Bɔ Nɛ O Ma Plɛ Kɛ Kai Ngmamihi Ha

Anɛ e he wa ha mo hyɛ kaa o ma kai Baiblo ngmami ko nɛ o bua jɔ he ɔ lo? Eko ɔ, e ji ngmami nɛ woɔ o bua, nɛ e yeɔ buaa mo nɛ o yeɔ susumi yayami nɔ. Aloo e ji ngmami ko nɛ o suɔ nɛ o kɛ nɔ ko nɛ susu he. (La 119:​11, 111) Ke jã nɛ e ji ngɛ o blɔ fa mi ɔ, lɛɛ ga womihi nɛ nyɛɛ se ɔ ma nyɛ maa ye bua mo konɛ o nyɛ nɛ o kai ngmamihi.

• Ngɔɔ tag blɔ he nɛ ngɛ JW Library^® ɔ nɔ ɔ kɛ tsu ní. Ke o kane ngmami ko ngɛ JW Library^® ɔ nɔ, nɛ o suɔ nɛ o kai pee se ɔ, o ma nyɛ maa ngɔ tag blɔ he ɔ kɛ to he so konɛ ke o ngɛ hlae ɔ, o na mla.

• Ngɔɔ ngmami ɔ kɛ fɔ he nɛ o maa na ngɛ mla. Moo ngma ngmami nɛ o suɔ kaa o ma kai ɔ kɛ fɔ womi nɔ, nɛ o kɛ fɔ he nɛ e be yee kaa o maa na. Ni komɛ kɛ fɔɔ he nɛ ahuhuɛ ngɛ, nɛ ni komɛ hu kɛ mɛtɛɔ a fridge he. Ni komɛ hu ngɔɔ a fon kɛ poɔ ngmami ɔ foto nɛ a kɛ peeɔ screen saver konɛ a kai mla.

• O ma nyɛ maa ngma ngɛ kaadi nyafii ko nɔ. O ma nyɛ maa ngma ngmami nɛ o suɔ kaa o kai ɔ ngɛ kaadi ɔ hɛ mi kɛ e mi munyu ɔmɛ hu ngɛ kaadi ɔ se. Lɔ ɔ se ɔ, moo hyɛ kaadi ɔ hɛ mi kaa o ma nyɛ ma kai ngmami ɔ mi munyu ɔmɛ lo, aloo moo hyɛ kaadi ɔ se kaa o ma nyɛ ma kai he nɛ ngmami ɔ ngɛ ngɛ Baiblo ɔ mi lo.