KILISINYIAMAA BƐ ƐBƖLAWƆLƐ

Fá Nninyeni Mɔɔ Ɩdɩ Baaba De Wʋ Anyɩ

Mɩnla ti mɔɔ ɩsɛ kɛɛ yɛfa nninyeni mɔɔ ɩdɩ baaba yede yɛ anyɩ a? Iluwakɛɛ sɛ yɛfa fɩlɩmɩ be kɛɛ yɛbahila, ndwomi be kɛɛ yɛbadiye, buuku be kɛɛ yɛbaɣɩnga, vidiyo geemi be kɛɛ yɛbawɔ, anzɛnyɩɩ intanɛtɩ dɩka be kɛɛ yɛbahɔ a, nɩ yesii pɔkɔ wɔ mɔɔ yɛpɛ kɛɛ yɛfa yesiye yɛ adwɩnɩ nu nɩ nwʋ. Mɔɔ yɛfa yede yɛ anyɩ nɩ ɩkã yɛ nyɛlɩyɛ. Aɣɛlɛbɔ odwokɔ yɛ lɛ kɛɛ, nninyeni mɔɔ Gyehova ikyi nɩ ɩyɛ nnɛ anyɩnlɩlelɛdɩyɛ nu manlɩ la tɔ. (Ndw 11:5; Gal 5:19-21) Iluwa eyi ti, Bayɩbʋlʋ nɩ ɩhyɛ yɛ ɛzɩzɩbɛ kɛɛ yɛhɔlɩ ɔzʋlɔ yɛdwɩnɩndwɩnɩ nninyeni mɔɔ ɩhyɛ Gyehova animinyiamɩ nɩ nwʋ.—Fɩl 4:8.

KILÁ VIDIYO MƆƆ ISE MƖNLA NNINYENI YƐ ƖSƐ KƐƐ MƖFA MIDE MƖ ANYƖ A? NA AKƲ̃ YƖ́ NDWOKƆƔIZIALƐ EYIMMƆ BO MUNWA:

Mɩnla ɔhʋanɩ zʋ yɛ ɔwɔkɩ Wulomimaa bɛ ɛɣɛlɛlilɛ mɔɔ nɩ mmenii bɔkʋ̃ botwonwɔ mmegyia bokua nɩ, ɩdɩ kɛɛ anyɩnlɩlelɛdɩyɛ azʋlɔtʋ mɔɔ ɩwɔ ɛkɛnɩ nnɛ a?
Kɛ asafʋ yi nu maa nɩ, mɩnla ɔhʋanɩ zʋ yɛ yɛkɔhʋla yɛkɔwʋwa nnwuakula ma bekezi anyɩnlɩlelɛdɩyɛ nwʋ pɔkɔba a?
Kɛ ɩsɛ kɛɛ Wulomimaa 12:9 ɩkã nninyeni mɔɔ yɛfa yede yɛ anyɩ nɩ ise a?
Nninyeni mɔɔ ɩdɩ baaba mɔɔ bɛfa bede bɛ anyɩ ɛhɩnla dɩyɛ yɛ ɩwɔ wʋ apaa yi nu a?

WƲZAWƲ EDE WƲ ANYƖ ANZƐNYƖƖ ABIYE IDE WƲ ANYƖ A?

Anyɩnlɩlelɛdɩyɛ mɔɔ iwuli zʋ wɔ nnɛ nɩ, sʋ̃maa nɩ la ɩma abiyemmɔ bede yɛ anyɩ ɩtɛla kɛɛ amɩyɛzayɛ yekele yɛ anyɩ. Fɩlɩmɩ azʋlɔtʋ, awuuku, nɩɩ TV zʋ egyimalilɛ azʋlɔtʋ nɩ ɩda abiye yɩ adwɩnɩhilelɛ ali. Ɩwɔ numɔ kɛɛ abiyemmɔ bɔkɔhʋla bekele yɛ anyɩ dɩyɛ, naasʋ̃ mmenii sʋ̃maa bɛyɛ yɩ ndwɩ kɛɛ, sɛ bɛzabɛ bɛyɛ dɩyɛ be bede bɛ anyɩ a, ɩma bɛ ahʋnlɩnɩ ɩtɔ bo kunlu baaba. Kɛ ndianwʋ nɩ, abiyemmɔ bɛ anyɩ ideli nwʋmɔ kɛɛ bɛkɛva baanʋ nɩɩ nninyeni mvʋlɔ bɔkɔwɔ ndwomi anzɛnyɩɩ bɔkɔdʋlɔ mfonyini. Mmenii mvʋlɔ sʋ̃ bɛ anyɩ ideli ɛɣɛlɛlilɛ be dɩkɛɛ bɔɔlʋwɔlɛ, ndɔlɔnwadulɛ, anzɛnyɩɩ kɛɛ bɔkɔhɔ dɩka be bɔkɔhɔ bekele bɛ anyɩ. Dɩyɛ bela mɔɔ yɛkɛva yekele yɛ anyɩ nɩ, bɛmá ‘yɛyɛ́ yɛhyɛ Nyamɩnlɩ animinyiamɩ.’—1Kɔl 10:31.