Nɔ́ Nɛ Maa Ye Bua Mo Konɛ O Na Nɔ Ko Nɛ Sa Nɛ O Kɛ Lɛ Nɛ Sɛ Gba Si Himi Mi

1-2. (a) Mɛni ji ní komɛ nɛ e sa kaa Kristofohi nɛ a sɛ we gba si himi mi lolo ɔ nɛ a susu he loko a kɛ nɔ ko nɛ bɔni nyɛɛmi kɛ ha gba si himi mi sɛmi? (b) Ke a ke nyumu ko kɛ yo ko ngɛ nyɛɛe kɛ ha gba si himi mi sɛmi ɔ, kɛ e tsɔɔ kɛɛ? (Hyɛ “Munyu Nɛ A Tsɔɔ Sisi.”)

ANƐ o suɔ nɛ o sɛ gba si himi mi lo? E ngɛ mi kaa pi gba si himi ji nɔ́ titli nɛ haa nɔ bua jɔmi mohu lɛɛ, se Kristofohi nɛ a ji nihewi kɛ yihewi kɛ nikɔtɔmahi tsuo ngɛ blɔ hyɛe kaa a ma ná nɔ ko nɛ sa nɛ a kɛ lɛ nɛ sɛ gba si himi mi. Niinɛ, loko o kɛ nɔ ko ma bɔni nyɛɛmi kɛ ha gba si himi mi sɛmi ɔ, e sa nɛ huɛ bɔmi kpakpa nɛ hi o kɛ Yehowa nyɛ kpɛti, e sa nɛ o le mo nitsɛ o he saminya, nɛ o hyɛ kaa o ngɛ sika nɛ o kɛ ma tsu o weku ɔ he lo nya hiami níhi a he ní lo.a (1 Kor. 7:36) Ke o he su ngɛ ní nɛ ɔmɛ a blɔ fa mi ɔ, e ngɛ heii kaa o maa ye manye ngɛ o gba a mi.

² Se kɛ̃ ɔ, e be gbɔjɔɔ kaa o maa na nɔ ko nɛ sa nɛ o kɛ lɛ nɛ sɛ gba si himi mi. (Abɛ 31:10) Ke o na nɔ ko nɛ o maa suɔ nɛ o le lɛ saminya po ɔ, e be gbɔjɔɔ kaa o kɛ lɛ ma bɔni nyɛɛmi kɛ ha gba si himi mi sɛmi.b Ngɛ ní kasemi nɛ ɔ mi ɔ, wa maa hyɛ nɔ́ nɛ maa ye bua Kristofohi nɛ a sɛ we gba si himi mi lolo ɔ konɛ a ná nɔ ko nɛ sa nɛ a kɛ lɛ nɛ bɔni nyɛɛmi. Jehanɛ hu ɔ, wa maa hyɛ nɔ́ nɛ ni kpahi nɛ a ngɛ asafo ɔ mi ɔ ma nyɛ maa pee kɛ ye bua nihi nɛ a suɔ nɛ a sɛ gba si himi mi ɔ.

NƆ́ NƐ MAA YE BUA MO KONƐ O NÁ NƆ KO NƐ SA

3. Mɛni ji ní komɛ nɛ e sa kaa Kristofohi nɛ a ngɛ nɔ ko hlae nɛ a kɛ lɛ nɛ sɛ gba si himi mi ɔ nɛ a susu he?

³ Ke o suɔ nɛ o kɛ nɔ ko nɛ sɛ gba si himi mi ɔ, e sa nɛ o le suhi nɛ o ngɛ hlae ngɛ nɔ ɔ he loko o kɛ lɛ nɛ bɔni nyɛɛmi. Ke pi jã a, nɔ ko nɛ jinɛ e ko pee huno loo yo kpakpa kɛ ha mo ɔ ma nyɛ maa je o dɛ aloo o kɛ nɔ nɛ sɛ kɛ ha mo ɔ ma bɔni nyɛɛmi. Ngɛ anɔkuale mi ɔ, e sa nɛ nɔ nɛ waa kɛ lɛ maa sɛ gba si himi mi ɔ nɛ pee Kristofo no nɛ a baptisi lɛ. (1 Kor. 7:39) Se lɔ ɔ hu tsɔɔ we kaa ke a baptisi nɔ ko ɔ, doo ɔ, e maa pee huno loo yo kpakpa kɛ ha mo. Enɛ ɔ he ɔ, mo bi o he ke: ‘Mɛni otihi lɛ i kɛ ma ye hɛ mi? Mɛni suhi nɛ i ngɛ blɔ hyɛe kaa nɔ nɛ i suɔ nɛ i kɛ lɛ nɛ sɛ gba si himi mi ɔ nɛ je kpo? Anɛ i ngɛ níhi fuu blɔ hyɛe tsɔ ngɛ nɔ ɔ he lo?’

4. Mɛni níhi nɛ ni komɛ sɔle ngɛ he?

⁴ Ke o suɔ nɛ o sɛ gba si himi mi ɔ, e ngɛ heii kaa o sɔle konɛ Yehowa nɛ ye bua mo nɛ o ná nɔ ko. (Filip. 4:6) Ngɛ anɔkuale mi ɔ, Yehowa wui nɔ ko si kaa e ma ha lɛ nɔ ko nɛ e kɛ lɛ nɛ sɛ gba si himi mi. Se e le o hiami níhi kɛ bɔ nɛ o ngɛ he nue ha, nɛ e maa ye bua mo konɛ o na nɔ ko nɛ sa nɛ o kɛ lɛ nɛ sɛ gba si himi mi. Enɛ ɔ he ɔ, yaa nɔ nɛ o de lɛ o hiami níhi kɛ bɔ nɛ o ngɛ he nue ha. (La 62:8) Moo sɔle konɛ Yehowa nɛ ha mo nile kɛ tsui si tomi. (Yak. 1:5) Johnc nɛ e ngɛ United States nɛ e sɛ we gba si himi mi lolo ɔ tsɔɔ ní komɛ nɛ e sɔleɔ ngɛ he. E de ke: “I deɔ Yehowa suhi nɛ i ngɛ hlae ngɛ yo nɛ i suɔ kaa i kɛ lɛ nɛ sɛ gba si himi mi ɔ he. I deɔ Yehowa kaa e bli blɔ ha mi konɛ ma ná nɔ ko nɛ sa. Jehanɛ hu ɔ, i deɔ Yehowa kaa e ye bua mi nɛ ma ná suhi nɛ ma ha nɛ ma pee huno kpakpa hwɔɔ se.” Nyɛmiyo Tanya nɛ e je Sri Lanka a de ke: “Be mi nɛ i ngɛ nɔ ko hlae nɛ i kɛ lɛ maa sɛ gba si himi mi ɔ, i deɔ Yehowa kaa e ye bua mi konɛ ma ya nɔ nɛ ma ye lɛ anɔkuale, ma ná juɛmi nɛ da, nɛ ye bua nɛ jɔ.” Ke o ná we nɔ ko nɛ sa nɛ o kɛ lɛ maa sɛ gba si himi mi amlɔ nɛ ɔ po ɔ, Yehowa wo si kaa e maa ya nɔ maa hyɛ o nɔ, e ma je suɔmi kpo kɛ tsɔɔ mo, nɛ e ma ha nɛ o bua maa jɔ.—La 55:22.

5. Mɛni ma nyɛ ma ha nɛ Kristofohi nɛ a sɛ we gba si himi mi ɔ kɛ nɔ ko nɛ e suɔ Yehowa a nɛ kpe? (1 Korinto Bi 15:58) (Hyɛ foni ɔ hulɔ.)

⁵ Baiblo ɔ woɔ wɔ he wami kaa wa “tsu babauu ngɛ Nyɔmtsɛ ɔ ní tsumi ɔ mi.” (Kane 1 Korinto Bi 15:58.) Ke o tsuɔ babauu ngɛ Yehowa sɔmɔmi mi nɛ o kɛ nyɛmimɛ slɔɔtohi bɔɔ ɔ, o bua maa jɔ wawɛɛ. Se pi lɔ ɔ pɛ, e ma nyɛ ma ha nɛ o kɛ ni kpahi nɛ a sɛ we gba si himi mi nɛ a kɛ a be tsuo ngɛ Yehowa sɔmɔe kaa mo ɔ maa kpe. Jehanɛ hu ɔ, ke o ya nɔ nɛ o bɔ mɔde kaa o maa sa Yehowa hɛ mi ɔ, o bua maa jɔ wawɛɛ nitsɛ.

6. Ke Kristofo no ko ngɛ nɔ ko hlae nɛ e kɛ lɛ nɛ sɛ gba si himi mi ɔ, mɛni nɛ e sa kaa e hi e juɛmi mi?

⁶ Kɔkɔ bɔmi: Ke o ngɛ hlae nɛ o kɛ nɔ ko nɛ sɛ gba si himi mi ɔ, moo hyɛ saminya nɛ o ko ngɔ lɔ ɔ kɛ pee nɔ́ titli ngɛ o si himi mi. (Filip. 1:10) Ke o sɛ gba si himi mi jio, o sɛ we mi jio, pi lɔ ɔ nɛ maa tsɔɔ kaa o ma ná bua jɔmi nítsɛnitsɛ, mohu ɔ, huɛ bɔmi nɛ ngɛ o kɛ Yehowa nyɛ kpɛti ɔ ji nɔ́ nɛ ma ha mo bua jɔmi nítsɛnitsɛ. (Mat. 5:3) Amlɔ nɛ ɔ nɛ o sɛ we gba si himi mi lolo ɔ, o ma nyɛ ma ná he blɔhi fuu kɛ bli o sɔmɔmi ní tsumi ɔ mi. (1 Kor. 7:​32, 33) Enɛ ɔ he ɔ, o kɛ o be nɛ tsu ní saminya. Nyɛmiyo ko nɛ a tsɛɛ lɛ ke Jessica nɛ e ngɛ United States ɔ sɛ gba si himi mi benɛ e piɛ bɔɔ nɛ e maa ye jeha 40 ɔ. E de ke: “E ngɛ mi kaa i ngɛ hlae nɛ ma sɛ gba si himi mi mohu lɛɛ, se i kɛ ye be tsuo tsu fiɛɛmi ní tsumi ɔ, nɛ lɔ ɔ ye bua mi nɛ i hɛwi tsɔ.”

MO HE BE KƐ LE NƆ Ɔ SAMINYA

7. Mɛni he je nɛ nile ngɛ mi kaa o ma he be kɛ le nɔ ko loko o de lɛ kaa o bua jɔ e he ɔ? (Abɛ 13:16)

⁷ Ke o na nɔ ko nɛ o susu kaa e ma nyɛ maa pee huno loo yo kpakpa kɛ ha mo ɔ hu nɛɛ? Anɛ e sa nɛ o ya de nɔ ɔ oya nɔuu kaa o bua jɔ e he lo? Baiblo ɔ tsɔɔ kaa nɔ nɛ e hɛ mi tɛ ɔ peeɔ e ní ngɛ nile mi. (Kane Abɛ 13:16.) Enɛ ɔ he ɔ, loko o ma de nɔ ko kaa o bua jɔ e he ɔ, e maa hi kaa o ma he be kɛ le nɔ ɔ kɛ ya si be ko. Nyɛminyumu ko nɛ a tsɛɛ lɛ ke Aschwin nɛ e je Netherlands ɔ de ke: “O ma nyɛ ma ná nɔ ko he suɔmi oya nɔuu, se jamɛ a he numi ɔ ma nyɛ maa laa si kake too. Enɛ ɔ he ɔ, ke o ha o he be konɛ o kɛ le nɔ ko ɔ, e maa ye bua mo nɛ o be o he numi pɛ nɔ dae nɛ o kɛ nɔ ko nɛ bɔni nyɛɛmi oya nɔuu kɛ ha gba si himi mi sɛmi.” Be mi nɛ o ngɛ nɔ ɔ he hɛ toe ɔ, eko ɔ, o maa na kaa jamɛatsɛ ɔ pi nɔ ko nɛ sa kɛ ha mo.

8. Ke o ngɛ hlae nɛ o kɛ nɔ ko nɛ bɔni nyɛɛmi kɛ ha gba si himi mi sɛmi ɔ, kɛ o maa pee lɛ kɛɛ? (Hyɛ foni ɔ hulɔ.)

⁸ Kɛ o ma plɛ kɛ to nɔ ko nɛ o ngɛ hlae nɛ o kɛ lɛ nɛ bɔni nyɛɛmi ɔ he hɛ kɛɛ be mi nɛ e li? Ngɛ asafo mi kpehi loo he nya buami komɛ a sisi ɔ, o ma nyɛ ma yɔse ní komɛ ngɛ e he. Ní nɛ ɔmɛ ekomɛ ji, huɛ bɔmi nɛ ngɛ e kɛ Yehowa a kpɛti, e ní peepeehi kɛ e suhi. O maa na nihi nɛ e kɛ bɔɔ, kɛ níhi nɛ e tuɔ he munyu. (Luka 6:45) Anɛ otihi nɛ e kɛ ma e hɛ mi ɔ ngɛ kaa o nɔ́ ɔ lo? O kɛ e we asafo mi nikɔtɔma amɛ loo nyɛmimɛ kpahi nɛ a nane pi si nɛ a le lɛ saminya a ma nyɛ maa sɛɛ ní. (Abɛ 20:18) O ma nyɛ ma bi mɛ ke ji e ngɛ biɛ kpakpa nɛ e baa e je mi saminya lo. (Rut 2:11) Be mi nɛ o ngɛ nɔ ɔ he hɛ toe ɔ, moo hyɛ saminya nɛ o ko pee nɔ́ ko nɛ ma gba e nya. Moo bɔ mɔde kaa o ma susu bɔ nɛ e nuɔ he ha a he. Koo bɔ mɔde kaa o maa hi he fɛɛ he nɛ nɔ ɔ ngɛ loo o le nɔ́ fɛɛ nɔ́ ngɛ e he.

9. Loko o ma de nɔ ko kaa o bua jɔ e he ɔ, mɛni nɔ mi mami lɛ e sa kaa o ná?

⁹ Mɛni be nɛ e sa nɛ o to nɔ ko he hɛ kɛ ya si loko o de lɛ kaa o bua jɔ e he? Ke o ye oya kɛ ya de nɔ ɔ kaa o bua jɔ e he ɔ, nɔ ɔ maa na kaa o susuu we níhi a he saminya loko o mwɔɔ yi mi kpɔ. (Abɛ 29:20) Jã kɛ̃ nɛ ke nɔ ɔ yɔse kaa o bua jɔ e he se o ha nɛ be pue mi tsɔ loko o ya de lɛ ɔ, eko ɔ, e ma susu kaa o gblaa o nane si tsɔ kɛ mwɔɔ yi mi kpɔ. (Fiɛɛ. 11:4) Mo kai kaa loko o ma de nɔ ko kaa o bua jɔ e he ɔ, e he hia we nɛ o ma o juɛmi nya si kaa o kɛ nɔ ɔ lɛ maa sɛ gba si himi mi. Se e sa nɛ o ná nɔ mi mami kaa o pee klaalo kaa o maa sɛ gba si himi mi, nɛ nɔ nɛ o ngɛ hlae nɛ o kɛ lɛ nɛ sɛ gba si himi mi ɔ ma nyɛ maa pee nɔ ko nɛ sa.

10. Ke o yɔse kaa nɔ ko bua jɔ o he, se moo lɛɛ o bua jɔɛ nɔ ɔ he ɔ, mɛni e sa kaa o pee?

¹⁰ Ke o yɔse kaa nɔ ko bua jɔ o he ɔ, mɛni e sa nɛ o pee? Ke o bua jɔɛ nɔ ɔ he ɔ, moo bɔ mɔde kaa o kɛ o ní peepee maa tsɔɔ jã. E sɛ nɛ o ha nɛ nɔ ɔ nɛ nu he kaa hɛ kɛ nɔ fɔmi ko ngɛ kɛ ha lɛ, be mi nɛ o le kaa o bua jɔɛ e he.—1 Kor. 10:24; Efe. 4:25.

11. Ke o ná he blɔ kaa o maa to blɔ nya konɛ nyumu ko kɛ yo ko nɛ a bɔni nyɛɛmi kɛ ha gba si himi mi sɛmi ɔ, mɛni ji ní komɛ nɛ e sa kaa o susu he saminya?

¹¹ Ngɛ ma komɛ a nɔ ɔ, a hyɛɛ blɔ kaa fɔli loo nikɔtɔmahi ji nihi nɛ e sa nɛ a hla huno loo yo kɛ ha nɔ ko nɛ e ngɛ hlae nɛ e sɛ gba si himi mi. Ngɛ ma kpahi hu a nɔ ɔ, weku li loo huɛmɛ lɛ a hlaa huno loo yo kɛ haa nɔ ko nɛ e ngɛ hlae nɛ e sɛ gba si himi mi, nɛ a toɔ blɔ nya konɛ nyumu ɔ kɛ yo nɛ a kpe nɛ a hyɛ kaa a bua jɔ a sibi a he lo. Enɛ ɔ he ɔ, ke o ná he blɔ kaa o maa to blɔ nya konɛ nyumu ko kɛ yo ko nɛ a bɔni nyɛɛmi loo a sɛ gba si himi mi ɔ, mo susu nyumu ɔ kɛ yo ɔ tsuo a hiami níhi kɛ nɔ́ nɛ a suɔ ɔ he. Ke o yɔse kaa nɔ ko maa pee huno loo yo kpakpa kɛ ha o huɛ loo o weku no ko ɔ, moo bɔ mɔde kaa o maa le nɔ ɔ saminya. Nɔ́ nɛ he hia titli ji kaa o maa hyɛ kaa huɛ bɔmi kpakpa ngɛ nɔ ɔ kɛ Yehowa a kpɛti lo. Huɛ bɔmi kpakpa nɛ maa hi nɔ ko kɛ Yehowa a kpɛti ɔ he hia kulaa pe sika, loo sukuu nɛ nɔ ko ya, loo bɔ nɛ nɔ ɔ he biɛ ha. Mo kai kaa nyumu ɔ kɛ yo ɔ lɛ a maa mwɔ yi mi kpɔ kaa a maa sɛ gba si himi mi loo a be mi sɛe.—Gal. 6:5.

NYƐƐMI KƐ HA GBA SI HIMI MI SƐMI

12. Ke o bua jɔ he kaa o kɛ nɔ ko ma bɔni nyɛɛmi kɛ ha gba si himi mi sɛmi ɔ, kɛ o ma plɛ kɛ de nɔ ɔ ha kɛɛ?

¹² Ke o bua jɔ he kaa o kɛ nɔ ko ma bɔni nyɛɛmi kɛ ha gba si himi mi sɛmi ɔ, kɛ o ma plɛ kɛ de nɔ ɔ ha kɛɛ?d O ma nyɛ maa to blɔ nya konɛ o kɛ lɛ nɛ sɛɛ ní ngɛ he ko nɛ nihi ma nyɛ maa na nyɛ aloo ngɛ fon nɔ. E sa nɛ o ha nɛ e pee heii ha nɔ ɔ kaa o suɔ lɛ nɛ o maa suɔ nɛ o le lɛ saminya. (1 Kor. 14:9) Ke e maa hi ɔ, mo ha nɔ ɔ be bɔɔ nɛ e kɛ susu he. (Abɛ 15:28) Se ke nɔ ɔ bua jɔɛ o he ɔ, o mi mi nɛ ko fu.

13. Ke nɔ ko de mo kaa e bua jɔ o he ɔ, mɛni o ma nyɛ maa pee? (Kolose Bi 4:6)

¹³ Ke nɔ ko de mo kaa e bua jɔ o he ɔ hu nɛɛ? E ngɛ heii kaa nɔ ɔ pee kã loko e nyɛ nɛ e ba de mo ɔ nɛ, lɔ ɔ he ɔ, mo je bumi kɛ mi mi jɔmi kpo kɛ tsɔɔ lɛ. (Kane Kolose Bi 4:6.) Ke o suɔ nɛ nɔ ɔ nɛ ha mo be bɔɔ konɛ o kɛ susu nɔ́ nɛ e de mo ɔ he ɔ, lɛɛ mo ha nɛ e le. Se kɛ̃ ɔ, moo bɔ mɔde kaa o ma ha lɛ heto mla. (Abɛ 13:12) Ke o be nɔ ɔ he bua jɔmi ɔ, moo je bumi mi nɛ o ha nɛ e le. Benɛ nyɛmiyo ko de nyɛminyumu ko nɛ a tsɛɛ lɛ ke Hans nɛ e je Austria a kaa e bua jɔ e he ɔ, kɛ Hans pee e ní ha kɛɛ? E de ke: “I je bumi mi nɛ i de lɛ ye susumi. I pee jã amlɔ nɔuu, ejakaa i sume nɛ e susu kaa ye bua jɔ e he. Lɔ ɔ se ɔ, i pee we nɔ́ ko nɛ ma ha nɛ nyɛmiyo ɔ nɛ susu kaa i tsake ye juɛmi.” Se ke o suɔ kaa o kɛ nɔ ɔ maa nyɛɛ kɛ ha gba si himi mi sɛmi ɔ, ha nɛ e le bɔ nɛ o suɔ nɛ níhi nɛ ya nɔ ha ngɛ nyɛ nyɛɛmi ɔ mi. Eko ɔ, níhi nɛ nyɛ ni enyɔ ɔmɛ nyɛ maa hyɛ blɔ ɔ maa je ekpa, ejakaa e slo he nɛ nyɛ tsuo nyɛ je loo bɔ nɛ a tsɔse nyɛ ha.

MƐNI NI KPAHI MA NYƐ MAA PEE KƐ YE BUA NIHI NƐ A SƐ WE GBA SI HIMI MI?

14. Mɛni blɔ nɔ wa ma nyɛ maa ngɔ wa munyu tutui kɛ wo Kristofohi nɛ a sɛ we gba si himi mi ɔ he wami?

¹⁴ Mɛni wɔ tsuo wa ma nyɛ maa pee kɛ ye bua nihi nɛ a maa suɔ nɛ a sɛ gba si himi mi ɔ? Nɔ́ kake nɛ wa ma nyɛ maa pee ji kaa wa maa hyɛ wa munyu tutui saminya. (Efe. 4:29) Wa ma nyɛ ma bi wa he ke: ‘Anɛ i yeɔ nihi nɛ a ngɛ hlae nɛ a sɛ gba si himi mi ɔ a he fɛu lo? Ke i na kaa nyɛminyumu ko kɛ nyɛmiyo ko ngɛ ní sɛɛe ɔ, anɛ e sa nɛ ma susu kaa a ná suɔmi kɛ ha a sibi lo?’ (1 Tim. 5:13) Jã kɛ̃ nɛ ke nɔ ko sɛ we gba si himi mi ɔ, e sɛ nɛ wa ha nɛ e nu he kaa se nami ko be e he loo e ngɛ nyagba. Hans nɛ wa tu e he munyu kɛ sɛ hlami ɔ de ke: “Nyɛmimɛ komɛ deɔ ke, ‘Mɛni o ngɛ mlɛe loko o sɛ gba si himi mi? O li kaa o ngɛ wae lo?’ Munyuhi kaa jã a ma nyɛ ma jɔ̃ nihi nɛ a sɛ we gba si himi mi ɔ a kɔní mi, nɛ a ma nyɛ maa nu he kaa e sa nɛ a sɛ mi.” Nyɛ ha nɛ waa ngɔ he blɔ fɛɛ he blɔ nɛ wa ma ná a kɛ je nyɛmimɛ nɛ a sɛ we gba si himi mi ɔ a yi!—1 Tɛs. 5:11.

15. (a) Ngɛ Roma Bi 15:2 ɔ nya a, mɛni he nɛ e sa nɛ wa susu loko waa ye bua nyɛmi ko nɛ e ná nɔ ko nɛ e kɛ lɛ nɛ sɛ gba si himi mi? (Hyɛ foni ɔ hulɔ.) (b) Mɛni otihi lɛ je kpo ngɛ video ɔ mi nɛ́ o kadi?

¹⁵ Ke o susu kaa nyɛmiyo ko maa sa nyɛminyumu ko kɛ ha gba si himi hu nɛɛ? Baiblo ɔ woɔ wɔ he wami kaa wa susu bɔ nɛ ni kpahi nuɔ he ha a he. (Kane Roma Bi 15:2.) Nyɛmimɛ komɛ nɛ a sɛ we gba si himi mi ɔ bua jɔɛ he kaa nɔ ko ma hla huno loo yo kɛ ha mɛ, nɛ e sa nɛ waa kplɛɛ nɔ ha mɛ jã. (2 Tɛs. 3:11) Se eko ɔ, ni kpahi a bua maa jɔ he. Ke a bua jɔ he po ɔ, e sɛ nɛ waa kɛ oya yemi nɛ pee jã be mi nɛ a de we wɔ ke waa pee jã.e (Abɛ 3:27) Nyɛmimɛ komɛ hu ngɛ nɛ a be suɔe nɛ nyɛmi ko nɛ ngɔ nɔ ko kɛ ba tsɔɔ mɛ kɛ yi mi tomi ɔ kaa a kɛ mɛ nɛ bɔni nyɛɛmi. Nyɛmiyo ko nɛ e ngɛ Germany nɛ a tsɛɛ lɛ ke Lydia a de ke: “O ma nyɛ maa to blɔ nya konɛ nyɛminyumu ɔ kɛ nyɛmiyo ɔ nɛ a ba he nya buami ko sisi. O ma nyɛ ma ha nɛ a nga a sibi, lɔ ɔ se ɔ, mo si nɔ́ nɛ piɛ ɔ kɛ ha mɛ.”

16. Mɛni nɛ e sa nɛ e hi Kristofohi nɛ a sɛ we gba si himi mi ɔ a juɛmi mi?

¹⁶ Wa sɛ gba si himi mi jio, wa sɛ we gba si himi mi jio, wɔ tsuo wa ma nyɛ ma ná bua jɔmi ngɛ si himi mi! (La 128:1) Enɛ ɔ he ɔ, ke o ngɛ hlae nɛ o sɛ gba si himi mi se o nɛ nɔ ko lolo ɔ, yaa nɔ nɛ o ngɔ o juɛmi kɛ ma Yehowa nɛ o ma sɔmɔ ɔ nɔ. Nyɛmiyo ko nɛ a tsɛɛ lɛ ke Sin Yi nɛ e je Macao ɔ de ke: “Ke o sɛ gba si himi mi ngɛ Paradeiso ɔ mi nɛ o ngɔ be nɛ o kɛ o huno loo o yo ma ná a kɛ to be nɛ o ngɛ amlɔ nɛ ɔ nɛ o sɛ we gba si himi mi ɔ he ɔ, o naa kaa be nɛ o ngɛ amlɔ nɛ ɔ pi kulaa. Enɛ he ɔ, moo ngɔ be nɛ o ngɛ amlɔ nɛ ɔ kɛ tsu ní saminya.” Se ke o na nɔ ko nɛ́ o bua jɔ e he nɛ nyɛ bɔni nyɛɛmi momo hu nɛɛ? Ní kasemi nɛ nyɛɛ se ɔ maa ye bua mo konɛ o ye manye.