Asʋ̃ Gyehova Dasɩvʋlɔmaa De Di Kɛɛ Aɣile Ahyiã Ankasa Yɛ Nyamɩnlɩ Va Wɔlɩ Nninyeni a?

Anhã. Gyehova Dasɩvʋlɔmaa de di kɛɛ Nyamɩnlɩ yɛ ɩwɔlɩ nninyeni munwala a. Naasʋ̃ yɛále yetiã numɔ kɛɛ aɣile ahyiã ankasa mɔɔ numɔ ɔkʋ̃ bela dɩ dɔnɩhwɩlɩ 24 yɛ Nyamɩnlɩ va wɔlɩ nninyeni a, kɛmɔ mmenii mɔɔ bede dɩyɛwɔlɛ bedi nɩ be kile nɩ. Mɩnla ti a? Iluwakɛɛ ɔzɔ mmenii nɩ, bɛ adwɩnɩhilelɛ be wɔ kɛnɩ a, ɩ nɩɩ Bayɩbʋlʋ yɩ iáyiyia. Kila ndianwʋ anwɩ̃ eyimmɔ:

1. Aɣile ahyiã mɔɔ Nyamɩnlɩ va wɔlɩ dɩyɛ nɩ yɩ tɩndɩnlɩ. Mbiyemmɔ de di kɛɛ, aɣile ahyiã mɔɔ Nyamɩnlɩ va wɔlɩ dɩyɛ nɩ, eɣile ɔkʋ̃ bela yɩ tɩndɩnlɩ dɩ dɔnɩhwɩlɩ 24. Naasʋ̃ odwokɔpɔkɔ “eɣile” mɔɔ ɩwɔ Bayɩbʋlʋ nu nɩ kɔhʋla kehile mmɩlɩ tɩndɩnlɩ be.​—Gyɛnɛsɩsɩ 2:4; Ndwomi 90:4.

2. Ɔlʋbɔ mɔɔ azɩlɛ yɩ li. Mbiyemmɔ kilehile kɛɛ azɩlɛ nɩ ɩlɛ́hyɛlɩda ɩlɛ́kyɛlɩ bela. Naasʋ̃ Bayɩbʋlʋ yɩ kilehile kɛɛ nɩ azɩlɛ yɩ nɩɩ amansɔnɩ yɩ wɔ kɛnɩ dada ansaana bɛlɛ aɣile ahyiã bɛbawɔ nninyeni. (Gyɛnɛsɩsɩ 1:1) Eyi ti, sayɩnsɩmaa bɛ ɛbɩbɛlɛnu mɔɔ ikile kɛɛ ebiye a, azɩlɛ yɩ nyia alʋbɔ biliyɔnʋ sʋ̃maa nɩ, Gyehova Dasɩvʋlɔmaa de tiã numɔ.

Ɩwɔ numɔ kɛɛ Gyehova Dasɩvʋlɔmaa de di kɛɛ Nyamɩnlɩ yɛ ɩwɔlɩ debela dɩyɛ, naasʋ̃ yɛádɩndɛ yetiyia sayɩnsɩmaa. Yede yedi kɛɛ sayɩnsɩmaa bo ndwokɔ be nɩɩ Bayɩbʋlʋ yɩ yiyia.