OZUMALƐDƖYƐ 9
Kɛ Ɩkɛyɛ na Yɛaziyeziye Yɛnwʋ Bʋwɔ Yɛama Ayiyialɩyɛ Azʋlɔtʋ a?
Cambodia
Ukraine
Sɛ ɛ nɩɩ Gyehova Dasɩvʋlɔmaa bosuma Bayɩbʋlʋ yɩ nɩ a, ebiye a ɔbɔ mmɔdɩnɩ edi bɔmʋnlɩ esiyeziye wʋ nwʋ ma dɩyɛzumanlɛ bela. Ɔzɔ la sʋ̃ yɛ sɛ ɛpɛyɩ kɛɛ enyia mfasʋ kezile a, ɩdɩ baaba kɛɛ ɛkɛyɛ ɔzɔ la ansaana wʋahɔ asafʋ ayiyialɩyɛ. Sɛ ɛyɛ nhyɩhyɛlɩyɛ ba osuma dɩyɛ a, ekenyia ɔzʋlɔ mfasʋ sʋ̃maa.
Pɩbɛ mmɩlɩ nɩɩ dɩka mɔɔ okozuma dɩyɛ. Mɩnla mmɩlɩ yɛɛ ɔkɔhʋla ɛkɛva wʋadwɩnɩ ekeziye mɔɔ osuma yɩ zʋ bʋwɔ a? Asʋ̃ ɩdɩ nwɔnɩ dɛkɛdɛkɛ ansaana wʋawɔ eɣile yɩ egyimalilɛ yɩ tʋ anzɛnyɩɩ ohunluma mmɩlɩ mɔɔ nnwuakula bɛlɩla yɩ nɩ a? Sɛ kʋlaa po wʋáhʋla suma dɩyɛ kyɛ a, sunzu mmɩlɩ dʋdʋ mɔɔ ɔkɔhʋla ɛkɛva ekeziye ahanlɩ na wʋava wʋazuma dɩyɛ, na bɔ mmɔdɩnɩ kɛɛ ɛlɛ́ma dɩyɛ bela ikezi wʋ ɔhʋanɩ. Pɩbɛ dɩka mɔɔ ɩyɛ dinyii, na yɩ dɩyɛ bela mɔɔ ɩkɔhwɩnhwɩ̃ wʋadwɩnɩ dɩkɛ ɣilediyo, tɛlivihyɩnɩ, nɩɩ wʋ foonu mɔɔ okonluma yɩ nɩ. Mpayɩ mɔɔ ɔkɔwɔ ansaana wʋazuma dɩyɛ nɩ ɩkɔwʋwa wʋ ma ɛkɛyɩ eɣile yɩ nu adwɩnɩndwɩnɩ bela wɔ ɛkɛnɩ na ama wʋahʋla wʋava wʋ adwɩnɩ wʋaziye Nyamɩnlɩ yɩ Odwokɔ nɩ zʋ.—Fɩlɩpɩmaa 4:6, 7.
Sunzuã mɔɔ osuma yɩ tʋ, na siyeziye wʋ nwʋ kɛɛ ɛkɛma munwalɩyɛ. Di bɔmʋnlɩ tɩ dɩyɛzumanlɛ yɩ nɩ tʋ bʋwɔ. Dwɩnɩdwɩnɩ dɩyɛzumanlɛ yɩ odwokɔ tile nɩ nwʋ, na sunzu kezimɔ odwokɔ tile ngyɩkɩ̃ɩ̃ ngyɩkɩ̃ɩ̃ nɩ ɩfalɩ odwokɔ tile yɩzayɩ nɩ nwʋ, na pɩbɛlɩ mfonyini nɩɩ ndwokɔɣizialɛ nɩ mɔ isi ndwokɔ aditili mɔɔ ɩwɔ dɩyɛzumanlɛ yɩ nu zʋ owudo nɩ nu. Akʋ̃ kɩnga nkyɩkyɛmi bela na pɩbɛ ndwokɔɣizialɛ mɔɔ bedindimi yɩ nɩ nwʋ munwalɩyɛ. Kila na kɩnga ɛhɛlɛlɛ odwokɔ yɩ nɩ mɔɔ bɔhwɩ̃ adwɩnɩ beziye ɔzʋlɔ yɩ nɩ, na dwɩnɩ kezimɔ ɩfʋwalɩ dɩyɛzumanlɛ yɩ nɩ zʋ. (Egyima 17:11) Mmɩlɩ mɔɔ ɔnwʋ odwokɔɣizialɛ be nwʋ munwalɩyɛ nɩ, sunzuã anzɛnyɩɩ yɛ ndwokɔ abɔkɔ yɩ ndwɩ kɛmɔ ɩkɛyɛ na wʋahakɛ munwalɩyɛ yɩ mmɩlɩ mɔɔ ɔwɔ ayiyialɩyɛ yɩ tʋ nɩ. Akʋ̃, wɔ ayiyialɩyɛ yɩ tʋ nɩ, sɛ ɛpɛyɩ a, sa ɔkʋla epigya wʋ sa sʋlɔ na wʋava wʋzawʋ wʋ ndwokɔ wʋama munwalɩyɛ sikalɛ be.
Ɔhɔlɛ mɔ ɔkɔhɔlɩ ɔzʋlɔ okozuma ozumanlɛdɩyɛ azʋlɔtʋ mɔɔ yesunzu ɔnwʋmɔ wɔ dapɛnɩ bela wɔ yɛ ayiyialɩyɛ yɩ tʋ nɩ, ɩkɛma ekenyia nnimidi mvʋlɔ ɛkɛhɩnla wʋ Bayɩbʋlʋ nu nnimidi mɔɔ ɔwɔ yɩ daada wɔ wʋ “dɩyɛziyelɛdɩka” yɩ nɩ nwʋ.—Matiyu 13:51, 52, NW.
Mɩnla nhyɩhyɛlɩyɛ yɛɛ ɔkɔhʋla ɛkɛyɛ na wʋava wʋaziyeziye wʋ nwʋ wʋama ayiyialɩyɛ azʋlɔtʋ nɩ a?
Mɩnla ɔhʋanɩ zʋ yɛɛ ɔkɔhʋla ekeziyeziye wʋ nwʋ na wʋama munwalɩyɛ wɔ ayiyialɩyɛ yɩ tʋ a?