Aninyia Yɛ Ɩdɩ Sʋ̃mɩvʋlɔ Nɔhʋanlɛvʋlɔ Nɩɩ Nɣɛlɛbɛvʋlɔ Yɩ Nɩ a?

Ɩhalɩ ɛgyɩkɩ̃ɩ̃ mɔɔ Gyisɛsɩ ibawu nɩ, ɩ nɩɩ yɩ adʋwavʋlɔ numɔ anla—Pita, Gyemisi, Dwɔɔnʋ, nɩɩ Andulusu belili nkɔmɔ be wɔ ahanlɩ. Mmɩlɩ mɔɔ Gyisɛsɩ ɩkãã sɛnkyɩlɛdɩ mɔɔ ikile yɩ ɛɣalɩyɛ wɔ awielɩyɛ mmɩlɩ yɩ nu nɩ, iɣizialɩ odwokɔ be mɔɔ ihyinyia kɛɛ: “Nɩ akʋ̃ aninyia yɛ ɩdɩ sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ a? Mɛyɩ yɛ lɛ sʋ̃mɩvʋlɔ nɩ mɔɔ yi diibenyia ɩvalɩ yɩ kɛɛ ihilá azʋ̃mɩvʋlɔ mɔɔ bɛha nɩ bɔ zʋ, na ɩvá bɛ kyɛfʋã alɩyɛ ɩma bɛ wɔ mmɩlɩ mɔ ɩsɛ nu.”(Matiyu 24:3, 45; Maakɩ 13:3, 4) Kɛ bɛ “diibenyia” nɩ, nɩ Gyisɛsɩ ɩhyɛ yɩ adʋwavʋlɔ yɩ nɩ ɛzɩzɩbɛ kɛɛ, ɩkɛyɩ mmenii be mɔɔ bɔkɔhɔlɩ ɔzʋlɔ bɛkɛva sunzuma fʋãnu alɩyɛ bɛkɛma yɩ mɛdalilɛmaa yɩ nɩ wɔ awielɩyɛ mmɩlɩ nu. Aninyiammɔ yɛɛ bɔbɔ numɔ bɛyɛ ɔzɔ sʋ̃mɩvʋlɔ eyi a?

Ɩdɩ Gyisɛsɩ yɩ mɛdalilɛmaa okuwu ɛgyɩkɩ̃ɩ̃ mɔɔ bɛba ngɔlɔ bɛ. “Sʋ̃mɩvʋlɔ” yɩ nɩ yɛ lɛ Gyehova Dasɩvʋlɔmaa bɛ Ɔhʋanɩhilelɛ Okuwu yɩ nɩ. Ɩma sunzuma fʋãnu alɩyɛ wɔ bɛ ɔhɔnwʋmmɔ azʋ̃mɩvʋlɔ mɔɔ bɔsʋ̃mɩ Gyehova nɩ. Yɛfa yɛnwʋ yetiã ɔzɔ sʋ̃mɩvʋlɔ nɔhʋanlɛvʋlɔ yɩ zʋ kɛɛ ɩma yɛ “kyɛfʋã alɩyɛ . . . wɔ mmɩlɩ mɔɔ ɩsɛ nu.”—Luuku 12:42.

Ikila Nyamɩnlɩ yɩ awudo zʋ. (1 Timoti 3:15) Gyisɛsɩ ɩmanlɩ sʋ̃mɩvʋlɔ yɩ nɩ egyimalilɛ mɔɔ numɔ yɛ ɔnlʋmɔ kɛɛ ihila Gyehova yɩ ahyɩhyɛdɩ yɩ ɔfʋã mɔɔ ɩwɔ azɩlɛ yɩ zʋ nɩ ɩzʋ—ebiye yɛ lɛ kɛɛ, ikehila yɩ nninyeni mɔɔ ɩwɔ azɩlɛ yɩ zʋ, kɛɛ ɩkɛma ɔhʋanɩhilelɛ wɔ odwokɔhanlɛ egyima yɩ nɩ nwʋ, nɩɩ ehilehilelɛ mɔɔ ikoluwa asafʋ azʋlɔtʋ zʋ ikehilehile yɛ nɩ zʋ. Meti, kɛmɔ ɩkɛyɛ na ɩava mɔɔ yehyinyia ɩama yɛ wɔ mmɩlɩ mɔɔ yehyinyia yɩ nu la ti, “sʋ̃mɩvʋlɔ nɔhʋanlɛvʋlɔ nɩɩ nɣɛlɛbɛvʋlɔ” nɩ iluwa awuuku nɩɩ nninyeni mvʋlɔ mɔɔ yɛfa yedi egyima wɔ yɛ ɔzʋ̃mɩnlɛ nu, asafʋ ayiyialɩyɛ nɩɩ ayiyialɩyɛ nɣezile zʋ ɩmaa yɛ sunzuma fʋãnu alɩyɛ.

Sʋ̃mɩvʋlɔ yɩ ɩdɩ nɔhʋanlɛvʋlɔ wɔ Bayɩbʋlʋ yɩ nu nɔhʋanlɛ nɩɩ yɩ egyima mɔɔ mɛyɩ yɛ lɛ kɛɛ ɩhã odwokɔba yɩ nɩ nu, na ɩdɩ nɣɛlɛbɛvʋlɔ wɔ kezimɔ ikila Kɩlayɩsɩ yɩ nninyeni mɔɔ ɩwɔ azɩlɛ yɩ zʋ wɔ nyɛlɛbɛ nu nɩ nwʋ. (Egyima 10:42) Gyehova iyilaa bɛ egyima yɩ zʋ iluwa mmenii sʋ̃maa mɔɔ ɩtwɩ̃ɩ̃ bɛ ma bɛba bɛyɛ ɩ Dasɩvʋlɔmaa yɩ nɩ, na ɩbʋwaa sʋ̃mɩvʋlɔ nɔhʋanlɛvʋlɔ nɩɩ nɣɛlɛbɛvʋlɔ nɩ ma ɩkɛma bɛ sunzuma fʋãnu alɩyɛ sʋ̃maa.—Isaiah 60:22; 65:13, NW.

• Aninyia yɛɛ Gyisɛsɩ ɩyɩlɩ yɩ kɛɛ ɩma yɩ adʋwavʋlɔ yɩ alɩyɛ wɔ sunzuma fʋãnu a?

• Mɩnla ahʋanɩ zʋ yɛɛ sʋ̃mɩvʋlɔ yɩ ɩdɩ nɔhʋanlɛvʋlɔ nɩɩ nɣɛlɛbɛvʋlɔ a?