Mɩnla Ti Mɔɔ Yesiyeziye Yɛnwʋ Bʋwɔ Yɛkɔ Yɛ Ayiyialɩyɛ a?

Asʋ̃ ɛyɛ yɩ ndwɩ wɔ mfonyini azʋlɔtʋ mɔɔ ɩwɔ blohyʋɔ eyi nu wɔ kezimɔ Gyehova Dasɩvʋlɔmaa besiyeziye bɔnwʋ bʋwɔ ansaana bɛahɔ bɛ ayiyialɩyɛ azʋlɔtʋ yɩ a? Mɩnla ti mɔ yɛma yɛanyɩ ɩkɔlɩ yɛ ntalɩwulalɛ nɩɩ yɛnwʋ eziyeziyelɛ zʋ zɛyɩ a?

Yɛfa yekile annidi yɛma yɛ Nyamɩnlɩ. Ɩdɩ nɔhʋanlɛ kɛɛ, Nyamɩnlɩ ɩáva ɩadwɩnɩ isiye mɔɔ ɩanyɩ ɩnwʋ yɩ zʋ dɩyɛ. (1 Samuel 16:7, NW) Naasʋ̃, sɛ yeyiyia numɔ kɛɛ yɛbɛazʋ̃mɩ yɩ a, yɛzʋ̃ yɛ ahʋnlɩnɩ nu yɛpɛyɩ kɛɛ yekile annidi yɛma yɩ nɩɩ yɛ ɔhɔnwʋmmɔ mɔɔ yɛ nɩɩ bɛ sʋ̃mɩ yɩ nɩ. Sɛ ɩsɛ kɛɛ yɛkɔ yekyina bulombunli anzɛnyɩɩ manlɩ-ebani be anyunu a, pɩlazunlɛ bela íni ɔnwʋmɔ kɛɛ yɛkɔwɔ mmɔdɩnɩ yɛkeziyeziye yɛ nwʋ bʋwɔ iluwa yi gyinabʋ ti. Ɔzɔ la sʋ̃ yɛɛ kezimɔ yesiyeziye yɛ nwʋ yɛkɔ yɛ ayiyialɩyɛ nɩ ikile annidi mɔɔ yɛwɔ yɛma yɛ “Bulombunli nɩ mɔɔ yi bulombunlililɛ ɩázã” nɩ, Gyehova Nyamɩnlɩ, nɩɩ dɩka mɔɔ yeyiyia numɔ yɛsʋ̃mɩ nɩ. —1 Timoti 1:17.

Ikile egyinalɛzʋ-ndwokɔ mɔɔ yɛfa yɛbɔ yɛ ɛbɩla. Bayɩbʋlʋ itu Ahilisinyiamaa fʋlɔ kɛɛ, “bɔnwʋ nɣɛlɛbɛ wɔ bɛ ndamɛviyialɛ nu.” (1 Timoti 2:9, 10) “Nɣɛlɛbɛ” mɔɔ yɛkɛva yekeziyeziye yɛnwʋ nɩ ikile kɛɛ, yelówula ntalɩ mɔɔ ɩkɛma mmenii bɛanyɩ ɩkɛɣa yɛ zʋ, mɔɔ ɩtwɩnhwɩ̃ nna nwʋ akɔnnɔ, anzɛnyɩɩ mɔɔ ɩma yɛnwʋ ikua ɛkɛnɩ. Akʋ̃ sʋ̃, sɛ yɛnwʋ ‘nɣɛlɛbɛ wɔ yɛ ndamɛviyialɛ’ nu a, ɩkɔwʋwa yɛ ma yekowula ntalɩ mɔɔ ɩyɛ ngɩnlɩma mɔ ɩanyɩ ɩtɩ na ɩáyɛ kukuntanyɩɩ. Ɔzɔ egyinalɛzʋ-ndwokɔ eyi ɩma yɛzayɛ ɔnwʋmɔ ɔhʋanɩ ma yesi pɔkɔ baaba wɔ mɔɔ yekowula nwʋ. Mɔ iléhyinyianlɩ kɛɛ yɛkã odwokɔ pɔkɔ bela nɩ, yɛnwʋ ziyeziyelɛ mɔɔ ɩyɛ pɩkɛ na ɩyɛ ngɩnlɩma sʋ̃ nɩ ɩkɔhʋla ɩkɛma mmenii kɔnwʋ “ehilehilelɛ nɩ mɔɔ ɩfalɩ Nyamɩnlɩ yɛ Nnwʋanlɩlelɛvʋlɔ nɩ nwʋ” na ɩyɩ “Nyamɩnlɩ ayɛlɛ.” (Tayɩtɔsɩ 2:10; 1 Pita 2:12) Yɛnwʋ mɔɔ yesiyeziye yɩ bʋwɔ yɛkɔ yɛ ayiyialɩyɛ azʋlɔtʋ nɩ ɩkã kezimɔ mvʋlɔ nwʋ Gyehova yɩ ɔzʋ̃mɩnlɛ.

Mákã kɛɛ éni ntalɩ anzɛnyɩɩ ndamɛ ba nɩ ti, ɔlɔ́kʋla ɛkɛɣa yɛ ayiyialɩyɛ nɩ yɩ be. Ɩáhyinyia kɛɛ yɛ ntalɩ ɩbʋlɔ yɛɛ ɛzɩzɩbɛ anzɛnyɩɩ ɩyɛ mɔɔ idwu ɔzʋlɔ nɩ be ansaana na ɩayɛ mɔɔ ɩfata, mɔɔ ɩanyɩ ɩtɩ, na ɩayɛ mɔɔ ɔkʋla ɛfa ɔkɔ mmenii nu.

• Mɩnla ti mɔɔ kezimɔ yesiyeziye yɛnwʋ wɔ Nyamɩnlɩ ɔzʋ̃mɩnlɛ ɩnwʋ nɩ ihyinyia a?

• Mɩnla egyinalɛzʋ-ndwokɔ yɛɛ ɩbʋwa yɛ wɔ yɛ ntalɩwulalɛ nɩɩ yɛnwʋ ziyeziyelɛ nu a?