Mɩnla Yɛɛ Ɔkɔnwʋ Yɩ Wɔ Yɛ Kilisinyianɩ Ayiyialɩyɛ Tʋ a?

Mmenii sʋ̃maa zɛ beyiaki asɔlɩ ɩhɔlɛ, sianti yɛ lɛ kɛɛ bɛányia ɛɣɛɛlɛ yɩkyɩlɛ nɩɩ ɛbɩlawɔlɛ nu ndwokɔɣizialɛ nwʋ munwalɩyɛ bela. Mɩnla ti, yɛɛ ɩsɛ kɛɛ ɔkɔ Kilisinyianɩ ayiyialɩyɛ mɔɔ Gyehova Dasɩvʋlɔmaa bɛhyɩhyɛ nɩ be a? Mɩnla yɛɛ ɔkɔnwʋ yɩ wɔ ɛkɛnɩ a?

Ekenyia anyɩnlɩlelɛ wɔ mmenii mɔɔ bɔwɔ ɔlɔlɛ na bɔdwɩnɩ mmenii nwʋ nɩ bɛ avinli. Wɔ adʋwavʋlɔ bɛ mmɩlɩ ɩzʋ nɩ, bɛhyɩhyɛlɩ Ahilisinyiamaa kɛɛ asafʋ azʋlɔtʋ, na bɛyɛlɩ ayiyialɩyɛ azʋlɔtʋ bɔzʋ̃mɩnlɩ Nyamɩnlɩ, bozumanlɩ Ɛhɛlɛlɛ Odwokɔ yɩ, na bɛhyɩhyɛlɩ bɔnwʋ bɔnwʋ ɛzɩzɩbɛ. (Hibulumaa 10:24, 25) Sɛ beyiyia numɔ wɔ ɔlɔlɛ nu zɛyɩ a, bɛtɩ nɣanlɩ kɛɛ bɔwɔ ɔhɔnwʋmmɔ baaba bɛ avinli—bɛ mmeliyema mmenyia nɩɩ mmaalɛ nu. (2 Tɛsalonikamaa 1:3; 3 Dwɔɔnʋ 14) Yedi ndianwʋ mɔɔ Kilisinyiamaa mɔɔ beli bɔmʋnlɩ nɩ bɛyɛlɩ yɩ mɛda na ɔzɔ ti yenyia anyɩnlɩlelɛ ɔkʋ̃ nɩ la.

Ɔkɔnwʋ mfasʋ mɔɔ ɩwɔ ɔzʋlɔ kɛɛ ɛkɛva Bayɩbʋlʋ nu egyinalɛzʋ-ndwokɔ ɔkɔwɔ wʋ ɛbɩla. Kɛmɔ nɩ ɩdɩ nɔhʋanlɛ wɔ mmɩlɩ mɔɔ nɩ bɛkɛlɛ Bayɩbʋlʋ yɩ nu nɩ, nnɛ sʋ̃, mmenyia, mmaalɛ, nɩɩ nnwuakula munwala yiyia numɔ. Ahilehilevʋlɔ mɔɔ bɛfata nɩ bɛfa Bayɩbʋlʋ yɩ bɔbʋwa yɛ ma yɛnwʋ kezimɔ yɛkɛva numɔ egyinalɛzʋ-ndwokɔ yɛkɔwɔ yɛ ɛbɩla eɣile bela. (Deuteronomy 31:12, NW; Nehemiah 8:8, NW) Abiyela kʋla nyia dɩyɛzumanlɛ nɩɩ ndwomidʋlɛ nu kyɛfʋã, eyi ɩma ɔhʋanɩ yɛ ma yɛda yɛ Kilisinyianɩ anyɩnlɩlazʋ nɩ ali.—Hibulumaa 10:23.

Ekenyia nyilalɛ wɔ wʋ dedi mɔɔ ɛkɛhyɛ yɩ ɛzɩzɩbɛ wɔ Nyamɩnlɩ nu nɩ. Pɔɔlʋ ɩhanlɩ ihileli asafʋ azʋlɔtʋ mɔɔ nɩ bɔwɔ yɩ mmɩlɩ zʋ nɩ bonu ɔkʋ̃ kɛɛ: “Mɩpɛ kɛɛ mɩba mikyela mʋnlʋmmɔ, . . . mʋnlʋmmɔ be dedi mɔɔ bɛlɛ yɩ nɩ, nɩɩ mi dedi dɩyɛ nɩ ɩkɛma ye munwatĩĩ yɛ ɛɣɛɛlɛ ɩkɛyɩkyɩ.” (Wulomimaa 1:11, 12) Wɔ yɛ ayiyialɩyɛ yɩ tʋ nɩ, ye mmeliyema dedimaa mɔɔ yɛnɩ bɛ bɔ nɩ ti, ɩhyɛ yɛ dedi nɩɩ yɛ kɛnɣa mɔɔ yezi kɛɛ yɛkɔwɔ yɛ ɛbɩla kɛɛ Kilisinyiamaa nɩ nu ɛzɩzɩbɛ.

Mɩnla ti mɔɔ wʋale salɛdʋlɛ eyi tiã nu a, na wʋahɔ yɛ asafʋ ayiyialɩyɛ mɔɔ ili ɛkɛnɩ na wʋanwʋ nninyeni eyi wɔ wʋzawʋ wʋanyɩ zʋ a? Sa yɛfa anyɩnlɩlelɛ yɛma wʋ akʋwaba. Yɛ ayiyialɩyɛ yɩ munwatĩĩ nɩ, bɛále hwɩ̃ɩ̃—na bɛalile kɔllɛhyɩnɩ bela sʋ̃.

• Mɩnla ndianwʋ yɛɛ yɛ asafʋ ayiyialɩyɛ azʋlɔtʋ nɩ igyĩ zʋ a?

• Kɛ ɩkɛyɛ na yɛanyia mfasʋ wɔ Kilisinyianɩ ayiyialɩyɛ azʋlɔtʋ mɔɔ yɛkɛhɔ yɩ nɩ zʋ a?