OZUMALƐDƖYƐ 22
Mɩnla Yɛɛ Bɛyɛ Yɩ Wɔ Yɛ Egyimayɛlɛ Dɩka Yɩ Nɩ a?
Solomon Islands
Canada
South Africa
Bɛtɩlɩ abusunwamaa bonu bela sʋ̃mɩ wɔ egyimalilɛ nnɩka, na bekila odwokɔhanlɛ egyima mɔɔ ɩkɔlɩ ɔzʋlɔ wɔ manlɩ ɔkʋ̃ anzɛnyɩɩ mɔɔ ɩbʋ ɔzɔ zʋ wɔ amanlɩ mvʋlɔ nu. Bonu be sʋ̃mɩ wɔ odwokɔtʋhilelɛ okuwu azʋlʋtʋ nu, dɩka mɔ betindimi magezini azʋlɔtʋ, dɩka mɔɔ bɛyɛ awuuku, dɩka mɔɔ besiye ɔnwʋma, na bɛyɛ vidiyo nɩɩ nninyeni mɔɔ bɔbɔ betiye, anzɛnyɩɩ bekila nninyeni azʋlɔtʋ zʋ bɛma nnɩka mɔɔ bedi be egyima yɩ nɩ.
Egyimayɛlɛ Dɩka Kɔmitii yɛɛ bekila egyima yɩ zʋ a. Ɔhʋanɩhilelɛ Okuwu ɩva egyimayɛlɛ dɩka bela yɩ egyimalilɛ yɩ munwatĩĩ iwula Egyimayɛlɛ Dɩka Kɔmitii mɔɔ bɛdɩ asafʋ nu mbanimbani mɔɔ bɔnwʋ ɩwʋkʋa mɔɔ bɛdɩ asã anzɛnyɩɩ mɔɔ ɩbʋ ɔzɔ nɩ bɛ sa. Kɔmitii yɩ nɩ ɩma Ɔhʋanɩhilelɛ Okuwu yɩ nɩ bɔnwʋ anyunumihɔlɛ nɩɩ ndwokɔ ɛzɩzɩbɛ bela mɔɔ ɩkɔlɩ ɔzʋlɔ wɔ manlɩ yɩ nu nɩ. Ɔzɔ amanɩyɛwɔlɛ yɩ nɩ yɛɛ ɩbʋwa Ɔhʋanɩhilelɛ Okuwu yɩ nɩ ma bɔnwʋ ndwokɔ mɔɔ ɩsɛ kɛɛ bɛfa bɛba yɛ awuuku nɩɩ nninyeni azʋlɔtʋ nu nɩɩ mɔ yekozunzu ɔnwʋmɔ wɔ yɛ asafʋ ayiyialɩyɛ nɩɩ ayiyialɩyɛ nɣezile tʋ a. Ɔhʋanɩhilelɛ Okuwu yɩ nɩ ɩtaa ɩsʋ̃ma iagyianugyinanlɛmaa ma bɔkɔ bekyela egyimayɛlɛ nnɩka yɩ nɩ, na bɛma Egyimayɛlɛ Dɩka Kɔmitiimaa yɩ nɩ ɔhʋanɩhilelɛ wɔ kezimɔ bekeli egyima mɔɔ iwula bɛ sa yɩ nɩ nwʋ egyima bʋwɔ. (Proverbs 11:14, NW) Bɛyɛ nhyɩhyɛlɩyɛ sʋnʋnkʋ̃ be bɛma egyimayɛlɛ dɩka yi ti iagyianugyinanlɛnii yɩ ma ɩma ndɛnɩ be ɩhyɛ mmeliyema mɔɔ bɔwɔ egyimayɛlɛ dɩka yɩ nɩ azɩlɛ-sini nu ɛzɩzɩbɛ.
Bɛfa mmʋwalɛ bɛma asafʋ azʋlɔtʋ yɩ nɩ. Mmeliyema mɔɔ bɔwɔ egyimayɛlɛ dɩka yɩ nɩ yɛɛ ɩdɩ bɛ asɛdɩ kɛɛ bekele asafʋ mvʋlɔ mɔɔ bɛkɛdɩ yɩ nɩ bekediã numɔ a. Mmeliyema eyi sʋ̃ yɛɛ bekila egyimalilɛ mɔɔ ɔhʋanɩbukolɛmaa, odwokɔbadɛlɛlɛmaa, nɩɩ mansini zʋ ehilalɛmaa bɛyɛ wɔ egyimayɛlɛ dɩka yɩ azɩlɛ-sini yɩ nɩ zʋ a. Bɛhyɩhyɛ ayiyialiyɛ nɣezile nɩɩ manlɩ-avinli ayiyialɩyɛ azʋlɔtʋ, bekila Bulombunli Ayiyialɩyɛ Nniyia mvʋlɔ mɔɔ bekyinangyina zʋ, na bekila kɛɛ, bɛkɛva ɔnwʋma bela bɔkɔnwʋã asafʋ azʋlɔtʋ na bɛava bɛali bɛ ahyinyiadɩ azʋlɔtʋ ɩnwʋ egyima. Egyima bela mɔɔ bɛyɛ yɩ wɔ egyimayɛlɛ dɩka yɩ nɩ ɩbʋwa ma yɛyɛ odwokɔhanlɛ egyima yɩ nɩ pɛpɛɛpɛ.—1 Kɔlɛntɩmaa 14:33, 40.
Mɩnla ɔhʋanɩ zʋ yɛɛ Egyimayɛlɛ Dɩka Kɔmitii yɩ nɩ ɩbʋwa Ɔhʋanɩhilelɛ Okuwu yɩ nɩ a?
Mɩnla egyima yɛɛ bɛyɛ yɩ wɔ egyimayɛlɛ dɩka yɩ nɩ a?