Sane Kpiti Ko Nɛ O Ma Nyɛ Ma Bi

Mary kɛ e huno John,a je ma ko nɛ nihi fuu jeɔ Philippines kɛ ba tsuɔ ní ngɛ lejɛ ɔ mi. Enɛ ɔ he ɔ, a nyɛɔ nɛ a fiɛɛɔ kɛ haa nimli nɛ ɔmɛ. Ngɛ COVID-19 be ɔ mi ɔ, Mary kɛ nihi nɛ a ngɛ e ma a mi, kɛ jehanɛ hu nihi nɛ a je ma kpahi a nɔ ɔ je Baiblo mi ní kasemi sisi. Kɛ e plɛ kɛ pee enɛ ɔ ha kɛɛ?

Be fɛɛ be ɔ, Mary biɔ nihi nɛ e kɛ mɛ kaseɔ Baiblo ɔ ke, “Anɛ o le nɔ ko nɛ lɛ hu e bua maa jɔ he kaa e maa kase Baiblo ɔ lo?” Ke ni ɔmɛ de ke ee ɔ, e deɔ mɛ kaa a ye bua lɛ konɛ e nine nɛ su a nɔ. Sane nɛ ɔ nɛ e pɔɔ bimi ɔ woɔ yiblii wawɛɛ. Mɛni he je? Ejakaa behi fuu ɔ, nihi nɛ a bua jɔ Mawu Munyu ɔ he ɔ suɔ kaa a ma ha nɛ a wekuli kɛ a huɛmɛ nɛ́ a le níhi nɛ a ngɛ kasee ɔ. Kɛ nihi nɛ Mary kɛ mɛ kaseɔ Baiblo ɔ peeɔ a ní ha kɛɛ ke e bi mɛ sane nɛ ɔ?

Mary kɛ nɔ ko nɛ a tsɛɛ lɛ ke Jasmin ɔ kaseɔ ní. Jasmin tu nihi eywiɛ nɛ a suɔ kaa a maa kase Baiblo ɔ a he munyu kɛ tsɔɔ Mary. Nimli nɛ ɔmɛ a kpɛti nɔ kake ji Kristine. Benɛ Mary kɛ Kristine ngɛ Baiblo ɔ kasee ɔ, Kristine bua jɔ nɔ́ nɛ e ngɛ kasee ɔ he, enɛ ɔ he ɔ, e de Mary kaa e maa suɔ nɛ a kase ní ɔ si enyɔ ngɛ otsi ɔ mi. Benɛ Mary bi Kristine kaa e le nɔ kpa ko nɛ lɛ hu e bua maa jɔ he kaa e maa kase Baiblo ɔ lo ɔ, Kristine de lɛ ke, “Ee, i ngɛ huɛmɛ kaa jã.” Otsi bɔɔ komɛ a se ɔ, Kristine to blɔ nya nɛ e kɛ Mary kɛ e huɛmɛ eywiɛ ɔmɛ nɛ a suɔ kaa a maa kase Baiblo ɔ sɛɛ ní. Pee se ɔ, Kristine kpale tu e huɛ kpa komɛ hu a he munyu kɛ tsɔɔ Mary, nɛ e huɛ nɛ ɔmɛ a ti ni komɛ hu tu a huɛmɛ kpahi nɛ a suɔ nɛ a kase Baiblo ɔ a he munyu kɛ tsɔɔ Mary.

Jehanɛ hu ɔ, Kristine suɔ nɛ e wekuli nɛ a ngɛ Philippines ɔ nɛ a kase Baiblo ɔ. Enɛ ɔ he ɔ, e kɛ e biyo ko nɛ a tsɛɛ lɛ ke Andrea a susu he. Sisije ɔ, Andrea susu kaa, ‘Odasefo ɔmɛ a jami ɔ ji jami kuu ko nɛ a he ngɛ gbeye, a he we Yesu yi, nɛ a kɛ Somi Momo ɔ nɛ ngɛ Baiblo ɔ mi ɔ pɛ lɛ tsuɔ ní.’ Benɛ a kɛ Andrea kase ní si kake pɛ ɔ, e tsake susumihi nɛ dɛ nɛ e hɛɛ ngɛ Yehowa Odasefo ɔmɛ a he ɔ. Ke Andrea kase nɔ́ ehe ko ngɛ Baiblo ɔ mi ɔ, e deɔ ke, “Akɛnɛ Baiblo ɔ lɛ de he je ɔ, e ji anɔkuale.”

Pee se ɔ, Andrea hu tu e huɛmɛ enyɔ kɛ nɔ ko nɛ e kɛ lɛ tsuɔ ní ɔ a he munyu kɛ tsɔɔ Mary, nɛ mɛ hu a bɔni Baiblo ɔ kasemi. Jehanɛ hu ɔ, ke Mary kɛ Andrea ngɛ ní kasee ɔ, Andrea wekuno ko nɛ e hɛngmɛ yu nɛ a tsɛɛ lɛ ke Angela a buɔ tue zaa be mi nɛ Mary li. Se ligbi ko ɔ, Angela bi Andrea ke ji e ma nyɛ ma de Mary kaa e kɛ lɛ nɛ ba kase Baiblo ɔ lo. Benɛ Angela je Baiblo ɔ kasemi sisi ɔ, e bua jɔ nɔ́ nɛ e ngɛ kasee ɔ he wawɛɛ. Ngɛ nyɔhiɔ kake pɛ mi ɔ, e kase ngmamihi fuu kɛ wo e yi mi, nɛ e suɔ nɛ e kase Baiblo ɔ si eywiɛ daa otsi. Andrea ye bua lɛ nɛ e bɔni asafo mi kpehi yami kɛ gu videoconference nɔ, nɛ e pui mi.

Mary yɔse kaa ke e kɛ Kristine ngɛ ní kasee ɔ, Kristine huno nɛ a tsɛɛ lɛ ke Joshua a hii tue bue zaa. Enɛ ɔ he ɔ, Mary bi lɛ ke ji e maa suɔ kaa e piɛɛ a he kɛ kase Baiblo ɔ. Joshua de ke, “Ma bu tue kɛkɛ, se ko bi mi sane ko, ke pi jã a, ma te si.” Benɛ a kase ní ɔ hɛngmɛfia enuɔ pɛ ɔ, Joshua bi sanehi fuu pe Kristine po, nɛ jehanɛ hu ɔ, e suɔ nɛ a kɛ lɛ hu nɛ e kase Baiblo ɔ.

Sane kpiti nɛ Mary pɔɔ bimi ɔ, ha nɛ e ná he blɔ nɛ e kɛ nihi fuu kase Baiblo ɔ. Akɛnɛ nihi nɛ Mary kɛ mɛ kaseɔ Baiblo ɔ a he ba hiɛ he je ɔ, e ngɔ a kpɛti ni komɛ kɛ ha nyɛmimɛ kpahi. Mary kɛ nihi 28 nɛ a ngɛ ma slɔɔtohi eywiɛ a nɔ ɔ je Baiblo mi ní kasemi sisi.

Jasmin, nɛ ji kekleekle Baiblo kaselɔ nɛ wa tu e he munyu ɔ ha nɛ a baptisi lɛ ngɛ April 2021. Kristine hu ha nɛ a baptisi lɛ ngɛ May 2022, nɛ e kpale kɛ ya piɛɛ e weku ɔ he ngɛ Philippines. Jehanɛ hu ɔ, a baptisi ni enyɔ komɛ nɛ Kristine tu a he munyu kɛ tsɔɔ Mary ɔ. Nyɔhiɔ bɔɔ komɛ a se ɔ, Angela hu ha nɛ a baptisi lɛ, nɛ amlɔ nɛ ɔ, e ji daa blɔ gbalɔ. Kristine huno Joshua kɛ a biyo Andrea kɛ ni kpahi fuu hu ngɛ a hɛ mi yae wawɛɛ.

Ngɛ kaseli ɔmɛ a be ɔ mi ɔ, nihi fuu ya nɔ nɛ a de a wekuli kɛ a huɛmɛ nɔ́ nɛ Yesu ngɛ mɛ tsɔɔe ɔ. (Níts. 10:​24, 27, 48; 16:​25-33) Enɛ ɔ he ɔ, mo hu mo bi nihi nɛ o kɛ mɛ ngɛ Baiblo ɔ kasee ɔ kɛ ni kpahi ke, “Anɛ o le nɔ ko nɛ lɛ hu e bua maa jɔ he kaa e maa kase Baiblo ɔ lo?” Ke o pee jã a, e maa pee mo nyakpɛ kaa o ma ná nihi fuu nɛ o kɛ mɛ maa kase Baiblo ɔ.