Sane Bimi He

◼ Anɛ e sa kaa asafohi loo ni kakaakahi nɛ ngɔ Yehowa Odasefoli a mlaa nya nítsumi okadihi kɛ tsu ní lo?

Okadi ji biɛ, loo nɔ́ nɛ a kɛ toɔ nɔ́ ko pɔtɛɛ he so konɛ a kɛ yɔse lɛ. Watch Tower okadi ɔ daa si ha Watch Tower Bible and Tract Society of Pennsylvania kɛ mlaa nya nítsumi biɛ kpahi nɛ asafo ɔ kɛ tsuɔ ní ɔ. Mlaa nya nítsumi biɛ nɛ ji Christian Congregation of Jehovah’s Witnesses we okadi nɛ e kɛ ngmaa sɛ womihi ji Baiblo nɛ a bli mi. Mlaa nya nítsumi biɛ kpahi nɛ Yehowa Odasefoli kɛ tsuɔ ní ɔ ngɛ okadi kpahi.

E sɛ kaa asafohi loo ni kakaakahi peeɔ okadi nɛ ɔmɛ loo a henɔhi loo asafo ɔ mlaa nya nítsumi he ɔ biɛ kɛ fɔɔ Matsɛ Yemi Asahi loo asa he blɔ tsɔɔlɔ, loo sɛ womihi, loo nɔ nitsɛ e nɔ́ ko nɔ. Ke a ngɔ asafo ɔ okadihi kɛ biɛhi kɛ ngɛ ní tsue ngɛ blɔ nɛ ɔmɛ a nɔ ɔ, e be hae nɛ amlaalo nane mi dali, fiɛɛli, kɛ ni kpahi maa le slɔɔto nɛ ngɛ asafo ɔmɛ kɛ mlaa nya nítsumi he ɔmɛ a kpɛti. Jehanɛ se hu ɔ, e ma ha nihi maa bu sɛ womihi nɛ a nine suu nɔ ɔ kaa a je asafo ɔ yi ɔ loo asafo ɔ kɔni ɔ.

Nyɛ ko tɛni Watch Tower okadi loo e henɔ ko ngɛ Matsɛ Yemi Asa nɛ a maa ma hwɔɔ se ko he, ke e ngɛ Watch Tower mlaa nya nítsumi ɔ biɛ mi po. E he hia we kaa asafohi nɛ a tɛni okadi ɔ eko ngɛ a Matsɛ Yemi Asa amɛ a he ɔ nɛ tsake mɛ nɔuu keji e maa pee nítsumi ngua nɛ ma he be, sika, kɛ he wami babauu. Se ke nítsumi ɔ maa pee nɔ́ ko hlɛhlɛ ɔ, lɛɛ a tsu he ní. Se ke pi jã lɛɛ a ma nyɛ maa mlɛ benɛ a ma dla tsu ɔ loo asa a he blɔ tsɔɔlɔ ɔ konɛ a tsake.