɛ ɔ maa ye bua mo nɛ o le, e maa ye bua mo konɛ o na jɔɔmihi nɛ o ma ná ke o kɛ Mawu ba ná huɛ bɔmi.