Mɩnla Ɔhʋanɩ Zʋ Yɛɛ Asafʋ Nu Mbanimbani Bɔsʋ̃mɩ Asafʋ Yɩ a?

Yéni azɔfʋ okuwu mɔɔ yetuwa kakɛ bɛ wɔ yɛ ahyɩhyɛdɩ yɩ nu. Mfomi, kɛmɔ bɛyɛlɩ wɔ mmɩlɩ mɔɔ Kilisinyianɩ asafʋ ɩwɔlɩ yɩ tʋ nɩ, bɛyɩ mmenyia mɔɔ bɛfata kɛɛ “behilá Nyamɩnlɩ yɩ asɔlɩ [“asafʋ,” NW] nɩ” ɩzʋ (Egyima 20:28) Ɔzɔ mbanimbani eyi bɛdɩ mmenyia mɔɔ bedi anyunumi wɔ asafʋ yɩ nu na bɛáhila bɔzʋ ‘kɛɛ gyama abiye ɩhyɛ bɛ kɛɛ behilá bɔ zʋ nɩ ti yɩ a, na mfomi bekilá bɛ kɛɛ bɛzabɛ munli yi bo kunlu itwo kɛmɔ Nyamɩnlɩ ɩpɛyɩ nɩ la. Bɛma bɛ anyɩ ɩbʋlʋ bekila bɔ zʋ na kɛ ebiye a nɩ bɛpɛ yɩ mɛda akatuwa nɩ ti a.’ (1 Pita 5:1-3) Mɩnla egyima yɛ bɛyɛ bɔbʋwa yɛ a?

Bɔdwɩnɩ yɛnwʋ na bɔbɔ yɛ nwʋ banɩ. Asafʋ nu mbanimbani bɔzʋ̃ Ɛhɛlɛlɛ Odwokɔ yɩ nu bekile ɔhʋanɩ yɛ na bɔbʋwa asafʋ yɩ ma ibike Gyehova. Iluwakɛɛ bezi kɛɛ ɩdɩ Nyamɩnlɩ yɛɛ ɩva ɔzɔ egyima yɩ iwula bɛ sa nɩ yɩ ti, asafʋ yɩ nu mbanimbani bɛáhyɛ Nyamɩnlɩ yɩ mmenii nɩ zʋ, mfomi, bɔbʋwa ma benyia bʋwabɩlɛ baaba nɩɩ fɛlɛkʋ̃lilɛ. (2 Kɔlɛntɩmaa 1:24) Kɛmɔ mmunwanɩzʋhilalɛvʋlɔ ɩma ɩanyɩ ɩkɔlɩ yɩ mmuwuanɩ nwʋ nkʋ̃kʋ̃ nkʋ̃kʋ̃ nɩ, asafʋ yɩ nu mbanimbani sʋ̃ bɔbɔ mmɔdɩnɩ kɛɛ bɔkɔnwʋ asafʋ yɩ nu mmeliyema munwatĩĩ nkʋ̃kʋ̃ nkʋ̃kʋ̃.—Proverbs 27:23, NW.

Bekilehile yɛ kezimɔ yɛkɛyɛ Nyamɩnlɩ yɩ apɛdɩ. Dapɛnɩ bela nɩ, asafʋ nu mbanimbani bekila asafʋ ayiyialɩyɛ nɩ ɩzʋ kɛmɔ ɩkɛyɛ na bɛahyɛ yɛ dedi ɛzɩzɩbɛ. (Egyima 15:32) Ɔzɔ mmenyia mɔɔ bodu bɔnwʋ bɛma yɩ nɩ bedi anyunumi wɔ odwokɔbahanlɛ egyima yɩ nu, bɛ nɩɩ yɛ yɛ egyima na bɛtɩdɩ yɛ wɔ ɔzʋ̃mɩnlɛ egyima yɩ ɔfʋã bela nu.

Bɛhyɛ yɛ ɛzɩzɩbɛ. Mɔɔ ɩkɛyɛ na bɛawʋwa yɛ na bɛahyɛ abusunwawɔlɛ mɔɔ yɛ nɩɩ Gyehova wɔ yɩ nu ɛzɩzɩbɛ nɩ, asafʋ nu mbanimbani bekyela yɛ wɔ yɛ awudo anzɛnyɩɩ wɔ Bulombunli Ayiyialɩyɛ Aliyia yɩ nu na bɛma yɛ mmʋwalɛ nɩɩ ɛɣɛɛlɛ ɣɩkyɩlɛ mɔɔ ɩzʋ̃ Ɛhɛlɛlɛ Odwokɔ yɩ nu.—Gyemisi 5:14, 15.

Sɛ ɛyɩ egyima mɔɔ bedi wɔ asafʋ yɩ nu esiye ahanlɩ a, mbanimbani sʋ̃maa zɛ sʋ̃ bɔwɔ bɛzabɛ bɛ nnwʋnlamɩ fʋãnu egyima azʋlɔtʋ nɩɩ bɛ abusunwa nu asɛdɩ azʋlɔtʋ mɔɔ ide mmɩlɩ na ihyinyia kɛɛ bɛma bɛ anyɩ ɩkɔ ɔnwʋmɔ. Ɔzɔ mmeliyema mmenyia mɔɔ bɛyɛ ɔzɔ egyima ɛzɩzɩbɛ nɩ, ihyinyia kɛɛ yedi bɛ nni.—1 Tɛsalonikamaa 5:12, 13.

• Mɩnla egyima yɛɛ asafʋ nu mbanimbani bɛyɛ wɔ asafʋ yɩ nu a?

• Mɩnla ɔhʋanɩ zʋ yɛɛ mbanimbani yɩ nɩ, bekile yɛnwʋ anyɩnlɩlelɛ a?