Sane Bimi He
◼ Mɛni Baiblo sisi tomi mlaahi nɛ kɔɔ mobile phone nɛ a kɛ tsuɔ ní ngɛ Kristofoli a kpehi a sisi kɛ fiɛɛmi mi ɔ he?
‘Nɔ́ Tsuaa Nɔ́ Ngɛ E Be.’ (Fiɛlɔ 3:1): Mobile phone haa nihi he blɔ nɛ a ngmaa sɛ gbi kɛ maneɔ nihi, loo a kɛ a sibi tuɔ munyu ngɛ be saisaa mi. Se be komɛ ngɛ nɛ Kristofoli sume nɛ a mobile phone nɛ je a juɛmi kɛ je nɔ́ ko nɔ. Kaa nɔ hyɛmi nɔ́ ɔ, wa yaa asafo mi kpehi konɛ wa ya sɔmɔ Yehowa, wa ya bu mumi mi blɔ tsɔɔmi tue, nɛ waa wo wa sibi he wami. (5 Mose 31:12; La 22:22; Rom. 1:11, 12) Anɛ wa be nyɛɛe maa gbe wa mobile phone ɔ, konɛ ke a kpa asafo mi kpe ɔ waa hyɛ kaa a ngma sɛ gbi ko kɛ mane wɔ lo? Ke oslaa ko nɛ ma nyɛ maa ba heje nɛ wa sume nɛ waa gbe wa phone ɔ, lɛɛ e sa nɛ waa to he blɔ nya konɛ e ko hao ni kpahi.
‘Pee Nihi Tsuo Ngɛ Sane Kpakpa A He.’ (1 Kor. 9:23): Be komɛ ɔ, waa kɛ mobile phone tsuɔ ní ngɛ fiɛɛmi mi nɛ se nami ngɛ he. Kaa nɔ hyɛmi nɔ́ ɔ, nyɛminyumu nɛ ngɛ nítsumi ɔ hɛ mi nyɛɛe ɔ ma nyɛ maa ngɔ kɛ tsɛ nyɛmimɛ nɛ a ngɛ fiɛɛe ngɛ zugba kpɔ ɔ fã ko mi ɔ konɛ e hyɛ kaa níhi ngɛ nɔ yae bɔnɛ sa lo. Be komɛ ɔ, fiɛɛli kɛ mobile phone tsɛɔ nihi nɛ a ngɛ munyu ɔ he bua jɔmi loo a Baiblo mi nikaseli loko a yaa a ngɔ, titli ɔ ke he nɛ a ngɛ ɔ kɛ nɔ ɔ we he kɛ. Ke wa hɛɛ mobile phone kɛ ya fiɛɛmi ɔ, e sa nɛ waa hyɛ nɛ e ko po munyu nɛ waa kɛ wetsɛ ɔ ngɛ tue ɔ mi. (2 Kor. 6:3) Ke fiɛɛlɔ nɛ waa kɛ lɛ ngɛ nyɛɛe ɔ kɛ nɔ ko ngɛ ní kasee ɔ, anɛ e be hie kaa wa juɛmi maa hi fiɛɛmi nítsumi ɔ kɛ fiɛɛlɔ ɔ nɔ pe nɛ wa ma tsɛ wa huɛ ko, loo wa maa ngma sɛ gbi kɛ mane lo?
Mo Susu Ni Kpahi A He. (1 Kor. 10:24; Filip. 2:4): E sɛ nɛ waa pɔ se kpɛmi kɛ ya fiɛɛmi yami kpe ɔ, kɛ susumi kaa wa ma nyɛ maa tsɛ nɔ ko loo wa maa ngma sɛ gbi kɛ mane nɔ ko konɛ e tsɔɔ wɔ he nɛ kuu ɔ ngɛ fiɛɛe ngɛ. Ke wa kpɛ se kɛ ya a, be fuu ɔ, e sa nɛ a tsake nɛ a gba fiɛɛli ɔmɛ. Ke e ngɛ mi hluu ɔ, si fɔfɔɛ komɛ nɛ wa be nyɛɛe nɔ́ ko peemi ngɛ he ma nyɛ ma ha nɛ waa kpɛ se. Se kɛ̃ ɔ, ke waa kɛ pee wa su kaa wa maa su lejɛ ɔ ngɛ be nya a, wa tsɔɔ kaa wa susuɔ blɔ nya nɛ Yehowa to ɔ, nyɛmi nɛ ngɛ fiɛɛmi yami kpe ɔ nɔ hyɛe ɔ, kɛ fiɛɛli kpa amɛ a he.