Anɛ O Le Lo?
Blema a, mɛni blɔ nɔ nɛ osɔfo ɔmɛ nɛ a sɔmɔɔ ngɛ sɔlemi we ɔ guɔ kɛ jeɔ lohwehi nɛ a kɛ sãa afɔlehi ɔ a muɔ kɛ jeɔ sɔlemi we ɔ?
DAA jeha ngɛ blema Israel ɔ, osɔfo ɔmɛ ngɔɔ lohwe akpehi abɔ kɛ sãa afɔle ngɛ afɔle sami latɛ ɔ nɔ ngɛ sɔlemi we ɔ. Yi nɔ sane ngmalɔ ko nɛ a tsɛɛ lɛ ke Josephus ɔ tsɔɔ kaa ke a ngɛ Hetsɔmi gbijlɔ ɔ yee ɔ, a ngɔɔ jijɔhi nɛ a hiɛ pe 250,000 kɛ sãa afɔlehi. Enɛ ɔ haa nɛ a ngɔɔ muɔ fuu kɛ pueɔ he ngɛ sɔlemi we ɔ. (3 Mose 1:10, 11; 4 Mose 28:16, 19) Jije muɔ nɛ ɔ tsuo beɔ kɛ yaa?
Nihi nɛ a tsuaa si kɛ hlaa blema níhi ɔ ya na muɔhi loo gɔta komɛ ngɛ sɔlemi we nɛ Herode ma a he, nɛ a kɛ tsu ní hluu kɛ ba si Yesu be ɔ mi. E ngɛ heii kaa lohwehi nɛ a kɛ sã afɔlehi a muɔ ɔ guɔ gɔta nɛ ɔmɛ a mi kɛ jeɔ sɔlemi we ɔ.
Mo susu ní enyɔ komɛ nɛ yeɔ buaa nɛ afɔle sami latɛ ɔ he tsɔɔ ɔ he nɛ o hyɛ:
A pee gɔtahi ngɛ afɔle sami latɛ ɔ sisi: Blema womi ko nɛ tu Yudabi a mlaahi kɛ a kusumi he munyu nɛ a ngma ngɛ jeha 200 se ɔ hu tu gɔta komɛ nɛ a pee kɛ be ngɛ zugba a sisi ɔ he munyu. Womi ɔ de ke: “A pee gɔta enyɔ komɛ ngɛ afɔle sami latɛ ɔ kɔnya. Lohwehi nɛ a kɛ sãa afɔlehi ɔ a muɔ nɛ jeɔ afɔle sami latɛ ɔ nɔ, kɛ nyu nɛ a kɛ fɔɔ afɔle sami latɛ ɔ nɔ ɔ guɔ gɔta nɛ ɔmɛ a mi, nɛ e ya beɔ ngɛ muɔ ko mi kɛ ya sɛɔ Kidron Dɔgba a mi.
Nihi nɛ a tsuaa si kɛ hlaa blema níhi ɔ kplɛɛ nɔ́ nɛ a de ngɛ blema womi nɛ ɔ mi ɔ nɔ. Womi kpa ko nɛ tu Yudabi a yi nɔ sane he munyu ɔ tsɔɔ kaa je mi si kpali ya na muɔ loo gɔta komɛ ngɛ sɔlemi we ɔ kasa nya. A tsɔɔ kaa eko ɔ, lohwehi nɛ a kɛ sãa afɔlehi ɔ a muɔ kɛ nyu nɛ a kɛ fɔɔ afɔle sami latɛ ɔ nɔ ɔ guɔ muɔ nɛ ɔmɛ a mi kɛ jeɔ sɔlemi we ɔ.
A náa nyu fuu ngɛ lejɛ ɔ: Osɔfo ɔmɛ hia nyu babauu konɛ a nyɛ nɛ a fɔ afɔle sami latɛ ɔ sisi kɛ gɔta amɛ a mi. Osɔfo ɔmɛ náa nyu fuu kɛ jeɔ ma a mi kɛ peeɔ jã, ejakaa a gba dɔ nɛ nyu guɔ mi kɛ jeɔ ma a mi kɛ baa he nɛ afɔle sami latɛ ɔ ngɛ ɔ. A yɛɔ nyu ɔ kɛ woɔ nyu tomi níhi a mi kɛ maa si. Joseph Patrich nɛ e tsuaa si kɛ hlaa blema níhi ɔ de ke: “Jamɛ a be ɔ mi ɔ, sɔlemi we kpa ko be nɛ a to blɔ nya ko kaa jã ngɛ lejɛ ɔ, nɛ nyu fuu baa sɔlemi we ɔ, nɛ a nyɛɔ nɛ a jeɔ nyu yaya kpo hulɔ.”