Anɛ O Le Lo?

Anɛ a kɛ ngɔwu peeɔ lɛ blema lo?

NGƐ blema Egipt ɔ, ngɔwu ji nɔ́ nɛ nihi fuu le kaa a kɛ peeɔ womi nɛ a ngmaa ní ngɛ nɔ. Hela bi ɔmɛ kɛ Roma bi ɔmɛ hu ngmaa ní ngɛ womi nɛ a kɛ ngɔwua pee nɔ. Se nihi fuu li kaa a kɛ ngɔwu peeɔ lɛ hulɔ.

Jeha 2,500 nɛ be ɔ, gbalɔ Yesaya tsɔɔ kaa nihi nɛ a hi ‘Etiopia pa amɛ a se’ ɔ ‘hi lɛhi nɛ a kɛ ngɔwu pee a mi.’ Pee se ɔ, gbalɔ Yeremia gba kaa Media kɛ Persia bi ɔmɛ ma ba sá Babilon ma a yi, nɛ a maa mɛ “lɛhi nɛ a kɛ ngɔwu pee” ɔ a he la. Nɛ Babilonia bi ɔmɛ be nyɛe maa tu fo.—Yes. 18:1, 2; Yer. 51:32, NW.

Nihi nɛ a tsuaa si kɛ hlaa blema níhi ɔ tsɔɔ kaa niinɛ a na níhi nɛ tsɔɔ kaa a ngɔ ngɔwu kɛ pee lɛhi blema. Baiblo ɔ je Mawu mumi ɔ mi, enɛ ɔ he ɔ, Baiblo kaseli ngɛ nɔ mi mami kaa nihi nɛ a tsuaa si kɛ hlaa blema níhi ɔ maa na ní nɛ ɔmɛ. (2 Tim. 3:16) Mɛni nɛ a na? Nihi nɛ a tsuaa si kɛ hlaa blema níhi ɔ na lɛhi nɛ a kɛ ngɔwu pee ngɛ Egipt ɔ he níhi.

KƐ A KƐ NGƆWU PEEƆ LƐ HA KƐƐ?

A tɛni bɔ nɛ nihi poɔ ngɔwu nɛ a kɛ peeɔ lɛhi ɔ ngɛ Egipt bi a yɔkɔhi a he. A poɔ ngɔwu ɔ nɛ a fiɔ lɛ yi tlomi nya yi tlomi nya. Kɛkɛ lɔ ɔ se ɔ, a fĩ tsuo kɛ pee kake. Bɔ nɛ ngɔwu ngɛ ha he je ɔ, ke a fĩ yi tlomi ɔmɛ kɛ bla a, e peeɔ kpikpitii nɛ e he waa saminya. Womi nɛ ji A Companion to Ancient Egypt ɔ tsɔɔ kaa lɛ nɛ a kɛ ngɔwu peeɔ mi kami maa pee nanewɛɛ 55 kɛ se, nɛ e mi bli bɔ nɛ akɔfa 10 loo 12 ma nyɛ maa hi lɛ ɔ hiɛ kɛ hiɛ.

MƐNI HE JE NƐ NIHI NGƆƆ NGƆWU KƐ PEEƆ LƐ?

Ngɛ Nilo Pa a mi ɔ, ngɔwu pɔ he wawɛɛ. Jehanɛ hu ɔ, ngɔwu kɛ lɛ peemi yi kulaa. Benɛ a kɛ tso bɔni lɛ nguahi peemi po ɔ, wo hɛli kɛ detsɛmɛ ngɔɔ ngɔwu kɛ peeɔ lɛhi.

Blema a, nihi ngɔ lɛhi nɛ a kɛ ngɔwu pee ɔ kɛ tsu ní be kɛkɛɛ. Hela womi ngmalɔ ko nɛ a tsɛɛ lɛ ke Plutarch nɛ e hi si ngɛ kaseli ɔmɛ a be ɔ mi ɔ tsɔɔ kaa nihi nɛ a hi si ngɛ jamɛ a be ɔ mi ɔ kɛ lɛhi nɛ a kɛ ngɔwu pee ɔ tsu ní.