Ekɩsadɔsʋ

3 Mosisi ɩɣa ɩyɛlɩ mmuwuanɩzʋhilalɛvʋlɔ, na nɩ ikila yɩ asɩwʋ benyia Gyɛtulo mɔɔ ɩdɩ Midiyianɩ sɔfʋ yɩ mmuwuanɩ zʋ. Eɣile be mɔɔ ɩlɛ mmuwuanɩ nɩ ɩkɔɔ ɛsɛlɛ yɩ ngyakɛ ɔfʋã nu nɩ, ɩhɔ ivindenli nɔhʋanlɛ Nyamɩnlɩ yɩ file Hɔlɩbɩ nwʋ. 2 Akʋ̃ Gyehova yɩ bɔvʋlɔ yɩlɩ yɩ nwʋ ali hileli yi wɔ ndibe be mɔɔ nɩ sɩnɩ la numɔ nɩ nu. Mmɩlɩ mɔ ihilalɩ yɩ dinyii nɩ, ɩnwʋnlɩ kɛɛ sɩnɩ la ndibe yi nu naasʋ̃ ɩáyɩba. 3 Meti Mosisi hanlɩ kɛɛ: “Mʋkɔ mikehila nnwʋánlɩdɩyɛ eyi, na mɩanwʋ sianti mɔɔ ndibe yi ɩáyɩba nɩ.” 4 Mɔ Gyehova nwʋnlɩ kɛɛ ibikee ɛkɛnɩ na iahila nɩ, Nyamɩnlɩ ɩzʋ̃ ndibe yi nu ɩvʋlɔlɩ yɩ kɛɛ: “Mosisi! Mosisi!” na iwuwalɩ yɩ kɛɛ: “Mamɩ yɛ ɩdɩ.” 5 Yɛ ɩhanlɩ kɛɛ: “Áma ebike ɛkɩhyɩ. Yɩ́ wʋ agyia tʋ mbabʋwa yɩ, iluwakɛɛ dɩka mɔɔ egyĩ nɩ ɩdɩ azɩlɛ nwanzanwanza.” 6 Ɩdʋwalɩ zʋ ɩhanlɩ kɛɛ: “Mamɩ yɛ lɛ wʋ zɩ yɩ Nyamɩnlɩ, Abilehamɩ Nyamɩnlɩ, Ayɩzɩkɩ Nyamɩnlɩ, yɛɛ Gyekɔpʋ Nyamɩnlɩ nɩ.” Yɛ Mosisi ɩvalɩ yɩ anyunu ɩɣɩntalɩ a, iluwakɛɛ nɩ yi kunlu itu kɛɛ ikehila nɔhʋanlɛ Nyamɩnlɩ yɩ nɩ. 7 Gyehova va hɩnlanlɩ nwʋmɔ kɛɛ: “Atɩɩtɩɩ mɔɔ mɩ mmenii bɔwɔ numɔ wɔ Igyibiti munwala nɩ mɩ anyɩ iduwa yɩ, na mɩtɩ ɛyɛkɛ mɔɔ bedii iluwa nhyɛ nɩɩ egyima mɔɔ bɛyɛ nɩ ti nɩ; Mizi bɛ ɛvɛlɩyɛ munwala. 8 Mʋkɔhɔ mikele bɛ wɔ Igyibitimaa bɛ sa nu, na mɩayɩ bɛ wɔ azɩlɛ yɩ zʋ mɩahɔ azɩlɛba mɔɔ ɩtɛlɛ zʋ, azɩlɛ mɔɔ avʋnɔnzulo nɩɩ ɔwʋlɔ iwulu zʋ wɔ ɔzʋlɔ, dɩka mɔɔ Keenanɩma, Hɩtɩmaa, Amolimaa, Pɛlɩzɩmaa, nɩɩ Havayɩmaa, yɛɛ Gyebusimaa bɛda nɩ. 9 Na kila! Mɩdɩ Yizilayamaa bo ozunɛ, na kezimɔ Igyibitimaa bɛhyɛ bɔ zʋ nɩ sʋ̃ mʋnwʋ yɩ. 10 Meti bɩla ma mʋzʋma wʋ wɔ Falo yɩ pɛ, na kɛyɩ mɩ mmenii Yizilayamaa wɔ Igyibiti.”