Ngɔɔ Baiblo ɔ Kɛ Tsu Ní Kaa Ahuhuɛ

Kaselɔ Yakobo ngɔ Baiblo ɔ kɛ to ahuhuɛ nɛ haa nɛ wa naa bɔ nɛ wa ngɛ ha nitsɛnitsɛ ɔ he. (Yak. 1:​22-25) Mɛni blɔ nɔ nɛ wa ma nyɛ maa ngɔ Baiblo ɔ kɛ tsu ní saminya kaa ahuhuɛ?

Moo kane Baiblo ɔ saminya. Ke wa ye oya kɛ hyɛ ahuhuɛ mi ɔ, eko ɔ, lɔ ɔ be hae nɛ waa na nyagba nɛ ngɛ wa he dlami he. Jã nɔuu kɛ̃ nɛ ke wa ye oya kɛ kane Baiblo ɔ, wa be nyɛe maa na hehi nɛ e sa nɛ waa pee tsakemihi ngɛ ngɛ wa si himi mi.

Ngɔɔ o juɛmi kɛ ma tsakemihi nɛ e he hia kaa o pee ɔ nɔ, se pi ni kpahi a nɔ. Behi fuu ɔ, wa hyɛɛ ahuhuɛ mi konɛ waa na bɔ nɛ wa ngɛ ha, se pi bɔ nɛ ni kpahi ngɛ ha. Jã nɔuu kɛ̃ nɛ wa kaneɔ Baiblo ɔ konɛ waa na tsakemihi nɛ e sa nɛ waa pee, se pi ni kpahi a gbɔjɔmihi.

Koo pee kpɛii. Ke wa hyɛ ahuhuɛ mi nɛ wa ngɔ wa juɛmi kɛ ma nɔ́ ko nɛ wa sume ɔ pɛ nɔ ɔ, wa kɔni mi ma nyɛ ma jɔ̃. Ke wa ngɛ Mawu Munyu ɔ kanee ɔ, e sɛ nɛ waa pee kpɛii tsɔ, nɛ wa susu kaa e sa nɛ waa pee babauu pe bɔ nɛ Yehowa ngɛ hlae ngɛ wa dɛ ɔ.—La 103:14.