Ndwokɔɣizialɛ Mɔɔ Ɩzʋ̃ Ɛɣɩngalɛmaa Bɛ Ɛkɛnɩ
Asʋ̃ odwokɔ “Ekehila bɔ zʋ,” mɔɔ ɩwɔ Ndwomi 12:7 nɩ, ɩkãã “mmenii mɔɔ bɔ nwʋ yɛ nwɔkɛ” (nkyɩkyɛmi 5) anzɛnyɩɩ ɩkãã “Gyehova yi ndwokɔ” yɩ (nkyɩkyɛmi 6)?
Mɔɔ nkyɩkyɛmi eyi ɩkãã nwʋmɔ odwokɔ ankasa nɩ falɩ mmenii nwʋ.
Ndwomi 12:1-4 kã kɛɛ, “nɔhʋanlɛmaa bɛzã wɔ mmenii nu.” Akʋ̃ kilá mɔɔ Ndwomi 12:5-7 mɔɔ ye odwokɔɣizialɛ yɩ falɩ nwʋmɔ nɩ kã.
“‘Iluwa mmenii mɔɔ bɔ nwʋ yɛ nwɔkɛ mɔɔ bɛhyɛ bɔ zʋ ti,
Iluwa ehyinyianii mɔɔ ɩpɩnlɩɩ ti,
Mukodwodwu mɩkɛhɩhã mʋ nwʋ,’ Gyehova yɛ ise a.
‘Mikele bɛ wɔ bɛzabɛ mɔɔ bobu bɛ animitiyia nɩ bɛ sa nu.’
Gyehova yi ndwokɔ nwʋ tɩ;
Ɩdɩ kɛɛ dwɛtɛ mɔɔ bɛyɩyɩ numɔ wɔ sɩnɩ fʋnlʋmɩ nu, mɔɔ bodwonwɔ zʋlɔ mbɔmɩ asunwa.
Ekehila bɔ zʋ, O Gyehova;
Ɔkɔwɔ bo nu ɔkʋ̃ bela nwʋ banɩ wɔ awʋbɔ sandɩnlɩ eyi nwʋ daabaa.”
Nkyɩkyɛmi 5 yi ma yɛnwʋ mɔɔ Nyamɩnlɩ hã valɩ mmenii mɔɔ bɔ nwʋ yɛ nwɔkɛ nɩ nwʋ. Ise, ikele bɛ.
Nkyɩkyɛmi 6 yɩ fa sɔ zʋlɔ kɛɛ “Gyehova yi ndwokɔ nwʋ tɩ,” ‘dɩkɛɛ dwɛtɛ.’ Ɔzɔ pɛpɛɛpɛ yɛ ye munwala yɛtɩ nɣanlɩ wɔ Gyehova yi odwokɔ nwʋ a.—Ndw. 18:30; 119:140.
Kakɩ yɩ, kila nkyɩkyɛmi mɔɔ ili kɛnɩ yɩ, Ndwomi 12:7: “Ekehila bɔ zʋ, O Gyehova; ɔkɔwɔ bo nu ɔkʋ̃ bela nwʋ banɩ wɔ awʋbɔ sandɩnlɩ eyi nwʋ daabaa.” Ɔzɔ “bɔ” nɩɩ “bo” nɩ, ɩfalɩ mɩnla nwʋ a?
Iluwakɛɛ nkyɩkyɛmi 7 yɩ nu ndwokɔ dʋwa odwokɔ, “Gyehova yi ndwokɔ” mɔɔ ɩwɔ nkyɩkyɛmi 6 yɩ zʋ nɩ ti, ebiye a abiyemmɔ kozunzu kɛɛ “bɔ” mɔɔ ɩwɔ kɛnɩ nɩ falɩ Nyamɩnlɩ yi ndwokɔ nwʋ. Amba, yezi kɛɛ Nyamɩnlɩ ihila Bayɩbʋlʋ yɩ zʋ ɩávalɩ nwʋmɔ kɛɛ adamvʋlɔ wɔlɩ mmɔdɩnɩ bela kɛɛ bɛkɛva salɛ bekediã zʋ na bɛazɩkɛ yɩ nɩ.—Ayɩ. 40:8; 1 Pit. 1:25.
Naasʋ̃, mɔɔ bɛhã nwʋmɔ odwokɔ wɔ nkyɩkyɛmi 5 yi sʋ̃ dɩ nɔhʋanlɛ. “Mmenii mɔɔ bɔ nwʋ yɛ nwɔkɛ” nɩɩ bɛzabɛ mɔɔ ‘bɛhyɛ bɔ zʋ’ nɩ, Gyehova bʋwa bɛ, na ɩkɔhɔ zʋ ɩkɔwʋwa bɛ na iale bɛ.—Dwb. 36:15; Ndw. 6:4; 31:1, 2; 54:7; 145:20.
Meti, “bɔ” nɩɩ “bo” mɔɔ ɩwɔ nkyɩkyɛmi 7 yɩ nu nɩ, ɩfalɩ mɩnla nwʋ a?
Sɛ yekila ndwomi eyi nu ndwokɔ yɩ munwala a, ɩma yɛnwʋ kɛɛ “bɔ” nɩɩ “bo” yi, ɩfalɩ mmenii nwʋ.
Ndwomi 12:1 yɩ tʋwɔlɛ yɩ kã “nɔhʋanlɛmaa” mɔɔ ebiye a bɛlahɩlɩlahɩlɩ bɛ nɩ nwʋ odwokɔ. Mɛyɩ mɛda nɩ, yɛnwʋ odwokɔ be mɔɔ ikile kɛɛ Gyehova kodwodwu kediyia bɛzabɛ mɔɔ bɛfa bɛ tavɩlɩma bɛkã ndwokɔ tanɩ nɩ. Ndwomi yi hyɛ yɛ ɛzɩzɩbɛ kɛɛ sa yɛkʋla yenyia Nyamɩnlɩ nu anwʋlazʋ kɛɛ ikele yi mmenii, iluwakɛɛ yi ndwokɔ nwʋ tɩ.
Meti mɔɔ nkyɩkyɛmi 7 yɩ ɩkãã yɛ lɛ kɛɛ, bɛzabɛ mɔɔ bɔ nwʋ yɛ nwɔkɛ nɩ, kile kɛɛ, mmenii mɔɔ tanɩyɛlɛmaa bɛhyɛɛ bɔ zʋ nɩ, Gyehova kehila “bɔ” zʋ na ɩawɔ “bɔ” nwʋ banɩ.
Bɛvalɩ odwokɔpɔkɔ “bɔ” belili egyima wɔ Hebrew Masoretic ɛhɛlɛlɛ mɔɔ bede bedi paa kɛɛ idi munli nɩ nu. Wɔ Greek Septuagint yi nu sʋ̃ nɩ, bɛvalɩ odwokɔpɔkɔ “yɛ” belili egyima mbɔmɩ anwɩ̃ wɔ nkyɩkyɛmi 7 yɩ nu, na ɩma yɛnwʋ kɛɛ odwokɔ yɩ falɩ nɔhʋanlɛmaa mɔɔ bɛyɛ nwɔkɛ na bɛhyɛ bɔ zʋ nɩ nwʋ. Mɔɔ itualɩ yɩ tʋ nɩ, nkyɩkyɛmi 7 yɩ kã kɛɛ nɔhʋanlɛmaa nɩ, bɔkɔwɔ “bo nu ɔkʋ̃ bela” nwʋ banɩ “wɔ awʋbɔ sandɩnlɩ eyi,” kile kɛɛ, mmenii mɔɔ bɔsʋzɔ ɛbɩla tanɩ zʋ nɩ nwʋ. (Ndw. 12:7, 8) Wɔ Hibulu Ɛhɛlɛlɛ yɩ mɔɔ behile yɩ tʋ bɔhɔ Alamɩkɩ ndɛnɩ nu nɩ, nkyɩkyɛmi 7 yɩ kɩnga kɛɛ: “Mɔwʋ, O NIIBENIYA, ɔkɔwɔ ɛdɩnɣɛlɛmaa nwʋ banɩ, ɔkɔwɔ bɔ nwʋ banɩ wɔ awʋbɔ sandɩnlɩ tanɩ eyi nwʋ daabaa.” Eyi dɩ dasɩlɛ fʋlɔ mɔɔ ikile kɛɛ, kɛ Nyamɩnlɩ yi ndwokɔ yɛ Ndwomi 12:7 yɩ ɩkãã nwʋmɔ odwokɔ a.
Iluwa sianti eyimmɔ ti, nkyɩkyɛmi eyi ma “nɔhʋanlɛmaa” nyia anyɩnlɩlazʋ kɛɛ Nyamɩnlɩ keli bo ndwokɔ kɛma bɛ.